Ang Tawo nga Mahisaon

ANG Hebreong hambal may isa lamang ka gamot nga tinaga para sa “kaimon.” Kon nagapatuhoy sa makasasala nga mga tawo, ang Hebreong tinaga mahimo badbaron nga “kahisa” ukon “paindis-indis.” (Genesis 26:14; Manugwali 4:⁠4) Apang, ang Griegong hambal may kapin sa isa ka tinaga para sa “kahisa.” Ang tinaga nga zeʹlos, kaangay sang Hebreong katumbas sini, mahimo magapatuhoy sa matarong kag malain nga kaimon. Ang isa pa ka Griegong tinaga, phthoʹnos, nagapatuhoy lamang sa malain nga kaimon. Sa New World Translation, pirme ini ginabadbad nga “kahisa.”

Paano gingamit ang tinaga nga phthoʹnos sa dumaan nga Griego? Ang The Anchor Bible Dictionary nagasiling: “Indi kaangay sang mahamkunon nga tawo, indi gid man luyag sang tawo nga ginasit-an sang phtho­nos ang mga butang nga ginakaakigan niya nga ginapanag-iyahan sang iban; indi lang niya luyag nga mapanag-iyahan ini sang iban. Tuhay sia sa mapaindis-indison nga tawo bangod, indi kaangay sang mapaindis-indison nga tawo, ang iya tinutuyo indi amo ang magdaug kundi ang upangan ang iban sa pagdaug.”

Ang tawo nga mahisaon masunson nga wala makahibalo nga ang iya kaugalingon nga panimuot amo ang pangunang kabangdanan sang iya mga problema. “Ang isa sang mga kinatuhayan sang phtho­nos,” paathag sini man nga diksionaryo, “amo ang kakulang sing ihibalo sini sa kaugalingon. Ang tawo nga phthoneros, kon ginapangabay sa pagpaathag sang iya paggawi, pirme magasiling sa iya kaugalingon kag sa iban nga yadtong ginamulay niya nagakabagay gid sa sini kag nga ang indi matarong nga kahimtangan amo ang nagtiklod sa iya sa pagmulay. Kon pamangkuton kon ngaa nahambal niya sa isa ka abyan ang ginhambal niya, magasiling sia nga ang iya mga pagmulay para gid sa kaayuhan sang iya abyan.”

Gingamit sang mga manunulat sang Ebanghelyo nga si Mateo kag si Marcos ang Griegong tinaga nga phthoʹnos sa paglaragway sang motibo sadtong may salabton sa pagpatay kay Jesus. (Mateo 27:18; Marcos 15:10) Huo, ginpahulag sila sang kahisa. Ining mahaliton man nga balatyagon ang naghimo sa mga apostata nga mangin malaut nga mga manugdumot sang ila anay nga mga kauturan. (1 Timoteo 6:​3-5) Indi katingalahan nga ang mga tawo nga mahisaon ginadumilian sa pagsulod sa Ginharian sang Dios! Si Jehova nga Dios nagsugo nga ang tanan nga nagapadayon nga mangin “puno sang kahisa” “takus sa kamatayon.”​—⁠Roma 1:​29, 32; Galacia 5:⁠21.

[Mga retrato sa pahina 7]

Indi pagtuguti nga gub-on sang kahisa ang imo kabuhi