Ang Kamatuoran Tuhoy sa Impierno

SING maathag, ang sadsaran nga doktrina sang pagpati sa silot sa tapos sang kamatayon amo ang pagpati nga ang matuod nga tawo wala nagakapatay kon ang undanon nga lawas mapatay kundi ang isa ka butang​—⁠masami ginatawag kalag⁠—​nagalampuwas sa pagkapatay sang lawas. Ining pagpati, subong nakita na naton sa nagligad nga artikulo, naghalin sa dumaan nga mga Sumerianhon kag mga Babilonianhon sa Mesopotamia. Sang ulihi, ginbaton ini sang mga Griego, kag ang mga pilosopo sini, subong ni Plato, nagpatahom sang teoriya. Ang ila napatahom na nga pagpati sa “lawas kag kalag” nangin bahin sang pagpati sang apostata nga mga Judiyo.

San-o ginbaton sang nagapangangkon nga mga Cristiano ang pagpati sa pihak nga kinabuhi? Sa pagkamatuod indi sa tion ni Jesus kag sang iya mga apostoles. Ang Pranses nga Encyclopædia Universalis nagasiling: “Ang [apokripal] Apokalipis ni Pedro (ika-2 nga siglo C.⁠E.) amo ang nahauna nga Cristianong sinulatan nga naglaragway sang silot kag mga pagtormento sa mga makasasala sa impierno.”

Sa kamatuoran, ang dumaan nga mga amay sang iglesia wala gid nagaugyunay tuhoy sa impierno. Sanday Justin Martyr, Clement sang Alexandria, Tertullian, kag Cyprian dampig sa kalayuhon nga impierno. Ginremedyohan ni Origen ang impierno paagi sa paghatag sing bag-o nga kahulugan sa sini, nga nagapangangkon nga ang mga makasasala sa impierno maluwas sa ulihi. Ginsundan sia sa mas daku ukon mas diutay nga kadakuon ni Gregory sang Nazianzus kag ni Gregory sang Nyssa. Apang gintapos ni Augustine inang haganhagan nga mga pagtamod sa impierno. Sa iya libro nga Early Christian Doctrines, ang propesor sang Oxford nga si J. N. D. Kelly nagsulat: “Sang ikalima nga siglo ang matigdas nga doktrina nga ang mga makasasala wala sing ikaduha nga kahigayunan sa tapos sining kabuhi kag nga ang kalayo nga magala­mon sa ila indi gid mapalong nangibabaw bisan diin.”

Tuhoy sa purgatoryo, ang libro nga Orpheus​—⁠A General History of Religions nagasiling: “Si St. Augustine nagpati nga may yara kahimtangan sang pagtilaw sa ulot sang palaabuton nga kalipay kag walay katapusan nga silot, amo ang pagpaputli sa mga kalag paagi sa kalayo. Amo ini ang doktrina ni Orphic [paganong Griego] kag ni Virgilian [paganong Romano] tuhoy sa Purgatoryo: wala sing bisan isa ka tinaga nahanungod sini sa Mga Ebanghelyo. . . . Ang doktrina sang Purgatoryo . . . ginhimo sang ikan-om nga siglo, kag ginproklamar nga doktrina sang Iglesia sang Konsilyo sang Florence (1439).” Ang New Catholic Encyclopedia nagabaton: “Ang Katoliko nga doktrina tuhoy sa purgatoryo napasad sa tradisyon, indi sa Balaan nga Kasulatan.” Tuhoy sa Limbo, si Kardinal Ratzinger sang Roma nagabaton nga ini “isa lamang ka teolohiko nga hipotesis.”

Wala sing Silot sa Tapos sang Kamatayon

Apang, kamusta naman ang Biblia? Nagasiling bala ini nga ang kalag nagalampuwas sa lawas kon mapatay ini kag busa sarang masilutan sa isa ka kalayuhon nga impierno ukon purgatoryo? Ang New Catholic Encyclopedia nagasiling: “Ang ideya nga ang kalag nagalampuwas sa kamatayon indi mahantop sa Biblia. . . . Ang kalag sa D[aan] nga T[estamento] nagakahulugan indi sing isa ka bahin sang tawo, kundi ang bug-os nga tawo​—⁠ang tawo subong isa ka buhi nga persona. Sing kaanggid, sa B[ag-ong] T[estamento] nagakahulugan ini sing tawhanon nga kabuhi: ang kabuhi sang isa ka indibiduwal.”

Gani nalusod ang sadsaran sang pagpati sa silot sa tapos sang kamatayon. Ang Biblia nagasiling: “Ang kalag nga nagapakasala mapatay.” (Ezequiel 18:​4, Revised Standard Version, Katoliko nga Edisyon) Nagasiling man ini: “Ang bayad sang sala amo ang kamatayon.” (Roma 6:​23, RSV) Busa, kon ang Biblia nagahambal nga ang dimahinulsulon nga malaut nga mga tawo magakadto sa “Gehenna,” “walay katapusan nga kalayo,” ukon “linaw sang kalayo,” nagagamit lamang ini sing simbuliko nga hambal sa paghambal nga sila magaeksperiensia sing permanente nga kamatayon, “ang ikaduha nga kamatayon.”​—⁠Mateo 23:​33; 25:​41, 46; Bugna 20:⁠14; 21:​8;⁠a ipaanggid ang 2 Tesalonica 1:​7-9.

Ang Impierno Mahaw-asan Paagi sa Pagkabanhaw

Mainit bala, kon amo, ang impierno? Indi suno sa Biblia. Sa pagkamatuod, ang Hebreo kag Griegong mga tinaga nga ginbadbad sa iban nga mga Biblia subong “impierno” nagapatuhoy lamang sa kinaandan nga lulubngan sang mga patay. Indi ini isa ka mainit nga duog sang pagtormento. Sa baylo, isa ini ka duog nga palahuwayan, nga gikan sa amo ang mga patay magaguwa sa pagkabanhaw. (Manugwali 9:​10; Binuhatan 24:15) Si Oscar Cullmann, propesor sa Theological Faculty sang University of Basel, sa Switzerland, kag sang Sorbonne, sa Paris, nagahambal tuhoy sa “daku nga kinatuhayan sang Cristianong pagpaabot sa pagkabanhaw sang mga patay kag sang Griegong pagpati sa pagkadimamalatyon sang kalag.” Sing husto, sia nagasiling nga “ang kamatuoran nga ang naulihi nga Cristianismo naghimo sing sugpon sa ulot sang duha ka pagpati . . . indi sa kamatuoran isa ka sugpon kundi pagsikway sa isa ka [doktrina sang Biblia tuhoy sa pagkabanhaw] pabor sa iban [pagano nga pagpati sa pagkadimamalatyon sang tawhanon nga kalag.]”​—⁠Italiko amon.

Ang mga Saksi ni Jehova wala magsikway sang ila pagtuo sa pagkabanhaw pabor sa ideya nga ang kalag dimamalatyon. Malipay sila sa pagpaambit sa imo sang ila makalilipay nga paglaum kag pamatud-an sa imo gikan sa Biblia nga, sa kamatuoran, ang impierno indi mainit.

[Footnote]