Ginahimo Mo Bala ang Imo Bug-os nga Masarangan?

“HIMUON ko ang bug-os ko nga masarangan.” Pila gid ka beses nga ining mga pulong ginasundan sang “apang” kag sang malaba nga listahan sang mga balibad tungod sang indi pagpanikasog! Kamusta ang aton dedikasyon kay Jehova? Ginatuman bala naton ang aton saad nga himuon ang aton bug-os nga masarangan sa iya?

Ang pagdedikar nagakahulugan sang ‘paghugod sang kaugalingon sing eksklusibo sa pag-alagad ukon pagsimba sa balaan nga persona ukon sa sagrado nga mga kagamitan.’ Daku ang ginhimo ni Jesus agod ipakita kon ano ang nadalahig sa dedikasyon kay Jehova paagi sa pagsiling: “Kon sin-ong tawo ang buot magsunod sa akon, magsikway sia sang iya kaugalingon kag magpas-an sang iya usok sang pag-antos kag padayon nga magsunod sa akon.” (Mateo 16:24) Ang isa nga nagasikway sang iya kaugalingon kag nagdedikar sang iya kaugalingon sa Dios nagakabig sang paghimo sa balaan nga kabubut-on nga pinakaimportante nga tilinguhaon sa iya kabuhi.

Subong dedikado nga katawhan, dapat naton usisaon ang aton kaugalingon agod hibaluon kon bala nagakabuhi kita nahisanto sa aton dedikasyon. Ginpakita ni Pedro kon ngaa dapat naton usisaon ang aton kaugalingon sang ginlaygayan niya ang hinaplas nga mga Cristiano: “Himua ninyo ang inyo bug-os nga masarangan sa paglig-on sang pagkatinawag kag pagkapinili ninyo; kay kon padayon ninyo ini nga ginahimo indi gid kamo mapaslawan.” (2 Pedro 1:10) Huo, kon ginahimo naton ang aton bug-os nga masarangan, indi kita mangin espirituwal nga kapaslawan sa ulihi.

Ang Aton Bug-os nga Masarangan Mahimo Mapauswag

Sa mas masangkad nga kahulugan, ang tanan nga dedikado nga mga alagad sang Dios ginapaabot nga himuon nila ang ila bug-os nga masarangan, nga pahamut-an si Jehova. Apang, ang aton pagpanikasog nga himuon ang kabubut-on sang Dios mahimo magatubo. Para sa isa ka tres anyos nga bata nga lalaki, ang sugusuguon mahimo nga amo ang iya bug-os nga masarangan sa pagbulig sa iya iloy, apang samtang nagadaku sia, labi pa ang mahimo niya. Amo man sa aton espirituwal nga pagtubo​—⁠ang aton anay bug-os nga masarangan mahimo nga indi na karon. Ginapahulag kita nga himuon ang labi pa para kay Jehova.

Ang aton dugang nga apresasyon kay Jehova nagapalig-on sang aton kahanda sa paghimo sing labi. Ang pagpasalamat tungod sang ginhimo niya para sa aton ginapabakod paagi sa personal nga pagtuon sang iya Pulong, ang Biblia. Halimbawa, kon usisaon naton sing maayo kag pamalandungan kon paano ginpadala ni Jehova ang iya Anak sa paghatag sang iya kabuhi agod hilwayon ang katawhan gikan sa sala, ginapahulag kita nga alagaron ang Ginhalinan sang kahimusan sang gawad. (Juan 3:​16, 17; 1 Juan 4:​9-11) Kon labi nga aton ‘ginatilawan kag ginatan-aw nga si Jehova maayo,’ labi pa gid nga ang aton mga tagipusuon mapahulag sa pag-alagad sa iya.​—⁠Salmo 34:⁠8.

Nahibaluan ini sang bug-os tion nga ministro nga si Jetter. Agod mahibaluan sing labi pa kon ano ang iya ginatun-an, gintigana niya ang isa ka diutay nga hulot sa iya balay para sa sinang katuyuan. Gin-areglo niya ini agod makakonsentrar sia samtang nagapanalawsaw. May yara sia Watch Tow­er Publi­ca­tions In­dex­es subong man mga ­bound vol­ume sang The Watch­tow­er kag Awake! sa iya talaguan sing libro. “Kon makapanalawsaw ako sing makawiwili nga impormasyon,” siling niya, “nalangkag ako nga ipaambit ini sa iban.”

Apang, subong nga ang pagkaon sing bugana sa pulupanag-on wala nagakuha sa isa ka tawo sang adlaw-adlaw nga kinahanglanon nga magkaon sing regular, ang madalom apang kis-a lang nga pagpanalawsaw sa Biblia wala nagadula sang adlaw-adlaw nga kinahanglanon nga magkuha sing espirituwal nga pagkaon. Nahibaluan ni Ruth ini nga kinahanglanon, kay kutob sa madumduman niya, ang iya pamilya nagabasa sang Biblia sing dungan kada aga kag gab-i pagkatapos sang pagkaon. Karon, sa 81 anyos nga edad, nga nakahinguyang sing kapin sa 60 ka tuig sa bug-os tion nga pag-alagad, nagabasa gihapon sia sang Biblia sing tayuyon pagkabugtaw sa alas 6:00 s.a. Sa gilayon nga mabaton niya ang Lalantawan kag Magmata! nga mga magasin, ginabasa ini ni Ruth. Ginabasa niya ang artikulo sing dimagkubos tatlo ukon apat ka beses antes niya ini tun-an sa kongregasyon. “Ang pagtuon sang Pulong sang Dios amo ang ginakinahanglan ninyo sa pagpabilin nga makusog sa pagtuo,” siling niya. Nagbulig man ini sa iya nga magpadayon sa misyonero nga pag-alagad sa madamong tinu⁠ig.

Paghimo sang Aton Bug-os nga Masarangan sa Pagbulig sa Iban

Paagi sa madalom kag regular nga pagtuon sang Pulong sang Dios, ang aton kakugi sa pag-alagad sa Dios nagatubo, kag may butang sa sulod naton nga nagapalig-on sa aton nga maghimo sing labi pa. (Ipaanggid ang Jeremias 20:⁠9) Ina nga kakugi nagpahulag kay Hirohisa sa pagtuman sang iya ministeryo sing bug-os. (2 Timoteo 4:⁠5) Nagpuyo sia sa isa sing ginikanan nga puluy-an upod sang apat ka utod nga lalaki kag babayi. Samtang tin-edyer pa, ginbuhi ni Hirohisa ang iya pamilya paagi sa pagbugtaw sing alas tres sa kaagahon sa pagdul-ong sing mga pamantalaan. Luyag niya maghimo sing kapin pa sa pagsugid sa iban nahanungod kay Jehova, gani nag-aplay si Hirohisa nga magpayunir, subong amo ang pagtawag sa bug-os tion nga pag-alagad sang mga Saksi ni Jehova. Bisan bata pa, nalipay sia sa pagbulig sa iban nga magbuylog sa iya sa paghimo sang ila bug-os nga masarangan sa pagdayaw kay Jehova.

Ang paghimo sang aton bug-os nga masarangan sa pagbulig sa iban nagalakip sang pagkamangin epektibo sa aton ministeryo. Si Jesus naglaygay anay sa iya mga disipulo: “Kon nakahibalo kamo sining mga butang, malipayon kamo kon ginahimo ninyo ini.” (Juan 13:17) Si Naomi isa ka maayong halimbawa sa paghimo sang mga panugda nga ginahatag sang organisasyon ni Jehova agod mapauswag ang aton ministeryo. Nabudlayan sia makigsugilanon sa mga estranghero sa mga balay kag masami nga indi makahunahuna kon ano ang isiling samtang nagatindog sia sa mga ganhaan. Ang mga gulang sa kongregasyon naglaygay sa iya nga iaplikar ang mga panugda nga masapwan sa libro nga Reasoning From the Scriptures, sa seksion nga “Intro­ductions for Use in the ­Field Min­is­try.”⁠a Ginsaulo niya ang mga introduksion sa ubos sang tig-ulo nga “Fam­ily/Chil­dren” kag gin-ensayo ini sa madamong beses. Subong resulta, nasugilanon niya ang isa ka ginang sa puluy-an nga mga treintahon ang edad. Bisan sa wala pa makaduaw liwat si Naomi, ining babayi nagkadto sa Kingdom Hall. Isa ka pagtuon sa Biblia ang ginhimos. Ang ginang sa puluy-an kag ang iya bana bawtismado na karon nga mga Cristiano, nga nagaagom sing malipayon nga pagkabuhi sang pamilya kaupod sang ila kabataan.

Paghimo sang Aton Bug-os nga Masarangan sa Pagpakita sing Personal nga Interes

Sarang man naton mailog si apostol Pablo, nga nagsiling: “Ginahimo ko ang tanan nga butang tungod sa maayong balita, agod nga mapaambit ko ini sa iban.”​—⁠1 Corinto 9:​22, 23.

Si Hatsumi nagapakita sining panimuot. Samtang si Hatsumi dayag nga nagaalagad, isa ka babayi ang matinahuron nga nagsiling sa inter­com nga tuman gid sa iya kasako agod makigsugilanon. Ang tono sang tingog sang tagbalay malulo, gani si Hatsumi padayon nga nagduaw sa iya. Ang tagbalay nagsabat lamang paagi sa inter­com, nga wala gid nagaguwa agod makilala si Hatsumi. Nagpadayon ini sa duha ka tuig kag tunga.

Isa ka adlaw ginbag-o ni Hatsumi ang oras sang iya pagduaw, nagduaw sing hapon na. Wala sing nagsabat. Apang, sang manuglakat na sia, isa ka pamilyar nga tingog sa likod niya ang namangkot, “Sin-o ka?” Bag-o lamang magpauli ang babayi halin sa guwa. Pagkabati niya sang ngalan ni Hatsumi, gilayon sia nga nagsabat, “A, ikaw gali ang nagaduaw sa akon. Salamat tungod sang imo pirme nga pag-ulikid sa akon.” Bangod gin-untat sang babayi ang iya pagtuon sa Biblia upod sa mga Saksi ni Jehova sa iban nga lugar, nahuya sia sa pagbukas sang ganhaan kay Hatsumi. Ginsugdan liwat ang pagtuon sa Biblia, kag ang tagbalay nagauswag sing maayo. Ginaulikdan bala naton sing daku ang mga nasugilanon naton sa pamalaybalay nga pag-alagad?

Himua ang Inyo Bug-os nga Masarangan

Ginaapresyar ni Jehova ang aton panikasog nga alagaron sia sa aton bug-os nga masarangan. Kaangay sia sang isa ka amay nga ang anak nagakadto sa iya nga may mga regalo. Sa mga tinuig, ang regalo mahimo nga lainlain depende sa edad kag ikasarang sang anak. Subong nga ang amay nalipay sa pagbaton sang bisan anong tinagipusuon nga mga regalo nga ginahatag sa iya sang iya anak, si Jehova gilayon man nga nagabaton sang aton bug-os tagipusuon nga pag-alagad nahisuno sa aton espirituwal nga pagtu⁠bo.

Sa pagkamatuod, wala sing rason nga ipaanggid ang aton bug-os nga masarangan sa iya sang iban. Subong sang ginasiling ni Pablo, may rason kita sa pagkalipay sa aton kaugalingon, “nga wala nagapaanggid sa iban.” (Galacia 6:⁠4) Kabay nga padayon naton nga pamatian ang laygay ni apostol Pedro: “Himua ang inyo bug-os nga masarangan agod masapwan niya kamo nga walay dagta kag kasawayan kag sa paghidait.”​—⁠2 Pedro 3:⁠14.

[Footnote]

[Piktyur sa pahina 29]

Ginahimo mo bala ang imo bug-os nga masarangan sa pag-aplikar sang mga panugda para sa pag-alagad sa latagon?