Ang “Katapusan nga Kaaway” Pagalutuson!
SANG bata pa ikaw, mahimo nga nahadlok ka sa dulom. Ang makahaladlok nga mga sugilanon kag bisan ang pila ka sugilanon nahanungod sa mga engkantado mahimo nga nagpabalaka sa imo. Daw ano liwat ka makapasalig sang ginbilin sang imo iloy ukon amay ang isa ka suga nga nagasiga samtang nagatinguha ka nga makatulog!
Ang kamatayon nagapahadlok man sa madamo. Apang, indi dapat. Ngaa? Bangod sa kon ano gid ang kamatayon.
Kilalaha ang Imo Kaaway
Ang maalamon nga si Hari Solomon sang Israel sadto anay nagsiling: “Ang buhi nakahibalo nga mapatay sila; apang ang patay wala makahibalo sang bisan ano.” (Manugwali 9:5) Suno sa sining inspirado sang Dios nga panghunahuna nga masapwan sa imo kaugalingon nga Biblia, ang kamatayon kabaliskaran lamang sang kabuhi. Ang patay wala sing hinalung-ong.
Nagapatuhoy sa kamatayon sa malaragwayon nga paagi, ang Cristianong si apostol Pablo nagsulat: “Kamatayon, diin bala ang imo pagdaug? Kamatayon, diin bala ang imo sudlot?” Ano ang sudlot nga nagapatubas sing kamatayon? Si Pablo nagsiling: “Ang sudlot nga nagapatubas sing kamatayon amo ang sala.” (1 Corinto 15:55, 56; Oseas 13:14) Ano, nian, ang ginhalinan sining makamamatay nga sudlot? Sa iban nga bahin sang Kasulatan, si Pablo nagsiling: “Bangod sa isa ka tawo ang sala nagsulod sa kalibutan kag ang kamatayon paagi sa sala, kag gani ang kamatayon naglaton sa tanan nga tawo kay ang tanan nakasala.” (Roma 5:12) Maathag nga ginpakilala sang apostol yadtong “isa ka tawo” sang nagsiling sia: “Kay Adan ang tanan nagakalamatay.” (1 Corinto 15:22) Huo, bangod sang pagkadimatinumanon sang aton unang ginikanan, nga si Adan, kita tanan madali maapektuhan sang sudlot sang kamatayon.—Genesis 3:1-19.
Bangod may maayong panglawas kag mahigugmaon nga pamilya sa matahom nga palibot, wala sing isa sa aton ang magapili nga mapatay. Apang, subong sang ginapakita sang Biblia, “ang tion kag ang dipat-od nga mga hitabo” mahimo magakuha sa aton sang kabuhi. (Manugwali 9:11) Sa katunayan, wala kita makahibalo kon ano ang matabo sa aton kabuhi buwas. (Santiago 4:14) Isa ka butang ang pat-od—kita tanan nakapanubli sing sala kag kamatayon. Busa, ang kamatayon nagatiid sa aton kag nagasalakay subong isa ka kaaway.
Pag-atubang sa Pagkapatay sang Isa ka Hinigugma
Ang kamatayon ilabi na nga isa ka kaaway kon ginasalakay sini ang isa ka hinigugma. “Mangin mas mabudlay ini para sa imo,” siling sang malapit na mapatay nga asawa sa iya bana samtang ginahunahuna niya ang kamatayon. Ngaa makasiling sia sina? Bangod ang Biblia nagasiling: “Ang bisan ano nga makita nga himuon sang imo kamot, himua ini sa imo gahom, kay sa Sheol [ang kinaandan nga lulubngan sang katawhan] nga imo ginakadtuan, walay buluhaton ukon pahito ukon ihibalo ukon kaalam.” (Manugwali 9:10) Ang patay wala na nagaantos. Apang ang lulan sang kasubo yara sa buhi nga mga paryente kag mga abyan. May mahimo bala sa subong sina nga pag-antos?
Ang mga pahina sang Pulong sang Dios, ang Biblia, nagaunod sing madamong makalulugpay nga mga pulong. Halimbawa, ang pagbasa kag pagpamalandong sa mga salmo pat-od gid nga isa ka tuburan sang paumpaw. Makalulugpay, matuod, ang mga pulong subong sini: “Bulahan si Jehova, nga nagadala adlaw-adlaw sang aton lulan, ang matuod nga Dios sang aton kaluwasan.”—Salmo 68:19.
Ang isa pa ka tuburan sang lugpay amo ang Cristianong kongregasyon. Sang unang siglo C.E., si apostol Pablo nagsulat: “Tahura ang balo nga mga babayi nga mga balo nga matuod. Kon ang balong babayi may mga kabataan ukon mga apo [nga mahimo makaatipan sa iya sa materyal], patun-a sila sing una sang ila diosnon nga katungdanan ayon sa ila kaugalingon nga panimalay kag sa pagbalos sa ila mga ginikanan kag mga lolo kag mga lola, kay ini kalahamut-an sa itululok sang Dios. Walay listahon nga balong babayi nga kubos sa kan-uman ka tuig, kinahanglan nga sia nakasal sing makaisa lamang, kinahanglan nga napamatud-an sia sing maayo tungod sa maayong mga buhat, subong nga nakabatiti sang mga anak, nakapakita sang pagkamasapopohon, nakahugas sang mga tiil sang mga balaan, nakatabang sang mga napiutan, kag nakahimo sing maukod sang maayo sa tagsa ka bagay.” (1 Timoteo 5:3, 4, 9, 10) Ang mga Saksi ni Jehova karon nagabulig kag nagalugpay man sa subong sina nga mga masigkatumuluo.
Sa masami ang pinakadaku nga pagpasibu nga dapat himuon sang namatyan amo ang sa emosyon. “Palangga ko gid ang akon asawa,” sulat sang isa ka lalaki nga ang tiayon napatay sang nagligad nga duha ka tuig. “Amo ini ang pinakamasubo nga hitabo sa akon kabuhi, kag nabudlayan ako sa pagbatas.” Ang isa ka minyo nga tawo sa pila ka tion naghinguyang sang iya kabuhi sa pinakasuod sa tawhanon nga mga kaangtanan. Kon ang isa ka tiayon mapatay, ang buhi nga tiayon natural nga magabatyag sing daku nga kadulaan. Kay sin-o sia makapangayo sing bulig?
Sa sinang mga kahimtangan, ang maayong Cristianong paghiliupod mahimo nga makapalig-on. “Ang matuod nga abyan nagahigugma sa tanan nga tion, kag isa ka utod nga natawo tungod sa kapiutan,” siling sang maalam nga hulubaton. (Hulubaton 17:17) Ang balo nagakinahanglan sing bulig—mga abyan nga nagahatag sing matuod nga supurta. Ang maalamon nga mga abyan nagapalig-on sa isa nga nasubuan sa paghambal, bisan pa nga nagapahibi ini. Ayhan ang isa ka Cristiano nga nakaeksperiensia na sing kasubo kag kasakit nga mamatyan sing tiayon mahimo makahatag sing malulo nga bulig. “Magpamulong sing malinugpayon sa nalisdan,” laygay sang Biblia. (1 Tesalonica 5:14) Apang dumduma nga ang mga balo nagakahidlaw sa ila mga tiayon. Busa, ang namatyan dapat magtu-ad sa iban sa idalom lamang sang mga kahimtangan nga nagabulig sa tanan nga mahuptan ang putli nga paggawi.—1 Pedro 2:12.
Ang labing maayo nga inugbato sa kasakit nga mahatag sang kamatayon amo ang pagpabilin nga masako sa pagbulig sa iban—isa gid ka hangkat para sa mga nagapati nga sila amo ang nagakinahanglan sing bulig! Diri sini nga ang pagkadimakagod may bahin. Ang dimakagod nga paghimo sing mga butang para sa iban nagabulig sa pagdula sang kalisod kag kasubo, kay si Jesus nagsiling: “Daku pa ang kalipay sa paghatag sangsa pagbaton.”—Binuhatan 20:35.
Pagdaug sa Kamatayon
Ang sudlot sang buyog mahimo nga tuman kasakit, makamamatay pa gani. Apang, sa masami, ang pagkuha sa sudlot sang insekto nga nagsulod sa imo panit makahatag sing paumpaw. Apang ano ang mga posibilidad nga may paumpaw gikan sa sudlot nga nagapatubas sing kamatayon?
Sa tapos mapaathag nga ang sala amo ang sudlot nga nagapatubas sing kamatayon, si Pablo nagsiling: “Salamat sa Dios, kay nagahatag sia sa aton sing pagdaug paagi sa aton Ginuong Jesucristo!” (1 Corinto 15:57) Paano ang pagdaug sa kamatayon ginabuylog kay Cristo? Ginpakita ni Jesus nga amo ini ang matabo sang nagsiling sia nahanungod sa iya kaugalingon: “Ang Anak sang tawo wala magkari nga alagdon kundi sa pag-alagad kag sa paghatag sang iya kabuhi nga gawad sang madamo.” (Mateo 20:28) Huo, para sa mga nagapakita sing pagtuo sa Anak sang Dios, nga si Jesucristo, kag sa halad gawad nga gin-aman ni Jehova paagi sa iya, ang kamatayon nga napanubli gikan kay Adan indi magaresulta sa permanente nga dipagluntad.—Juan 3:16.
Makalilipay gid ang pinamulong ni Jesus: “Ang takna magaabot nga ang tanan nga yara sa mga lulubngan magapamati sang iya tingog kag magaguwa, ang mga nakahimo sing maayo sa pagkabanhaw nga sa kabuhi, ang mga nakahimo sing malaut, sa pagkabanhaw nga sa paghukom.”—Juan 5:28, 29.
Mga siglo sang una, si Isaias, nga manalagna sang Dios, nagtagna: “Ginlamon niya [Jehova nga Dios] sing dayon ang kamatayon, kag pahiran sang Soberanong Ginuo nga si Jehova ang luha sang tanan nilang nawong.” (Isaias 25:8) Sa liwat, sa Bugna 21:4, ang Biblia nagahatag sining makalilipay nga palaabuton: “Pahiran [sang Dios] ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.” Napalig-on sining paglaum sa Biblia para sa mga nagakatulog sa kamatayon, ang mga namatyan indi kinahanglan nga “magkasubo subong sang iban nga walay paglaum.”—1 Tesalonica 4:13.
Tilawi nga handurawon kon ano ang ginatigana sang Dios para sa katawhan, subong sang ginapahayag sa Biblia. Ang nagapakari nga “dakung kapipit-an” nagakahulugan sing kalaglagan para sa karon malauton nga sistema sang mga butang. (Bugna 7:14) Yadtong nagabuhat sing butig nga relihion pagalaglagon. Wala na ang makagod nga politikal kag komersial nga mga elemento nga nagaamot sa gutom kag inaway. Si Jesucristo magatagbong kay Satanas nga Yawa, nga nagtuga sing tuman kadamo nga kamatayon sa tawo. Nian sugdan ni Cristo ang iya Milenio nga Paggahom, diin iaplikar niya ang balor sang iya halad gawad sa katawhan. Ang patay magabalik sa ginalauman nga pagkabanhaw, kag ang kapawa gikan sa Pulong sang Dios magaiwag sing tuman kasanag nga ang supertisyuso nga mga pagtamod tuhoy sa kamatayon, ang kaaway sang tawo, madula na. Nian ang tanan nga buhi may kahigayunan sa pagtuon sang mga dalanon sang Dios kag sa pagpahisuno sa iya matarong nga mga talaksan.—Hulubaton 4:18; Binuhatan 24:15; Hebreo 2:14, 15; Bugna 18:4-8; 19:19-21; 20:1-3.
‘Nian, ang katapusan,’ siling ni Pablo, ‘kon itugyan ni Jesucristo ang ginharian sa iya Dios kag Amay. Kay magahari sia tubtob nga mabutang sang Dios ang tanan nga kaaway sa idalom sang iya mga tiil. Tuhoy sa katapusan nga kaaway, ang kamatayon pagalaglagon.’ (1 Corinto 15:24-26) Ang tanan nga sablag nga tuga sang sala ni Adan madula. Ang katapusan nga pagtilaw mahanabo, kag ang mga nagahigugma sa Dios makalampuwas sa katutom. (Bugna 20:4-10) Napasag-uli sa kahimpitan, ining matinumanon nga katawhan mabuhi, indi lamang sing kan-uman ka tuig kag napulo ukon bisan sing isa ka gatos ka tuig kag napulo, kundi sing dayon. Daw ano nga dulot halin sa Dios paagi sa iya hinigugma nga Anak!—Roma 6:23.
Kon amo, daw ano kalawig ayhan ikaw mahimo mabuhi? Ang imo kalawigon sang kabuhi mahimo nga magalab-ot sa walay katubtuban. Subong nga nagakabuhi ikaw sa “tion sang katapusan” sining kalibutan, mahimo nga indi na ikaw mapatay pa. (Daniel 12:4; Juan 11:25, 26; 17:3) Kon himuon mo ang balaan nga kabubut-on, mahimo ka mabuhi didto mismo sa bag-ong kalibutan nga ginsaad sang Dios.—2 Pedro 3:13.
Apang, kon ikaw tigulang na, realistiko nga dapat mo binagbinagon ang posibilidad nga mapatay. Sing pat-od, ang paglaum nga pagkabanhaw nagadala sing kalipay. Apang ayhan nagapalibog ikaw kon paano himuson ni Jehova ang pagkabuhi sang pamilya sa sinang bag-ong sistema sang mga butang. Indi pagpaligbi ina nga mga butang, kay si Jehova magahatag sing mapinadayunon nga kalipay sa sadtong matutom sing dayon sa iya.
Samtang ining makahalanguyos nga “katapusan nga mga adlaw” sang malaut nga sistema ni Satanas manugtapos na, indi pagtuguti ang kahadlok sa kamatayon nga magakuha sa imo sang pribilehiyo nga alagaron si Jehova karon mismo. (2 Timoteo 3:1) Kon nadula mo ang isa ka hinigugma sa kamatayon, lugpayi ang imo kaugalingon paagi sa paghibalo nga ang gahom sang kamatayon umalagi lamang. (Bugna 20:13, 14) Magsalig sa paglaum nga pagkabanhaw. Nian, makasulod ka man sa bag-ong kalibutan paagi sa pagkalampuwas sa dakung kapipit-an ukon paagi sa pagkabanhaw, magsalig sa inspirado nga garantiya nga ang kamatayon, ang katapusan nga kaaway, pagalaglagon.—Bugna 7:9, 14.
[Piktyur sa pahina 5]
Ang maayong Cristianong mga kaupdanan makapalig-on sa namatyan sa espirituwal
[Piktyur sa pahina 7]
Magpabilin nga masako sa pagbulig sa iban nga mabuhinan ang kasubo nga tuga sang pagkapatay sang isa nga hinigugma