Mga Pamangkot Gikan sa mga Bumalasa

◼ Nagakaigo bala para sa isa ka Cristiano ang magbakal sing mga tiket sa loterya subong kalingawan lamang kon ang ganansia magakadto sa buhat sang kaluoy?

Ang Biblia wala gid nagadumili sang nagakaigo nga kalingawan, kay si Jehova “malipayon nga Dios.” (1 Timoteo 1:11) Ang iya katawhan sarang magkalipay sa musika, maugdang nga saot, haganhagan nga pagkaon ukon pag-inum, kag balanse nga sports kag mga hampang. (Salmo 150:​4; Manugwali 2:24) Apang, ang sugal supak gid sa maalamon nga laygay sang Dios, kag amo man ang pag-entra sa mga loterya.

Ano gid bala ang loterya? Amo ini ang pagbakal sang mga tiket agod may tsansa nga magdaug sing mga premyo. Ginapili ang mga dumalaug paagi sa paggabot ukon patsamba-tsamba nga pagpili sing numero.⁠a Masami nga may isa ka daku nga premyo, ayhan nagabili sing minilyon ka dolyar, pesos, ukon pounds. Makagalanyat gid katama inang daku nga premyo sa bagay nga ang mga loterya amo ang nangin “pinakalapnag nga dagway sang sugal.” (The World Book Encyclopedia) Ginatos ka milyon ka tawo ang nagasugal paagi sa mga loterya.

Ang iban nangatarungan nga indi sala ukon malain ang loterya bangod ang bili sang tiket (tsansa) mahimo nga diutay lamang, bangod ang nagaentra nagahimo sini sing kinabubut-on, kag bangod ang iban nga ganansia mahimo gamiton sa mga buhat sa kaluoy, subong sang pagbulig sa mga imol. Daw ano ka nagakaigo ina nga pangatarungan?

Bisan pa ang iban nagasiling nga ang pagbakal sing tiket sa loterya isa ka simple kag manubo sing bili nga kalingawan, indi mapanghiwala ang rason nga kakagod. Ang mga tawo nagabakal sing mga tiket sa loterya sa paglaum nga makadaug sing daku nga kuwarta. Supak ini sa balaan nga laygay batok sa kakagod, nga mahimo mangin isa ka serioso nga bisyo sa bagay nga sarang sini maupangan ang isa gikan sa ‘pagpanubli sang Ginharian sang Dios.’ Busa, kon ang isa ka Cristiano nagapakita sing dalayon nga kakagod paagi sa sugal, mahimo sia paguwaon sa kongregasyon. (1 Corinto 5:​11; 6:10) Ang Biblia nagasiling: “Ang panublion maagom sing madali sa kamunoan, apang ang iya katapusan indi mangin bulawan.” (Hulubaton 20:21) Kon ang isa ka Cristiano ginatiklod nga ‘magpatsamba-tsamba’ sa loterya, dapat niya hunahunaon sing serioso ang nahanungod sa kakagod nga sa sini napasad ang loterya. Ang Efeso 5:3 nagasiling nga ang ‘kakagod indi gid dapat sambiton sa tunga naton,’ labi na gid nga entrahan sang Cristiano.

Ang pinakadaku nga bahin sang mga humalampang sa loterya masunson makita sa imol nga mga komunidad. Gani bisan pa ang bili sang tiket diutay lamang, ang kuwarta ginagasto sa iban nga butang sa baylo nga gastuhon sa tunay nga mga kinahanglanon sang pamilya​—⁠dugang nga pagkaon, bastante nga panapton, mas maayo nga pag-atipan sa medisina. Ang isa nga nagapangangkon nga Cristiano apang nagapatumbaya sa mga kinahanglanon sang pamilya “mas malain pa sa tawo nga wala sing pagtuo.”​—⁠1 Timoteo 5:⁠8.

Bisan pa nga ang bili sang tiket sa loterya wala nagaapektar sa kuwarta sang isa ukon sang pamilya, wala ina nagakahulugan nga ang iban indi maapektuhan. Ngaa? Bangod halos ang tanan nga nagabakal sing tiket sa loterya luyag magdaug. Sa diin magahalin ang iya premyo nga kuwarta? Kon ang tiket niya nagabili sing napulo ka pesos kag ang premyo isa ka milyon ka pesos, nagakahulugan ina nga ginakuha niya ang kuwarta sa tiket gikan sa ginatos ka libo pa nga tawo. Nahisanto bala ina sa laygay sang Dios batok sa pagkaibog sa mga pagkabutang sang iban? (Deuteronomio 5:21) Sa katunayan, ang iya premyo magalakip sa kuwarta nga ginkuha gikan sa madamo pa nga tawo, kay kapin sa isa ka gatos ka libo ka tiket ang dapat nga ibaligya. Ang maarang-arang nga kantidad sang kuwarta sa tiket magakadto sa mga gasto sa pagdumala, subong man sa mga buhat sang kaluoy nga ginapahibalo subong ang kabangdanan sang loterya. Gani bisan pa nga masarangan sang isa ang napulo ka pesos para sa iya kaugalingon nga tiket, kamusta ang madamo pa nga iban? Dugang pa, ang pagdaug niya mahimo nga ianunsio, nagapahulag sa madamo nga magsugod sa paghampang sing loterya ukon sa pagbakal sing madamo pa nga tiket, bisan pa nga indi nila ini masarangan.

Indi man mapanghiwala nga nabuylog sa loterya ang handum nga magdaug sing kuwarta nga wala ini ginpangabudlayan. Huo, ang loterya nagapalig-on sang katamad ukon nagaganyat sa sini. Apang, ang Biblia nagalaygay sa katawhan sang Dios nga mangin makinot, mapisan, kag mabakas. Sa baylo nga ipadaku ang espiritu sang ‘pagkuha sing pila ka butang sa wala,’ ini nagalaygay: “Kon sin-o ang indi magpangabudlay, indi sia magkaon.”​—⁠2 Tesalonica 3:​10; Hulubaton 13:​4; 20:​4; 21:​25; 1 Tesalonica 4:​9-12.

Nga ang iban mahimo nga makigbahin sa loterya sa kaugalingon nila nga desisyon kag nga ini legal wala nagapakamatarong sa pag-entra sang mga Cristiano sa sini. Ang iban nga mga gobierno nagahimo nga legal sang iban nga dagway sang sugal, subong man sang prostitusyon kag poligamiya. Bisan pa ina nga mga butang mahimo nga mangin legal kag madamo nga tawo ang kinabubut-on nga nagahimo sini, wala ini nagakahulugan nga ina nga mga buhat kalahamut-an sa itololok sang Dios. Sa baylo, ang mga Cristiano nagapanikasog sa pagbanaag sang pagtamod ni David: “Ipakita sa akon ang imo mga dalanon, O Jehova; tudlui ako sang imo mga banas. Tuytuyi ako sa imo kamatuoran kag tudlui ako, kay ikaw amo ang Dios sang akon kaluwasan.”​—⁠Salmo 25:​4, 5.

Kon ang Cristiano maluyag gid sa pagbulig sa imol, sa may sablag, ukon sa tigulang, sarang niya ini mahimo sing direkta ukon sa paagi nga wala nagadalahig sa sugal.

[Footnote]