Ang Paghiliutod nga Gugma Buhi

Mga Pangunang Punto Gikan sa Filemon

SI Jesucristo naghatag sing “bag-ong sugo” sa iya mga sumulunod nga maghigugmaanay sila subong nga ginhigugma niya sila. (Juan 13:34, 35) Bangod sina, mahimo gani sila magpakamatay tungod sa isa kag isa. Huo, ang paghiliutod nga gugma amo sina ka kusog kag buhi.

Napat-od ni apostol Pablo nga ang paghiliutod nga gugma magapahulag kay Filemon, isa ka Cristiano nga nagapakig-upod sa kongregasyon sang Colosas, sa siudad sang Asia Minor. Bangod sang gugma ginbuksan ni Filemon ang iya balay agod gamiton subong Cristianong duog tilipunan. Ang ulipon ni Filemon nga si Onesimo naglayas, ayhan nangawat sing kuwarta agod makalakbay pakadto sa Roma, diin nakilala niya sang ulihi si Pablo kag nangin Cristiano.

Samtang bilanggo sa Roma sang mga 60-61 C.⁠E., si Pablo nagsulat kay Filemon. Nagpangabay sia kay Filemon nga batunon liwat si Onesimo sa espiritu sang paghiliutod nga gugma. Basaha ini nga sulat, kag makita mo nga isa ini ka maayong halimbawa sang gugma kag taktika​—⁠isa nga mailog sing maayo sang katawhan ni Jehova.

Komendasyon Tungod sang Gugma kag Pagtuo

Nagasulat kay Filemon kag sa iban, si Pablo naghatag anay sing komendasyon. (Bersikulo 1-7) Nabatian sang apostol ang nahanungod sa gugma ni Filemon kay Cristo kag sa tanan nga mga balaan kag nahanungod sa iya pagtuo. Nagpahulag ini kay Pablo nga magpasalamat kay Jehova kag nagdala sa iya sing daku nga kalipay kag paumpaw. Personal bala naton nga ginakumendahan ang mga masigkatumuluo nga huwaran sa gugma kag pagtuo? Dapat gid.

Ang paglaygay sa sadsaran sang gugma pirme kalahamut-an kon nagapakig-angot sa mga masigka Cristiano, subong sang ginapakita sang mga pulong ni Pablo. (Bersikulo 8-14) Pagkatapos sang iya mataktika nga pag-umpisa, ang apostol nagsiling nga bisan pa masugo niya si Filemon “sa paghimo sang kinahanglanon,” sa baylo ginpakamaayo niya nga laygayan sia. Nga himuon ang ano? Ti, nga batunon liwat ang ulipon nga si Onesimo sing malulo! Luyag kuntani hawiran ni Pablo si Onesimo bangod sang iya mapuslanon nga pag-alagad apang indi niya ini paghimuon nga wala sing pahanugot ni Filemon.

Ang daw dimaayo nga hitabo masunson napamatud-an nga mapuslanon, subong sang masunod nga ginpakita ni Pablo. (Bersikulo 15-21) Huo, maayo ang resulta sang paglayas ni Onesimo. Ngaa? Bangod mapabalik sia karon ni Filemon subong isa ka kinabubut-on kag bunayag nga Cristianong utod, indi subong dikinabubut-on kag ayhan dibunayag nga ulipon. Ginpangabay ni Pablo kay Filemon nga abiabihon si Onesimo subong sang pag-abiabi niya kay Pablo. Kon nakasala gid man si Onesimo sa iya, si Pablo ang magabayad. Agod magpasugot si Filemon, ginpahanumdom ni Pablo nga nautang niya sa apostol ang iya pagkanangin Cristiano. Gani, nakapat-od si Pablo nga si Filemon magahimo sang labi pa sa ginapangabay sa iya. Isa gid ka mataktika kag mahigugmaon nga pangabay! Huo, amo ini kon paano kita dapat makig-angot sa aton mga masigka Cristia⁠no.

Ginhinakpan ni Pablo ang iya sulat paagi sa paglaum, panamyaw, kag pangumusta. (Bersikulo 22-25) Ginalauman niya nga paagi sa pagpangamuyo sang iban tungod sa iya, pagapaguwaon sia sa dili madugay gikan sa bilanggoan. (Subong ginapakita sang ikaduha nga sulat ni Pablo kay Timoteo, ginsabat ina nga mga pangamuyo.) Nagahinakop sang iya sulat, si Pablo nagpanamyaw kag naglaum nga ang dibagay nga kaluoy ni Jesucristo mangin sa espiritu nga ginpakita ni Filemon kag sang iya mga masigkasumilimba kay Jehova.

[Kahon/Laragway sa pahina 23]

Labaw Pa sa Ulipon: Nahanungod sa pagbalik sang naglayas nga ulipon ni Filemon nga si Onesimo, si Pablo nagsiling: “Ayhan . . . ginpahilayo sia sa imo sing diutay nga tion, agod nga magbalik sia sa imo sing dayon, indi na subong nga ulipon kundi labaw pa sa ulipon, subong nga utod nga hinigugma, labi na sa akon, apang daw ano pa gid sa imo sa unod kag sa Ginuo.” (Filemon 15, 16) Sa Romanong Emperyo, ang pag-ulipon ginapatuman sang imperyo nga gobierno, kag ginkilala ni Pablo inang “superyor nga awtoridad.” (Roma 13:​1-7) Wala niya ginpukaw ang pag-alsa sang ulipon kundi nagbulig sa ila nga matigayon ang espirituwal nga kahilwayan subong mga Cristiano. Nahisanto sa iya laygay nga ang mga ulipon magpasakop sa ila mga agalon, ginpabalik ni Pablo si Onesimo kay Filemon. (Colosas 3:​22-24; Tito 2:​9, 10) Labaw pa sa isa ka kalibutanon nga ulipon si Onesimo. Isa sia ka hinigugma nga masigkatumuluo nga may relatibo nga pagpasakop kay Filemon subong maayo pa nga ulipon, isa nga ginagamhan sang diosnon nga mga prinsipio kag nagapakita sing paghiliutod nga gugma.