Nagapamati Bala ang Dios Kon Nagapangamuyo Ka?

ANG isa ka hepe nga ehekutibo nagapamat-od kon bala ipahimo niya sa iban ang isa ka butang ukon sia na lang ang magahimo sini. Sa kaanggid, ang Soberano nga Gumalahom sang uniberso may kinamatarong sa pagpat-od kon tubtob diin sia magapasilabot sa isa ka butang. Ang Kasulatan nagatudlo sa aton nga ginapakamaayo sang Dios ang magpasilabot sing personal sa aton mga pangamuyo kag busa nagasugo sa aton nga ipatuhoy ini sa iya.—Salmo 66:19; 69:13.

Ang pagpili sang Dios sa sining butang nagapakita sang iya personal nga interes sa mga pangamuyo sang iya tawhanon nga mga alagad. Sa baylo nga paluyahon ang buot sang iya katawhan sa pagpalapit sa iya sa tanan nga libog kag kabalaka, nagalaygay sia sa ila: “Magpangamuyo sa walay langan,” “magpadayon sing malig-on sa pangamuyo,” “itungtung kay Jehova ang imo lulan,” “magtugyan sang imo tanan nga paghimud-os sa [Dios].”—1 Tesalonica 5:17; Roma 12:12; Salmo 55:22; 1 Pedro 5:⁠7.

Kon ang Dios indi luyag magpamati sa mga pangamuyo sang iya mga alagad, kuntani wala sia maghimos sina nga pagpalapit sa iya kag magpalig-on sang hilway nga paggamit sini. Kon amo, ining pagpili sang Dios nga himuon ang iya kaugalingon nga madali mapalapitan sang iya katawhan, isa ka rason para magsalig nga nagapamati gid sia. Huo, ginabinagbinag niya ang tagsa ka pangamuyo sang iya mga alagad.

Indi mapasapayanan ang katunayan nga ang Biblia maathag nga nagasiling nga ang Dios nagapamati sa pangamuyo. Si apostol Juan, halimbawa, nagasulat: “Ini amo ang pagsalig naton sa iya, nga kon magpangayo kita sing bisan anong butang suno sa iya kabubut-on, nagapamati sia sa aton.” (1 Juan 5:14) Ginpatuhuyan ni Hari David si Jehova nga Dios subong “Nagapamati sang pangamuyo” kag masaligon nga nagsiling: “Sia magapamati sang akon tingog.”—Salmo 55:17; 65:2.

Gani samtang ang buhat sang pagpangamuyo pat-od gid nga may mga kaayuhan sa iya kaugalingon, ginapakita sang Kasulatan nga labi pa ang nadalahig kon ang isa ka matarong nga tawo nagapangamuyo. May isa nga nagapamati. Ina sia amo ang Dios.—Santiago 5:16-18.

Mga Pangamuyo nga Ginpamatian

Ang Biblia may madamo nga sugilanon nahanungod sa mga tawo nga ang ila mga pangamuyo, sa katunayan, ginpamatian kag ginsabat sang Dios. Ang ila mga eksperiensia maathag nga nagapalig-on nga ang mga benepisyo sang pangamuyo nagalabaw pa sa nagaayo nga epekto sang paghibalo kag pagpabutyag sang panghunahuna. Nagalabaw ini sa personal nga mga panikasog sang isa ka tawo nahisuno sa iya mga pangamuyo.

Halimbawa, sang naghimbon si Absalom agod agawon ang pagkahari sa Israel, si Hari David nagpangamuyo: “O Jehova, ginaampo ko sa imo, lisu-a sa kabuangon ang laygay ni Ahitofel [manuglaygay ni Absalom]!” Indi ini isa ka diutay nga pangabay, kay “ang laygay ni Ahitofel . . . subong nga nagapamangkot ang tawo sa pulong sang matuod nga Dios. Amo ini ang tanan nga laygay ni Ahitofel.” Pagkatapos sadto ginsikway ni Absalom ang ginpanugda ni Ahitofel nga estratehiya sa pagpukan kay Hari David. Ngaa? “Si Jehova nagtangdo sa paglutos sang maayo nga laygay ni Ahitofel, sa katuyuan nga si Jehova makadala sing malaut kay Absalom.” Sing maathag, ang pangamuyo ni David ginpamatian.—2 Samuel 15:31; 16:23; 17:14.

Sa kaanggid, sang nagpakiluoy si Ezequias sa Dios nga ayuhon sia sa iya balatian, nag-ayo sia. Bangod lamang bala ini sang mga benepisyo sa hunahuna kay Ezequias subong resulta sang pagpangamuyo? Indi, sa pagkamatuod! Ang mensahe ni Jehova kay Ezequias, nga ginhatag ni manalagna Isaias, amo: “Ginpamatian ko ang imo pangamuyo. Nakita ko ang imo mga luha. Yari karon, ayuhon ko ikaw.”—2 Hari 20:1-6.

Si Daniel, nga ang pangamuyo ginsabat sang ulihi na sang sa ginpaabot niya, ginpasalig sang manugtunda ni Jehova: “Ginpamatian ang imo mga pulong.” Ang mga pangamuyo sang iban, subong sang kay Ana, sang mga disipulo ni Jesus, kag sang opisyal sang hangaway nga si Cornelio, ginsabat sa mga paagi nga indi mapadungog sa tawhanon nga ikasarang lamang. Nian, ang Biblia maathag nga nagatudlo nga ang mga pangamuyo nga nahisuno sa balaan nga kabubut-on ginbaton, ginpamatian, kag ginsabat sang Dios.—Daniel 10:2-14; 1 Samuel 1:1-20; Binuhatan 4:24-31; 10:1-7.

Apang paano ginasabat sang Dios ang mga pangamuyo sang iya matutom nga mga alagad karon?

Mga Sabat sa mga Pangamuyo

Ang mga pangamuyo nga ginsambit sa ibabaw ginsabat sa dramatiko kag milagruso nga mga paagi. Apang, dumduma palihog, nga bisan sang panahon sang Biblia, ang labi kasunson nga mga sabat sa mga pangamuyo wala sa gilayon mahantop. Ina bangod may kaangtanan ini sa paghatag sing moral nga kusog kag kasanag, nagabulig sa mga alagad sang Dios sa paglakat sa matarong nga dalanon. Labi na para sa mga Cristiano, ang mga sabat sa mga pangamuyo nagahilabot sa mga butang nga espirituwal, indi makatilingala ukon gamhanan nga mga buhat.—Colosas 1:9.

Gani, indi magkasubo kon ang imo mga pangamuyo wala pirme ginasabat sa paagi nga ginapaabot ukon ginapakamaayo mo. Halimbawa, sa baylo nga kuhaon ang isa ka pagtilaw, mahimo pakamaayuhon sang Dios nga hatagan ka sing “gahom nga labaw sa kinaugali” agod mabatas ini. (2 Corinto 4:7; 2 Timoteo 4:17) Indi gid naton dapat pakadiutayon ang kabilihanan sina nga gahom, ukon dapat kita maghinakop nga wala gid ginasabat ni Jehova ang aton pangamuyo.

Binagbinaga ang natabo sa Anak sang Dios, nga si Jesucristo. Sa iya kabalaka nga indi mapatay subong isa ka daw manugpasipala, si Jesus nangamuyo: “Amay, kon buot mo, ipahilayo sa akon ining tagayan.” Ginsabat bala sang Dios ini nga pangamuyo? Huo, subong sang ginapalig-on sang Hebreo 5:⁠7. Wala ginkuha ni Jehova sa iya Anak ang kinahanglanon nga mapatay sia sa usok sang pag-antos. Sa baylo, “nagpahayag sa iya ang isa ka manugtunda gikan sa langit, nga nagpabakud sa iya.”—Lucas 22:42:43.

Isa bala ka dramatiko kag milagruso nga sabat? Para sa bisan sin-o sa aton, daw amo gid! Apang kay Jehova nga Dios, ang ginhalinan sina nga gahom, indi ini milagro. Kag si Jesus, kutob sa iya maaga nga pagkabuhi sa langit, nakahibalo sang nagligad nga mga hitabo nga ang mga manugtunda nagpahayag sa mga tawo. Gani ang pagpahayag sang isa ka manugtunda mahimo nga wala sing dramatiko nga epekto sa iya kasubong sang sa aton. Apang, ining manugtunda, nga ayhan kilala sing personal ni Jesus kutob sang Iya wala pa nangin tawo nga pagkabuhi, nagbulig sa pagpabakud sa Iya para sa pagtilaw nga yara lamang sa unahan.

Sa pagsabat sang mga pangamuyo sang iya matutom nga mga alagad karon, si Jehova masunson nagahatag sang kinahanglanon nga kabakud sa pagbatas. Ini nga pagsakdag mahimo nga sa dagway sang pagpalig-on gikan sa mga masigkasumilimba nga upod sa ila kita personal nga nagapakig-upod. May yara bala sa aton nga indi magabaton sina nga pagpalig-on, ayhan nagahinakop nga bangod ang aton mga masigkaalagad wala nakaeksperiensia sing mga pagtilaw nga kaanggid sang sa aton, wala sila sa posisyon nga magpabakud sa aton? Mahimo kuntani nga amo sina ang ginhunahuna ni Jesus sa manugtunda nga nagpahayag sa iya. Sa baylo, ginbaton niya ang pagpalig-on subong sabat ni Jehova sa iya pangamuyo kag gani nahimo niya sing matutom ang kabubut-on sang iya Amay. Luyag man naton batunon sing mainayuhon ang kabakud nga ginahatag sang Dios bilang sabat sa aton mga pangamuyo. Dumduma, man, nga inang mga panag-on sang mapailubon nga pagbatas masunson nga ginasundan sang dimasugid nga mga pagpakamaayo.—Manugwali 11:6; Santiago 5:11.

Magsalig nga ang Dios Nagapamati

Indi pagdulaa ang pagsalig sa pagkaepektibo sang pangamuyo kon wala ka ginasabat sa gilayon. Ang sabat sa iban nga mga pangamuyo, subong sang para sa personal nga paumpaw gikan sa kasisit-an ukon para sa dugang nga responsabilidad sa pag-alagad sa Dios, mahimo magahulat sa tion nga nahibaluan sang Dios nga husto kag labing maayo. (Lucas 18:7,8; 1 Pedro 5:6) Kon nagapangamuyo ka nahanungod sa isa ka butang nga personal mo nga ginakabalak-an sing daku, ipakita sa Dios paagi sa imo pagkamapadayunon nga ang imo handum daku, ang imo motibo putli kag tunay. Ginpakita ni Jacob ini nga espiritu sang, sa tapos makigdumog sing malawig sa isa ka manugtunda, nagsiling sia: “Indi ko ikaw pagbuhian kon indi mo ako pagpakamaayuhon.” (Genesis 32:24-32) May kaanggid kita nga pagsalig nga kon padayon kita sa pagpangayo, magabaton kita sing pagpakamaayo sa natalana nga tion.—Lucas 11:9.

Isa ka katapusan nga panghunahuna. Agod pamatian sang Soberano sang uniberso, isa ini ka hamili nga pribilehiyo. Bangod sini, nagapamati bala kita sing maayo kon si Jehova nga Dios, paagi sa iya Pulong, nagasugid sa aton sang iya mga kinahanglanon? Subong nga ang aton mga pangamuyo nagapasuod sa aton sing labi sa Manunuga, luyag naton hatagan sing hanuot nga igtalupangod ang tanan nga ginasiling niya sa aton.

[Laragway sa pahina 6]

Ang Dios nagapamati sa mga pangamuyo. Nagapamati bala kita sa iya paagi sa iya Pulong?