Report sang mga Manugbantala sang Ginharian

Ang Isa ka Lamharon nga Mahuyugon sa Tren Nakatuon sing Kamatuoran

KON ang tagipusuon sang isa ka tawo nahuyog sa pagkamatarong, nian pat-uron ni Jehova nga Dios, nga ginagamit si Cristo Jesus kag ang langitnon nga mga anghel, nga inang katulad-karnero nga tawo masugiran sa ulihi sing maayong balita sang Ginharian. Sa ulihi nga tion ina nga tawo mahimo magkadto sa tuo nga bahin sang pabor ni Jesus. (Mateo 25:​31-33) Matuod ina sa isa ka lamharon nga mahuyugon sa tren sa Austria nga nakatuon sang kamatuoran sa pinasahi nga paagi.

Ang labing makakulunyag nga bahin sang kalingawan sining lamharon nga lalaki amo ang pagsakay sa bagon sang makina sang tren, sa pahanugot sang administrasyon sang tren. Ginrekord niya ang tagsa ka biyahe sa iya vid­eo camera agod matan-aw niya ini liwat sa iya balay. Sa iya biyahe halin sa Vienna pakadto sa Salzburg, ang enhinyero sang tren isa sang mga Saksi ni Jehova. Ginhimuslan niya ang kahigayunan nga makabantala tuhoy sa Ginharian sa sinang tawo nga mahuyugon sa tren. Sang primero ang lamharon nga lalaki nakibot makabati nga ang enhinyero nagahambal tuhoy sa Dios kag sa Biblia, apang sa tion sang paglakbay, nagkonsentrar sia sing labi sa talan-awon sangsa ginahambal sa iya sang enhinyero.

Pagpauli, gintan-aw sining lamharon nga mahuyugon sa tren ang iya narekord sa vid­eo indi lamang sing makaisa kundi sing napulo ka beses, kay interesado gid sia sa sini nga paglakbay. Sanglit ginrekord man niya ang tunog, pirme niya mabatian ang ginahambal sang Saksi sa iya. Sa dugang nga pagtan-aw niya sing vid­eo, dugang pa nga nangin pamilyar sia sa ginhambal sa iya. Ginsugdan niya karon nga hunahunaon ini, kag sang ulihi nangin interesado sia tuhoy sa makadalayaw nga impormasyon nga ginhatag sang Biblia. Luyag niya makahibalo sing dugang pa.

Nadumduman niya ang ngalan sang enhinyero kag nahibaluan niya nga nagapuyo sia sa Vienna. Gani nagkadto sia sa post of­fice kag ginteleponohan ang lainlain nga mga numero nga nalista sa idalom sina nga ngalan sa directory. Ang pamangkot niya sa mga nagsabat sang telepono amo: “Enhinyero ka bala sang tren?” Kon indi ang sabat, ginatawgan niya ang lain naman nga numero. Sang ulihi, nakita niya ang enhinyero. Ginsugiran niya sia sang iya sugilanon kag nga interesado sia sa mensahe sa Biblia nga nabatian niya sa video.

Ang Saksi naghimo sing kahimusan paagi sa sanga talatapan nga may isa nga magduaw nga nagapuyo malapit sa lamharon nga lalaki. Natabuan man nga sa lokal nga kongregasyon didto, may isa ka Saksi nga enhinyero man sa tren. Ginduaw sining ikaduha nga enhinyero ang mahuyugon sa tren, kag isa ka pagtuon sa Biblia ang nasugdan. Sang tig-ilinit sang 1991, ang lamharon nga lalaki nabawtismuhan.

Pat-od nga nakita ni Jehova, nga nagausisa sang tanan nga tagipusuon, nga ini nga tawo may hanuot nga gugma sa pagkamatarong. Gani, ginpahanabo niya nga makita ang kamatuoran sang Biblia​—⁠bisan pa nga sa pinasahi nga paagi.​—⁠1 Cronica 28:9; Juan 10:⁠27.

[Picture Credit Line sa pahina 9]

Sa maayong kabubut-on sang Austrian Railways