Ginasabat Bala sang Dios ang Imo mga Pangamuyo?

“WALA ko gid mabatyagi nga ang akon mga pangamuyo ginsabat,” siling sang isa ka babayi nga nagapuyo sa Hokkaido, Japan. Wala sia nagaisahanon sa sini. Madamong mga tawo ang nagabatyag nga wala gid ginasabat ang ila mga pangamuyo. Sa katunayan, mahimo nga nagapalibog ka kon bala ginasabat sang Dios ang imo mga pangamuyo.

Minilyon ang nagapangamuyo sa dimaisip nga mga diosdios. Ngaa daw tuman kadamo nga mga pangamuyo ang wala ginasabat? Agod masabat ini, usisaon naton anay ang mga sahi sang pangamuyo nga ginahimo.

Ano ang Ginapangamuyo sang Iban?

Kon panahon sang Bag-ong Tuig, dos-tersia sang populasyon sang Japan, ukon mga 80 milyones ka tawo, ang nagapangamuyo sa Shinto nga mga altar ukon Budhista nga mga templo. Nagahatag sila sing mga sensilyo subong mga halad kag nagapangamuyo para sa maayo nga suwerte kag kaayuhan sang pamilya.

Kon Enero kag Pebrero​—⁠antes sang mabudlay nga pasanaw agod makaeskwela sa kilala nga mga kolehiyo​—⁠ang mga estudyante nagadugok sa mga altar subong sang isa sa Tokyo nga kilala subong dios sang edukasyon. Ginasulat nila ang ila mga luyag sa kahoy nga plake sang pangamuyo kag ginapakabit ini sa kahoy nga baras sa palibot sang templo. Sa dimagkubos 100,000 sining mga plake ang nagapuni sang mga presinto sang kilala nga altar sa Tokyo sa tion sang pasanaw sang 1990.

Madamong mga pangamuyo ang nagahilabot sa kapagros. Sa isa ka templo sa Kawasaki, Japan, ang mga tawo nagapangamuyo agod maamligan batok sa AIDS. “Ang importansia sang pagpangamuyo batok sa AIDS,” paathag sang pari sa templo, “amo nga nagahimo ini sa mga tawo nga mainandamon sa ila paggawi.” Apang amo lamang bala ina ang pangamuyo?

Sa isa pa ka templo, ang isa ka tigulang nga babayi nagapangamuyo para “mapatay sing hinali.” Ngaa? Bangod luyag niya likawan ang pag-antos sing madugay na nga balatian kag indi luyag nga mangin pabut-at sa iya pamilya.

Sa isa ka ginatawag nga Cristianong pungsod, ang kapitan sang isa ka team sa foot­ball nagpangamuyo para sa kadalag-an sang iya team kag sa pangamlig gikan sa sablag. Ang mga Katoliko sa Poland nagapangamuyo para sa ila personal nga kaayuhan kag nagapuni sang ila Madonna sing alahas kon ginabanta nila nga ang ila mga pangamuyo ginpamatian. Madamong mga tawo ang nagadugok sa mga simbahan subong sang bantog nga Guadalupe sa Mexico City, kag Lourdes, Pransya, nga nagapakiluoy para sa milagruso nga pag-ayo.

Sa Sidlangan ukon Katundan, ang mga tawo nagapangamuyo para sa madamo kag lainlain nga personal nga mga rason. Sing maathag, luyag nila nga ang ila mga pangamuyo pagapamatian kag pagasabton. Apang, realistiko bala ang magpaabot nga ang tanan nga mga pangamuyo pagapamatian sing kalahamut-an? Kamusta ang aton kaugalingon nga mga pangamuyo? Ginasabat bala ini? Sa katunayan, ginasabat gid bala sang Dios ang mga pangamuyo?