Report sang mga Manugbantala sang Ginharian

Ginbag-o Nila ang Ila Dalanon sang Kabuhi

WALAY duhaduha nga nakita ninyo sila nga nagasugilanon sa iban sa mga dalan, nagaduaw sa pamalay, ukon nagatambong sa Cristianong mga miting sa ila mga King­dom Hall. Ginapatuhuyan namon ang maayo-mamiste nga mga pamatan-on sang mga Saksi ni Jehova. Mahimo kamo maghinakop nga mga Saksi sila bangod gintudluan sila nga mangin amo sina sang ila mga ginikanan kag amo sina sa madamo sa ila. Sa pihak nga bahin, ang iban sining mga pamatan-on may tuhay katama nga ginhalinan kag dalanon sang kabuhi nga indi gid kaangay sang pagkabuhi nila sa karon. Sa katunayan, ang mga ginapakita sa masunod nga pahina nagapakig-upod anay sa mga grupo diin ang krimen kag abuso sa droga amo ang matag-adlaw nga mga hitabo. Ano ang nagpabag-o sing bug-os sang ila kabuhi? Duawon naton ang isa ka banwa sa Norway kag kilalahon ang pila sang mga pamatan-on nga naghimo sinang mga pagbag-o.

Ang Sadsaran sang Pagbag-o

Sang nakilala sang duha ka Saksi si Annette sa pamalaybalay nga hilikuton, 19 anyos sia. “Pirme ako ginsingganan nga indi gid makigsugilanon sa mga Saksi ni Jehova, apang natingala ako kon ngaa, gani ginpasulod ko sila,” panaysayon niya. Nagadroga sia sugod sang 11 anyos sia kag nadalahig sa pila ka kinawatay sa balay kag salakyan.

Naganyat sia sa maayong balita sang Ginharian. Napalig-on sia ilabi na sang paglaum nga pagkabanhaw, kay napatay ang iya iloy sang singko anyos sia. Gani ginbaton niya ang walay bayad nga pagtuon sa Biblia kag nagsugod sa pagtambong sa mga miting sa King­dom Hall. Ginsugiran niya ang iya nobyo kag ang iban pa sang iya natun-an. Ang reaksion? Wala nila ini maluyagan kag nagsumbong nga nahaylo si Annette sang sayop nga propaganda sang relihion. Walay sapayan, ang iban sadtong nagapamatok gid anay nagsugod sang ulihi sa pagtuon sa Biblia.

Isa ka halimbawa amo si Espen, isa ka pamatan-on nga lalaki nga 20 anyos. Nabatian niya sa nobyo ni An­nette ang tuhoy sa maayong balita sang Ginharian kag sa gilayon luyag niya magtuon sa Biblia. Apang, nagahulat sia sing sentensia nga apat ka bulan nga pagkabilanggo, kay nadalahig sia sa pag-ismagol sing mga droga kag, kaangay ni An­nette, sa pila ka kinawatay. Nagagamit man sia sing tabako, marijuana, kag iban pa nga mga droga. Karon, ano ang nagtiklod sa isa ka tawo nga nadalahig sa sinang mga butang nga magtuon sa Biblia? Narealisar ni Espen ang pagkawalay pulos kag pagkawalay katuyuan sang iya dalanon sang kabuhi. Nagapanaysayon sia: “Naganyat ako sa mga saad sang Biblia tuhoy sa isa ka palaabuton nga naghatag sa akon sing katuyuan sa kabuhi. Gani nagsugod ako sa pagtuon agod hibaluon kon kamatuoran ang ginsugid sa akon.”

Ang Iban Pa Luyag Magtuon sa Biblia

Sini nga tion, isa ka pamatan-on nga lalaki gikan sa amo man nga grupo sang mga pamatan-on ang nakabati sang maayong balita, kag nagsugod man sia sa pagtuon kag sa pagtambong sa mga miting. Masunod, nasugdan ang isa ka pagtuon upod sa isa pa sining mga pamatan-on, kag nagsugod sia sa pagtambong sa mga miting. Wala magdugay pagkatapos sadto, isa pa ka pamatan-on nga lalaki ang nagbuylog sa iya mga abyan sa pagtuon sa Biblia kag sa paghimo sing espirituwal nga pag-uswag. Nian isa pa gid ka pamatan-on sa amo man nga grupo ang natandog sa positibo nga mga pagbalhin nga ginahimo sang iya mga abyan, kag sa sulod sang malip-ot nga tion, nagtuon sia sa Biblia.

Si Gilbert, isa ka pamatan-on nga musikero gikan sa amo man nga grupo, nagsugod karon sa pagtuon sa Biblia. Ang iya mga ginikanan lunsay napatay sa kanser, gani ang paglaum nga pagkabanhaw sa Biblia naglugpay sa iya. (Juan 5:​28, 29) Nagamarijuana man sia kag nagapangabuhi sing patuyang, kag may mga ambisyon sia nga mangin bituon sa rock. Apang, sa pagligad sang tion, nag-uswag sia sa espirituwal kag namat-od sang ulihi nga mangin isa ka Saksi ni Jehova. Sa katapusan, ang manghod nga lalaki ni Espen nagsugod sa pag-usisa sang Biblia kag nakig-upod sa mga Saksi.

Ang Kamatuoran sang Biblia Nagabag-o sang Kabuhi

Nagbag-o sing daku ining mga pamatan-on nga mahigko anay mamayo, wala mahusay ang buhok, kag nadalahig sa mga droga, mga pangawat, kag iban pa nga mga krimen. Si An­nette isa ka maayong manugbantala sang Ginharian kag mga isa ka tuig nga nagpayunir. Si Espen kag si Gilbert nakaaux­il­iary payunir na anay, kag sila man mga ministeryal nga alagad. Nangasawa sila sa sulod sang Cristianong kongregasyon. Apat pa sa grupo anay ang mapisan man nga mga manugbantala sang Ginharian!

Kamusta ang apat ka bulan nga sentensia kay Espen? Bangod sang mga pagbag-o nga ginhimo niya sa iya kabuhi, ang iya sentensia gin-islan sa 80 ka oras nga pagpangabudlay sa komunidad. Paagi sa pagpasugot sang mga pulis kag sang iban pa, ginhinguyang niya ining mga oras sa pagpangabudlay sa lokal nga Kingdom Hall sang mga Saksi ni Jehova. Nalipay katama ang mga pulis sa sining kahimusan.

Huo, madamong iban nga mga pamatan-on sa bug-os nga kalibutan ang may kriminal nga inagihan. Apang ang kamatuoran sang Pulong sang Dios naghatag sa ila sing mga sabat sa importante nga mga pamangkot kag sing pat-od nga paglaum para sa palaabuton. Gani, indi na sila mga kriminal ukon mga durugista, kag wala sila nagalakat nga mahigko mamayo. Bangod ginbag-o nila ang ila dalanon sang kabuhi, kaangay gid sila sa mga tawo nga ginsambit sa ibabaw​—⁠pamatan-on, maayo-mamiste, kag aktibo nga mga Saksi ni Jehova. Luyag nila ibantala sa iban ang mapinadayunon nga mga solusyon sang Biblia sa mga problema sang tuman kadamo nga pamatan-on sa karon.​—⁠Tan-awa ang 1 Corinto 6:​9-11.

[Piktyur sa pahina 8]

Sanday Espen, Annette, kag Gilbert