Kon Ngaa Nagagamit Sila sing mga Relikya sa Pagsimba

NAPLES, Italya. Handurawa nga didto ka sadtong maaga nga mga tuig sang ika-18 ka siglo sang aton Kumon nga Dag-on. Sa katedral sini, ang taga-Ireland nga pilosopo nga si ­George Ber­ke­ley nagatindog sa atubangan sang isa ka bantog nga relihiosong relikya. Wala sia nagapati sa pagtulo sang dugo ni “San Gennaro,” ang Katolikong “santo” nga si Januarius.

Diutay lamang ang pagbalhin sang Naples nahanungod sini. Halimbawa, walay sapayan sang malain nga panahon sang isa ka okasyon sining karon lang nga mga tuig, ang simbahan napuno liwat sang mga tawo, kag may natabo kuno nga isa ka milagro. Ang relikya kag prosesyon nga ginpangunahan sang kardinal nga arsobispo gin-abiabi sing mainit. Huo, isa ini sang madamong beses nga ang dugo ni “San Gennaro” nagtulo. Ang mga milagro nahanungod sining relihioso nga relikya ginakunokuno nga nagakatabo kutob sang ika-14 ka siglo.

Suno sa Katolikong tradisyon, ang relikya (halin sa Latin nga relinquere, nagakahulugan “agod ibilin”) isa ka butang nga ginbilin sang isa ka tawo nga ginkabig nga santo. Subong sang ginasiling sang Dizionario Ecclesiastico, ang mga relikya “sa estrikto nga kahulugan sang tinaga, ang lawas ukon bahin sang lawas kag abo sang Santo, sa mas masangkad nga kahulugan subong ang butang nga nakatandog sa lawas sang santo kag busa takus sang debosyon.”

Gin-aprobahan sang Papa

Sa walay duhaduha, ginasimba sang iban ang relihioso nga mga relikya bangod sang ginakunokuno nga milagro nga nagaupod sa sini. Ang pag-aprobar sang papa isa pa ka rason sang pagkapopular sini.

Sa dimagkubos apat ka papa sang katapusan nga 70 ka tuig ang naghatag sing pinasahi nga igtalupangod sa mga relikya. Ang Katolikong magasin nagasiling nga kaangay sang ginbuslan niya nga si Pio XI, si Papa Pio XII “nagatago sing mga relikya sang santa sang Lisieux.” Si Paulo VI “nagatago sang tudlo ni apostol [Tomas] sa lamesa nga iya ginatun-an,” kag si Juan Paulo II “nagatago, sa iya kaugalingon nga apart­ment, sing mga tipak sang . . . nagkalabilin” ni “San Benedict” kag ni “San Andres.”​—⁠30 giorni, Marso 1990, pahina 50.

Bangod sang pag-aprobar sang papa, indi makakilibot nga ang pagkinahanglan sing mga relikya para sa pribado kag publiko nga debosyon nagadugang. Apang nagapahamuot bala sa Dios ang debosyon sa relihiosong mga relikya?

[Laragway sa pahina 3]

Reliquary, isa ka suludlan diin ginatago ang relihiosong mga relikya

[Ginkuhaan]

Sa maayong kabubut-on sang The British Museum