Nakita Ko “Ang Diutay” nga Nangin “Isa ka Mabakod nga Pungsod”

PANUGIRON NI WILLIAM DINGMAN

Tuig 1936 sadto; ang lugar, Salem, Oregon, E.⁠U.⁠A. Nagtambong ako sa isa ka miting sang mga Saksi ni Jehova. May nag-utwas nga pamangkot: “Sa diin ang daku nga kadam-an?” (Bugna 7:​9, King James Version) Ako lang ang bag-uhan, gani tanan sila nagtudlo sa akon kag nagsiling, “Yara sia!”

SANG tungatunga nga bahin sang dekada 1930, diutay lamang sa mga Saksi ni Jehova ang may paglaum sa Biblia nga magkabuhi sing dayon sa Paraiso sa duta. (Salmo 37:​29; Lucas 23:43) Nagbag-o sing daku ang mga butang kutob sadto. Apang tuguti ako sa pagsugid tuhoy sa mga hitabo nga nagdul-ong sa akon sa pagtambong sa sadtong miting sa Salem, Oregon.

Ang akon amay nagasuskribe sing The Golden Age, ang pagtawag anay sa Magmata! nga magasin. Sang tin-edyer pa ako, naluyagan ko ang pagbasa sini, kag nakumbinsi ako nga nagaunod ini sing importante nga kamatuoran sa Biblia. Gani sang isa ka adlaw ginpadala ko ang isa ka kupon nga makita sa likod nga panghapin sang Golden Age. Nagatanyag ini sa bumalasa sing 20 ka bukleta, isa ka libro, kag sing ngalan sang pinakamalapit nga kongregasyon sang mga Saksi ni Jehova. Sang mabaton ko ang mga literatura, nagpamalaybalay ako kag nagpahamtang sing tanan nga bukleta subong man sing libro.

Sadto nga tion wala sing nagtudlo sing Biblia sa akon. Sa katunayan wala gid ako makapakighambal sa isa sang mga Saksi ni Jehova. Apang karon, bangod may direksion ako sang pinakamalapit nga Kingdom Hall, nagmaneho ako sing mga 40 kilometros pakadto sa Salem, Oregon, agod magtambong sa miting. Didto, sang 18 anyos pa lamang ako, nga gintudlo ako subong isa sang “dakung kadam-an.”

Walay sapayan nga indi pa ako handa para sa ministeryo, ginsugdan ko ang pagbantala upod sa Kongregasyon sang Salem. Ginpalig-on ako nga ilakip ang tatlo ka panguna nga punto sa akon pagpanaksi. Una, nga si Jehova amo ang Dios; ikaduha, nga si Jesucristo amo ang iya gintangdo nga Hari; kag ikatlo, nga ang Ginharian amo lamang ang paglaum sang kalibutan. Gintinguhaan ko nga ipaambit ina nga mensahe sa tagsa ka ganhaan.

Sa tapos sang duha ka tuig nga pagpakig-upod sa mga Saksi ni Jehova sa Salem, ginbawtismuhan ako sang Abril 3, 1938. Nalipay ang mga Saksi sa Salem nga makita ang madamo sa amon sang “dakung kadam-an” nga ginbawtismuhan. Sang Pebrero 1939, nangin isa ako ka payunir, ukon bug-os tion nga ministro. Sang Disiembre sadto nga tuig, ginbaton ko ang pangagda nga magsaylo sa Arizona, diin mas daku ang kinahanglanon para sa mga manugbantala sang Ginharian.

Pagpayunir sa Arizona

Ang hilikuton sang mga Saksi ni Jehova bag-o sadto sa Arizona, kag madamo ang sayop nga pagkilala nahanungod sa amon, gani sang nakigbahin ang Estados Unidos sa Inaway Kalibutanon II, naeksperiensiahan namon ang daku nga paghingabot. Halimbawa, samtang nagaalagad ako sa Stafford, Arizona, sang 1942, may hinuringhuring tuhoy sa pagpanggamo batok sa amon sang isa ka grupo sang mga Mormon. Kami sang akon kaupdanan nga payunir nagapuyo malapit sa balay sang isa ka obispo sang mga Mormon nga nagatahod sa amon kag nagsiling: “Kon ang mga misyonero sang mga Mormon subong ka aktibo sang mga Saksi, nian ang Mormon nga Simbahan magauswag.” Gani naghambal sia sa simbahan kag nagsiling: “Nabatian ko nga may pagpanggamo nga himuon batok sa pamatan-on nga mga Saksi. Bueno, nagapuyo ako malapit sa sinang mga pamatan-on, kag kon may pagpanggamo, ang akon pusil magapuntariya sa pihak nga kudal. Ina nga pusil pagagamiton​—⁠apang indi batok sa mga Saksi. Gamiton ini batok sa mga nagapanggamo. Gani kon luyag ninyo manggamo, nahibaluan na ninyo kon ano ang matabo.” Wala gid matabo ang pagpanggamo.

Sa tion sang akon tatlo ka tuig sa Arizona, madamong beses nga gindakop kami kag ginbilanggo. Isa ka bes ginpriso ako sa sulod sang 30 ka adlaw. Agod malikawan ang pagpangdakop sang mga pulis sa amon ministeryo, nagporma kami sing gintawag namon nga flying squad. Ang nagadumala nga Saksi nagsiling sa amon: “Magapanghikot kita suno sa aton ngalan. Masugod kita sa alas singko ukon alas seis sang aga, mabilin sing isa ka tract ukon bukleta sa kada ganhaan, kag malakat kita gilayon.” Nakobrehan sang amon “flying squad” ang malapadlapad nga estado sang Arizona. Apang, gin-untatan yadto sang ulihi bangod indi namon mabuligan ang mga interesado sa amo nga paagi sang pagbantala.

Eskwelahan Sang Gilead kag Espesyal nga Pag-alagad

Sang Disiembre 1942, isa ako sang madamo nga payunir sa Arizona nga nakabaton sing sulat nga nagapangagda sa isa ka bag-o nga eskwelahan sa misyonero nga gintukod sang mga Saksi ni Jehova. Ang eskwelahan gintawag sang una nga Watchtower Bible College of Gilead. Sang ulihi gin-islan ang ngalan subong Watchtower Bible School of Gilead. Ang eskwelahan nahamtang sa halos 4,800 kilometros nga kalayuon malapit sa siudad sang Ithaca sa naaminhan nga estado sang New York.

Sa tapos sang malip-ot nga pagduaw sa Oregon, sang Enero 1943, madamo sa amon nga mga payunir ang nagbiya sa mainit nga Desyerto sang Arizona sakay sa Greyhound nga bus. Pila ka adlaw sang ulihi nakalab-ot kami sa amon destinasyon kag naabtan ang mga yelo sang tigtulugnaw sa naaminhan nayon sang New York. Ang eskwelahan nagbukas sang Pebrero 1, 1943, sang ang presidente sini nga si Nathan H. Knorr, nagsiling sa iya pamulongpulong sa inagurasyon sa isa ka gatos ka estudyante: “INDI tuyo sining kolehiyo nga sangkapan kamo nga mangin ordenado nga mga ministro. Mga ministro na kamo kag nangin aktibo sa ministeryo sa sulod sang mga tuig. . . . Ang kurso sa pagtuon sa kolehiyo gintuyo para sa paghanda sa inyo nga mangin mas kalipikado nga mga ministro sa mga teritoryo nga kadtuan ninyo.”

Sanglit manubo lang ang akon naeskwelahan, sang primero indi ako mapahamtang sa Gilead. Apang ang mga instruktor mahinangpanon gid, kag naluyagan ko gid ang akon pag-eskwela. Ang amon klase naggradwar pagkatapos sang lima ka bulan sang maid-id nga paghanas. Pagkatapos sadto, ginpadala ang pila sa amon sa bug-os kalibutan nga ulong talatapan sang mga Saksi ni Jehova sa Brooklyn, New York, diin ginhanas kami sing dugang agod ihanda kami sa pag-alagad sa nagalakbay nga hilikuton subong mga manugtatap sa sirkito. Ang akon una nga teritoryo amo ang Aminhan kag Bagatnan nga Carolina.

Sadtong una nga mga adlaw, ang manugtatap sa sirkito halos nagasaylo pirme. Nagatener kami sing isa ka adlaw sa magamay nga kongregasyon ukon duha ka adlaw kon daku ini. Ang kalabanan nga kongregasyon sadto magamay. Gani pagkatapos makahinguyang sing bug-os nga adlaw, kag masami tubtob sa halos tunganggab-i nga pagduaw kag pagsabat sing mga pamangkot, nagabugtaw ako sing mga alas singko pagkaaga agod magpadulong sa masunod nga kongregasyon. Nag-alagad ako sa sirkito nga hilikuton sa sulod sang mga isa ka tuig, kag pagkatapos sadto nagpayunir ako sa sulod sang pila ka tion sa Tennessee kag New York.

Sa Cuba kag Tubtob sa Puerto Rico

Sang Mayo 1945, upod sa iban pa, ginpadala ako sa akon una nga teritoryo subong misyonero sa iban nga pungsod, sa Cuba! Sang gab-i nga nag-abot kami sa Havana, kapital sang Cuba, nagguwa kami sa pagpanagtag sing magasin nga hilikuton. Nagtener kami sa Havana tubtob nga nakakita kami sing puluy-an sa Santa Clara. Ang amon bulanan nga galastuhon $25 lamang ang kada isa para sa tanan nga kinahanglanon, lakip ang pagkaon kag arkila sa balay. Naghimo kami sing mga katre kag kasangkapan gikan sa mga materyales nga matigayon kag gingamit ang mga kahon sang mansanas para sa amon mga kabinet.

Sang masunod nga tuig gintangdo ako sa sirkito nga hilikuton. Sadtong tion ang bug-os nga Cuba isa lang ka sirkito. Bangod ang manugtatap sa sirkito nga akon ginbuslan malaba sing batiis kag madasig maglakat, ang kauturan nga lalaki kag babayi literal nga nagadalagan agod makadungan sa iya. Maathag nga ginhunahuna nila nga amo man ako, gani ginplano nila ang tanan nga butang para sa akon pagduaw. Wala sila nagdulungan guwa sa ministeryo sa pareho nga adlaw kundi nagbahinbahin sa mga grupo kag nagturnoturno sa pagpanghikot upod sa akon. Sa una nga adlaw gindala ako sang isa ka grupo sa malayo nga teritoryo; sa masunod nga adlaw isa naman ka grupo ang nagdala sa akon sa amo man kalayo nga teritoryo, kag padayon. Ginkapoy gid ako pagkatapos sang pagduaw, apang nalipay ako sa sini. May matahom ako nga mga handumanan sa sadto nga kongregasyon.

Sang 1950 may yara kami kapin sa 7,000 ka manugbantala sang Ginharian sa Cuba, mga pareho kadamo sa Mexico. Sang Hulyo sadto nga tuig, nagtambong ako sa Theocracy’s Increase internasyonal nga kombension sa Yankee Stadium sa New York City. Pagkatapos sadto, nakabaton ako sing bag-o nga teritoryo sa pagmisyonero, sa Puerto Rico. Lakip sa bag-o nga mga misyonero halin sa ika-12 nga klase sang Gilead amo sanday Estelle kag Thelma Weakley, nga nag-upod sa akon sakay sa eroplano padulong sa Puerto Rico.

Walo ka tuig sang ulihi nagpakasal kami ni Estelle sa isa ka simple nga seremonya sa Bayamón, Puerto Rico, nga ginhiwat sa plataporma sa tion sang intermisyon sang amon sirkito nga asambleya. Antes kag pagkatapos sang amon kasal, nagaalagad ako sa sirkito nga hilikuton. Sa tion sang amon kapin sa napulo ka tuig sa Puerto Rico, nakita namon ni Estelle ang daku nga pag-uswag​—⁠halin sa kubos sa 500 ka manugbantala tubtob sa kapin sa 2,000. Madamo kami sing nabuligan tubtob nga nagdedikar kag nagpabawtismo, kag nakigbahin kami sa pagtukod sing bag-o nga mga kongregasyon.

Sang Disiembre 1960, ginduaw ni Milton Henschel halin sa bug-os kalibutan nga ulong talatapan sang mga Saksi ni Jehova sa Brooklyn, New York, ang Puerto Rico kag nakighambal sa mga misyonero. Namangkot sia kon ang pila sa amon mahimo makasaylo sa lain nga teritoryo. Nalakip kami ni Estelle sa mga nagboluntaryo.

Ang Amon Puluy-an sa Dominican Republic

Sa Dominican Republic ang amon bag-o nga teritoryo, kag gintalana namon ang Hunyo 1, 1961, subong ang petsa sang amon pagsaylo. Sang Mayo 30 ang Dominican nga diktador nga si Rafael Trujillo, ginpatay, kag ang mga biyahe sing eroplano padulong sa pungsod ginkanselar. Apang, wala magdugay ginbalik ang mga biyahe, kag nakabiyahe kami padulong sa Dominican Republic sang Hunyo 1 suno sa plano.

Magamo ang kahimtangan sa pungsod sang mag-abot kami, kag may mga operasyon ang militar. Ginapaabot ang isa ka rebolusyon, kag ginarekisa sang mga soldado ang tanan sa kalsada. Ginpadulog kami sa madamo nga checkpoint, kag sa tagsa sini gin-usisa ang amon mga dala. Ginpaguwa ang tanan nga unod sang amon mga maleta, bisan ang magamay kaayo nga bagay. Amo yadto ang amon una nga pag-abot sa Dominican Republic.

Nagtener kami sa kapital nga amo ang Santo Domingo, sa sulod sang pila ka semana antes magkadto sa amon una nga teritoryo sa La Romana. Sa panahon sang diktador nga si Trujillo, ginsilingan ang publiko nga ang mga Saksi ni Jehova mga Komunista kag amo ang pinakamalain nga sahi sang mga tawo. Subong resulta, ginhingabot sing daku ang mga Saksi. Apang, sing amat-amat napatahaw namon ang kaugot.

Sa tapos makapanghikot sa La Romana sa sulod sang malip-ot nga tion, nag-alagad kami liwat sa sirkito nga hilikuton. Nian, sang 1964, gintangdo kami subong mga misyonero sa siudad sang Santiago. Sang masunod nga tuig nagrebolusyon sa Dominican Republic, kag liwat nga nangin magamo ang pungsod. Sa tion sadtong pag-inaway ginsaylo kami sa San Francisco de Macorís, isa ka banwa nga kilala bangod sang aktibista nga mga politiko sini. Walay sapayan, nagbantala kami nga wala sing sablag. Walay sapayan sang kagamo sa politika, nakatukod pa gani kami sing isa ka bag-o nga kongregasyon. Sang masunod nga mga tinuig, naeksperiensiahan namon ang dugang pa nga pagsulusaylo sang teritoryo antes kami ginpadala liwat sa amon karon puluy-an sa Santiago.

Nakita gid namon ang mga pagpakamaayo ni Jehova sa hilikuton diri sa Dominican Republic. Sang mag-abot kami sang 1961, may mga 600 ka Saksi kag 20 ka kongregasyon. Karon may halos 20,000 ka manugbantala nga nagabantala sing maayong balita tuhoy sa Ginharian sang Dios sa kapin sa 300 ka kongregasyon. Daku gid ang pagpaabot sa dugang nga pag-uswag subong ginapamatud-an sang nagtambong nga 81,277 sa Memoryal sang kamatayon ni Cristo sang 1997. Mga tatlo ka pilo kag tunga yadto sa kadamuon sang mga manugbantala!

Karon Isa ka Mabakod nga Pungsod

Walay sapayan nga ang danyag sining kalibutan padayon nga nagabag-o, ang mensahe sang Biblia nga ginabantala sang mga Saksi ni Jehova wala nagabag-o. (1 Corinto 7:31) Si Jehova amo gihapon ang Dios, si Cristo Hari gihapon, kag ang Ginharian mas maathag na gid nga amo lamang ang paglaum sang kalibutan.

Sa amo man nga tion, isa ka daku nga pagbag-o ang natabo sa katawhan ni Jehova kutob sang nagtambong ako sadto nga miting sa Salem, Oregon, sang nagligad nga mga 60 ka tuig. Ang daku nga panong, ukon dakung kadam-an, matuod gid nga nangin daku, nagadamo sing kapin sa lima ka milyon. Subong gid sini ang gintagna ni Jehova tuhoy sa iya katawhan: “Ang diutay mismo mangin isa ka libo, kag ang diutay mangin isa ka mabakod nga pungsod. Ako mismo, si Jehova, magapadali sini sa iya tion.”​—⁠Isaias 60:⁠22.

Pagkatapos sing halos 60 ka tuig sa bug-os tion nga ministeryo, malipayon ako nga nagapadayon sa pagbantala kag pagtudlo sa akon misyonero nga hilikuton. Isa gid ka daku nga pribilehiyo nga makapakigbahin sa sinang hilikuton kag makita ang “diutay” nga nangin “isa ka mabakod nga pungsod”!

[Kapsion sa pahina 21]

Upod sa akon asawa, sa Dominican Republic