Magpabilin nga Mapagros sa Pagtuo!
Mga Pangunang Punto Gikan sa Tito
ANG Cristianong mga kongregasyon sa isla sang Creta sa Meditaraneo nagakinahanglan sing espirituwal nga igtalupangod. Sin-o ang makabulig sa ila? Ti, ang kaupod nga manugpangabudlay ni apostol Pablo nga si Tito! Maisog sia, kalipikado sa pagtudlo, makugi sa maayong mga buhat, kag mapagros sa pagtuo.
Ginduaw ni Pablo ang Creta sa ulot sang iya nahauna kag ikaduha nga pagkabilanggo sa Roma. Ginbilin niya si Tito sa pagtadlong sang iban nga mga butang kag pagtangdo sang mga gulang sa kongregasyon. Nagkinahanglan ini sang pagsabdong ni Tito sa dimatuod nga mga manunudlo kag sa pagpahamtang sing maayo nga halimbawa. Ginpakita ini sa sulat ni Pablo kay Tito, ayhan ginpadala halin sa Macedonia sa ulot sang 61 kag 64 C.E. Ang laygay sang apostol magabulig sa mga manugtatap kag mga masigkatumuluo karon nga mangin maisog, makugi, kag mapagros sa espirituwal.
Ano ang Ginakinahanglan sa mga Manugtatap?
Kinahanglan ang magtangdo sing mga manugtatap kag mag-uyat sing mabug-at nga mga problema. (1:1-16) Agod matangdo subong isa ka manugtatap, ang isa dapat nga mangin disalawayon, huwaran sa personal kag sa iya pagkabuhi sa pamilya, maabiabihon, timbang, kag may pagpugong sa kaugalingon. Magatudlo sia sang matuod kag magalaygay kag magasabdong sa mga nagasumpong. Kinahanglan ang kaisog bangod dapat pahipuson ang mga balingag sa kongregasyon. Labi na gid sila nga sa sirkunsisyon, kay ginatublag nila ang bug-os nga mga panimalay. Kinahanglan ang matigdas nga pagsabdong agod ang mga kongregasyon magapabilin nga mapagros sa espirituwal. Sa karon, ang Cristianong mga manugtatap dapat man mangin maisog sa paghatag sing sabdong kag laygay, sa tuyo nga pabakuron ang kongregasyon.
Itudlo ang Putling Pagtulun-an
Dapat itudlo ni Tito ang putli sa espirituwal nga pagtulun-an. (2:1-15) Ang magulang nga mga lalaki dapat mangin halimbawa sa paghaganhagan, pagkatalahuron, pagkabut-anan, sa pagtuo, sa gugma, kag sa pagbatas. Ang magulang nga mga babayi dapat “magmatinahuron sa paggawi.” Subong “mga manunudlo sang maayo,” sarang nila mabuligan ang pamatan-on nga mga babayi sa pagtigayon sing husto nga pagtamod sa ila katungdanan subong mga asawa kag mga iloy. Ang pamatan-on nga mga lalaki dapat mangin maligdong sa hunahuna, kag ang mga ulipon dapat magpasakop sa ila mga amo agod nga mapunihan ang pagtulun-an sang Dios. Ang tanan nga mga Cristiano dapat magsikway sang pagkadidiosnon kag magkabuhi sang but-anan sa sining sistema sang mga butang samtang nagahulat sang mahimayaon nga pagpahayag sang Dios kag ni Jesucristo, “nga naghatag sang iya kaugalingon tungod sa aton sa pagtubos sa aton gikan sa tanan nga kalautan kag sa pagtinlo nga sa iya kaugalingon sang katawhan nga iya nga makugi sa maayong mga buhat.” Paagi sa pagpanudlo sang maayo nga laygay, ‘punihan man naton ang panudlo sang Dios.’
Ang nagahinakop nga laygay ni Pablo nagapauswag sang espirituwal nga kapagros. (3:1-15) Kinahanglan magpakita sing nagakaigo nga pagpasakop sa mga gumalahom kag sa pagpalambo sing pagkarasonable. Ang mga Cristiano may paglaum sang kabuhi nga walay katapusan, kag ang mga pulong ni Pablo dapat ipadaku agod palig-unon sila nga huptan ang ila panghunahuna sa maayong mga buhat. Ang binuang nga mga pagduhaduha kag pagpakig-away sa Kasuguan dapat likawan, kag ang nagapauswag sang isa ka sekta dapat sikwayon sa tapos malaygayan sing makaduha. Samtang ginaaplikar karon sang mga gulang ina nga laygay, sila kag ang ila mga masigkatumuluo magapabilin nga mapagros sa pagtuo.
[Kahon/Laragway sa pahina 22]
Indi Magpaulipon sa Alak: Bisan pa ang mga babayi indi dapat magtudlo sa mga lalaki sa kongregasyon, ang magulang nga mga utod nga babayi sarang makatudlo sa pamatan-on nga mga babayi sing pribado. Apang agod mangin epektibo sa sini, ang magulang nga mga babayi dapat magpamati sa pinamulong ni Pablo: “Ang magulang pa nga mga babayi magmatinahuron sa paggawi, indi mapatupatuon ukon naulipon sa alak, magtudlo sila sang maayo.” (Tito 2:1-5; 1 Timoteo 2:11-14) Bangod sang pagkabalaka sa epekto sang pag-inum, ang mga manugtatap, ministeryal nga mga alagad, kag magulang nga mga babayi dapat mangin haganhagan, nga wala nagapahubog. (1 Timoteo 3:2, 3, 8, 11) Ang tanan nga mga Cristiano dapat maglikaw sa pagpahubog kag sa alkoholiko nga ilimnon samtang nagahimo sang “balaan nga buhat” sang pagbantala sang maayong balita.—Roma 15:16; Hulubaton 23:20, 21.