Ang krus—Simbulo sang Cristianismo?

MGA siglo na nga ginabaton sang kadam-an ang krus subong simbulo sang Cristianismo. Apang matuod gid bala ini? Madamo sang hanuot nga nagapati nga matuod ini ang nakibot sa paghibalo nga ang krus indi pinasahi sa Cristiandad. Sa kabaliskaran, gingamit ini anay sing lapnag sang di-Cristiano nga mga relihion sa bug-os nga kalibutan.

Halimbawa, sang temprano nga bahin sang dekada 1500, samtang si Hernán Cortés kag ang iya “Cristianong” hangaway naghanda sa pagsalakay sa Emperyo sang Aztec, nagdala sila sing mga bandera nga nagasiling, “Sundon naton ang tanda sang Sagrado nga Krus sa matuod nga pagtuo, kay sa idalom sini nga tanda magadaug kita.” Ayhan nakibot sila sang nakita nila nga ang ila paganong mga kaaway nagsimba sa krus nga pareho sa ila. Ang libro nga Great Religions of the World nagasiling: “Si Cortés kag ang iya mga sumulunod nangil-ad sa mga paghalad sing tawo sang mga Aztec kag sa daw kaangay sang satanikong makahalam-ot nga pag-ilog sa Cristianismo: . . . pagsimba sa kaangay sang krus nga mga simbulo sang mga dios sang hangin kag ulan.”

Sa isa ka editoryal sang pamantalaan nga La Nación, ang manunulat nga si José Alberto Furque nagapaathag nga sa ikaduha nga katunga sang ika-18 nga siglo, nagsugod didto ang “mainit kag maakigon nga binais sa tunga sang mga antropologo kag mga arkeologo nahanungod sa mga ginhalinan kag kahulugan sang krus nga mga tanda” nga nakita nila sa madamo nga bahin sang Sentral kag Bagatnan nga Amerika. Maathag nga luyag gid sang pila nga amligan ang tindog sang krus subong “Cristiano” lamang nga simbulo sa bagay nga nagpanugda sila sing teoriya nga ang Amerika nangin Cristiano na antes sang paglakbay ni Columbus! Ining indi mapamatud-an nga opinyon ginsikway subong wala sing sadsaran.

Sang ulihi, ang dugang nga mga tukib may kaangtanan sini nagtapos sang mga binais. Si Furque nagasiling: “Sa isa ka libro nga ginbalhag sang 1893 sang Smithsonian Institution, ginpamatud-an nga ang krus ginasimba na anay . . . sa wala pa mag-abot ang unang mga Europeanhon sa Aminhan nga Amerika, nga nagapamatuod sa teoriya . . . nga ina nga simbulo nakita sa tanan nga mga komunidad subong bahin sang kulto nga pagsimba sang mga puwersa nga ginhalinan sang kabuhi.”

Ginapakita sang Biblia nga si Jesus wala mapatay sa ginakilala na nga krus kundi, sa isa lamang ka usok, ukon stau·rosʹ. Ining Griegong tinaga, nga makita sa Mateo 27:40, nagakahulugan gid sang isa ka simple nga tadlong nga kahoy ukon haligi, subong sang ginagamit sa mga pundasyon sang tinukod. Gani, ang krus wala gid nagalaragway sa matuod nga Cristianismo. Ginpakilala ni Jesucristo ang matuod nga simbulo, ukon “tanda,” sang matuod nga Cristianismo sang nagsiling sia sa iya mga sumulunod: “Sa sini ang tanan nga tawo makahibalo nga kamo mga gintutun-an ko, kon maghigugmaanay kamo.”—Juan 13:35.