Kulto Bala ang mga Saksi ni Jehova?

Indi kulto ang mga Saksi ni Jehova. Sa baylo, mga Cristiano kami nga nagatinguha nga magkabuhi suno sa halimbawa kag mga panudlo ni Jesucristo.

Ano ang kulto?

Ang termino nga “kulto” ginahangop sang mga tawo sa lainlain nga paagi. Pero, binagbinaga ang duha ka kinaandan nga pagpati parte sa mga kulto kag kon ngaa indi kami amo sini.

• Nagapati ang iban nga ang kulto isa ka bag-o ukon wala ginakilala nga relihion. Ang mga Saksi ni Jehova wala nagtukod sing bag-o nga relihion. Kundi, ginasunod namon ang amon pagsimba sa halimbawa kag mga panudlo sang unang siglo nga mga Cristiano nga narekord sa Biblia. (2 Timoteo 3:​16, 17) Nagapati kami nga ang Balaan nga Kasulatan amo ang awtoridad sa kon ano ang dapat sundon parte sa pagsimba.

• Nagapati ang iban nga ang kulto makatalagam nga sekta nga ginapangunahan sang isa ka tawhanon nga lider. Indi tawo ang lider sang mga Saksi ni Jehova. Kundi, ginasunod namon ang talaksan nga gintudlo ni Jesus sa iya mga sumulunod sang magsiling sia: “Isa lamang ang inyo Lider, ang Cristo.”​—Mateo 23:10.

Ang mga Saksi ni Jehova indi isa ka makatalagam nga kulto, kundi isa ini ka relihion nga nagahatag sing kaayuhan sa mga miembro sini kag sa komunidad. Halimbawa, ang amon ministeryo nakabulig sa madamo nga mauntat ang makahalalit nga mga bisyo pareho sang pagdroga kag pagpahubog. Nagahiwat man kami sing mga klase sa bilog nga kalibutan para tudluan ang madamo sa pagbasa kag pagsulat. Dugang pa, nagabulig kami sa tion sang kalamidad. Ginatinguhaan gid namon nga magpakita sing kaayo sa tanan, subong sang ginsugo ni Jesus sa iya mga sumulunod.​—Mateo 5:​13-​16.