Paglandas sang Kahidlaw sa Balay Samtang Nagaalagad sa Dios

SI Jesucristo nagsugo sa iya mga sumunulod: “Lakat kamo . . . kag maghimo sing mga disipulo sang katawhan sa tanan nga mga pungsod.” (Mateo 28:19) Para sa madamo nga mga Cristiano, ang pagtuman sa sina nga sugo nagkahulugan sang pagbaton sang mabudlay nga mga sirkunstansia nga malayo sa puluy-an. Ang mga nagalakbay nga manugtatap, ang ila mga asawa, kag iban pa nagbilin sang madamong mga butang tungod sa pag-alagad sa Dios. Ang kahidlaw sa balay isa gid ka daku nga hangkat para sa sining tanan nga mga Saksi ni Jehova.

Ang kahidlaw nagaabot kon madumduman mo ang kalig-unan kag gugma sang makalilipay nga kahapon. Nagatuga ini sing mabug-at nga balatyagon nga ginapung-aw ka kag indi makasarang sa pagpadayon. Sa katunayan, sa tapos mabaligya ang ila pagkabutang kag nakahimo sing magastos nga paglakbay sa isa ka pungsod sa luwas, gintalikdan sang iban ang ila mga plano kag nagpauli. Nadaug sila sang kahidlaw.

Ina nga mga pagsalakay sa emosyon kinaandan na nga masami mabatyagan pagkatapos sang nahauna nga pagsaylo, apang para sa iban nagapadayon ini sa bug-os nga kabuhi. Pagligad sang kapin sa 20 ka tuig nga napahilayo, si Jacob ‘ginhidlaw sing daku sa panimalay sang iya amay.’ (Genesis 31:30) Sin-o ang makapaabot nga magaantos sing kahidlaw? Ano ang ginatunaan sini? Paano malandas sang isa ka tawo ang subong sina nga mga balatyagon?

Ano ang Ginatunaan sang Kasubo?

Ang kahidlaw mahimo nga magaapektar kay bisan sin-o. Si Amytis, nga anak nga babayi sang hari sang Media nga si Astyages, may rason gid para magkalipay: manggad, kabantugan, matahom nga puluy-an. Apang, nahidlaw gid sia sa kabukiran sang Media nga ginpatindugan sang iya bana, nga si Hari Nabocodonosor, sing nagakabit nga mga hardin sang Babilonia sa panikasog nga pasulhayan sia.

Ang kahidlaw ilabi na nga mabudlay kon ang pangabuhi daw mas mabudlay sangsa wala pa magsaylo ang isa ka tawo. Sang ang katawhan sang Juda nangin mga tinapok, sila nanalabiton: “Sa ubay sang mga suba sang Babilonia​—⁠didto naglingkod kami. Naghibi man kami sang nadumduman namon ang Sion. Paano bala ang pag-amba namon sang ambahanon ni ­Jehova sa duta nga dumuluong?”​—⁠Salmo 137:​1, 4.

Madamo nga mga butang ang mahimo nga makatuga sing kapung-aw sang pagkahidlaw. Si Terri, nga nagbiya sang Canada, nagasiling: “Isa ka adlaw nahulog sa libro ang larawan sang amon pamilya. Sang ginpudyot ko ini, hinali ako nga ginhidlaw, kag nakahibi ako.” Si Chris, nga nagsaylo halin sa Inglaterra pakadto sa imol gid katama nga pungsod, nagabaton: “Ang mabatian lamang ang tono sang isa ka daan nga ambahanon ukon mapanimahuan ang isa ka pamilyar nga pagkaon nagapahidlaw sa akon sa mga butang nga akon ginbayaan.”​—⁠Ipaanggid ang Numeros 11:⁠5.

Ang suod nga kaangtanan sa pamilya amo sa masami ang dugang pa nga rason. Si Roseli, isa ka taga-Brazil nga nagapuyo na karon sa kaingod nga pungsod, nagakomento: “Ginasubuan ako kon makabati ako sing malain nga balita halin sa amon kag wala ako didto agod makabulig. Kon kaisa mas malala ini kon wala ako sing mabalitaan kag magasugod sa paghunahuna sang bisan ano.” Si Janice nagsaylo halin sa North America pakadto sa diutay nga banwa sa mga tropiko sang Amazon. Sia nagasiling: “Ginahidlaw ako kon makabati ako sing maayo nga balita halin sa amon. Mabalitaan ko kon daw ano sila kasadya sa ila pagtilipon, kag ginahandom ko nga kuntani didto man ako.”

Indi lamang ang pagbiya sa mga tawo ang ginabangdan sang kahidlaw. Si Linda nagapaathag: “Naugot ako kon indi ko matultulan ang balaklan sang mga butang nga ginakinahanglan ko. Wala ako sing namang-an sa mga prisyo ukon sa pagbarter. Mahal ang makapanag-iya sing kaugalingon nga salakyan, kag pirme ako nagakaipit samtang nagapanagil-ot ako sa pagsakay sa nagaginutok nga pangpubliko nga transportasyon. Nagapahidlaw gid ini sa akon sa amon.” Nagakomento sa kal-ang sa kultura kag ekonomiya, si Janet nagakomento: “Naugot ako sa kaimulon. Wala gid ako anay makakita sang mga tawo nga nagapakilimos sing tinapay, ukon sang dalagku nga mga pamilya nga nagapuyo sa isa ka hulot nga wala sing tubig . . . Naugot gid ako sa sina nga mga butang nga nagbatyag ako nga indi na ako makapadugay.”

Paglandas sang Imo mga Balatyagon

Indi kita dapat mahuya nga mahidlaw sa mga tawo nga ginahigugma naton ukon sa pamilyar nga mga butang sang bata pa kita. Si Jehova nga Dios naghatag sa aton sing mga emosyon agod mabatyagan naton ang mapagsik nga personal nga mga kaangtanan. Ang Cristianong mga manugtatap sang kongregasyon sa Efeso mga tawo nga hamtong sa emosyon. Apang ano ang natabo sang manugtapos na ang pagduaw ni apostol Pablo sa ila? Aba, “indi diutay nga paghibi ang nagsugod sa tunga nila, kag nagdungok sila sa liog ni Pablo kag mapinalanggaon nga ginhalukan sia”! (Binuhatan 20:37) Sa pagkamatuod, ina nga hitabo wala nagadalahig sing kahidlaw. Apang, nagahatag ini sa aton sing butang nga hulunahunaon. Normal ang may yara mga balatyagon, apang indi naton ini dapat pagtugutan nga magkontrol sa aton. Paano, nian, ninyo madinalag-on nga malandas ang kahidlaw?

Ang pagtuon sang lokal nga hambal isa ka sekreto agod malikawan ang kahidlaw. Ang kahidlaw nagadugang kon ang komunikasyon ginaupangan bangod sang dumuluong nga hambal. Busa, kon mahimo, magtuon sa pagbasa kag sa paghambal sang lengwahe sang rehiyon antes ka magsaylo didto. Indi gani, magkonsentrar sa pagtuon sa lengwahe sa unang pila ka semana pag-abot mo. Amo ina ang tion nga may yara ikaw pinakamalig-on nga motibasyon kag busa may pinakamaayo nga posibilidad nga matun-an ini. Kon ihinguyang mo ini nga mga senemana sa pagtuon lamang sa lengwahe, sa dili madugay magakalipay ikaw sa pagpakigsugilanon, kag makabulig ina sa pagpakanay sang kahidlaw.

Kon mahimo gilayon nga mangita sing bag-ong mga abyan, kay magabulig ini sa imo nga magabatyag nga daw sa inyo lamang. Ang kongregasyon sang mga Saksi ni Jehova amo ang pinakamaayo nga duog sa pagpangita sing matuod nga mga abyan. Magmatumato kag mangin interesado sa iban. Panikasugi nga hibaluon ang ila ginhalinan, ang ila pamilya, ang ila mga problema, kag ang ila mga luyag. Agdaha sa imo balay ang mga masigkatumuluo. Masapwan mo nga sila man mangin interesado sa imo.

Sa tunga sang katawhan sang Dios, ang mga pagpakig-abyan mangin subong ka suod sa mga kaangtanan sa panimalay. Si Jesus nagsiling: “Ang bisan sin-o nga nagahimo sang kabubut-on sang Dios, ining isa amo ang akon utod nga lalaki kag utod nga babayi kag iloy.” (Marcos 3:35) Ginpasalig man ni Cristo ang iya mga sumulunod: “Walay tawo nga nagbiya sang balay ukon mga utod nga lalaki ukon mga utod nga babayi ukon iloy ukon amay ukon mga anak ukon mga duta bangod sa akon kag sa maayong balita ang indi magabaton sing isa ka gatos ka pilo sa karon nga panag-on sang tion, sang mga balay kag mga utod nga lalaki kag mga utod nga babayi kag mga iloy kag mga anak kag mga duta, upod sang mga paghingabot, kag sa nagapakari nga sistema sang mga butang sang kabuhi nga walay katapusan.” (Marcos 10:​29, 30) Sa sinang makalilipay nga espirituwal nga paghiliutod, wala kita nagaisahanon, bisan sa bag-ong pungsod.

Ang paghupot sang pagpakig-abyan upod sa mga tagainyo makabulig man sa paglandas sang kahidlaw. Ayhan makibot ikaw sa paghibalo nga karon nga nagsaylo ka, ang komunikasyon paagi sa sulat ilabi na nga makahulugan, kay ayhan ginahunahuna mo sing maayo ang imo mga pulong. May yara makakulunyag nga mga butang nga ihambal. Si Janet, nga ginsambit kaina, nagapanugda: “Ang pagtawganay sa telepono mahal, apang ang pagpadala sang narekord nga cas­sette tape paagi sa koreo mas barato. Ang pagpakighambal sa isa ka makina makasalaw-a sa primero. Apang, kon makigsugilanon ka sa isa paagi sa mikropono, ini mas mahapos kag makawiwili.” Ayhan mahimo man ikaw makapangabay sing cas­sette record­ing bilang balos.

Si Shirley, nga nagsaylo sa Estados Unidos halin sa Latin America 25 ka tuig na ang nakaligad, nagasiling: “Pirme ako nagasulat sing makapalig-on nga mga eksperiensia sa baylo sang mga problema. Nagapalig-on ini sa iban nga magpadayon sa pagsulat sa akon.” Apang, maghalong. Ang tuman nga pagsulat mahimo nga magapugong sa imo sa pagtigayon sing bag-ong mga abyan. Si Del, nga nagsaylo halin sa Canada pakadto sa iban nga pungsod, nagsiling: “Likawi ang pagtener sa balay kag pagpamensar sing masubo sa mga butang nga ginakahidlawan mo. Sa baylo, magguwa kag magkalipay sa imo bag-o nga lugar.”

Hibalua ang kustombre, maragtas, makahalam-ot nga sugilanon, kag mga duog nga makawiwili kag katahom sang bag-o nga pungsod. Magabulig ini sa imo nga indi mapensar ang negatibo nga mga butang. Kag kon tuyo mo nga magtener sa ginsayluhan mo, labing maayo nga indi dayon ukon masami nga duawon ang imo tumandok nga lugar. Nagakinahanglan sing tion ang makatigayon sing bag-ong mga abyan kag maanad sa bag-o nga mga palibot. Ang malawig nga mga pagduaw sa inyo lugar makaupang sa sina nga proseso. Sa tion nga naluyagan mo na ang imo bag-ong puluy-an, malipay ka na sa pagpauli agod makabisita​—⁠kag nian makabalik. Sa karon, magpabilin nga masako sa pagpabakod sang pagkaluyag sa imo bag-o nga puluy-an.

Padayon nga Magtulok sa Unahan

Ginhatag ni Jehova sa aton ang bug-os nga duta subong puluy-an naton. (Salmo 115:16) Upod ang malipayon nga Cristianong espiritu, ang kabuhi mahimo mangin makalilipay bisan diin. Kon magasaylo ikaw agod pasanyugon ang mga interes ang Ginharian kag ibantala ang maayong balita sa iban nga pungsod ukon sa iban pa nga lugar sa inyo tumandok nga pungsod, himua ini upod ang makalilipay nga pagpaabot. Makunyag sa pagpangita sing bag-ong mga abyan, pagtuon sa lainlain nga mga kustombre, paghimo sing mga disipulo, ukon pagbuhat sing makapaladya nga mga butang sa pag-alagad sa Dios.

Si Jehova nga Dios isa ka Abyan nga pirme mangin kaupod mo, bisan diin ka man. (Salmo 94:14; 145:​14, 18) Gani magpabilin nga suod sa iya sa pangamuyo. (Roma 12:12) Magabulig ini sa imo nga mahuptan sa hunahuna ang imo katuyuan sa kabuhi subong alagad sang Dios. Ginhuptan nanday Abraham kag Sara ang ila katuyuan sa hunahuna sang ginbiyaan nila ang ila masulhay nga puluy-an sa siudad sang Ur. Bilang pagtuman sa sugo ni Jehova, ginbiyaan nila ang mga abyan kag mga paryente. (Binuhatan 7:​2-4) Kon padayon nila nga ginpamensar kag ginkahidlawan ang lugar nga ginbiyaan nila, may kahigayunan kuntani sila nga makabalik. Apang magakadto sila sa mas maayo nga lugar​—⁠sa ulihi ang kabuhi sa paraiso nga duta sa idalom sang langitnon nga Ginharian sang Dios.​—⁠Hebreo 11:​15, 16.

Ang pagbantala sa dumuluong nga mga latagon ukon sa kon diin mas daku ang kinahanglanon sing mga manugbantala sang Ginharian sangsa inyo tumandok nga duta daw makahalangkat. Apang mabungahon man kag labing makapaladya ini nga hilikuton. (Juan 15:⁠8) Kag kon umalagi nga madaug ikaw sang negatibo nga mga panghunahuna, sarang ini malandas paagi sa pagpanumdom sang imo tulumuron kag pagtan-aw sa unahan. Ang isa ka diminyo nga misyonera nga utod nagsiling: “Kon daw madaug ako sang kasubo, ginahunahuna ko ang bag-ong kalibutan kag kon paano ang tanan nga katawhan mangin isa ka pamilya.” Ang matahom nga mga panghunahuna kaangay sini makabulig sa imo nga mahuptan ang imo kalipay kag indi magpadaug sa kahidlaw.

[Piktyur sa pahina 29]

Ang kahidlaw indi kinahanglan nga mag-upang sa Cristianong ministeryo