Kon Paano Ginaatubang sang mga Cristiano ang Pagpakahuya sa Ila sa Publiko

ANO ang imo batyagon kon may isa nga nagapakahuya sa imo ukon nagapalapta sing mga binutig tuhoy sa imo? Natural lamang nga masaklaw gid ikaw. Amo man sina ang naeksperiensiahan sang mga Saksi ni Jehova kon ginapuntariya sila sang indi matuod ukon tiko nga impormasyon sa media. Apang subong sang ginsiling ni Jesus sa Mateo 5:​11, 12, may rason gihapon sila nga magmalipayon.

Halimbawa, ang isa ka publikasyon sang mga Katoliko sa Alemanya nagsiling nga “ang tagsa ka Saksi obligado sa pagdonar sing mga 17 tubtob 28 porsiento sang ila kinitaan sa ulong-talatapan sang sekta.” Apang, ang mga Saksi ni Jehova indi isa ka sekta, kag ang ila hilikuton ginasakdag sing bug-os paagi sa boluntaryo nga mga amot. Madamo nga bumalasa ang napatalang sining sayop nga impormasyon, nga ginakasubo gid sang mga Saksi ni Jehova. Apang paano dapat atubangon sang matuod nga mga Cristiano ang pagpakahuya sa ila sa media?

Isa ka Huwaran nga Dapat Sundon sang mga Cristiano

Maathag nga ginalaragway sang Mateo kapitulo 23 kon paano ginpakamalaut ni Jesus ang iya relihioso nga mga manugpamatok bangod sang ila pagkasalimpapaw kag pagkamalimbungon. Nagahatag bala ini sing isa ka sulundan para sa mga Cristiano karon sa kon paano atubangon ang mga pagpakalain? Indi gid man. Ginpakamalaut sang Anak sang Dios ang iya relihioso nga mga manugpamatok sa sadsaran sang pinasahi nga awtoridad kag paghantop nga gin-angkon niya, ginhimo ini para sa kaayuhan sang mga kadam-an nga nagapamati.

Ang Mateo 15:​1-11 nagaasoy nga si Jesus ginpakalain bangod ginlapas kuno sang iya mga disipulo ang Judiyong tradisyon. Ano ang reaksion ni Jesus? Nagpabilin sia nga malig-on. Sa pila ka okasyon, nga nakigbais si Jesus sa iya mga kritiko, nagahimutig sang ila sayop nga mga pagtamod. Sa kabilugan, indi sayop ang mga Cristiano sa karon sa pagtinguha nga tadlungon ang dinagakaigo nga pagtamod sa ila hilikuton ukon mga panudlo, nagatinguha sa pagpaathag sang kahimtangan sa isa ka maminatud-on kag lohiko nga paagi. Ginahimo nila ini agod buligan ang sinsero nga mga tawo nga mahibaluan nga ang pagpakalain sa mga Saksi ni Jehova indi matuod kag makahalalit.

Apang talupangda kon ano ang reaksion ni Jesus sang ulihi sang ang iya mga disipulo nagpatalupangod sa iya: “Nakahibalo ka bala nga ang mga Fariseo nagkalasandad sang pagkabati nila sang imo ginpamulong?” Ining mga Fariseo ‘nasandad’​—⁠wala lamang sila nalugaw-i kundi nangin dili matadlong nga mga kaaway nga ginsikway ni Jesus. Gani nagsabat sia: “Pabayai ninyo sila. Bulag sila nga mga manugtuytoy.” Ang padayon nga pagpakigsuay sa sinang mahingabuton nga mga kasumpong wala sing kapuslanan, wala sing kaayuhan sa bisan kay sin-o, kag nagadul-ong lamang sa walay pulos nga pagbinais. (Mateo 7:​6; 15:​12-14; ipaanggid ang 27:​11-14.) Ginapakita sang sabat ni Jesus nga may “tion sa paghipos kag tion sa paghambal.”​—⁠Manugwali 3:⁠7.

Wala ginapaabot sang mga Saksi ni Jehova nga ang tagsatagsa maghambal sing maayo tuhoy sa ila. Ginadumdom nila ang mga pulong ni Jesus: “Kailo kamo, kon ang tanan nga tawo magahambal sing maayo nahanungod sa inyo, kay sa amo nga bagay naghimo ang ila mga ginikanan sa dimatuod nga mga manalagna.” (Lucas 6:26) Si C. T. Russell, una nga presidente sang Watch Tower Society, ginpamangkot anay kon ngaa wala niya ginpangapinan ang iya kaugalingon batok sa mga manugpasipala. Nagsabat sia: “Kon magdulog ka sa pagsipa sa tagsa ka ido nga nagataghol sa imo, wala ka sing madangatan.”

Gani indi naton pagtugutan nga matublag kita sa aton pag-alagad sa Dios sang mga ginahambal sang determinado nga mga manugpamatok. (Salmo 119:69) Magkonsentrar kita sa hilikuton sang matuod nga mga Cristiano, nga amo, ang pag-ebanghelyo. Subong kinaugali nga resulta, may kahigayunan kita sa pagsabat sa mga pamangkot kag sa pagpaathag sang aton hilikuton, nga nagapauswag sa moral sang tawo kag nagatudlo sa iya sang Pulong sang Dios.​—⁠Mateo 24:​14; 28:​19, 20.

Sabton Mo Bala ang Pagmulay?

Nagsiling si Jesus sa iya mga sumulunod: “Indi kamo bahin sang kalibutan . . . Busa ang kalibutan nagadumot sa inyo.” (Juan 15:19) Madamo nga report sang media nga nagapakahuya sa mga Saksi ni Jehova ang nagapahayag sining dumot, kag indi ina dapat sapakon. Apang, ang media kon kaisa nagahatag sing impormasyon nga nagapakita sing kakulang sang ihibalo tuhoy sa mga Saksi ukon nagapatiko kag nagabaliskad sang pila ka katunayan. Ang pila ka mamantala mahimo magkuha sing impormasyon gikan sa may ginadampigan nga ginhalinan. Kon bala pabayaan naton ang sayop nga impormasyon sang media ukon pangapinan ang kamatuoran sa nagakaigo nga paagi nasandig sa mga sirkunstansia, sa nagamulay, kag sa iya katuyuan.

Kon kaisa ang mga katunayan mahimo matadlong paagi sa pagpadala sa editor sing matinahuron nga sulat. Apang mahimo nga kabaliskaran ang resulta sang amo nga sulat. Paano? Ang orihinal nga kabutigan mangin labi pa ka bantog, ukon mahimo nga mahatagan sing dugang nga kahigayunan ang mga manugpamatok nga magsulat sing mga binutig ukon mga pagmulay sa sulat. Sa kalabanan nga hitabo, maalamon nga itugyan sa mga gulang ang pagdesisyon kon bala magpadala sing sulat para sa editor. Kon ang negatibo nga report sang media magpukaw sang pagkapanatiko, ang sanga talatapan sang Watch Tower Society magapahibalo sa mga kongregasyon sa sina nga pungsod sang mga katunayan, sa amo makabulig sa mga manugbantala nga makahatag sing husto nga paathag sa mga nagapamangkot.

Dapat bala kamo sing indibiduwal manghilabot sa sining dimatuod nga mga alegasyon? Ang laygay ni Jesus nga “pabayaan sila,” indi sila pagsapakon, maathag nga naaplikar sa sining grupo sang mga kaaway. Ang matutom nga mga Cristiano may Biblikanhon nga mga rason sa paglikaw sa mga apostata kag sang ila mga pagtamod. (1 Corinto 5:​11-13; Tito 3:​10, 11; 1 Juan 2:​19; 2 Juan 10, 11) Kon ang isa sinsero nga interesado sa kon bala ang pagpakalain sa mga Saksi ni Jehova matuod ukon indi, ang imo napasad sing maayo nga ihibalo masami nga bastante na sa paghatag sing sabat.​—⁠Tan-awa ang Ang Lalantawan sang Marso 15, 1986, pahina 13 kag 14.

Kon ginaatubang ikaw sang binutig nga impormasyon sa media, pamatii ang laygay sang Hulubaton 14:​15: “Ang kulangkulang nagapati sa tagsa ka pulong, apang ang mahalungon nagatan-aw sa iya paglakat.” Sa Swit­zer­land madamo nga tawo ang naakig sang ang emosyonal nga report nagsiling nga napatay ang isa ka lamharon nga babayi nga Saksi bangod wala gintugutan sang iya mga himata ang mga manugbulong nga tayhunan sia sing dugo. Apang amo gid bala sina ang natabo? Indi. Nagdumili ang pasyente sa pagpatayhon sing dugo bangod sang relihioso nga mga kabangdanan, apang nagpasugot sia sa pagbaton sing tal-us nga pagbulong nga wala nagagamit sing dugo. Kon ginhatag ini sa gilayon nga wala na sing madamo pa nga istorya, ayhan natabangan pa sia. Apang, gin-awat sang ospital ang pagbulong tubtob nga nangin ulihi na ang tanan. Wala ginsambit sang report ini nga mga katunayan.

Gani, binagbinaga sing maayo kon daw ano ka matuod inang report. Mapaathag naton sa mga nagapamangkot nga ang lokal nga mga gulang nagatatap sinang mga kahimtangan sa mahigugmaon nga paagi kag suno sa mga panuytoy sang Biblia. Ang pagpabilin sa mga prinsipio kon nagahatag kita sing sabat nagapugong sa aton sa padalidali nga paghimo sing mga konklusion.​—⁠Hulubaton 18:⁠13.

Importante ang Direkta nga Impormasyon

Sang unang siglo, nagpalapnag sing mga binutig ang mga tawo tuhoy kay Jesucristo agod gub-on ang iya reputasyon, ginpakilala pa sia sang iban subong maluib. (Lucas 7:​34; 23:​2; ipaanggid ang Mateo 22:⁠21.) Sang ulihi, ang bata pa nga Cristianong kongregasyon nakasumalang sing lapnag nga pagpamatok gikan sa relihioso kag kalibutanon nga mga elemento. Sanglit “ginpili sang Dios ang mga buang-buang sang kalibutan,” madamo ang nagapakanubo sa iya mga alagad. (1 Corinto 1:​22-29) Dapat kabigon sang matuod nga mga Cristiano sa karon ang pagpakahuya, subong isa ka porma sang paghingabot.​—⁠Juan 15:⁠20.

Apang, ginaapresyar ini sang mga Saksi ni Jehova, kon ang tawo nga ila masugilanon walay ginapasulabi kag nagapadayag sing pareho nga panimuot sang pila ka dumuluaw ni Pablo sa Roma, nga nagsiling: “Apang luyag kami mamati sa imo sang imo ginahunahuna, kay nahanungod sining bunghay nahibaluan namon nga bisan diin ginapakamalain ini.”​—⁠Binuhatan 28:⁠22.

Paathagi ang napatalang nga mga tawo, ginahimo ini nga may kalulo. (Roma 12:​14; ipaanggid ang 2 Timoteo 2:⁠25.) Agdaha sila sa pagkuha sing direkta nga impormasyon tuhoy sa mga Saksi ni Jehova, agod indi sila malimbungan sang sayop nga mga panumbungon. Mahimo man nimo magamit ang mga paathag nga ginbalhag sang Watch Tower Society nga nagahatag sing mga detalye tuhoy sa organisasyon, sang maragtas sini, kag sang mga panudlo sini.⁠a Ginsabat sadto ni Felipe si Natanael sa pagsiling lamang: “Kari kag tan-awa.” (Juan 1:46) Mahimo man naton ini. Mainit nga ginaabiabi ang bisan sin-o nga maluyag sa pagduaw sa lokal nga Kingdom Hall agod direkta nga makapanilag sa kon ano nga sahi sang mga tawo ang mga Saksi ni Jehova kag kon ano ang ila ginapatihan.

Dili Magkahadlok sa mga Manugpamatok

Makapalig-on gid mahibal-an nga ang pagpakahuya wala nagapugong sa mga tawo nga mangin mga Saksi! Sa tion sang isa ka programa sa telebisyon sa Alemanya, nagpresentar sing madamo nga kabutigan ang mga apostata tuhoy sa mga Saksi. Isa ka tumalan-aw ang nakatalupangod sang mga patupato sang apostata subong indi mapatihan kag napahulag sa pagpadayon sang iya pagtuon sa Biblia upod sa mga Saksi. Huo, ang pagpakahuya sa publiko nagadul-ong kon kaisa sa positibo nga mga resulta!​—⁠Ipaanggid ang Filipos 1:​12, 13.

Nahibaluan ni apostol Pablo nga ang pila magapamati sa “sayop nga mga sugilanon” sangsa kamatuoran. Busa nagsulat sia: ‘Magmalig-on ka sa walay langan, batasa ang pag-antos, himua ang buluhaton sang ebanghilisador, tumana sing bug-os ang imo ministeryo.’ (2 Timoteo 4:​3-5) Gani indi pagtuguti ang imo kaugalingon nga matublag, kag ‘mahadlok sa bisan ano’ sa imo mga kasumpong. (Filipos 1:28) Magpabilin nga kalmado kag handa kag ibantala ang maayong balita sing malipayon, kag malandas mo nga may kalig-on ang pagpakahuya sa publiko. Huo, dumduma ang saad ni Jesus: “Malipayon kamo kon ang mga tawo magpasipala sa inyo kag maghingabot sa inyo kag binutig nga maghambal sang tanan nga sahi sang kalautan batok sa inyo bangod sa akon. Magkalipay kamo kag magkasadya, kay ang inyo balos daku sa langit; kay amo man ang paghingabot nila sang mga manalagna nga nahauna sa inyo.”​—⁠Mateo 5:​11, 12.

[Footnote]

[Blurb sa pahina 27]

Sang gin-atubang sang mga manugpamatok, ginsilingan ni Jesus ang iya mga disipulo: “Pabayai ninyo sila.” Ano ang buot niya silingon?

[Blurb sa pahina 29]

“Malipayon kamo kon ang mga tawo magpasipala sa inyo kag maghingabot sa inyo kag binutig nga maghambal sang tanan nga sahi sang kalautan batok sa inyo bangod sa akon.”​—⁠Mateo 5:⁠11