Paghimo sang Aton Labing Masarangan sa Pagwali sing Maayong Balita
“Himua ang imo labing masarangan sa pagpakita sang imo kaugalingon nga nahamut-an sang Dios, isa ka manugpangabudlay nga wala sing ikahuya.”—2 TIMOTEO 2:15.
1, 2. Anong pag-uswag sa ranggo sang bug-os tion nga mga ministro ang napanilagan ninyo? Ano ang nakaamot sa sini?
“SANG nagligad nga pila ka tuig, madamo sa aton ang nagdumdom nga ang makapayunir lamang ang may pinasahi nga mga kahimtangan,” sulat sang isa ka payunir, ukon bug-os tion nga ministro, sa Hapon. “Daw nagsayop kita. Natalupangdan naton nga ang indi makapayunir amo lamang ang may pinasahi nga mga kahimtangan.”
2 Inang positibo nga pagtamod nagresulta sa isa sang labing talalupangdon nga mga pag-uswag sa mga ranggo sang bug-os tion nga mga ministro sa tunga sang mga Saksi ni Jehova sang nagligad nga tinuig. Sa Hapon karon, duha sa kada lima ka manugbantala sang Ginharian ang nagapakigbahin sa pila ka porma sang bug-os tion nga ministeryo. Apang ining makugi nga espiritu indi sa Hapon lamang. Sang nagligad nga tuig sang pag-alagad, ang kadamuon sang manugbantala sa bug-os nga kalibutan nag-uswag sing 5 porsiento, samtang ang kadamuon sang bug-os tion nga mga ministro nag-uswag sing 22 porsiento. Sing maathag, gintuman sang katawhan ni Jehova ang ginhambal ni apostol Pablo: “Himua ang imo labing masarangan sa pagpakita sang imo kaugalingon nga nahamut-an sang Dios, isa ka manugpangabudlay nga wala sing ikahuya.” (2 Timoteo 2:15) Amo ka bala sini?
“Amo Ini ang Buot Silingon sang Gugma sa Dios”
3. Ano ang nagapahulag nga kusog sa sining pag-uswag?
3 Kon pamangkuton ang mga payunir kon ngaa ginpili nila ang bug-os tion nga ministeryo, ang ila sabat pirme amo bangod sang ila gugma kay Jehova nga Dios. (Mateo 22:37, 38) Sa pagkamatuod, dapat amo sini, kay kon indi gugma ang nagakaigo nga nagapahulag, ang bisan anong panikasog mangin wala sing pulos. (1 Corinto 13:1-3) Dalayawon gid nga kadamo sang aton mga masigka-Cristiano—sa kamatuoran, kapin sa pito ka manugbantala sa promedyo sa tagsa ka kongregasyon sa bug-os nga kalibutan—ang naghatag sing lugar sa ila kabuhi sa pagpakita sang ila gugma sa Dios sa sining paagi.
4. Paano naton ginhigugma ang Dios? (Roma 5:8)
4 Sa pagkamatuod, kita tanan nga nagdedikar sang aton kabuhi kay Jehova naghimo sini bangod ginahigugma naton sia. Sang maton-an naton ang gugma sa aton ni Jehova kag sang iya Anak, si Jesucristo, kag ang makatilingala nga mga pagpakamaayo nga dalhon sang iya Ginharian, ang aton tagipusuon natandog sa pagsabat paagi sa paghigugma sa iya. Amo sina ang ginsiling ni apostol Juan: “Naghigugma kita, bangod sia ang una nga naghigugma sa aton.” (1 Juan 4:19) Amo sina ang aton kinaugali nga reaksion bangod amo sina ang pagkahimo sa aton. Apang ang mapagsik lamang bala nga balatyagon sa aton tagipusuon ang nadalahig sang gugma sa Dios?
5. Ano ang nadalahig sa gugma sa Dios? (1 Juan 2:5)
5 Indi, ang gugma sa Dios nagakahulugan sing dugang pa. Si apostol Juan nagsiling sa aton: “Amo ini ang buot silingon sang gugma sa Dios, nga tumanon ta ang iya mga sugo; apang ang iya mga sugo indi mabug-at.” (1 Juan 5:3) Huo, ang matuod nga gugma, kaangay sang matuod nga pagtuo, ginapabutyag sa aksion. (Ipaanggid ang 2 Corinto 8:24.) Luyag sini mapahamut-an kag matigayon ang kahamuot sang isa nga ginahigugma. Daw ano ka ekselente nga paagi ang napili sang mga yara sa bug-os tion nga ministeryo sa pagpakita sang ila gugma kay Jehova kag kay Jesucristo!
6. (a) Ano nga sahi sang mga tawo ang nakapayunir? Ngaa nahimo nila ini? (b) May nahibaloan ka bala nga subong sina nga mga huwaran?
6 Ang kahimtangan sang mga indibiduwal wala nagapalareho, kag dapat ini binagbinagon. Apang kon tan-awon naton ang mga yara sa bug-os tion nga ministeryo, masapwan naton nga nagalakip sila sa mga tawo sa tagsa ka posible nga kahimtangan—pamatan-on kag tigulang, minyo kag diminyo, may maayo kag mapigaw nga panglawas, may pamilya kag wala, kag iban pa. Ang kinatuhayan amo nga, sa baylo nga tugutan ining mga butang nga mangin sablag, sila, kaangay ni apostol Pablo, nakatuon sa pagpanghikot nga ginalandas ini ukon sa pagkabuhi kaupod sini. (2 Corinto 11:29, 30; 12:7) Binagbinaga, halimbawa, ang isa ka kinaandan nga pamilya.
Si Eiji isa ka gulang sa iya kongregasyon. Sia kag ang iya asawa 12 ka tuig na nga nagapayunir samtang nagasagod sing tatlo ka kabataan. Paano nila ginahimo ini? “Simple lamang ang amon pagkabuhi,” siling ni Eiji. Bisan ang kabataan nakatuon sa pagbaton sing indi sa madamo nga butang nga naluyagan nila. “Bisan pa may yara kami mabudlay nga mga tion, si Jehova pirme nga nag-aman sang aton ginakinahanglan.”
Takos bala ang mga sakripisyo? “Kada gab-i antes namon patyon ang mga suga, ginatan-aw ko ang akon asawa nga nagasulat sang iya report sa pagbantala sa sulod sang adlaw,” siling ni Eiji. “Kon makita ko ang akon pamilya nga nagauna sang espirituwal nga mga interes subong sini, ginabatyag ko nga ang tanan nga butang dapat mangin amo sini, kag nakabatyag ako sing katigayunan. Indi ko mahanduraw kami nga wala nagapayunir.” Ano ang ginabatyag sang iya asawa nahanungod sini? “Maayo ang pag-atipan sa amon ni Eiji,” siling niya. “Kon makita ko sia nga masako sa espirituwal nga mga butang, nagabatyag ako sing nasulod nga pagkakontento. Nagalaum ako nga makapadayon kami.”
Bangod ang amay kag iloy nagahinguyang sing daku nga tion sa pagbantala nga hilikuton kada adlaw, ano ang epekto sini sa kabataan? Ang magulang nga anak nga lalaki nagatrabaho na karon sa apat ka tuig nga proyekto sang konstruksion sa sanga sang Watch Tower Society. Ang anak nga babayi regular payunir, kag ang nagaeskwela pa nga anak nga lalaki nagaplano nga mangin espesyal payunir. Malipayon sila tanan nga ang ila mga ginikanan mga payunir.
7. (a) Maghatag sing mga halimbawa tuhoy sa mga indibiduwal nga kilala mo nga nakalandas sang mga sablag sa pagsulod sa bug-os tion nga pag-alagad. (b) Ano nga laygay sang Biblia ang ginsunod nila?
7 Ang mga pamilya nga kaangay sini sarang masapwan sa tunga sang mga Saksi ni Jehova sa madamo nga pungsod sa bilog nga kalibutan. Nagapanikasog gid sila nga himuon ang labing maayo gikan sa ila mga kahimtangan agod makasulod kag dayon magpabilin sa bug-os tion nga pag-alagad. Paagi sa ila buhat ginapakita nila kon ano gid ang buot silingon sa ila sang gugma sa Dios. Sing hanuot, ginapamatian nila ang laygay ni Pablo: “Himua ang imo labing masarangan sa pagpakita sang imo kaugalingon nga nahamut-an sang Dios, isa ka manugpangabudlay nga wala sing ikahuya.”—2 Timoteo 2:15.
“Isa ka Manugpangabudlay nga Wala sing Ikahuya”
8. Ngaa ginlaygayan ni Pablo si Timoteo nga ‘himuon ang iya labing masarangan’ kag ano ang kahulugan sina?
8 Sang ginsulat ni Pablo yadtong mga pulong kay Timoteo, mga 65 C.E., nagaalagad na si Timoteo sa isa ka responsable gid nga katungdanan sa Cristianong kongregasyon. Gintawag sia ni Pablo nga isa ka “maayong soldado ni Cristo Jesus” kag makapila nga nagpahanumdom sa iya sang iya salabton sa pagtudlo kag sa paghatag sing instruksion sa iban. (2 Timoteo 2:3, 14, 25; 4:2) Apang, ginlaygayan niya si Timoteo: “Himua ang imo labing masarangan sa pagpakita sang imo kaugalingon nga nahamut-an sang Dios.” Ang ekspresyon nga “himua ang imo labing masarangan” ginbadbad gikan sa Griegong termino nga nagakahulugan “dasiga.” (Tan-awa ang Kingdom Interlinear Translation.) Sa iban nga mga pulong, ginsilingan ni Pablo si Timoteo nga agod mahamut-an sang Dios dapat niya padasigon ang iya hilikuton, bisan pa nagauyat na sia sing mabug-at nga salabton. Ngaa? Agod nga sia mangin isa ka “manugpangabudlay nga wala sing ikahuya.”
9. Ano nga parabola ni Jesus ang makabulig sa aton sa paghangop sang mga pulong ni Pablo nahanungod sa “isa ka manugpangabudlay nga wala sing ikahuya”?
9 Ining naulihi nga prase nagapahanumdom sa aton sang tatlo ka ulipon sa parabola ni Jesus tuhoy sa mga talanton nga narekord sa Mateo 25:14-30. Sa pagbalik sang agalon, amo ini ang tion sang ila pagsumiter sang ila binuhatan sa agalon agod aprobahan. Ang mga ulipon nga ginhatagan sing lima kag duha ka talento gindayaw sang agalon sa ila ginhimo sa mga butang nga ginsalig sa ila. Gin-agda sila sa ‘pagsulod sa kalipay sang ila agalon.’ Apang ang ulipon nga gintugyanan sing isa ka talanton nasapwan nga kulang. Ang yara sa iya ginkuha, kag sa iya kahuy-anan, ginpilak sia sa “kadudulman sa guwa.”
10. Ngaa nahuy-an kag ginsilutan ang ulipon nga ginhatagan sing isa ka talanton?
10 Ang una nga duha ka ulipon nagpangabudlay sing lakas kag ginpadamo nila ang mga interes sang ila agalon. Matuod gid sila nga mga manugpangabudlay nga “wala sing ikahuya.” Apang ngaa nahuy-an ang ikatlo nga ulipon kag ginsilutan bisan pa wala niya madula ang ginhatag sa iya? Bangod wala niya ini pagpadamua. Subong ginpakita sang agalon, kuntani gindeposito man lang niya ang kuwarta sa banko. Apang ang malain amo nga wala sia sing matuod nga gugma sa iya agalon. “Hinadlukan ako kag naglakat kag gintago ko ang imo talanton sa duta,” tu-ad niya sa agalon. (Mateo 25:25; ipaanggid ang 1 Juan 4:18.) Gintamod niya ang iya agalon subong isa ka mapintas, “estrikto nga tawo” kag ang iya tulumanon subong isa ka lulan. Ginhimo niya ang labing kubos nga posible agod makapadayon lamang sa baylo nga himuon ang iya “labing masarangan” agod matigayon ang kahamuot sang agalon.
11. Paano ina nga parabola naaplikar sa aton karon?
11 Ina nga parabola nagakatuman karon. Ang Agalon, si Jesucristo, nagbalik kag ginausisa niya ang hilikuton sang iya “ulipon”nga klase subong man ang ila sang ila mga kaupod, ang “dakung kadam-an” sang mga tulad karnero. (Mateo 24:45-47; Bugna 7:9, 15) Ano ang nasapwan sang Agalon? Kon kontento na kita sa pakulahaw nga pag-alagad agod makapadayon lamang, nian mahimo nga masapwan kita nga nalakip sa mga nahuy-an kag ginpilak “sa kadudulman sa guwa.” Sa pihak nga bahin, kon himuon naton ang ‘aton labing masarangan,’ kon sayoron, ‘padasigon’ ang aton hilikuton bilang reaksion sa pagkahilingagawon sang tion, masapwan kita nga nahamut-an subong ‘mga manugpangabudlay nga wala sing ikahuya’ kag magaambit sa ‘kalipay sang aton agalon.’
Kinahanglanon ang Disiplina kag Pagsakripisyo sang Kaugalingon
12. Ano ang mga kabangdanan nga mataas nga porsiento sang mga manugbantala sa Hapon ang nakasulod sa bug-os tion nga ministeryo?
12 Ang padayon nga pag-uswag sang mga ranggo sang mga payunir sa lainlain nga pungsod sa bug-os nga kalibutan isa ka maathag nga pamatuod nga ang katawhan ni Jehova sa kabilugan ‘nagahimo sang ila labing masarangan’ sa pagpamatuod sang ila kaugalingon subong ‘mga manugpangabudlay nga wala sing ikahuya.’ Apang natingala ka bala kon ngaa sa iban nga mga pungsod ang porsiento sang kauturan nga nagasulod sa bug-os tion nga pag-alagad labaw sa iban nga pungsod? Ginpamangkot ining makawiwili nga pamangkot sa iban nga mga payunir sa Hapon. Binagbinaga ining mga sabat:
“Sa banta ko wala ini nagakahulugan nga ang pagtuo, ukon gugma, sang mga Hapones nga Saksi mas daku sa pagtuo kag gugma sang ila kauturan sa iban nga mga pungsod,” siling sang isa ka manugpangabudlay sa Bethel nga yara sa bug-os tion nga pag-alagad sa mga 30 ka tuig. “Apang nagapati ako nga ang personalidad sang mga Hapones mahimo nga may kaangtanan sa sini. Subong kabilugan, ang mga Hapones matinumanon nga mga tawo; madali sila palig-unon.”
“Bangod kadamo gid sing mga payunir sa halos tanan nga kongregasyon,” komento sang isa ka gulang, “ang kabilugan nga ideya amo nga ang bisan sin-o makahimo sini.” Ang mga Hapones maluyag magpanghikot sing grupogrupo. Ekselente ang ila espiritu subong isa ka grupo.
Makapahunahuna gid ining mga komento, kag kon serioso kita sa pagpauswag sang aton pag-alagad kay Jehova, may pila ka talalupangdon nga mga punto nga takus sang aton mahalungon nga pagbinagbinag.
13. Paano kita makabenepisyo gikan sa pagkamatinumanon kag sa kahanda sa pagsunod sa pagpalig-on?
13 Una sa tanan, amo ang bagay sang pagkamatinumanon kag handa sa pagsunod sa pagpalig-on. Kon ang sugo kag ang pagpalig-on nagagikan sa nagakaigo nga tuburan, nagakaigo lamang nga dapat kita magsunod dayon. Sa amo, sa baylo nga tamdon ining mga kinaiya subong mga kinaiya lamang sang isa ka pungsod, ginadumdom naton ang mga pulong ni Jesus: “Ang akon mga karnero nagapamati sa akon tingog, kag kilala ko sila, kag nagasunod sila sa akon.” (Juan 10:27) Madumduman man naton nga ang isa ka bahin sang “kaalam nga gikan sa hitaas” amo ang ‘pagkahanda sa pagtuman.’ (Santiago 3:17) Mga kinaiya ini nga ginapalig-on sa tanan nga Cristiano nga isuklob nila. Bangod sang ginhalinan kag pagpadaku, ang iban mahimo nga mas may huyog sa independiente nga panghunahuna kag pagbuotbuot sang sa iban. Ayhan isa ini ka bahin nga dapat naton disiplinahon ang aton kaugalingon kag ‘bag-uhon ang aton panghunahuna’ agod nga mahantop naton sing maathag pa kon ano ang “kabubut-on sang Dios.”—Roma 12:2.
14. Ano nga pangagda ang ginbaton sang tanan dedikado nga Cristiano, kag ano ang nadalahig?
14 Subong dedikado nga mga Cristiano, ginbaton naton ang pangagda ni Jesus: “Kon ang bisan sin-o luyag magsunod sa akon, magdumili sia sang iya kaugalingon kag magpas-an sang iya usok sang pag-antos kag padayon nga magsunod sa akon.” (Mateo 16:24) Ang ‘pagdumili’ sa kaugalingon literal nga nagakahulugan sing ‘pagdingot sa kaugalingon sing bug-os’ kag dayon handa sa pagbaton sang pagpanag-iya ni Jehova nga Dios kag ni Jesucristo, nagatugot sa ila sa pagkontrol sang aton kabuhi kag sa pagsugo sa aton kon ano ang dapat naton himuon kag ang indi dapat himuon. Ano pa ang maayo nga paagi sa pagpakita nga ginpanghiwala naton ang kaugalingon sang sa pagsunod sa mga tikang ni Jesus sa bug-os tion nga ministeryo?
15. (a) Paano ang pagkakontento sa diutay nga materyal naangot sa pagsunod kay Jesus? (b) Paano ang unang mga disipulo nagsabat sa pangagda ni Jesus sa pagsunod sa iya?
15 Yara man ang bagay sang pagkakontento sa diutay nga materyal. Maathag nga nagasumpakil ini sa kabilugan nga huyog sang kalibutan, nga nagasakdag sang “kailigbon sang unod kag sang kailigbon sang mga mata kag sang bugal sang kabuhi.” (1 Juan 2:16) Apang si Jesus mabaskog nga nagsiling: “Mapat-od gid ninyo, ang bisan sin-o nga wala nagapaalam sa tanan niya nga pagkabutang indi mangin disipulo ko.” (Lucas 14:33) Ngaa subong sini? Bangod agod mangin disipulo ni Jesus nagakahulugan sing kapin pa sa tumuluo lamang. Sang gintawag ni Jesus sanday Andres, Pedro, Santiago, Juan, kag ang iban pa agod mangin mga disipulo niya sang ikaduha nga tuig sang iya ministeryo, wala sia mag-untat sa pagpangabay sa ila nga magtuo sa iya subong ang Mesias. Sang ulihi gin-agda niya sila sa pagsunod sa iya kag sa paghimo sang iya ginahimo, nga amo, ang bug-os tion nga hilikuton sa pagbantala. Ano ang ila sabat? “Sa gilayon ginbiyaan nila ang ila mga pukot kag nagsunod sa iya.” ‘Ginbiyaan pa gani [nanday Santiago kag Juan] ang ila amay nga si Zebedeo sa sakayan kaupod sang mga suluguon nga sinuhulan, kag nagsunod sa iya.’ (Marcos 1:16-20) Ginbiyaan nila ang ila negosyo kag mga kaupod anay kag ginpili ang pagbantala sing bug-os tion.
16. Subong dedikado nga mga Cristiano, sa ano naton dapat ipuhunan ang aton tion kag kusog? (Hulubaton 3:9)
16 Busa, mahapos mahangpan kon ngaa ang pagkakontento sa diutay nga butang importante gid sa paghimo sang aton labing masarangan sa pag-alagad kay Jehova. Kon ginabug-atan kita sing madamo materyal nga mga butang ukon mga obligasyon, mahimo kita mangin kaangay sang manggaranon nga pamatan-on nga manuggahom nga nagdumili sa pangagda ni Jesus nga mangin iya sumulunod, indi bangod indi niya ini mahimo, kundi bangod indi sia handa sa pagbiya sang iya “madamo nga pagkabutang.” (Mateo 19:16-22; Lucas 18:18-23) Gani sa baylo nga usikan ang aton tion kag kusog sa pagtinguha sang mga butang nga sa dili madugay ‘magataliwan,’ luyag naton ipuhunan ining hamili nga mga pagkabutang para sa aton dayon nga kaayuhan.—1 Juan 2:16, 17.
17. Tubtob sa anong kasangkaron ang espiritu sang grupo mangin isa ka positibo nga impluwensia?
17 Bilang katapusan, amo ang espiritu sang grupo. Sanday Andres, Pedro, Santiago, kag Juan wala sing duhaduha nga nag-impluwensiahanay sa ila desisyon nga batunon ang pangagda ni Jesus sa pagsunod sa iya. (Juan 1:40, 41) Sing kaanggid, ang kamatuoran nga kadamo gid sang aton kauturan ang makahatag sing lugar sa ila masako nga kabuhi sa pagsulod sa bug-os tion nga pag-alagad dapat magpahulag sa aton sa pagbinagbinag sang aton bahin sing serioso. Sa pihak nga bahin, ang aton mga kaupod nga yara na sa sining pribilehiyo makapaambit sa iban sang ila makalilipay nga mga eksperiensia, paagi sa sini mapalig-on sila sa pagbuylog man sa ila ranggo. Kag, sa pagkamatuod, ang bug-os tion nga mga ministro makabuligay para sa ila kaayuhan.—Roma 1:12.
18. Paano kita tanan makaamot sa espiritu sang pagpayunir?
18 Bisan gani sila nga sa karon ang ila mga kahimtangan wala nagatugot sa ila sa pagsulod sa bug-os tion nga ministeryo makahimo sing daku sa pagpapagsik sang espiritu sa pagpayunir. Paano? Paagi sa pagsakdag kag pagpalig-on sa mga payunir, paagi sa pagpakita sing aktibo nga interes sa mga posible nga magpayunir, paagi sa paghimos nga sa dimagkubos ang isa ka katapo sang ila pamilya makapayunir, paagi sa pag-auxiliary payunir kon mahimo, kag paagi sa pagtinguha nga makasulod sa bug-os tion nga pag-alagad sa gilayon nga mahimo. Paagi sa paghimo sini, mapakita naton tanan nga aton ‘ginahimo ang aton labing masarangan’ sa pag-alagad kay Jehova kon bala nalista karon sa bug-os tion nga ministeryo ukon wala.
Magpadayon sa Paghimo sang Aton Labing Masarangan
19. Ano ang dapat naton ipamat-od nga himuon bangod sang tion?
19 Sa pagkamatuod, samtang ginapadasig ni Jehova ang hilikuton, tion na karon nga ‘himuon naton ang aton labing masarangan’ agod mangin ‘mga manugpangabudlay nga wala sing ikahuya.’ Subong maayong mga soldado ni Jesucristo, dapat man naton ipahigad ang tanan dikinahanglanon nga mga lulan agod nga makaalagad kita sing epektibo kag matigayon ang iya kahamuot. (2 Timoteo 2:3-5) Samtang nagapangabudlay kita sing lakas sa pagpauswag sang aton bahin sa pag-alagad sa Ginharian, makasalig kita nga ang aton mga panikasog padyaan sing bugana. (Hebreo 6:10; 2 Corinto 9:6) Sa amo, sa baylo nga magpabuyanbuyan, magpadayon kita sa paghimo sang aton labing masarangan sa pagbantala sing maayong balita, bilang sabat sa pangagda sang salmista: “Alagda si Jehova nga may kasadya. Magkara sa iya atubangan nga may malipayon nga pagsinggit.”—Salmo 100:2.
Kahon Para sa Repaso
◻ Ano ang nadalahig sa gugma sa Dios?
◻ Ano ang matuod nga problema sa ikatlo nga ulipon sa ilustrasyon ni Jesus tuhoy sa mga talanton?
◻ Ano ang kahulugan sang pagdumili sa kaugalingon?
◻ Ngaa ang mga sumulunod ni Jesus dapat ‘magpaalam sa ila materyal nga mga pagkabutang’?
◻ Paano kita tanan makaamot sa espiritu sang pagpayunir?
[Laragway sa pahina 18]
‘Ipilak ang wala sing pulos nga ulipon’