Si Jehova Nag-atipan sa Amon sa Tion sang Pagdumili—Bahin 3
MARSO 14, 1990 ini sadto. Sadtong importante katama nga adlaw, isa ako sang yadto didto sang gindaho sang mataas nga opisyal sang gobierno sa Ministry for Religious Affairs sa Sidlangan nga Berlin ang dokumento nga nagahatag sing legal nga pagkilala sa mga Saksi ni Jehova sa ginatawag sadto anay nga German Democratic Republic, ukon Sidlangan nga Alemanya. Sa mga hitabo sadto nga adlaw, gindumdom ko liwat ang tion nga nangin isa ako ka Saksi kag ginhunahuna ang mabudlay nga mga tion nga naagihan namon.
Sang tungatunga sang mga katuigan 1950, sang si Margarete, isa ka kaupod sa trabaho nga isa ka Saksi, nagsugid primero sa akon nahanungod sa iya napasad sa Biblia nga mga pagtuluuhan, ang paghingabot sa mga Saksi ni Jehova sa Sidlangan nga Alemanya grabe katama. Dili madugay pagkatapos sadto naghalin sia agod magtrabaho sa iban nga lugar, kag nagsugod ako sa pagtuon sa Biblia upod sa iban nga Saksi. Natugmawan ako sang 1956, kag nagpakasal kami ni Margarete sadto man nga tuig. Nakig-upod kami sa Lichtenberg Congregation sa Berlin. Mga 60 ka manugbantala sang Ginharian ang nagapakigbahin sadto anay sa pagbantala nga hilikuton.
Duha ka tuig pagkatapos ako nabawtismuhan, ang mga opisyal sang gobierno nagduaw sa balay sang isa nga nagapanguna sa amon kongregasyon. Tuyo nila nga dakpon sia, apang didto sia sa trabaho sa Katundan nga Berlin. Napasidaanan sia sang iya pamilya nga magpabilin didto, kag mga pila ka bulan sang ulihi nagkadto man sila sa Katundan. Bisan pa 24 anyos lamang ako, ginhatagan ako sadto sing mabug-at nga mga responsabilidad sa kongregasyon. Nagapasalamat ako nga si Jehova nagahatag sing kaalam kag kabakud nga kinahanglanon agod matatap ina nga katungdanan.—2 Corinto 4:7.
Pag-aman sing Espirituwal nga Pagkaon
Sang gintukod ang Pader sang Berlin sang Agosto 1961, ang mga Saksi ni Jehova sa Sidlangan hinali nga nahamulag sa ila mga kauturan sa Katundan. Busa nagsugod ang panag-on nga naghimo kami sing mga kopya sang amon literatura, una paagi sa makinilya, nian paagi sa mga makina sa pagduplikar. Sugod sang 1963, naghinguyang ako sing duha ka tuig sa paghimo sing lugar nga palanaguan sa amon balay agod himuon ini nga pag-imprinta. Pagligad sang bilog-adlaw nga pagtrabaho subong manughimo sing kagamitan, nagahinguyang ako sing mga gab-i sa paghimo sang mga kopya sang Ang Lalantawan sa bulig sang iban nga mga kauturan. Ang mga awtoridad nanikasog nga mahibaluan ang pagpanghikot sang amon organisasyon sa pag-imprinta, apang ginbuligan kami ni Jehova agod ang amon pagkaon, subong sang pagtawag namon, magaabot sing husto sa tion.
Ang paghimo sing bastante nga kopya sang amon magasin nagkinahanglan sing madamo nga papel, kag indi ini mahapos kuhaon. Kon pirme kami magbakal sing binulto nga papel, magaganyat ini sang igtalupangod sang awtoridad. Busa ginapabakal namon ang indibiduwal nga mga Saksi sing tagdiutay nga papel kag ginadala ini sa amon grupo nga pagtuon sang Biblia. Halin diri ginadala ini sa ginahimuan namon sang magasin. Nian ginapanagtag sang mga Saksi ang natapos na nga mga magasin.
Bangod nagsuspetsa ang mga opisyal nga may labot ako sa pag-imprinta sang literatura, ginabantayan nila ako sing maayo. Sang talipuspusan sang 1965, nadiparahan ko nga ginasundan nila ako sing labi sa kinaandan kag nabatyagan ko nga may ginaplano sila. Sa hinali, nagsalakay sila isa ka kaagahon.
Diutayan Lang Madakpan
Manugpakadto na ako sa trabaho sadtong matugnaw nga aga. Wala pa ang kaagahon, kag daw makusog ako sa katugnaw. Samtang nagalakat, namulalungan ko ang apat ka ulo sa ibabaw sang mga tanum. Ang mga tawo nagliko sa bangga kag nagpadulong sa akon. Sa akon kahadlok nakilala ko sila subong mga opisyal sang gobierno. Ano ang himuon ko?
Ang mga yelo ginkahig sa higad agod may mabilin nga makitid nga banas. Padayon ako sa paglakat. Nagadungok, gintuon ko ang akon mga mata sa duta. Nangamuyo ako sing maabtik. Nagalapit kag nagalapit sila. Nakilala bala nila ako? Sang nagsugat-anay kami sa makitid nga banas, daw indi ako makapati sa natabo. Padayon ako nga naglakat sing madasig pa. “Aba,” singgit sang isa sa ila, “sia ina. Dulog!”
Madasig ako nga nagdalagan sa masarangan ko. Pagliko sa bangga, ginlumpat ko ang kudal sang amon kaingod kag naglusot sa amon ugsaran sa likod. Dalidali pasulod sa balay, gintrangkahan kag ginkandaduhan ko ang puwertahan. “Bangon kamo tanan!” singgit ko. “Dakpon nila ako.”
Dalidali nga nagkadto si Margarete sa idalom sang balay kag nagpuwesto sa puwertahan. Sa makadali didto ako sa bodega sang idalom-balay nga nagasindi sang kalan. Ginkuha ko ang tanan nga rekord sang kongregasyon kag ginsunog ini.
“Buksi kami!” singgit sang mga lalaki. “Buksi ang puwertahan! Piskal ini.”
Wala maghulag si Margarete samtang ginsunog ko sing maayo ang tanan. Nian ginbuylugan ko si Margarete kag nagsinyas sa iya nga buksan ang puwertahan. Ang mga lalaki nagsulod sa balay.
“Ngaa nagdalagan ka?” pamangkot nila.
Dili madugay nag-abot ang madamo pa nga opisyal sang gobierno, kag ginlighot ang bilog nga balay. Ang akon ginakabalak-an sing daku amo ang lugar nga palanaguan diin didto ang amon makina sa pag-imprinta kag ang 40,000 ka panid sang papel. Apang ang tago nga puwertahan wala makita. Bisan pa ang interogasyon nagpadayon sing inoras, si Jehova nagbulig sa akon nga magkalma. Yadto nga eksperiensia labi nga nagpasuod sa amon sa amon mahigugmaon nga langitnon nga Amay kag nagpabakud sa amon nga magbatas.
Nabilanggo Apang Nahilway
Sang talipususan sang katuigan 1960, ginpareport ako para magsoldado. Bangod wala ginatugot sang akon konsiensia nga magsoldado, napilitan ako nga maghinguyang sing pito ka bulan sa bilangguan kag sa kampo sa pagpangabudlay. May 15 ka Saksi sa kampo sa Cottbus, bagatnan-sidlangan sang Berlin. Kami tanan nabilanggo bangod sang amon Cristianong pagkawalaynadampigan. (Isaias 2:2-4; Juan 17:16) Ang amon adlaw sa pagtrabaho malawig kag mabudlay. Nagabugtaw kami sing alas 4:15 s.a. kag ginadala sa guwa sang kampo sa pagtrabaho sa mga riles sang tren. Apang, samtang bilanggo, may kahigayunan kami nga ibantala sa iban ang tuhoy sa Ginharian ni Jehova.
Halimbawa, kaupod namon sa Cottbus ang duha ka manugpakot sang palaabuton. Isa ka adlaw nabalitaan ko nga ang batabata diutay luyag gid makigsugilanon sa akon. Ano ang luyag niya? Ginpautwas niya ang tanan. Ang iya lola madugay na nga manugpakot sang palaabuton, kag nakuha man niya ang kaanggid nga gahom sang mabasa niya ang mga libro sang iya lola. Bisan pa luyag niya nga magbulag sa gahom nga nagaulipon sa iya, nahadlok sia sa mga gaba. Naghibi sia. Apang ano ang labot sini sa akon?
Sa amon paghambalanay, ginsugid niya nga ang ikasarang niya sa paghibalo sang palaabuton nauntat sang nakaupod niya ang mga Saksi ni Jehova. Ginpaathag ko sa iya nga may yara malain nga mga espiritu, ukon mga demonyo, kag mga maayo, ukon matarong nga mga anghel. Naggamit sang halimbawa sang mga nangin Cristiano sa Efeso anay, ginpadaku ko ang kinahanglanon nga dulaon ang tanan nga butang nga may kaangtanan sa pagpakot sang palaabuton ukon iban pa nga espiritistiko nga buhat. (Binuhatan 19:17-20) “Nian makigsugilanon ka sa mga Saksi,” siling ko sa iya. “May mga Saksi bisan diin.”
Ang pamatan-on naghalin sa kampo mga pila ka adlaw sang ulihi, kag wala na ako sing nabalitaan tuhoy sa iya. Apang ang eksperiensia upod sadtong nahadlok kag dimapahalipay nga tawo nga naghandum sing kahilwayan nagpatudok sang akon gugma kay Jehova. Kami nga 15 ka Saksi yadto didto sa kampo tungod sang amon pagtuo, apang hilway kami sa espirituwal nga paagi. Yadtong pamatan-on ginhilway sa bilangguan, apang naulipon gihapon sia sa “isa ka dios” nga ginakahadlukan niya. (2 Corinto 4:4) Dapat gid naton nga mga Saksi pakabahandion ang aton espirituwal nga kahilwayan!
Ang Amon Kabataan Gintilawan
Indi lamang mga adulto ang kinahanglan magtindog nga malig-on para sa ila napasad sa Biblia nga pagpati kundi ang mga kabataan man. Gin-ipit sila nga magkompromiso sa eskwelahan kag sa ulubrahan. Ang apat namon ka kabataan dapat maghimo sing tindog tungod sa ila pagtuluuhan.
Ang seremoniya sa pagsaludo sa bandera ginahiwat sa eskwelahan kada Lunes. Ang mga kabataan nagalinya sa ugsaran, nagakanta, kag nagahimo sang ginatawag nga Thälmann nga saludo samtang ginapasaka ang bandera. Si Ernst Thälmann isa anay ka Aleman nga Komunista nga ginpatay sang Nazi SS sang 1944. Pagkatapos sang ikaduhang inaway kalibutanon, si Thälmann nangin baganihan sa Sidlangan nga Alemanya. Bangod sang amon napasad sa Biblia nga pagtuo nga ang balaan nga pag-alagad dapat lamang himuon kay Jehova nga Dios, gintudluan namon nga mag-asawa ang amon mga kabataan nga magtindog sing matinahuron sa sinang seremoniya nga wala nagapakigbahin.
Ang nagaeskwela nga mga kabataan gintudluan sang mga kanta sang Komunista. Nagkadto kami ni Margarete sa eskwelahan sang amon mga kabataan kag ginpaathag kon ngaa indi sila makaamba sinang politikal nga mga kanta. Apang, nagsiling kami nga handa sila nga magtuon sang iban nga sahi sang mga kanta. Busa, sa bata pa, ang amon mga kabataan nakatuon sa pagtindog nga malig-on kag nangin tuhay sa ila mga katubotubo.
Sang talipuspusan sang katuigan 1970, ang amon kamagulangan nga babayi luyag mag-aprentis sa isa ka opisina. Apang, ang tagsa ka aprentis dapat anay mag-agi sa 14 ka adlaw nga paghanas sa militar. Bangod ang konsiensia ni Renate wala nagatugot sa iya nga makigbahin sa sini, naghimo sia sing maisog nga tindog kag sang ulihi wala na pagpakuhaa sina nga paghanas.
Samtang nagaaprentis, si Renate nagkadto sa isa ka klase diin gintawag sia nga magtambong sa praktis sa pagtiro. “Renate, magakadto ka man sa praktis sa pagtiro,” siling sang maestro. Indi sia mamati sa paathag ni Renate. “Indi ka magatiro,” panaad niya. “Magahanda ka lamang sang pamahaw.”
Sadto nga gab-i, ginhambalan namon ini subong isa ka pamilya. Pamatyag namon, ang presensia ni Renate sa praktis sa pagtiro sala, bisan pa indi sia direkta nga makigbahin. Napabakud bangod sang pagpakigsugilanon sa amon kag bangod sang pangamuyo, wala sia magpadala sa pamahog. Daw ano nga kalipay para sa amon nga makita ang amon bataon nga anak nga babayi nga maghimo sing tindog para sa matarong nga mga prinsipio!
Pagpauswag sang Amon Publiko nga Pagbantala nga mga Hilikuton
Sang nag-ugdaw ang pagpamatok sa amon hilikuton sang talipuspusan sang katuigan 1970, madamong suplay sang amon Cristianong mga publikasyon ang ginpadala halin sa Katundan. Bisan pa delikado ini, ang maisog nga mga utod nga lalaki nagboluntaryo. Gin-apresyar namon sing daku ining madamong suplay sang literatura kag ang panikasog sadtong mga nagpaposible sini. Sang ang paghingabot malisud katama sadtong naunang tinuig sang pagdumili, ang pamalaybalay nga pagbantala nga hilikuton isa gid ka hangkat. Sa katunayan, ang kahadlok nga silutan nagdul-ong sa iban sa pag-untat. Apang sang ulihi ang amon publiko nga pagbantala nag-uswag sing amat-amat. Sang katuigan 1960, mga 25 porsiento lamang sang mga manugbantala sang Ginharian ang nakigbahin sa pamalaybalay nga pag-alagad sing tayuyon. Apang, ang kadamuon sang tayuyon nga nagapakigbahin sa sinang bahin sang ministeryo nagsaka sa 66 porsiento sang talipuspusan sang katuigan 1980! Sadto nga tion wala na ginasapak sang mga awtoridad ang amon publiko nga pagbantala nga hilikuton.
Sang isa ka bes gindala sang utod nga lalaki nga kaupod ko sa ministeryo ang iya bata nga babayi. Nalipay sa pag-upod sang bata, ginpasulod kami sang isa ka tigulang nga babayi nga nasugilanon namon sa iya balay. Ginpasalamatan niya ang amon Makasulatanhon nga presentasyon kag nagpasugot nga duawon sia liwat. Ginhatag ko ini sa akon asawa, nga gilayon nga nakaumpisa sing pagtuon sa Biblia upod sa babayi. Walay sapayan sang katigulangon kag mapigaw nga panglawas, nangin utod namon sia kag padayon nga aktibo sa pag-alagad kay Jehova.
Mga Pagbag-o Samtang Nagahilapit ang Kahilwayan
Si Jehova naghanda sa amon para sa tion nga magaagom kami sing daku pa nga kahilwayan. Halimbawa: Antes lamang ginkuha ang pagdumili, ginlaygayan kami nga islan ang paagi sang amon pagtawganay sa mga miting. Tungod sa rason sa seguridad, nagtawganay kami anay paagi lamang sa amon ngalan. Madamo sang magkilalahay sing tinuig na ang wala makahibalo sang apelyido sang masigkatumuluo. Apang, agod ihanda kami sa pag-abiabi sa madamo pa nga interesado sa amon miting, ginpalig-on kami nga magtawganay paagi sa apelyido. Para sa iban daw masaw-a ini, apang yadtong nagsunod sa laygay mas mahapos nga nakapasibu sang ulihi sang natigayon namon ang amon kahilwayan.
Ginpalig-on man kami nga sugdan ang amon mga miting sing ambahanon. Sa sining paagi amat-amat kami nga naanad sa paagi nga ginahimo sa mga kongregasyon bisan diin. Ang isa pa ka pagbag-o amo ang kadakuon sang amon grupo sa pagtuon. Amat-amat ini nga nagdugang halin sa apat ka tawo sang katuigan 1950 tubtob sa walo. Sang ulihi nagdugang ini sa 10 kag sang ulihi sa 12. Dugang pa, ginhimo ang pagtuon sa sitwasyon agod siguruhon nga ang lugar nga ginamitingan para sa tagsa ka kongregasyon nahamtang malapit sa kalabanan nga mga Saksi.
Kon kaisa nakita lamang namon ang kaalam sang ginpanugda nga pagbag-o pagligad lamang nga nahimo ini. Daw ano kasunson nga ginpakita ni Jehova ang iya kaugalingon nga maalam kag mapatugsilingon nga Amay! Sing amat-amat, ginbuligan niya kami nga mapahisanto sa iya dutan-on nga organisasyon, kag labi namon nga nabatyagan nga bahin kami sang bug-os kalibutan nga paghiliutod sang iya katawhan. Sa pagkamatuod, si Jehova nga Dios mahigugmaon nga nag-amlig sang iya katawhan sa halos 40 ka tuig nga nagpangabudlay sila sa tion sang pagdumili sa Sidlangan nga Alemanya. Daku gid ang amon kalipay karon nga matigayon ang legal nga pagkilala!
Sa karon, may 22,000 ukon kapin pa ka Saksi ni Jehova sa gintawag anay nga Sidlangan nga Alemanya. Saksi sila sa maalamon nga panuytoy kag mahigugmaon nga pagtatap ni Jehova nga Dios. Ang pagsupurta niya sa mga tuig nga ginadumilian kami nagapakita nga sarang niya makontrol ang bisan anong sitwasyon. Bisan ano man nga hinganiban ang gamiton batok sa iya katawhan, indi ini magamadinalag-on. Si Jehova pirme nagaatipan sa mga nagasalig sa iya. (Isaias 54:17; Jeremias 17:7, 8)—Panugiron ni Horst Schleussner.
[Laragway sa pahina 31]
Si Horst kag si Margarete Schleussner sa talatapan sang Sosiedad sa Sidlangan nga Berlin