Ang Pagsalig kay Jehova Nagadala sing Kalipay
PANUGIRON NI JACK HALLIDAY NATHAN
Ayhan nabatian na ninyo ang ekspresyon, “Natawo nga may pilak nga kutsara sa iya baba.” Ti, sang matawo ako sang 1897, matuod gid ina sa akon bahin.
IKA-60 nga tuig sadto sang paggahom ni Reyna Victoria, ang iya brilyante nga jubilyo. Ang mga bata nga natawo sadto nga tuig sa Inglaterra ginhatagan sing pilak nga kutsara. Ang Emperyo sang Britanya yara sa putukputukan sang iya himaya, nga nagaani sang mga benepisyo sang Industriyal nga Rebolusyon sa sulod sang pungsod kag sang hamungaya nga negosyo gikan sa nagauswag nga mga koloniya sa luwas.
Ang akon lolo isa ka Judiyo, kag ang akon amay nangin isa ka Hebreo nga eskolar, sampaton sa Hebreong Kasulatan. Apang ang akon lola anak sang isa ka Anglikano nga obispo, kag bangod sang iya impluwensia, ginbaton sang akon amay si Jesucrito subong ang Mesias. Ang mga sinulat ni Charles Taze Russell nakaimpluwensia sa akon mga ginikanan, gani wala gid kami magpati sa Trinidad ukon sa doktrina sang kalayuhon nga impierno.
Sang bata ako, ang salakyan sa Inglaterra amo ang kabayo, kag pila lamang ang wala ginaguyod sang kabayo nga mga karo, ukon mga awto. Sang 1913, bangod maluyagon ako sa mga kabayo, nagbuylog ako sa yunit sang armada nga ginaguyod sang kabayo. Sang magdabdab ang Inaway Kalibutanon I, ginsaylo ako sa regular nga armada kag ginpadala sa Griego nga patag-awayan, nga sa diin nagmasakit ako sing malaria. Nian, ginpadala ako sa nakatundan nga patag-awayan sa Pransya subong manug-uyat sing machine gun kag sang ulihi gindala ako nga bilanggo sang 1917 sang mga Aleman.
Pagsapo sing Katuyuan sa Kabuhi sa India
Sang matapos ang inaway sang 1918, wala ako sing makita nga obra sa Inglaterra, gani nagbuylog ako liwat sa armada kag nagkadto sa India subong bahin sang garison sa panahon sang paghidait. Sang Mayo 1920 naglukmat ang akon malaria, kag ginpataklad ako sa mga pukatod agod magpaayo didto. Samtang didto, ginbasa ko ang tanan nga libro nga mauyatan ko, lakip ang Biblia. Ang pagbasa sang Kasulatan nagpabaskog sang akon interes sa pagbalik sang Ginuo.
Pagligad sang mga binulan, didto sa Kanpur, naghuman ako sing isa ka grupo nga nagatuon sa Biblia, nagalaum nga makatuon ako sing dugang pa nahanungod sa pagbalik sang Ginuo. Amo sadto nga nakilala ko si Fredrick James, isa anay ka Britaniko nga soldado nga isa na karon ka makugi nga Estudyante sang Biblia. Ginpaathag niya sa akon nga si Jesus presente na kutob pa sang 1914, nga indi makita sang tawo. Amo ini ang labing makakulunyag nga balita nga nabatian ko. Ang akon una nga reaksion amo ang pagguwa sa armada. Nangidlis ako sa mga pagpaagay sing dugo kag kamatay sa Europeanhon nga inaway. Luyag ko mangin mahidaiton nga misyonero kag magwali sining maayong balita nahanungod sa presensia ni Cristo.
Apang, wala magsugot ang armada nga paguwaon ako. Sa baylo, ginpadala nila ako sa nakatundan sang India, karon Pakistan na. Samtang didto, ginbasa ko ang Studies in the Scriptures, ni Charles Taze Russell, kag nakombinse ako sing kapin pa nga dapat ko batunon ang panawag nga magbantala. Nagsugod ako sa pagdamgo sing malain nga mga damgo nga naghimo sa akon nga masinulub-on. Nadulaan sing paglaum, ginsulatan ko si Utod James, kag gin-agda niya ako nga mamasyar sa iya balay sa Kanpur. Natabuan gid nga adlaw sang Memoryal sang kamatayon sang Ginuo pag-abot ko. Yadto nga adlaw may daku nga epekto sa akon kabuhi—namat-od ako nga magpabilin nga soltero kag himuon ang bug-os tion nga ministeryo nga akon tulumuron sa kabuhi.
Pagbalik sa Inglaterra
Sang talipuspusan sang 1921, ginsaylo ako liwat sa Inglaterra, kag sang tigpamulak sang 1922, ginpaguwa ako sa armada. Sadto nga tig-ilinit, si J. F. Rutherford, ang ikaduha nga presidente sang Watch Tower Society, nag-abot sa Inglaterra, kag nag-upod ako sa akon mga ginikanan agod mamati sa iya pamulongpulong sa Royal Albert Hall, London. Pagkatapos sadto, napahulag ako nga itanyag ang akon serbisyo sa Bethel, subong amo ang pagtawag sa mga sanga talatapan sang Watch Tower Society, apang ginpalig-on nila ako nga himuon anay ang hilikuton sang colporteur (bug-os tion nga pagbantala). Gani naghalin ako sa akon obra kag ginbaton ko ang akon teritoryo nga asaynment sa bagatnan sang Inglaterra. Wala sing eksperiensia, isa ka crown (50 cents, U.S.) lamang ang unod sang akon bulsa, kag nagasalig kay Jehova, ginsugdan ko ang akon karera subong bug-os tion nga ministro. Sang mga Marso 1924, gin-agda ako sa Bethel.
Apang, sang nagsunod nga tuig, ginpangabay ako nga magguwa sa Bethel, kag nangasubo gid ako, kay sa pamatyag ko gindisiplina ako bangod sang isa ka butang nga indi ako ang salaon. Sa sadtong malip-ot nga tion, ang Bethel nangin akon kabuhi. Apang paagi sa pagdala sang problema sa atubangan ni Jehova paagi sa pangamuyo kag pagsalig nga himuon ang iya kabubut-on, malipayon nga napadayon ko ang pagpayunir nga asaynment nga ginhatag sa akon. Sang Mayo 1926, gin-agda ako liwat sa Bethel, nga sa diin nagpabilin ako sa masunod nga 11 ka tuig.
Nagduaw liwat si Utod Rutherford sa Inglaterra sang 1936 kag gin-agda niya ako nga magkadto sa Canada agod magbulig sa hilikuton sang Ginharian didto. Apang, bangod sang indi paghangpanay, naakig si Utod Rutherford kay ginsugid ko ang kompidensial nga impormasyon. Madumduman ko pa ang iya eksakto nga mga pulong: “Jack, indi ko ikaw masaligan. Gisia ang imo tiket!” Daw ano ka makapaluya nga eksperiensia! Apang isa yadto ka disiplina nga kinahanglan gid, kag pagkatapos sadto, upod sa isa pa ka utod, gin-asayn ako subong payunir sa nagsunod nga walo ka bulan. Ining pribilehiyo sang pag-alagad nakabulig sa paglandas sang akon kasubo, kag nakatuon ako gikan sa disiplina.
Ginpasangkad nga Ministeryo sa Canada
Mga isa ka tuig sang ulihi, sa tion sang iya masunod nga pagduaw sa Inglaterra, ginsambit liwat ni Utod Rutherford ang tuhoy sa Canada. Nalangkag gid ako sa sini nga kahigayunan kag ginbaton ko sa gilayon ang asaynment didto. Sa tapos makaalagad sing pila ka bulan sa Bethel sa Canada, gin-asayn ako subong nagalakbay nga tiglawas sang Sosiedad sa bagatnan-nakatundan nga Ontario. Magagmay ang kalabanan nga kongregasyon didto kag nagakinahanglan sing daku nga pagpalig-on. Apang daw ano ka makalilipay yadtong una nga mga tuig, walay sapayan sang pisikal nga mga kabudlayan bangod sang mabudlay nga mga paniempo kag maiwat nga transportasyon!
Indi ko gid malipatan ang mainit kag espirituwal nga apresasyon sang isa ka gamay nga kongregasyon sang tumandok nga mga Indian malapit sa Brantford. Tigtulugnaw sadto, kag kadamol sang yelo, nga bangod sini indi makaagi ang akon salakyan nga Model T Ford. Wala sing bisan sin-o nga naglaum nga maabot ako, kag pag-abot ko, nasapwan ko nga ang kauturan nangahoy sing tulutdan. Gani ginpangita ko sila, nga ang yelo tubtob sa hawak ang kadamulon. Sang makita ko sila, nakibot sila, apang nalipay sila nga makita ako. Ginbuy-an nila ang tanan nga napangahuyan nila, nagpauli, kag naghimos sing miting sadto gid nga gab-i.
Sa kaiping nga Beamsville, ang matutom nga mga utod kag ako nakig-away sa sulod sang madamo nga binulan batok sa ginboto nga mga gulang kag mga apostata. Daw ano nga pribilehiyo nga makita kon paano ginhusay sang espiritu ni Jehova ang kahimtangan! Ang pagsalig kay Jehova kag ang katutom sa iya organisasyon nagresulta sa madamo nga mga pagpakamaayo para sa mga kongregasyon sadtong una nga mga tinuig. Madamo nga kabataan gikan sa sadtong mga kongregasyon ang nagdaku kag nagsulod sa mga ranggo sang mga payunir, nagkadto sa Bethel, nangin mga misyonero, kag nagalakbay nga mga manugtatap. Indi ko gid malipatan ang kalipay sang pagtener upod sa matutom nga Cristianong mga pamilya nga nagpatubas sadtong maayo nga mga pamatan-on. Ining mga pamilya nangin pamilya ko man, kag ang ila mga anak nangin mga anak ko man.
Mga Tinuig sa Idalom sang Pagdumili
Sa tion sang kainit sang inaway sang 1940, ang hilikuton sang mga Saksi ni Jehova gindumilian. Makapakibot gid! Ang ginsakdag sang gobierno nga mga anunsyo sa radyo nagmando sa amon nga isungka sa polisiya ang amon mga literatura, ang amon mga rekord sang kongregasyon, kag ang amon yabi sa Kingdom Hall. Nahangpan ang pagkahilingagawon sang kahimtangan, ginlibot ko ang mga kongregasyon kag ginpalig-on sila nga panaguon ang ila mga literatura kag mga rekord. Ginpalig-on ang kauturan nga magtipon sa pribado nga mga balay, sa lainlain nga balay kada semana. Sang ulihi ginsugdan liwat sang mga kongregasyon ang pamalaybalay nga ministeryo, nga ang ginagamit Biblia lamang. Nangin pagpakamaayo ini, kami tanan nag-uswag sa paggamit sang amon Biblia.
Sang ulihi nga bahin sadto nga tuig nakabaton kami sing madamo nga suplay sang polyeto nga End of Nazism gikan sa Estados Unidos. Ang pagpasulod sining ginadumilian nga literatura sa Canada nagkinahanglan sing daku nga kalantip. Ginapasakay sang iban nga kauturan ang nagalakat lamang nga mga soldado kag ginapapungko sa mga karton nga sing dihungod nagahatag sing tabon para sa ginadumilian nga polyeto. Nian sang isa ka aga sang Nobiembre, sa ulot sang alas tres kag alas sies, ang bug-os nga pungsod ginsalakay sang mga Saksi nga nagbilin sing isa ka kopya sining polyeto sa hagdanan sang kalabanan nga balay sa Canada.
Sadtong tinuig sang pagdumili, padayon ako nga nagpayunir sa nakatundan nga probinsia sang British Columbia sang Canada. Sa wala pa ang pagdumili, ang kauturan nagagamit sing sakayan sa pagduaw sa mga tawo sa mga minuro sa nabaw-ing nga mga suba halin sa Vancouver tubtob sa Alaska. Sang gin-anunsyo ang pagdumili, madamo nga literatura ang yara sa sakayan, gani ginhapit ini sang mga Saksi sa mainabyanon nga mga tawo sa alagyan padulong sa pantalan nga sa diin dakpon ang sakayan. Sang ulihi, nagsakay ako sa inugpangisda nga sakayan sa pagpangita sining literatura, kag dayon, sang panahon sang pagpangisda sing salmon, naglihog ako sing mga utod nga magkuha sini gikan sa sining interesado nga mga tawo. Ang mga literatura nadala sa Vancouver agod ipanagtag sing lapnag, sa idalom sang pakunokuno sang nagapangisda nga mga sakayan.
Sang talipuspusan sang 1943, nakabaton kami sing balita nga ginkuha na ang pagdumili batok sa mga Saksi ni Jehova. Apang, wala ini ginkuha gikan sa Watch Tower Society. Gani amo gihapon ang amon pagpanghikot, nga nagadala sing Biblia lamang sa amon pamalaybalay nga ministeryo. Apang sini nga tion sarang na namon mapakilala sing dayag nga mga Saksi ni Jehova kami. Sang magsugod ang pagdumili, mga 6,700 kami nga mga Saksi; sang ginkuha ini, 11,000 kami tanan!
Ang Kabuhi Subong Nagalakbay nga Manugtatap
Subong nagalakbay nga tiglawas sang Sosiedad, indi maisip nga mga kilometro ang ginlakbay ko sang nagsunod nga pila ka mga tuig, nga nagapanghikot kag nagapalig-on sa mga kongregasyon. Kon tigtulugnaw, nagaupod ako sa kauturan nga lalaki sa isa ka tumalagsahon nga salakyan nga ginatawag caboose. Isa ini ka may atop nga balsa-balsa, ginaguyod sang mga kabayo, kompleto sing indi masudlan sing hangin nga kahoy nga pugon kag alasuhan. Sa masami, sa wala pa ang pamanagbanag, mga anom kami nga nagalakbay sa madamol nga yelo sing 35 kilometros ukon kapin pa, nga nagaduaw sa mga uma nga maagihan namon. Dapat mangin alisto ang tsuper kay sarang mapabaliskad sang ginapalid nga mga yelo ang caboose, kag mahulog ang mga nagasalakay upod sa mainit nga mga baga gikan sa kahoy nga pugon.
Sang 1947, gintangdo ako sa pagtatap sang nahauna nga distrito sang pungsod, nga amo ang bug-os nga pungsod. May ginaalagaran ako nga sirkito nga asambleya halos kada semana. Ang mga asambleya ginahiwat sa ice rink, halampangan sang football, karerahan, mga tilipunan sang unyon, kag tilipunan sang komunidad. Dapat atipanon sing maayo ang mga kahimusan para sa sining mga pagtinipon antes magsugod ang programa. Sang 1950, si Frank Franske gintangdo subong ikaduha nga manugtatap sang distrito sa Canada, kag sang ulihi lima pa nga nagalakbay nga manugtatap ang gindugang.
Sa sulod sang mga tinuig, nakalakbay ako paagi sa gamay nga eroplano, sakayan sa pangisda, dalagku nga mga salakyan pangyelo nga may track kag ski nga ginatawag bombardier, eroplano nga pangyelo (mga salakyan nga may elise sa likod kag may ski sa atubangan sa paggiya), kag sa kapin ka kombensional nga mga paagi—tren, bus, kag awto. Kon kaisa, samtang sa eroplano kami ginapaagihan namon ang putukputukan sang mataas nga Rocky Mountains, kag dayon magsurip paidalom padulong sa natago nga mga nalupyakan agod makadtuan ang nabaw-ing nga mga grupo sang kauturan.
Madamo nga beses nga ginlakbay ko ang Canada pakadto-pakari. Nakaistar ako sa troso nga mga kabin nga katugnaw gid sa bagay nga makita namon ang amon ginhawa sa aga kag sa mga balay sa uma nga wala sing moderno nga mga kasangkapan. Apang, walay sapayan sining tanan, nakabatyag ako sing daku nga kaayawan, kay nahibaluan ko nga ginahimo ko ang hilikuton ni Jehova kag ginapalig-on ang katawhan ni Jehova
Dugang Pa nga mga Pribilehiyo sang Pag-alagad
Sa nagligad nga 33 ka tuig, nakatigayon ako sing pribilehiyo nga mangin katapo sang pamilya Bethel sang Canada, subong man nakaalagad ako subong humalambal sang kombension sa Inglaterra, Europa, Aprika, Australia, New Zealand, kag sa Malayo nga Sidlangan. Sa Australia, nakilala ko ang anak nga babayi ni Utod James, nga nangin makapalig-on gid sa akon sa India. Si Utod James indi misyonero, apang napaliton niya sa iya pamilya ang isa ka maayong espirituwal nga panublion.
Ginalibutan ako karon sang ginatos ka pamatan-on nga mga lalaki kag mga babayi sa Bethel sang Canada. Ang paggamit nila sa ila pamatan-on nga kapagsik sa pag-alagad kay Jehova makapalig-on kag makapapukaw. Madulom na ang akon panulok, apang ginabasahan ako sining mga pamatan-on. Maluya na ang akon mga tuhod, apang ginadala nila ako sa pag-alagad sa latagon. Ang iban nagapamangkot kon paano ko nalandas ang mga problema sang panglawas nga may kaangtanan sa katigulangon. Ti, una, ginatun-an ko ang Pulong sang Dios kada adlaw. Ginahuptan sini ang akon hunahuna kag tagipusuon sa espirituwal nga mga butang.
Sa pagkamatuod, isa gid ka dakung pribilehiyo nga makalakat kag mahambal ang akon langitnon nga Amay, si Jehova, sing 69 ka tuig sang dedikado nga kabuhi, ang 67 ka tuig sini ginhinguyang ko sa bug-os tion nga pag-alagad. Napamatud-an ko pirme si Jehova nga isa ka mahigugmaon, maluluy-on nga Dios, nagapatawad sang tawhanon nga mga sala kag nagahatag sing gahom kag kusog sa mga nagasalig sa iya. Nagalaum ako nga mahuptan ang akon integridad kag katutom kay Jehova kag sa iya organisasyon tubtob sa katapusan, nagasalig sa saad nga sa sibu nga tion mahiusa ako sa akon palangga nga Ginuo, si Jesucristo, kag upod sa madamo sang akon matutom nga kauturan nga mga lalaki kag mga babayi sa langitnon nga himaya.—Salmo 84:12.
[Piktyur sa pahina 12]
Ang mga eroplano nga pangyelo naglakbay sa bug-os nga pungsod sa kadasigon nga tubtob sa 80 kilometros kada oras
[Piktyur sa pahina 13]
Kon tigtulugnaw, ang ginaguyod sang mga kabayo nga caboose gingamit sa pagpanaksi sa kapatagan sang Canada
[Piktyur ni Jack Halliday Nathan sa pahina 10]