“Himua Ang Inyo Bug-os Nga Masarangan”
1 Sang gindedikar naton ang aton kaugalingon kay Jehova, nanaad kita nga ihatag naton ang aton bug-os nga masarangan sa iya. Sing nagakaigo, ginlaygayan ni apostol Pedro ang unang-siglo nga mga Cristiano nga himuon ang ila bug-os nga masarangan sa pagpat-od sang ila tindog sa atubangan ni Jehova. (2 Ped. 1:10) Luyag gid naton himuon ang aton bug-os nga masarangan agod pahamut-an si Jehova sa pag-alagad sa iya karon. Ano ang ginalakip sini? Samtang ang aton kaangtanan kay Jehova labi nga nagabakod kag aton ginapamalandungan ang tanan nga ginhimo niya para sa aton, ang aton tagipusuon magapahulag sa aton nga himuon pirme ang aton bug-os nga masarangan sa pag-alagad sa iya. Luyag naton pauswagon ang kalidad kag, kon mahimo, dugangan ang aton pagpakigbahin sa aton ministeryo.—Sal. 34:8; 2 Tim. 2:15.
2 Isa ka pamatan-on nga utod nga lalaki nga luyag makahimo sing labi pa sa ministeryo ang nakasapo nga ang regular nga pagtuon sa Pulong sang Dios nagpadalom sang iya apresasyon kay Jehova kag nagpatudok sing daku pa nga kakugi sa iya. Nagpahulag ini sa iya sa pagsulod sa payunir nga pag-alagad. Isa ka utod nga babayi nga nabudlayan makighambal sa mga estranghero ang nag-ensayo sing pila ka presentasyon sa Reasoning nga libro kag wala madugay nakatigayon sing daku pa nga kadalag-an sa iya ministeryo. Nakadumala sia sing isa ka pagtuon sa Biblia sa isa ka mag-asawa nga nagbaton sang kamatuoran.
3 Magkalipay sa Imo Masarangan Himuon: Ang iban sa aton nakaeksperiensia sing mabudlay nga mga sirkunstansia subong sang mapigaw nga panglawason, pagpamatok sang pamilya, kaimulon, ukon di-pagsapak sa teritoryo. Madamo pa nga problema nga kinaandan sa sining katapusan nga mga adlaw ang mahimo nga magaupang sa aton pag-alagad. (Luc. 21:34, ftn.; 2 Tim. 3:1) Nagakahulugan bala ini nga napaslawan kita sa aton dedikasyon kay Jehova? Indi kon nagaalagad kita sa iya sa aton bug-os nga masarangan.
4 Indi maalamon nga hukman ang aton kaugalingon pasad sa masarangan himuon sang iban. Sa baylo, ang Kasulatan nagapalig-on sa aton nga “pamatud-an sang kada isa kon ano ang iya kaugalingon nga binuhatan.” Ang paghimo sang bug-os gid naton nga masarangan nagapahamuot kay Jehova kag nagahatag sa aton sing “rason sa pagkalipay.”—Gal. 6:4; Col. 3:23, 24.
5 Kabay nga sundon naton ang ginsiling ni Pedro nga ‘himuon ang aton bug-os nga masarangan agod masapwan sang Dios nga walay dagta kag kasawayan kag sa paghidait.’ (2 Ped. 3:14) Ina nga espiritu magapabatyag sa aton nga may kalig-unan kag magahatag sa aton sing kalinong sa hunahuna nga si Jehova lamang ang makahatag.—Sal. 4:8.