Madumduman Mo Bala?

Naluyagan mo bala ang pagbasa sa ulihi nga mga guwa sang Ang Lalantawan? Ti, tan-awa kon masabat mo ang masunod nga mga pamangkot:

▫ Anong praktikal nga bulig ang mahatag sa mga masakiton kag mga tigulang sa sulod sang isa ka kongregasyon karon?

Sadtong unang Cristianong kongregasyon, ang mga balo nga nagakinahanglan sing materyal nga bulig ginalista. (1 Timoteo 5:​9, 10) Amo man sa karon, ang mga gulang mahimo magalista sang mga masakiton kag mga tigulang nga nagakinahanglan sing pinasahi nga igtalupangod. Apang, indi dapat nga pabay-an na lamang ang mga gulang sa paghimo sini. Ang tanan sa kongregasyon dapat mangin alisto sa sinang mga kinahanglanon. (1 Timoteo 5:​4-8)​—⁠8/15, pahina 28-9.

▫ Dimapatihan bala ang sugilanon sang Biblia tuhoy kay Jonas nga ginlamon sang isa ka sapat sa dagat?

Indi, ang sperm whale, ang dakung puti nga bagis, ukon ang balyena nga bagis mahimo makalamon sa tawo. Dugang pa, ginpalig-on mismo ni Jesus nga ang sugilanon ni Jonas matuod. (Mateo 12:​39, 40)​—⁠8/15, pahina 32.

▫ Ano nga halit ang resulta sang disparatis nga paggamit sing mga anting-anting kag mga panagang?

Ang paggamit sini aktuwal nga nagapalas-ay sa mga tawo nga atubangon sing maalamon ang ila mga problema kag nagapalig-on sa ila nga tamdon ang swerte subong bulong sa tanan. Makahatag man ini sa nagagamit sing sayop nga pagbatyag sing kalig-unan. Sing labi pa ka importante, ang isa ka tawo nga nagapati sa gahom sang mga anting-anting kag mga panagang nagapakontrol sang iya kabuhi sa dikitaon nga yawan-on nga mga puwersa.​—⁠9/1, pahina 4.

▫ Ano ang apat ka elemento nga nagabulig sa pagdugay sang isa ka pag-asawahay?

Ini amo ang kahanda sa pagpamati, ang ikasarang sa pagpangayo sing pasaylo, ang ikasarang sa paghatag sing dalayon nga pagsakdag sa emosyon, kag ang handum sa pagtandog sing mahigugmaon. (1 Corinto 13:​4-8; Efeso 5:33; Santiago 1:19)​—⁠9/1, pahina 20.

▫ Ano ang isa ka paagi nga si Jehova nagahatag sing pagbatas sa mga nagaatubang sing mga pagtilaw?

Ginahimo ini ni Jehova paagi sa mga halimbawa sang pagbatas nga ginrekord sa iya Pulong, ang Biblia. (Roma 15:⁠4) Samtang ginapamalandungan naton ini, ginapalig-on kita sa pagbatas kag sa pagtuon man sing daku kon paano magbatas.​—⁠9/15, pahina 11-12.

▫ Ano ang diosnon nga debosyon?

Ang diosnon nga debosyon nagapatuhoy sa debosyon kay Jehova nga nagapahulag sa aton sa paghimo kon ano ang kalahamut-an sa iya, bisan sa atubangan sang mabudlay nga mga pagtilaw, bangod ginahigugma naton ang Dios gikan sa tagipusuon.​—⁠9/15, pahina 15.

▫ Paano naton dapat tamdon ang kaluoy sang Dios?

Indi naton dapat pakadiutayon ang daku nga kaluoy sang Dios. Dapat kita mangin kaangay ni Pablo kag ipakita ang aton apresasyon paagi sa pagpakig-away batok sa aton kaugalingon nga dikahimpitan. (1 Corinto 9:27) Sa sining paagi ginapakita naton, bisan sa atubangan sang mga kabudlayan, nga may matuod kita nga handom nga himuon kon ano ang husto.​—⁠10/1, pahina 23.

▫ Ngaa nagakaigo nga ginlista ni Pablo ang pagbatas subong ang nahauna nga bahin sang gugma?

Ginasiling nga wala sing ginatawag nga Cristianong pag-ululupod kon wala ang pagbatas, ukon kon wala ang mapailubon nga pagpaumuray. Ini bangod kita tanan mga dihimpit, kag ang aton mga dikahimpitan kag mga kakulangan nagatilaw sa iban. Busa, ang pagbatas kinahanglanon agod ang gugma magaluntad sa tunga sang mga kauturan.​—⁠10/15, pahina 21.

▫ Gingamit bala sang unang mga Cristiano ang ngalan sang Dios?

Ang pamatuod nagasiling nga huo. Gintudluan ni Jesus ang iya mga sumulunod nga mangamuyo sa Dios: “Pakabalaana ang imo ngalan.” (Mateo 6:⁠9) Kag pagkatapos sang iya ministeryo, nangamuyo sia: “Ginpahayag ko ang imo ngalan sa mga tawo nga ginhatag mo sa akon gikan sa kalibutan.” (Juan 17:⁠6) Isa pa, ang unang mga kopya sang Septuagint nagaunod sang ngalan sang Dios sa dagway sang Hebreong Tetragrammaton.​—⁠11/1, pahina 30.

▫ Anong mga halimbawa sa Biblia ang nagapakita nga mahimo maapektuhan ang aton kabuhi kon paano naton ginatamod ang aton mga sayop?

Si Hari Saul matig-a nga namatok sa laygay, kag ang iya sayop nagmuad, sang ulihi nagdul-ong sa iya kamatayon nga wala sing kahamuot sang Dios. (1 Samuel 15:​17-29) Sa pihak nga bahin, walay sapayan sang iya mga kasaypanan kag mga kasal-anan, si Hari David mahinulsulon nga nagbaton sing pagtadlong kag nagpabilin nga matutom kay Jehova. Ining mga halimbawa sa Biblia nagapakita nga ang pagbaton sa aton mga sayop nagabulig sa aton nga mahuptan ang maayong kaangtanan sa Dios kag busa makatigayon sing paglaum nga kabuhi nga walay katapusan. (Salmo 32:​1-5)​—⁠11/15, pahina 29-⁠30.

▫ Paano ginabuligan ni Jehova ang iya katawhan kon ginasit-an sila bangod sang kinaugali nga mga kalamidad ukon iban pa nga mga kabangdanan?

Si Jehova nagabulig, indi paagi sa milagruso nga pagbaliskad sa mga kusog sang kinaugali ukon paagi sa iban pa nga labaw sa kinaugali nga buhat, kundi paagi sa isa pa ka kusog nga wala mahangpi sing bug-os sang kalabanan nga mga tawo​—⁠ang gugma. Huo, ginahigugma gid ni Jehova ang iya katawhan, kag ginpalambo niya sa tunga nila ang tuman kabakod nga gugma para sa isa kag isa amo nga mahimo niya para sa ila ang butang nga daw halos milagruso. (1 Juan 4:​10-12, 21)​—⁠12/1, pahina 10.