Pagpamulong Paagi sa Pagtuo—Gikan Bala Ini sa Dios?

ANG tawo nagamasakit sa 38 ka tuig. “Luyag mo bala mag-ayo?” pamangkot ni Jesus. Kon ikaw ining tawo, malangkagon ka ayhan nga nagsabat sing huo? Si Jesus nagsiling sa iya: “Tindog ka, dalha ang imo higdaan kag maglakat.” Ang epekto sadtong mga pulong? “Sa gilayon nag-ayo ang tawo, kag gindala niya ang higdaan kag naglakat.”—Juan 5:5-9.

Ining buhat sang balaan nga pagpang-ayo isa lamang sa madamo nga ginhimo ni Jesus sa tion sang iya dutan-on nga ministeryo. (Mateo 11:4, 5) Ang mga ­faith heal­er karon nagapangangkon nga Dios gihapon ang nagahimo sina nga mga pagpang-ayo, kag ginasakdag sila sang mga pamatuod sang linibolibo nga nagapangangkon gin-ayo nila sila.

Importante nga mga Kinatuhayan

Ang pagtuon sa Biblia nagapahayag sing pila ka importante nga mga kinatuhayan sa ulot sang mga pagpang-ayo nga ginreport sa Biblia kag ang ginreport sang mga ­faith heal­er karon. Si Jesus kag ang iya mga disipulo, halimbawa, wala magpabayad sa ila pagpang-ayo. “Nabaton ninyo nga wala sing bayad, ihatag nga wala sing bayad,” tudlo ni Jesus. (Mateo 10:8) Sa amo ginsunod nila ang halimbawa nga ginpahamtang ni Eliseo, nga wala magbaton sing regalo gikan sa isa nga nagahingalan kay Naaman nga ginpaayo ni Eliseo sa iya aro. (2 Hari 5:1, 14-16) Busa, kon nagapabayad ang mga ­faith heal­er sa ila mga serbisyo, ginalapas nila ining Makasulatanhon nga halimbawa.

Talalupangdon man nga ang mga pagpamulong nga ginhimo sa panahon sang Biblia hinali ukon ginhimo sa sulod sang malip-ot nga tion. Sang makita ni apostol Pedro ang isa ka lalaki “nga piang kutob sa tiyan sang iya iloy,” ginsilingan niya ang tawo: “Sa ngalan ni Jesucristo nga Nazareno, lakat ka!” Ang rekord nagapahayag: “Sa gilayon nagbaskog ang iya [piang nga tawo] mga tiil kag mga bukobuko; kag, sa nagatumbo nagtindog sia kag naglakat.” (Binuhatan 3:1-8) Basaha para sa imo kaugalingon ang iban pa nga halimbawa sa Binuhatan 5:15, 16 kag 14:8-10.

Apang, ang mga pagpamulong karon paagi sa pagtuo masami nga nagakinahanglan sing mga inadlaw, mga semana, ukon binulan pa gani antes mag-ayo! Talalupangdon, man, ang kamatuoran nga ang mga ­faith heal­er may huyog sa pagbulong sang mga balatian, subong sang bulag, paralitiko, ukon bungol—mga balatian nga kon kaisa may sikolohiko nga mga kabangdanan. Ang manugbusbos nga si Paul ­Brand nagsiling: “Sa tion nga ang isa ka organiko nga kamatuoran indi na mapanghiwala—wala sing tiil, wala sing mata, ukon wala sing buhok—talagsa lang nagakatabo ang milagro.” Apang, gin-ayo ni Jesus “ang tanan nga sahi sang balatian kag ang tanan nga sahi sang masakit,” lakip ang mga depekto nga organiko, subong sang itos nga kamot.—Mateo 9:35; Marcos 3:3-5.

‘Kulang Ka sing Pagtuo!’

Sing makapasubo, madamo sang nagabalatian nga mga tawo ang nagatambong sa ‘mga krusada sang pagpamulong’ agod magpauli lamang nga naglala pa ang ila balatian. Ginapaathag sang mga ­faith heal­er ina nga mga kapaslawan paagi sa pagsiling, ‘Kulang sila sing pagtuo!’ Apang, isa ini ka daku nga limbong. Subong ginsiling ni Dr. Wil­liam Nolen: “Indi kaangay sang ortodokso nga manugbulong, ang sikiko nga manugbulong wala gid sing salabton kon mapaslawan ang iya pagpamulong. Ginatu-ad ko nga luyag ko gamiton ina nga balibad kon makasugata ako sing pasyente nga indi ko mabulong.”

Ang mga manalagna sang Dios, si Jesus, ukon ang mga disipulo ni Jesus wala maghatag sina nga balibad nga ang isa nga nagabalatian wala mag-ayo bangod kulang sia sing pagtuo. Matuod, bangod sang kakulang sing pagtuo mahimo nga pila lamang ang nagpalapit agod magpabulong. Apang tuhoy sa mga tawo nga nagpalapit, nag-ayo sila sing bug-os!—Marcos 6:5, 6.

Sa pagkamatuod, sa pila ka kaso ang mga tawo nga kulang sing pagtuo nag-ayo. Si Naaman, ang pangulo sang Sirianhon nga hangaway, halimbawa, wala magpati sing bug-os nga mapaayo ang iya aro suno sa paagi nga ginsugo ni manalagna Eliseo. Sa tapos lamang sia mapaayo nga sia nagbaton: “Yari, karon, nga wala sing Dios sa bug-os nga duta kundi sa Israel.” (2 Hari 5:11-13, 15) Sa amo indi makatarunganon ang maluya nga mga balibad sang mga ­faith heal­er.

Pagpamulong—Isa ka Dulot nga Nagtaliwan

Apang indi bala matuod nga ang milagruso nga mga dulot sa pagpamulong kinaandan anay sa tunga sang unang mga Cristiano? (1 Corinto 12:9) Huo, apang ang mga milagro nga natabo sadto may maayo nga rason. Sa sulod sang isa ka libo ka tuig kag tunga, ang pungsod sang undanon nga Israel amo ang pinili nga katawhan sang Dios; apang sang una nga siglo sang aton Kumon nga Dag-on, ang Israel ginsikway bangod sang kakulang sing pagtuo sini kag ginbuslan sang bag-o nga Cristianong kongregasyon. Yadtong unang mga Cristiano nagkinahanglan sing labaw sa kinaandan nga bulig sa pagpalig-on sang ila pagtuo kag sa paghatag sing pamatuod sa kalibutan nga sila ginasakdag ni Jehova nga Dios.

Sa amo, ang milagruso nga mga dulot, lakip ang pagpamulong, ginhatag sa lapsag nga Cristianong kongregasyon. Nangin “tanda” ini sa mga ditumuluo kag nangin paagi sa pagpalig-on sa pagtuo sang mga tumuluo. (1 Corinto 14:22) Apang, halos duha ka libo ka tuig sang ulihi, ang Cristianismo indi na lapsag. (Ipaanggid ang 1 Corinto 13:9-13.) Ang Biblia madugay na nga natapos kag ginasirkular sa minilyon ka kopya. Gani mahapos na karon matuytuyan sang matuod nga mga Cristiano ang mga ditumuluo sa mga pahina sini bilang supurta sa ila ginapanudlo. Indi kinahanglan ang milagruso nga mga pagpahayag.

Dugang pa nga ginpakita ni Pablo nga ang labaw sa kinaugali nga mga dulot “magataliwan.” (1 Corinto 13:8) Yadtong mga dulot ginpasa lamang sing direkta ukon sa presensia sang mga apostoles ni Cristo Jesus. (Binuhatan 8:18-20; 10:44-46; 19:6) Sa tapos mapatay ang mga apostoles, ang milagruso nga mga pagpahayag nag-untat.

Ang Cyclopedia of Biblical, Theological, and Ecclesiastical Literature nanday Mc­Clintock kag ­Strong (Tomo VI, pahina 320) nagsiling nga “isa ka indi masuay nga pinamulong nga sa tion sang una nga isa ka gatos ka tuig sa tapos mapatay ang mga apostoles diutay lamang ukon wala gid kita sing nabatian tuhoy sa paghimo sing mga milagro sang unang mga Cristiano.”

Rason sa Pag-andam

Si Jesucristo nagpaandam nga magaabot ang tion nga madamo ang magasiling sa iya: “Ginuo, Ginuo, wala bala kami magpanagna sa imo ngalan, kag sa imo ngalan magsubol sa mga demonyo, kag sa imo ngalan maghimo sing madamo nga buhat nga gamhanan?” Apang si Jesus magasiling sa ila: “Wala gid ako makakilala sa inyo! Palayo sa akon, kamo nga mga manugbuhat sing kalautan.” (Mateo 7:22, 23) Ano, nian, ang kabangdanan sang daw kadalag-an sa paghimo sing ‘mga buhat nga gamhanan’ kon indi ini ang espiritu sang Dios?

Sa iban nga kaso, nadalahig ang maathag nga limbong. Halimbawa, ang The Herald, isa ka pamantalaan sa Zimbabwe, nagreport tuhoy sa tatlo ka indibiduwal nga siling sang bantog nga ­faith heal­er nag-ayo. Ginbuyagyag ini sang pamantalaan subong limbong: “Ang isa ka bata indi gihapon makabati ukon makahambal; ang isa ka bata indi gid anay bungol ukon apa; kag ang isa ka babayi, nga bungol, indi gihapon makabati.”

Kon kaisa, ang pagpamulong paagi sa pagtuo daw may placebo nga epekto sa nagabalatian. Sa iban nga mga kaso—labi na kon malawig nga tion ang nagaligad antes mag-ayo ang balatian—daw subong bala nga ang kinaugali nga mekanismo sang lawas sa pagpaayo nadalahig. Sa libro nga Science and the Paranormal, si Dr. Wil­liam Nolen nagasiling nga “mga 80 porsiento sang mga pasyente nga nagapatan-aw sa [isa ka ortodokso nga manugbulong] ang may limitado-sa-kaugalingon nga mga balatian—kon sayoron, mga balatian nga gikan sa sini magaayo sila sing kinaugali.” Busa, sa pagligad sang tion, ang ­faith heal­er mahapos nga makakuha sang kadungganan sa pag-ayo.

Bilang katapusan, ang Biblia nagapaandam nga “si Satanas nagapakaanghel sang kapawa” sa pagtinguha nga maglimbong. (2 Corinto 11:14) Sa 2 Tesalonica 2:9, 10, si Pablo nagpaathag sing dugang pa: “Ang pag-abot sang malinapason paagi sa pagpanghikot ni Satanas mangin sa tanan gamhanan nga buhat [“tanan nga sahi sang milagro,” The Jerusalem Bible] kag sa butig nga mga tanda kag mga kalatingalahan kag sa bug-os nga malauton nga daya sa mga nagakawala.” Gani mag-andam! Ang pagpamulong paagi sa pagtuo masami nga nagadalahig sing gahom sang mga demonyo! “Indi ko luyag nga mangin mga umalambit kamo sa mga demonyo,” paandam ni Pablo. “Indi kamo makainom sa tagayan ni Jehova kag sa tagayan sang mga demonyo.”—1 Corinto 10:20, 21.

Kon Nagamasakit ang Isa ka Cristiano

Matuod, kon nagamasakit ang isa, ang isa ka milagruso nga pag-ayo mahimo nga isa ka makagalanyat nga posibilidad. Apang, talupangda nga ang masigkamanugpangabudlay ni apostol Pablo nga si Epafrodito nagmasakit nga halos mapatay na. (Filipos 2:25-27) Ang suod nga kaupod ni Pablo nga si Timoteo may “masunson nga mga balatian.” (1 Timoteo 5:23) Apang, wala pag-ayuha ining duha ka tawo sing milagruso. Kag sang si Pablo mismo nagkinahanglan sing medikal nga igtalupangod, mahimo nga nagpabulong sia kay Lucas, “ang hinigugma nga manugbulong,” nga naglakbay upod sa iya.—Colosas 4:14.

Amo man sa karon, ang isa ka Cristiano nga nagamasakit mahimo makapabulong sa isa ka sangkol nga manugbulong ukon terapista, nga ginalikawan ang gin-inspirar sang demonyo nga mga pagpang-ayo ukon ang pagpamulong sang albularyo nga kinaandan gid sa madamo nga kadutaan karon. Makapangamuyo man sia, indi para sa milagruso nga pag-ayo, kundi para sa kaalam sa pag-atubang sa balatian. (Santiago 1:5) Makapangabay man sia kay Jehova nga ‘sakdagon sia sa iya higdaan sang pagbalatian.’—Salmo 41:3.

Matuod, makapaluya gid kon ang medikal nga siensya indi makabulong sang isa ka partikular nga balatian. Apang, dapat tinguhaan sang isa ka Cristiano kon nagamasakit sia nga ‘pat-uron ang kapin ka importante nga mga butang,’ nga wala ginatugutan ang kabalaka sa panglawas nga maglabaw sa espirituwal nga mga butang sing bug-os. (Filipos 1:10) Mapapagsik niya ang iya kaugalingon paagi sa paglaum nga mabuhi sa idalom sang Ginharian sang Dios kon “wala na sing pumuluyo ang magasiling: ‘Nagamasakit ako.’”—Isaias 33:24; 65:17-19.

Sa pagkamatuod, ining paglaum sa isa ka matarong nga bag-ong kalibutan may labaw nga kabilihanan sang sa wala sing unod nga mga saad sang mga ­faith heal­er. Binagbinaga si Peter, isa ka bulag nga tawo nga nagapuyo sa Akumadan, Ghana. Naghinguyang sia sing kabug-osan nga 26 ka tuig sa nanuhaytuhay nga iglesia nga nagapamulong paagi sa pagtuo sa paglaum nga makakita sia. Apang wala sing ­faith heal­er nga nakapamuklat sang iya mga mata. Nian, samtang nagatambong pa sia sa isa ka iglesia nga nagapamulong paagi sa pagtuo, nakilala sia sang mga Saksi ni Jehova.

Ginpaathag sang mga Saksi gikan sa Biblia nga sa idalom sang Ginharian sang Dios mahanabo ang bug-os nga pag-ayo sang tanan nga balatian. Nabuksan sini ang mga mata sang paghangop ni Peter. Puno sing apresasyon sa dalayawon nga mga kamatuoran sang Biblia, sia nangin bug-os tion nga manugbantala sang Ginharian sang Dios kag nagaalagad sing subong sa tatlo ka tuig na! Ginapaabot niya ang tion nga, sa literal nga paagi, “ang mga mata sang mga bulag pamuklaton, kag ang mga igdulungog sang mga bungol mabuksan.”—Isaias 35:5, 6.

Paagi sa bulig sang Pulong sang Dios, linibolibo pa ang naghilway man sang ila kaugalingon gikan sa sayop nga pagsalig sa mga ­faith heal­er.

[Laragway sa pahina 5]

Talagsa lang mapaayo sang mga faith healer ang mga tawo nga may organiko nga mga balatian

[Mga Laragway sa pahina 7]

Ang isa ka Cristiano nga nagamasakit nagapangamuyo agod hatagan sing kusog sa pagbatas. Ginapaabot man niya ang bag-ong kalibutan, nga sa diin “wala sing pumuluyo ang magasiling: ‘Nagamasakit ako’”