Mga Pamangkot Gikan sa mga Bumalasa
Si Juan nga nagbawtismo kay Jesus dapat bala tawgon nga “Juan Bautista” ukon “Juan nga Manugbawtismo”?
Lunsay ini husto nga mga panawag kag ginasakdag sang Biblia.
Si Juan ‘magahanda kay Jehova sing katawhan nga naaman,’ nga ginhimo niya paagi sa ‘pagwali sang bawtismo sang paghinulsol sa kapatawaran sang mga sala.’ (Lucas 1:17; 3:3) Si apostol Mateo nagsulat: “Si Juan Bautista nagwali sa kamingawan sang Judea, nga nagsiling: ‘Hinulsol kamo, kay ang ginharian sang langit malapit na.’ . . . Nian nagdugok sa iya ang Jerusalem kag ang bug-os nga Judea . . . , kag ginbawtismuhan niya sila sa Suba sang Jordan, nga nagatu-ad sang ila mga sala.”—Mateo 3:1-6.
Talupangda nga ginkilala ni Mateo si Juan nga “Bautista.” Si Mateo, nga maathag nga nagabagay sang iya kasaysayan sa mga Judiyo, mahimo nagbatyag nga makilala sang mga Judiyo kon sin-o si “Bautista.” Gingamit niya ang “Bautista” subong apelyido.a Gingamit ni Jesus kag sang iya mga disipulo ang “Juan Bautista,” subong man sang mga alagad ni Herodes.—Mateo 11:11, 12; 14:2; 16:14.
Si disipulo Marcos nagreport sing kaanggid nga paggamit sang “Bautista.” (Marcos 6:25; 8:28) Apang sang nagapakilala kay Juan, gintawag sia ni Marcos nga “Juan nga manugbawtismo.” (Marcos 1:4) Ang Griego nga gingamit sa Marcos 1:4 may diutay nga kinatuhayan sa iban nga mga bersikulo. Ang Marcos 1:4 mahimo man mabadbad nga “ang isa nga nagabawtismo.” Ginpatalupangod ni Marcos kon ano ang ginahimo ni Juan; sia ang isa nga nagahimo sang pagbawtismo, ang nagabawtismo.
Apang, wala ini nagapakita nga dapat naton mahibaluan ang kinatuhayan sa sining mga paagi sang pagtawag kay Juan. Sa Marcos 6:24, 25, aton mabasa tuhoy kay Salome: “Nagguwa sia kag nagpamangkot sa iya iloy: ‘Ano bala ang akon pangayuon?’ Sia nagsiling: ‘Ang ulo ni Juan nga manugbawtismo.’ Kag sa gilayon nagsulod sia sing dalidali sa hari kag nangayo, nga nagasiling: ‘Luyag ko nga imo ihatag sa akon sa gilayon sa bandihado ang ulo ni Juan Bautista.’ ” Ang duha ka ngalan gingamit sing bayluhanay.
Mahimo hangpon sang iban ang “Baptist” sa Ingles suno sa ikaduha nga depinasyon sa diksionaryo: “Ang katapo ukon sumalakdag sang isa ka ebangheliko nga Protestante nga denominasyon nga kilala bangod sang sahi sang panguluhan sang kongregasyon kag sang bawtismo paagi sa pagtugmaw sa mga tumuluo lamang.” Si Juan pat-od gid nga indi amo sina.
Busa, ang “Juan Bautista” kag “Juan nga Manugbawtismo” lunsay husto kag nagakaigo.
[Footnote]
a Ang Judiyong istoryador nga si Flavius Josephus nagsulat tuhoy kay “Juan, nga gin-apelyiduhan Bautista.”