Mga Pamatan-on nga Nagaalagad sa Dios

NATINGALA ka bala nga may maayong mga pamatan-on nga nagasakripisyo sang ila tion, sa wala sing bayad, sa pagduaw sa imo balay agod maghambal nahanungod sa Dios? Daw makapakibot bala, sa isa ka dag-on nga nagadugang ang indi pagpati, nga ang kabataan nagabuylog sa ila mga ginikanan sa paghambal sa iban nahanungod sa matahom nga mga saad sang Biblia tuhoy sa isa ka makalilipay nga palaabuton?⁠a

Sa kalabanan sang 60,000-kag-kapin pa nga mga kongregasyon sang mga Saksi ni Jehova sa bug-os nga duta, makasapo ka sing madamo nga pamatan-on. Wala sila nagaeskwela sa Sun­day ­school ukon sa klase sang katekismo. Sa baylo, ining mga pamatan-on nagabenepisyo kag nagapakigbahin pa gani sa mga miting sang kongregasyon. Ang mga magamay nagahatag sing simple lamang nga mga komento. Ang mga lanubo nagapakigbahin sa Teokratikong Eskwelahan sa Ministeryo. Madamo nga tin-edyer ang nagahinguyang sang ila bakasyon sa eskwelahan sa pagbulig sa ila mga isigkatawo nga makatuon nahanungod sa Dios kag sa iya matahom nga mga saad sa palaabuton.

Wala gid sing bag-o sa sining pagpanghikot sang mga pamatan-on. Ang Biblia nagasugid tuhoy sa matutom nga hoben nga mga lalaki kag mga babayi, subong man mga pamatan-on kag magamay nga kabataan, nga nagpakita sing talalupangdon nga mga huwaran sa pag-alagad sa Dios.

Ang tulun-an nga Salmo sang Biblia nagtagna sing isa ka “hubon sang mga pamatan-on nga lalaki,” nga subong ka makapabugnaw kag subong kadamo sa “tun-og,” sa pag-alagad sa Dios. Nagasugid man ini tuhoy sa “mga pamatan-on nga lalaki” kag “mga ulay” nga nagadayaw sa ngalan sang Dios. (Salmo 110:​3; 148:12, 13) Mahimo gid nga may yara mga pamatan-on sang ginpasagahay ang balaan nga espiritu sang Dios sa mga tumuluo sang Pentecostes 33 C.⁠E. Sadto nga adlaw mga 3,000 ang nagbaton sang Pulong kag ginbawtismuhan. Nagsiling si apostol Pedro nga ining makapakibot nga hitabo isa ka katumanan sang tagna ni Joel: “Ang inyo mga anak nga lalaki kag ang inyo mga anak nga babayi magapanagna kag ang inyo tigulang nga mga lalaki maga­damgo sing mga damgo.”​—⁠Binuhatan 2:​4-8, 17, 16, 41.

Ang iban pa nga huwaran sa Biblia sang mga tawo nga nag-alagad kay Jehova nga Dios sang pamatan-on sila nagalakip kay Samuel, sa matarong nga si Hari David, sa kilala nga mga manalagna sang Biblia nga sanday Jeremias kag Daniel, subong man sa matutom nga si Timoteo. Ining guwa nagaunod sing tatlo ka artikulo nga nagabinagbinag sang iban sining mga huwaran sang Biblia. Makita mo sa mga artikulo kon ngaa ang mga pamatan-on, subong man ang mga tawo nga may edad na, serioso nga nagatamod sang ila pag-alagad sa Dios kag kon ngaa nagahinguyang sila sing daku gid nga tion sa pagbulig sa ila mga isigkatawo sa paghimo man sini.

[Footnote]