Ngaa Wala Ginasabat sang mga Saksi ni Jehova ang Tanan nga Panumbungon sa Ila?
Ginasunod sang mga Saksi ni Jehova ang laygay sang Biblia nga indi pagsabton ang tanan nga panumbungon kag pagyaguta sa ila. Halimbawa, ang isa ka hulubaton sa Biblia nagasiling: “Ang isa nga nagatadlong sa nagapangyaguta nagaagda sing kahuy-anan.” (Hulubaton 9:7, 8; 26:4) Imbes nga uyangan ang tion sa pagpakigbais bangod sa sala nga panumbungon, nagapokus kami kon paano mapalipay ang Dios.—Salmo 119:69.
Siempre, may “tion sa paghipos kag tion sa paghambal.” (Manugwali 3:7) Ginasabat namon ang pamangkot sang sinsero nga mga tawo nga interesado nga mabal-an ang kamatuoran, pero wala kami nagapakigbais. Paagi sini, ginasunod namon ang mga panudlo kag halimbawa ni Jesus kag sang mga Cristiano sang una.
Si Jesus wala nagsabat sa sayop nga mga panumbungon sa iya sa atubangan ni Pilato. (Mateo 27:11-14; 1 Pedro 2:21-23) Naghipos lang si Jesus sang ginsilingan sia nga palahubog kag dahakdahak. Ginpabay-an niya nga maobserbahan sang iban ang iya mga ginahimo para mapamatud-an kon bala matuod ang panumbungon sa iya. Ginsunod ni Jesus ang prinsipio sa Biblia nga nagasiling: “Ang kaalam ginapamatud-an nga matarong paagi sa mga resulta sini.” (Mateo 11:19, footnote) Pero kon kinahanglanon, maisog nga ginasabat ni Jesus ang mga nagapasipala sa iya.—Mateo 15:1-3; Marcos 3:22-30.
Gintudluan ni Jesus ang iya mga sumulunod nga indi maluyahan sa sayop nga mga panumbungon sa ila. Nagsiling sia: “Malipayon kamo kon ginapakahuy-an kamo kag ginahingabot kag ginabutangbutangan sang tanan nga sahi sang kalautan tungod sa akon.” (Mateo 5:11, 12) Pero nagsiling man si Jesus nga kon makapanaksi ang iya mga sumulunod bangod sini nga mga panumbungon, tumanon niya ang iya promisa: “Hatagan ko kamo sing kaalam sa pagsabat nga indi mapamatukan ukon masuay sang tanan nga nagapamatok sa inyo.”—Lucas 21:12-15.
Si apostol Pablo naglaygay sa mga Cristiano nga likawan ang wala sing pasingadtuan nga pagpakigbais sa mga nagapamatok, kay suno sa iya “wala ini sing mahatag nga kaayuhan kag wala sing pulos.”—Tito 3:9; Roma 16:17, 18.
Si apostol Pedro naglaygay sa mga Cristiano nga pangapinan ang ila pagtuo kon kinahanglanon. (1 Pedro 3:15) Pero nabal-an niya nga mas maayo nga ipakita ini paagi sa buhat sa baylo nga sa hambal. Nagsiling sia: “Paagi sa paghimo sing maayo, mapahipos ninyo ang indi makatarunganon nga mga tawo.”—1 Pedro 2:12-15.