Mga Pamangkot Gikan sa mga Bumalasa

Sanglit ang mga Cristiano wala nagapatad sing kuwarta, mahimo bala sila makabaton sing mga tiket ukon makaentra sa mga ripa nga mahimo sila makadaug sing mga premyo?

Isa ini ka pamangkot nga nagautwas sa tion kag tion, gani nabinagbinag na ini sa aton mga publikasyon. Sa pila ka pamulong, may mga indese kita sang aton mga literatura, subong sang Watch Tower Publications Index 1930-1985 (kag ang isa pa nga nagatuptop sang 1986-1990). Kon ang isa ka Cristiano may amo sina nga mga indese sa iya pamulong, mapuslanon gid ini sa pagpangita sa gilayon sang makaalayaw nga mga sabat.

Ang pamangkot sa ibabaw isa ka halimbawa. Nagapangita sa Index para sa 1930-1985 sa ubos sang tig-ulo nga “Questions From Readers,” masapwan sang isa ang mga subtitulo nga “ ‘draw­ings,’ may Christian accept tick­et for?” Ang bumalasa ginatudlo sa seksion nga “Mga Pamangkot Gikan sa mga Bumalasa” sa The Watchtower sang Pebrero 15, 1973, pahina 127.⁠a Madamo nga mga Saksi ang may tomo (ukon indibiduwal nga mga guwa) sang The Watchtower sang 1973, ukon mahimo ini tan-awon sa librarya sang madamong mga Kingdom Hall.

Ang pagbinagbinag nga ginbalhag sang 1973 nagapakita nga ang mga Cristiano nagalikaw gid sa mga sweep­stakes ukon mga ripa nga nagalakip sang pagbakal sing mga tiket ukon paggamit sing kuwarta para sa kahigayunan nga makadaug sing pila ka premyo. Sing maathag, ginalikawan naton ang sugal, nga isa gid ka pagpakita sing kakagod.​—⁠1 Corinto 5:11; 6:10; Efeso 4:19; 5:​3, 5.

Apang, ang isa ka balaligyaan ukon isa ka negosyo mahimo maggamit sing ripa subong isa ka paagi sa pagpasayod. Ang himuon lamang sang isa amo ang isulat ang iya ngalan ukon ipadala ang porma ukon tiket, nga wala sing ginbakal. Ang ripa bahin sang padugi sa pagpasayod; gindesinyo ini nga mangin isa ka wala ginadampigan nga paagi sa pagpat-od kon sin-o ang hatagan sing premyo ukon mga premyo. Ang iban nga mga Cristiano mahimo magbatyag nga mahimo nila mabaton ang premyo sa ripa nga wala nagadalahig sing sugal, subong nga mahimo sila makabaton sing libre nga sampol ukon iban pa nga regalo nga mahimo gamiton sang negosyo ukon balaligyaan sa iya programa sang pagpasayod.

Apang, ang pila ka Cristiano nagalikaw sang bisan ano sini nga sahi, indi luyag nga masandad ukon magumon ang iban kag nagapanikasog man nga mapahilayo sa pagsulay nga magsalig sa Swerte. Subong sang ginapakita sang Isaias 65:​11, ang mga alagad sang Dios wala nagaangot sang ila kaugalingon sa “dios sang Swerte” ukon sa “dios sang Kapalaran.” Mahimo man sila magbatyag nga indi nila luyag nga mangin bahin sang bisan ano nga publisidad nga mahimo ginakinahanglan sa mga dumalaug nga pakigbahinan. Yadtong nagabatyag sing amo sini indi dapat magmulay sa isa ka Cristiano ukon mga Cristiano nga ang konsiensia nagatugot sa ila sa pag-entra sa sinang mga ripa.​—⁠Ipaanggid ang Roma 14:​1-4.

[Footnote]