Ang Planta nga Nagapaiwag sing Espirituwal nga Kapawa

SUNO SA MANUNULAT SANG MAGMATA! SA ITALYA

◼ Sang maaga nga bahin sang katuigan 1900, nag-inulhot ang mga industriya sa kabukiran sang Pistoia, sa Italya. Agod mahakot ang ginagamit nga mga materyales kag ang nahuman na nga mga produkto, ginhimo ang de-koryente nga riles sang tren. Sang Hunyo 21, 1926, gin-inagurahan ang 16 kilometros nga makitid kag nagalikoliko nga riles sa mga kabakuluran kag mga kabukiran.

Ang koryente nga nagapadalagan sa tren naghalin sa diutay nga planta sang koryente (nawala sa ibabaw). Apang, bangod sa pagdiutay sang ulihi sang nagasakay sa tren, gin-untat ang pagbiyahe sini, kag ginsira ini sang 1965. Ano ang natabo sa mga bilding nga gintukod sa tupad sang riles? Ang iban nagkalaguba; ang iban naman nangin ilimnan kag nangin terminal sang mga bus.

Apang, ginkay-o ang diutay nga planta sang koryente. Sang 1997 ginbakal ini sang San Marcello Pistoiese Association of Jehovah’s Witnesses kag ginhimo nga isa sa tumalagsahon nga mga Kingdom Hall sa Tuscany (nawala sa ubos). Ang mga miembro sang kongregasyon nga nagatipon sa sining planta anay sang koryente masako nga ‘nagasiga subong sulo’ sa sining kabukiran, kag nagabantala sing maayong balita sang Ginharian sang Dios. (Filipos 2:15; Mateo 24:14) Huo, ang bilding nga literal anay nga nagahatag sing koryente ginagamit karon sa pagpaiwag sing espirituwal nga kapawa.—Mateo 5:14-16; 28:19, 20.