Report sang mga Manugbantala sang Ginharian
Padayon nga Pagtuman sa Sugo sang Dios sa Ila
SERIOSO nga ginatamod sang mga Saksi ni Jehova ang sugo sang Dios sa ila nga ibantala ang maayong balita sang Ginharian sang Dios. (1 Corinto 9:16; Binuhatan 20:26, 27) Nabatyagan sang isa ka mag-asawa sa Pransya ang puersa sining sugo nga dalhan sing maayong balita ang tanan. Sa ila teritoryo may isa ka hostel nga ginapuy-an sang politikal nga mga refugees kag pamatan-on nga dumuluong nga mga mamumugon. Ining mag-asawa nagpaathag: “Nagpalibog kami kon paano makasulod luwas kon imbitahon kami sang isa nga nagapuyo sa sulod. Gani namat-od kami nga kontakon ang mga tawo sa guwa lamang kag mahimo nga makatigayon kami sing imbitasyon sa pagduaw sa ila sa sulod. Malangkagon nga ginbaton sang isa ka pamatan-on nga lalaki ang mga magasin kag nangabay ng duawon.
“Ginduaw namon ining pamatan-on nga lalaki, kag nasugdan sa gilayon ang pagtuon. Sa kada pagtuon namon yara ang iya abyan, apang wala gid sia nagatingog. Sang, sa tapos sang ikaduha nga pagtuon, ginpamangkot namon sia kon luyag man niya makatuon sing dugang pa nahanungod sa Pulong sang Dios, sia nagsabat: ‘Ngaa indi?’ Sa amo nasugdan ang ikaduha nga pagtuon. Gin-agda namon sila sa mga miting sa umpisa gid, kag wala sila sing napalyahan nga miting sugod sadto. Kitaon gid ang ila pag-uswag, labi na sa otel, nga sa diin nagsugod sila sa gilayon sa paghambal nahanungod sa mga butang nga ila ginaton-an, nga nagresulta sa ikatlo nga pagtuon sa isa ka mag-asawa. Sang isa ka adlaw ang bug-os nga grupo yara sa guluwaan, nga handa sa paglakat para sa miting, isa pa ka abyan ang namat-od nga mag-upod man. Nakunyag gid sia kag luyag niya nga pati ang iya nobyo makatuon man nahanungod sini. Sila nga duha nagsugod sa pagtuon.
“Tubtob sa karon lima ka pagtuon ang ginadumalahan. Ang tagsatagsa sini daw isa ka miting! Ang kada isa nagatambong sa pagtuon sang isa kag isa, kag may mga bag-ohan man nga nagabuylog. Sila tanan naghambal nahanungod sa kamatuoran, kag subong resulta, nasugdan ang ikan-om nga pagtuon upod sa isa ka tawo, nga nagsugod man sa pagtambong sa mga miting kag nagpanaksi sa iya nobya.
“Sa pagkamatuod, ini tanan isa ka dalayawon nga pagpanaksi sa sulod sang otel. Indi mahapos para sa sining pamatan-on nga mga tawo ang pagsuklob sing bag-ong personalidad. Dapat nila landason ang pagpanigarilyo, alkoholismo, kasingki, lugak nga mga moral, kag malain nga mga kaupod. Gintinguhaan ni Satanas nga gamiton ang ila mga abyan anay sa pagbalabag sa ila pag-uswag, nagahaylo sa ila sa pagpanigarilyo ukon magbuylog sa magansal nga mga sinalusalo. Ang isa sang interesado nga mga tawo kalaslon na sa isa ka lin-ay nga natungod sa isa ka kulto. Gintinguhaan sang lin-ay nga pahilayuon sia gikan sa kamatuoran. Apang, sang ulihi nagsugod ang lin-ay sa pagtuon kag sugod sadto nag-uswag sing maayo.
“Suno sa pinakaulihi nga balita,” report sang mag-asawa, “ang isa sang pamatan-on nga mga lalaki nabilanggo bangod sang iya tindog sa neutralidad. Sa kubos sa isa ka tuig, anom pa ang nabawtismuhan, lima sa ila nagsulod sa gilayon sa auxiliary payunir nga pag-alagad. Gikan sa bug-os nga grupo, anom ang regular payunir karon, kag tulumuron nila nga mangin espesyal payunir.”
Daw ano ka bugana ang ginpadya sa sining mag-asawa bangod sang ila padayon nga pagtuman sa sugo sang Dios nga pangitaon ang mga tulad-karnero! Sa pagkamatuod ginpakamaayo ni Jehova ang ila matutom nga mga panikasog. Samtang mahimo nga wala kita sing subong sini ka talalupangdon nga mga eksperiensia, luyag naton pirme nga tumanon sing matutom ang aton balaan nga komisyon sa pagbantala sing maayong balita sang Ginharian.—Mateo 24:14.
[Laragway sa pahina 21]
Ang mag-asawa sa Pransya upod sa anom ka regular nga payunir