Ang Gugma kay Jehova Nagapapagsik sang Matuod nga Pagsimba
“Amo ini ang buot silingon sang gugma sa Dios, nga tumanon ta ang iya mga sugo.”—1 JUAN 5:3.
1, 2. Ano dapat ang motibo naton sa pag-alagad kay Jehova?
ANG isa ka grupo sang 80 ka bisita gikan sa Hapon nagtour sa Assembly Hall of Jehovah’s Witnesses sa California, E.U.A. Ang makalilipay nga palibot, lakip ang isa ka hardin nga may mga pispis nga blue jay, salampati, kag mga hummingbird, labi pa nga nagpasuod sa ila kay Jehova nga Dios nga ila Daku nga Manunuga. Wala madugay, natukiban sang tour guide nga ang halos tanan sa grupo bug-os tion nga mga payunir. Gani, sang ulihi, ang grupo ginpamangkot sang pakiana nga pirme ginapamangkot: “Ngaa kadamo gid sang mga payunir sa Hapon?” May kalinong sa makadali. Nian ang isa ka lamharon pa nga babayi boluntaryo nga nagsabat: “Bangod ginahigugma namon si Jehova.”
2 Gugma kay Jehova—ginatiklod gid kita sini nga mangin makugi sa pag-alagad sa iya! Matuod, indi tanan makapayunir. Sa pagkamatuod, ang kalabanan sang aton kapin sa apat ka milyon nga manugbantala sang Ginharian wala pa makatilaw sining pribilehiyo. Apang madamo nga ginatugutan sang ila kahimtangan ang nagatinguha sini. Kita man ‘makasalig kay Jehova kag makahimo sing maayo,’ nagapakita sang aton gugma paagi sa pagpakigbahin sa paghimo sing disipulo nga hilikuton. (Salmo 37:3,4) Kag ang tanan nga dedikado nga mga sumilimba ni Jehova makapakigbahin sa pagpabaskog sang espiritu sa pagpayunir, paagi sa mahigugmaon nga pagsakdag sa mga nagapayunir.—Mateo 24:14; 28:19.
3. Ano nga pagkatuhay ang makita sa ulot sang kalabanan sang nagapangangkon nga mga Cristiano kag sang mga Saksi ni Jehova?
3 Tuhay sa kalabanan sang nagapangangkon nga mga Cristiano, nga kombenyente nga nagakabig sang relihion subong puni lamang sa ila kabuhi, ang mga Saksi ni Jehova nagapakita sing mainit nga gugma sa Dios nga nagapahulag sa ila nga padayon nga ‘pangitaon anay ang ginharian kag ang iya pagkamatarong.’ Nagkinahanglan ini sing pagsakripisyo, apang daw ano ka mapuslanon ining pagsakripisyo! (Mateo 6:33; 16:24) Nahisanto ini sa una nga dakung sugo, nga una nga ginpamulong ni Moises kag ginsulit ni Jesucristo: “Si Jehova nga aton Dios isa lamang, kag dapat mo higugmaon si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna kag sa bug-os mo nga kusog.”—Marcos 12:29, 30; Deuteronomio 6:4,5.
4, 5. Sin-o ang dapat kabigon nga matutom, kag paano mapakita ang katutom?
4 Ang isa ka katapo sang mga manugpangabudlay sa ulong-talatapan sang mga Saksi ni Jehova nagsiling kasan-o lang kay F. W. Franz, ang 98-anyos nga presidente sang Watch Tower Society nga nakahinguyang sing kapin sa 70 ka tuig sa bug-os tion nga pag-alagad: “Isa ikaw ka maayong huwaran sang katutom, Utod Franz.” Si Utod Franz nagsabat: “Huo! Dapat ikaw magmatutom.” Amo ini ang kabilugan. Sa bisan ano nga bahin sang hilikuton sang Ginharian nga aton ginaalagaran, mahimo kita magmatutom.—1 Corinto 4:2; Galacia 3:9.
5 Matuod, madamo ang luyag magpauswag sang ila pag-alagad kay Jehova, apang ang Makasulatanhon nga mga salabton ukon mga problema sa lawas mahimo nga nagalimite sa ila. Apang, ang mga indi makapayunir indi dapat tamdon nga kubos katutom. Ang iban nagpabilin nga matutom sa idalom sang mabudlay gid nga mga kahimtangan kag sa masami sa sulod sang madamo nga tuig. Huo, matutom sila! Nagpakita sila sing gugma kay Jehova kag maukod nga nag-alagad bilang bug-os tagipusuon nga pagsakdag sa iya teokratiko nga mga kahimusan. Nagpakita sila sing hanuot nga interes sa hilikuton sang mga payunir kag nagpalig-on sa posible nga magpayunir, sa masami sa ila kaugalingon nga mga anak, nga lambuton ang pagpayunir subong karera sa kabuhi nga labaw sa tanan nga butang.—Ipaanggid ang Deuteronomio 30:19, 20.
6, 7. Paano ang talaksan nga hitabo nga narekord sa 1 Samuel 30:16-25 naaplikar sa karon?
6 Ang mahigugmaon nga pagpanghikot sang tanan nga katawhan sang Dios karon nga may paghiusa sarang mailustrar sang kasaysayan sa 1 Samuel 30:16-25. Sa pagpakig-away batok sa Amaleknon, “gingubat sila ni David kutob sa kasisidmon tubtob sa kagab-ihon” kag nagdala sing madamo nga inagaw. Pagbalik sa kampo, ang iban sang mga nakig-away upod kay David nangabay nga indi paghatagan sing inagaw ang mga wala mag-upod sa ila sa mainit nga pagpakig-away. Apang si David nagsabat: “Sin-o bala ang magapamati sa inyo sa sini nga butang? Kay subong sang bahin sang mga nagdulhog sa inaway, amo ang bahin sang nagpabilin sa mga dinala. Alangay ang bahin sang tanan.”
7 Amo man nga prinsipio ang naaplikar karon. Ang mga payunir yara sa unahan sang aton espirituwal nga pagpakig-away. Apang ang tanan nga iban pa sa kongregasyon nagahatag sing bug-os tagipusuon, matutom nga pagsakdag. Kag ang dakung resulta sang ila tingob nga pagpanghikot sang 1991 ginalaragway sa tsart nga nagasunod karon.
Isa ka Talalupangdon nga Report
8. (a) Ano ang ginapahayag sang bug-os kalibutan nga report tuhoy sa kabilugan nga manugbantala kag sa oras nga ginhinguyang nila sa pag-alagad kay Jehova? (b) Anong makawiwili nga punto ang natalupangdan mo sa mga pungsod nga bag-o lang magguwa sa report?
8 Huo, ginapakita sang masunod nga apat ka pahina sining magasin kon paano ang nahiusa nga mga panikasog sang tanan nga makugi nga sumilimba ni Jehova nakaamot sa isa ka makakulunyag nga bug-os kalibutan nga pag-uswag sang 1991. Isa ka dalayawon nga bag-ong kataason sang 4,278,820 ka manugbantala sang Ginharian ang narekord—6.5 porsiento nga pag-uswag. Ini sila naghugod sing 951,870,021 ka oras (halos isa ka bilyon!) sa pag-alagad. Kag talupangda ang ekselente nga panikasog nga ginhugod sang aton kauturan sa mga pungsod nga sang una ginadumilian apang karon nagguwa sa bug-os kalibutan nga report—Bulgaria, Cameroon, Czechoslovakia, Etiopia, Mozambique, Nicaragua, Rwanda, kag U.S.S.R.
9, 10. (a) Paano gin-atubang sang mga payunir ang hangkat sang mabudlay nga mga tion? (b) Ano ang nagapalig-on sa pagpayunir?
9 Sining karon nga tinuig ang espiritu sang pagpayunir naglapnag sa bug-os nga kalibutan. Bisan sa mga pungsod nga sa diin kasan-o lang gintugot ang kahilwayan sa pagsimba, ang ranggo sang mga payunir nagadamo. Ang mabudlay nga pangabuhi wala nagapahadlok sa sining mabakod nga mga Saksi gikan sa paghugod sang tanan nga yara sa ila sa pagsimba kay Jehova. (Ipaanggid ang 2 Corinto 11:23,27.) Sa binulan nga promedyo, 14 porsiento sang tanan nga manugbantala sang Ginharian ang nagapayunir. Ang pinakamataas nga kadamuon sang mga payunir 780,202, nga isa ka ekselente nga 18 porsiento sang tanan nga manugbantala.
10 Sang makita ang kalipay sang mga payunir, ang iban man napalig-on sa pagpayunir. Kon wala pa ikaw nagapayunir, ang imo bala gugma kay Jehova magatiklod sa imo sa pagsiling, subong sang mabasa naton sa Isaias 6:8, “Yari ako! Ipadala ako?” Ukon paagi sa imo maukod nga pagtuon sang Biblia, ang Pulong sang Dios bala magapadabdab sang nagahingalayo nga handum sa imo tagipusuon, agod nga ikaw magahimo sing dugang pa nga tikang nga magsulod sa pag-alagad subong payunir? Bisan sa tion sang pagtilaw, ang pulong ni Jehova nagpapagsik kay Jeremias, amo kon ngaa indi sia makaisol.—Jeremias 20:9.
Mahigugmaon nga Pag-alagad sa Katawhan
11. Paano nag-uswag ang hilikuton sa pagtuon sang Biblia sa puluy-an?
11 Ang isa sang talalupangdon nga mga bahin sang tuigan nga report amo ang pagdugang sang kadamuon sang libre nga pagtuon sang Biblia sa puluy-an, kay 3,947,261, ang regular nga ginadumalahan kada bulan sa bug-os nga kalibutan. Isa ini ka mahigugmaon nga kahimusan nga sa diin ginabuligan sang mga Saksi ni Jehova ang mga interesado nga masapwan nila sa ila pamalaybalay nga hilikuton. Nalipay kita sa pagdumala sang mga pagtuon sa Biblia upod sa katawhan gikan sa tanan nga nasyonalidad kag rasa, nga may kahanuot sa aton pagpangabudlay subong sang ginpakita ni apostol Pablo. Ang iya ‘bug-os nga pagpanaksi sa mga Judiyo kag sa mga Griego’ wala sing duhaduha nga nagkinahanglan sing madamo nga oras sa pagpanudlo sing kamatuoran. (Binuhatan 20:20, 21) Amo man sa karon. Ginabuligan sang mga Saksi ni Jehova ang “tanan nga sahi sang mga tawo agod maluwas kag makadangat sa sibu nga ihibalo sang kamatuoran.”—1 Timoteo 2:4.
12-14. Anong makalilipay nga mga report ang gikan sa Europa?
12 Daw ano ka makakulunyag ang mga report tuhoy sa nag-uswag nga hilikuton sa pagtuon sang Biblia sa Sidlangan nga Europa! Sa sulod sang mga dekada ang aton mga kauturan didto nagtipon sa diutay nga mga grupo, nga ayhan may isa lamang ka gabok na, na-mimeograph nga kopya sang daan nga Lalantawan para sa tanan sa grupo. Apang bugana nga mga Biblia kag literatura sa Biblia ang nagabaha karon sa sini nga mga pungsod. Nagapahanumdom ini sa isa sang Ambahanon ni Solomon 2:4, King James Version: “Ginadala niya [Cristo Jesus] ako sa balay sang [espirituwal] nga sinalusalo, kag ang iya hayahay sa ibabaw ko amo ang gugma.” Bangod may personal nga kopya na sila sang mga magasin, madamo ang nasangkapan na sing maayo sa paggamit sang “pulong sang kamatuoran sing matadlong.”—2 Timoteo 2:15.
13 Ang kongregasyon sang 103 ka manugbantala sa St. Petersburg, Rusya, nagreport kasan-o lang sing kapin sa 300 ka pagtuon sang Biblia sa puluy-an. Subong bunga sining panikasog sa pagtuon sang Biblia, 53 ka bag-ong mga Saksi ang nabawtismuhan sa sulod lamang sang walo ka bulan. Kapin sa katunga sang kongregasyon ang yara sa kamatuoran sa walo ka bulan pa lang ukon kubos pa! Kag wala sila sing mga gulang—isa lamang ka ministeryal nga alagad ang nagaatipan sang ila espirituwal nga pag-uswag.
14 Ang manugbantala sang Ginharian sa Estonia ginpamangkot sang isa ka estudyante sa Biblia kon mahimo niya agdahon ang pila sang iya mga abyan sa pagtuon. Sang mag-abot ang Saksi sa puluy-an sang masunod nga semana, kapin sa 50 ka tawo ang nagtipon! Sa pagkamatuod, pinasahi nga mga kahimusan ang ginhimo agod padayon nga maatipan ining tanan nga interes.
15. Ano ang masiling sa nagtambong sa Memoryal kag sa bawtismo?
15 Madamo sang nagatuon ang nakatilaw sa una nga tion sang Cristianong paghiliupod paagi sa pagtambong sa Memoryal sang kamatayon ni Jesus. Sining nagligad nga tuig, ang nagtambong naglabaw sa 10,000,000 sa una nga tion, kay 10,650,158 ang nagtipon sa bug-os nga kalibutan sa 66,207 ka kongregasyon para sa sining makalilipay nga okasyon. Sa madamo nga pungsod sa Latin-Amerika, Aprika, kag Sidlangan nga Europa, ang kadamuon sang nagtambong naglabaw sing tatlo ukon apat ka pilo sa kadamuon sang mga manugbantala sang Ginharian. Dapat kita karon maghanda para sa Memoryal nga pagahiwaton karon nga tuig sa Biernes, Abril 17. Ginalauman nga madamo sang bag-o nga mga estudyante sa Biblia nga magatambong sa Memoryal ang padayon nga magahimo sing pag-uswag padulong sa bawtismo. Tuhoy sa bawtismo, sang 1991 sa liwat aton nakita nga kapin sa 300,000 ang nagsimbulo sang ila dedikasyon kay Jehova nga Dios paagi sa pagpatugmaw sa tubig.
Mga Mahigugmaon sang Diosnon nga Kahilwayan
16. Anong makakulunyag nga mga report ang gikan sa “Mga Mahigugmaon sang Kahilwayan” nga Distrito nga mga Kombension?
16 Ang talalupangdon nga bahin sang 1991 nga tuig sang pag-alagad amo ang mga serye sang “Mga Mahigugmaon sang Kahilwayan” nga Distrito nga mga Kombension, nga karon natapos na sa Aminhan nga Hemisperio apang magapadayon pa tubtob sa 1992 sa Bagatnan nga Hemisperio. Sa una nga tion, ang kompleto nga programa sang kombension ginpresentar sa pila ka pungsod sang Sidlangan nga Europa, nga sa diin ang aton kauturan nalipay sa paggamit sang ila bag-o natigayon nga kahilwayan para sa kadayawan ni Jehova. Sang Oktubre 1991 ang kabilugan nga nagtambong nga ginreport sa una nga 705 ka kombension sa 54 ka pungsod 4,774,937.
17, 18. (a) Anong mga kahilwayan ang ginaagom kag ginapaabot sang mga sumilimba ni Jehova? (b) Paano ang diosnon nga kahilwayan nagakatuhay sa kalibutanon nga mga kahilwayan?
17 Ginsilingan ni Jesus ang iya mga disipulo: “Ang kamatuoran magahilway sa inyo.” (Juan 8:32) Sa karon, ang kamatuoran sang Biblia naghilway sa minilyon gikan sa mga doktrina sang Cristiandad. Ining minilyon nakatuon nga paagi sa halad nga gawad ni Cristo nga gin-aman ni Jehova, ang katawhan ‘pagahilwayon gikan sa pagkaulipon sa kaduluntan kag makaagom sing mahimayaon nga kahilwayan sang mga anak sang Dios.’ (Roma 8:19-22) Daw ano ka daku nga kahilwayan mangin amo ina—pagkabuhi sing dayon sa isa ka paraiso nga duta sa sulod sang nagakaigo nga mga dulunan nga ipahamtang sing mahigugmaon ni Jehova!—Isaias 25:6-8; ipaanggid ang Binuhatan 17:24-26.
18 Ang kahilwayan nga ginaagom karon sang mga Saksi ni Jehova, kag ginapaabot nga maagom sing bugana pa sa bag-ong sistema sang mga butang sang Dios, naghalin sa aton Dios, nga si Jehova. (2 Corinto 3:17) Indi ini depende sa bisan anong politikal ukon rebolusyonaryo nga kahublagan. (Santiago 1:17) Agod indi masal-an sa sini nga punto, ang mga badge para sa kombension sang 1991 nga gintakod sang mga Saksi ni Jehova sa pila ka pungsod sang Sidlangan nga Europa nagaunod sing mga pulong nga “Mga Mahigugmaon sang Diosnon nga Kahilwayan nga Distrito nga Kombension” sa baylo sang “Mahigugmaon sang Kahilwayan” lamang.
Mainit nga Gugma Para kay Jehova
19. Paano ang pagkasuod kay Jehova paagi sa pangamuyo makapabaskog sa aton?
19 Ang aton gugma kay Jehova kag ang aton pagsalig sa iya magatiklod sa aton nga magpabilin sing suod sa iya sa pangamuyo. Ini nga pagkasuod kay Jehova amo ang nakabulig sa aton kauturan nga batason ang madamo nga kabudlayan kag paghingabot. (Salmo 25:14, 15) Sa tion sang iya pinakamabudlay nga pagtilaw, ginhuptan ni Jesus ang iya pagkasuod sa iya Amay paagi sa pangamuyo. (Lucas 22:39-46) Ining pagkasuod kay Jehova paagi sa pangamuyo amo ang nagpabaskog kay Esteban sa iya pag-antos subong martir. Sang buot na sia batuhon tubtob kamatayon nagtangla sia sa langit, kag nagsiling: “Yari karon! Nakita ko ang mga langit nga nabuksan kag ang Anak sang tawo [Jesus] nga nagatindog sa tuo nga kamot sang Dios.”—Binuhatan 7:56.
20-22. Paano ginailustrar sang isa ka eksperiensia nga ginapamatian sang Dios ang mga pangamuyo?
20 Subong masami nga naeksperiensiahan sang mga sumilimba ni Jehova, ginasabat ni Jehova ang mga pangamuyo nga nahisanto sa iya kabubut-on. Halimbawa, sa isa ka pungsod sang Aprika nga sa diin ang hilikuton sang mga Saksi ginadumilian, ang isa ka espesyal nga payunir nga nagalakbay padulong sa aminhan paagi sa bus may inugdul-ong nga isa ka daku nga sako sang literatura sang Ginharian kag mga sobre. Ang konduktor nga nagapasaka sang mga kargamento sa bus namangkot sa utod: “Ano ang unod sang sako?” Ang utod nagsiling nga ang una nga butang nga nagsulod sa iya hunahuna amo: “Mga sulat.”
21 Sa dalanon, ang bus madasig nga naglabay sa rutina nga checkpoint sa dalan kag gani ginlagas sang mga pulis sang trapiko ang bus kag ginpadulog ini, nagasuspetsa nga may karga ini nga kontrabando. Ginpapanaug nila sa bus ang tanan nga pasahero kag gin-usisa ang tanan nga kargamento. Makahaladlok yadto nga tion! Ang utod nagpalayo sa nagakinumod nga kadam-an kag, nangamuyo kay Jehova nga nagaluhod. Sang magbalik sia sa kadam-an, ang kargamento sang tagsa ka manuglakbay ginabuksan kag ginausisa sing mauti. Sang buot na buksan ang sako sang utod, hipos nga nangayo sia sing bulig kay Jehova.
22 “Kay sin-o ini sako, kag ano ang unod sini?” singgit sang pulis. Antes makasabat ang utod, ang konduktor sang bus nagsabat kag nagsiling: “Mga sulat halin sa isa ka — post office padulong sa —lain nga post office.” “Maayo gid,” sabat sang pulis. Ginhakwat niya ang sako kag gindaho ini sa konduktor. “Pat-ura nga ibutang ini sa sigurado nga lugar,” siling niya. Ang espesyal payunir nagluhod liwat agod pasalamatan ang Manugpamati sa pangamuyo.—Salmo 65:2; Hulubaton 15:29.
23. Ano ang ginpasundayag ni Jehova, apang ngaa kon kaisa ginatugutan niya ang paghingabot nga tapuson ang bug-os nga dalanon sini?
23 Apang, wala ini nagakahulugan nga ang mga sumilimba ni Jehova hilway sing bug-os gikan sa mga kalamidad. Sa pila ka mga kahimtangan, sa panahon sang Biblia kag sa karon, ginpasundayag ni Jehova nga sarang niya maluwas ang iya katawhan. Apang nahisanto sa paghusay sang hulusayon tuhoy sa integridad, kon kaisa ginatugutan niya ang paghingabot nga tapuson ang bug-os nga dalanon sini. (Ipaanggid ang Mateo 26:39.) Dugang pa, indi awtomatiko nga ginaamligan ni Jehova ang iya katawhan gikan sa mga aksidente, ginamo sang mga tawo, ukon krimen, apang ang pagpakita sing praktikal nga kaalam nga napasad sa Biblia mahimo mangin mapuslanon. (Hulubaton 22:3; Manugwali 9:11) Apang, makasalig kita, nga luwason man kita ukon indi gikan sa mabudlay nga mga kahimtangan, ang aton katutom pagapadyaan, bisan sing pagkabanhaw kon kinahanglanon.—Mateo 10:21, 22; 24:13.
24. Anong mahigugmaon nga mga dulot ang gin-aman ni Jehova, kag paano naton mabalusan ang iya gugma?
24 Daw ano ka dalayawon ang mahigugmaon nga mga dulot ni Jehova! Ang duta kag ang tanan sa sini nga gindulot niya sa katawhan isa ka talalupangdon nga pagpabutyag sang iya gugma. (Salmo 104:1, 13-16; 115:16) Kag ang maluluy-on nga pagdulot sang Dios sa iya Anak, nga si Jesucristo, agod gawaron ang katawhan gikan sa sala kag kamatayon amo ang labing mahigugmaon nga dulot nga nahatag. “Paagi sa sini ginpahayag sa aton ang gugma sang Dios, kay ginpadala sang Dios sa kalibutan ang iya bugtong nga Anak agod nga magkabuhi kita paagi sa iya. Sa sini amo ang gugma, indi nga ginhigugma ta ang Dios, kundi nga ginhigugma niya kita kag ginpadala ang iya Anak nga katumbasan sang aton mga sala.” (1 Juan 4:9, 10) Bilang balos sa sini nga gugma, kabay nga makombinsi kita “nga ang kamatayon ukon kabuhi ukon mga anghel ukon mga gobierno ukon mga butang nga sa karon ukon mga butang nga palaabuton ukon mga gahom ukon kataasan ukon kadadalman ukon bisan ano nga iban nga tinuga indi sarang makapahamulag sa aton gikan sa gugma sang Dios nga yara kay Cristo Jesus nga aton Ginuo.”—Roma 8:38, 39.
Sa Pagrepaso Sining Artikulo
◻ Ano ang kahulugan sang magmatutom?
◻ Sa anong mga bahin sang hilikuton mapasundayag naton ang gugma kay Jehova?
◻ Sa anong mga bahin sang tuigan nga report sang pag-alagad nangin interesado ikaw sing labi?
◻ Paano naton mapakita ang apresasyon sa mahigugmaon nga mga dulot ni Jehova?
[Kahon sa pahina 15]
NGAA KADAMO GID SANG MGA PAYUNIR?
Suno sa report, sa sulod sang 2,600 ka tuig ang mga Hapones mainit nga mga sumilimba sa ila mga emperador. Sa mga inaway sining ika-20 nga siglo lamang, kapin sa tatlo ka milyon ka Hapones nga mga lalaki nga nakig-away ang naghalad sang ila kabuhi, kay nagdumdom sila nga wala sing kadungganan nga daku pa sa pagpanginmatay para sa ila emperador nga dios. Apang ang Budhista-Shinto nga militarismo napaslawan sa Inaway Kalibutanon II, kag sa tapos sini ginsikway sang emperador ang iya pagkadios. Ano ang nagpuno sining relihioso nga pagkawalay unod? Sing makalilipay, ang mga pagtuon sa Biblia sa puluy-an nga gindumalahan sang mga misyonero sang mga Saksi ni Jehova kag sang ulihi sang tumandok nga mga Saksi nakabulig sa madamo nga makita ang matuod nga Dios, nga si Jehova, kag sa pagdedikar sang ila kabuhi sa iya. Ining pagdedikar nagakahulugan sing daku para sa Hapones nga mga Saksi. Kon sang una ginahalad nila ang ila kabuhi para sa isa ka emperador nga dios, daw ano pa ka daku nga kakugi nga ginahugod nila karon ang ila kusog subong mga payunir sa pagsimba sa buhi nga Dios kag Manunuga sang uniberso—ang Soberanong Ginuong Jehova!
[Tsart sa pahina 10-13]
REPORT 1991 NGA PAG-ALAGAD SANG MGA SAKSI NI JEHOVA SA BUG-OS KALIBOTAN
(Tan-awa ang tomo)
[Laragway sa pahina 16]
Mga mahigugmaon sa diosnon nga kahilwayan—mga sumilimba ni Jehova sa kombension sa Prague, Agosto 9-11, 1991