Ano ang Isiling Ninyo sa Isa ka Budhista?

¹ Sa iban nga kadutaan kapin sa katunga sang mga nagapabawtismo ang mga Budhista anay. Ano ang nagganyat sa ila sa kamatuoran? Sanglit madamong Tsino sa Pilipinas ang ginpadaku nga mga Budhista, paano naton matanyag ang maayong balita sa ila?

² Magpakita sing Matuod nga Interes: Madamong Budhista anay ang nagsiling nga wala sila maganyat sa kamatuoran bangod sang maayo nga pagpangatarungan. Sa baylo, natandog sila bangod sang personal gid nga interes nga ginpakita sa ila. Isa ka taga-Asia nga babayi sa Estados Unidos ang nagdayaw katama sa pagkamainabyanon sang sister nga nagduaw sa iya amo nga nagsugot sia nga magtuon. Indi sia maayo mag-Ingles, apang ang sister mapailubon. Kon ang babayi nakapoy ukon indi makatuon, ang sister nagaduaw lang kag nagahimo sing kahimusan para sa masunod nga pagtuon. Sang ulihi, ang babayi, ang iya duha ka anak nga lalaki, kag ang iya tigulang nga iloy ginbawtismuhan. Nagpauli sia sa iya tumandok nga pungsod kag nagbulig sa madamo pa nga makatuon sing kamatuoran. Isa sang iya mga anak nga lalaki ang nagaalagad karon sa sanga talatapan. Isa gid ka daku nga pagpakamaayo bangod sang pagpakita sing ‘kalulo kag gugma [ni Jehova] sa tawo’!​—⁠Tito 3:⁠4.

³ Budhista nga Pagtamod: Ang mga Budhista kinaandan na nga mahinangpanon sa iban nga mga ideya, apang wala nila ginakabig nga kinahanglanon ang pagsunod sa espesipiko nga doktrina. Gani ang ila indibiduwal nga mga pagtuluuhan nagakalainlain. Ang kinaandan nga tema sang isa ka sanga sang panudlo sang mga Budhista amo nga ang kabuhi puno sing pag-antos, apang paagi sa kasanagan, sarang mapauntat sang isa ang dalayon nga siklo sang liwatliwat nga pagkabun-ag sa di-makalilipay nga pagkabuhi. Ginasiling nga agod mahilway sa sining siklo, dapat kuno tigayunon sang isa ang Nirvana, ang kahimtangan nga indi malaragway bangod indi ini isa ka lugar ukon isa ka hitabo kundi, sa baylo, isa ka kahimtangan sang indi pagluntad diin wala sing kasakit kag kalainan. (Tan-awa ang Ano ang Nagakatabo sa Aton Kon Mapatay Kita?, pahina 9-10.) Ano ang ginasugid sini sa aton? Nga wala sing matigayon nga maayo ang makigbais tuhoy sa Budhista nga pilosopiya. Sa baylo, hambali ang kinaandan nga mga problema nga nagaapektar sa tanan.

⁴ Ipadaku ang Pareho nga Intereses: Sanglit masunson nga ginatimbangan sang mga Budhista ang kabuhi sa duta sing pag-antos, ang ideya tuhoy sa kabuhi nga walay katapusan sa duta mahimo nga indi makatarunganon para sa ila. Apang, kita tanan nagahandum nga maagom ang malipayon nga pagkabuhi sang pamilya, nga makita nga madula ang pag-antos, kag nga mahibaluan ang kahulugan sang kabuhi. Talupangda kon paano ining pareho nga mga kinahanglanon sarang mapadaku.

⁵ Mahimo ninyo tilawan ini nga introduksion:

◼ “Nagakabuhi kita karon sa kalibutan diin madamong inosente nga tawo ang nagaantos. Ano sa banta mo ang kinahanglanon agod madula sing bug-os ang kasakit kag kasubo? [Pasabta sia.] May isa anay ka saad nga makalulugpay gid sa akon. [Basaha ang Bugna 21:⁠4.] Sa pagkamatuod, ina nga tion wala pa mag-abot, apang kon mag-abot ini, luyag naton ini makita, indi bala?” Dayon itanyag ang isa ka publikasyon nga nagapaathag kon paano matapos ang pag-antos.

⁶ Sa tawo nga may edad, mahimo ka makasiling:

◼ “Kaangay ko, ayhan nagakabalaka ka sa pagdagsa sang malain nga mga ideya kag sa mga epekto sini sa aton kabataan. Ngaa nagadugang ang imoralidad sa tunga sang mga pamatan-on? [Pasabta sia.] Nakahibalo ka bala nga gintagna ini sa isa ka tulun-an nga madugay na nga ginsulat antes pa gintukod ang Muslim, Cristiano, kag Hindu nga mga relihion? [Basaha ang 2 Timoteo 3:​1-3.] Talupangda nga ining mga kahimtangan nagalapnag walay sapayan sang dalayon nga pagtuon. [Basaha ang bersikulo 7.] Ining publikasyon nagbulig sa akon nga mahangpan ang kamatuoran nga wala gid mahibaluan sang kalabanan nga mga tawo. Luyag mo bala ini mabasa?” Itanyag ang nagakaigo nga libro ukon brosyur.

⁷ Masami nga ginatahod sang mga Budhista ang Biblia subong isa ka sagrado nga sinulatan. Gani magbasa sing direkta gikan sini. (Heb. 4:12) Kon nasaw-ahan sia sa impluwensia sang kultura sang Nakatundan, sambita sa iya nga ang tanan nga manunulat sang Biblia mga taga-Asia.

⁸ Ano nga Publikasyon ang Labing Epektibo? Dugang sa aton mga tract, nga matigayon sa Tsino, madamong manugbantala ang nakagamit sing madinalag-on sang masunod nga literatura: ang mga libro nga Mankind’s Search for God, Ang Sekreto sang Kalipay sa Pamilya, kag Questions Young People Ask​—⁠Answers That Work; ang mga brosyur nga “Toloka! Ginahimo Ko nga Bag-o Ang Tanan nga Butang,” kag Ano ang Katuyuan sang Kabuhi​—⁠Paano Mo Masapwan Ini?; kag, kon matigayon gihapon, ang Kingdom News Num. 35, Magahigugmaanay Pa Ayhan ang Tanan nga Tawo? Natun-an sang kalabanan nga mga Budhista ang kamatuoran paagi sa pagtuon una sa Ginapatuman nga brosyur kag pagkatapos sini sa Ihibalo nga libro.

⁹ Bisan pa nga ang Budhista nga mga misyonero ginasiling nga nag-abot kuno sa Atenas halos 400 ka tuig antes nagbantala didto si Pablo, indi mapat-od kon nasugilanon niya ang isa ka tawo nga naimpluwensiahan sang Budhista nga doktrina. Apang, nahibaluan naton ang balatyagon ni Pablo tuhoy sa pagpanaksi sa tanan nga sahi sang tawo. Sia mismo ‘nagpaulipon sa tanan’ agod “nga sa bisan ano nga paagi maluwas [niya] ang iban.” (1 Cor. 9:​19-23) Mahimo man naton ini paagi sa pagpakita sing personal nga interes sa mga tawo kag paagi sa pagpadaku sang aton paglaum samtang nagapanaksi kita sa tanan nga masugilanon naton.