Mga Pamangkot Gikan sa mga Bumalasa
Ano ang buot silingon ni disipulo Santiago sang nagsiling sia: “Mga kauturan ko, dili maghingamo ang madamo sa inyo sa pagkamanunudlo, kay nahibaluan ninyo nga kita nga nagatudlo hukman sing maid-id pa”?—Santiago 3:1.
Pat-od gid nga wala ginapalas-ay ni Santiago ang mga Cristiano sa pagtudlo sang kamatuoran sa iban. Sa Mateo 28:19, 20, si Jesus nagsugo sa iya mga disipulo nga “himuon nga mga disipulo ang katawhan sang tanan nga kapungsuran, . . . nga nagapanudlo sa ila sa pagtuman sang tanan nga butang nga ginsugo ko sa inyo.” Hanti, ang tanan nga Cristiano dapat mangin mga manunudlo. Ginlaygayan ni apostol Pablo ang Hebreong mga Cristiano bangod indi pa sila mga manunudlo. Sia nagsulat: “Kay dapat na kamo kuntani magmanunudlo sa sining tion, apang nagakinahanglan kamo sing isa nga magtudlo sa inyo liwat sang nahauna nga mga pagtulun-an sang sagradong mga pahibalo sang Dios.”—Hebreo 5:12.
Ano, nian, ang ginahambalan ni Santiago? Ginapatuhuyan niya yadtong may pinasahi nga mga pribilehiyo sa pagpanudlo sa kongregasyon. Sa Efeso 4:11, aton mabasa: “Ginhatag niya [si Jesucristo, ang Ulo sang kongregasyon] ang iban subong mga apostoles, ang iban subong mga manalagna, ang iban subong mga ebanghelisador, ang iban subong mga manugbantay kag mga manunudlo.” May pinasahi sadto nga mga pribilehiyo sa pagtudlo sa tunga sang nahaunang siglo nga mga kongregasyon kaangay man sa karon. Halimbawa, ang Nagadumala nga Hubon ginatiglawas sang “matutom kag mainandamon nga ulipon” kag may pinasahi nga responsabilidad sa pagdumala sang pagpanudlo sa bug-os kalibutan nga kongregasyon. (Mateo 24:45) Ang nagalakbay nga mga manugtatap kag mga gulang sang kongregasyon may pinasahi man nga mga responsabilidad sa pagpanudlo.
Ginasilingan bala ni Santiago ang kalipikado nga Cristianong mga lalaki nga indi nila dapat pagbatunon ang katungdanan sang manunudlo bangod sang kahadlok sa mas mabug-at nga paghukom sang Dios? Wala gid. Ang katungdanan sang gulang isa ka daku nga pribilehiyo, subong sang ginapakita sang 1 Timoteo 3:1, nga nagasiling: “Kon ang bisan sin-o nagahandum sang palangakuan sang manugtatap, nagahandum sia sing maayong hilikuton.” Ang isa sang mga kinahanglanon agod matangdo subong isa ka gulang sang kongregasyon amo nga ang lalaki mangin “sampaton sa pagpanudlo.” (1 Timoteo 3:2) Wala ginasumpakil ni Santiago ang inspirado nga mga pinamulong ni Pablo.
Apang, mahimo nga sang nahaunang siglo C.E., ginahimo sang iban ang ila kaugalingon subong mga manunudlo, bisan pa nga indi sila kalipikado kag wala gintangdo. Ayhan naghunahuna sila nga may pila ka kabantugan sa sinang palangakuan, kag ginhandum nila ang personal nga himaya. (Ipaanggid ang Marcos 12:38-40; 1 Timoteo 5:17.) Ginhinambitan ni apostol Juan si Diotrefes, nga ‘naluyag manguna, apang wala magbaton sing bisan ano gikan kay Juan nga may pagtahod.’ (3 Juan 9) Ang 1 Timoteo 1:7 nagapamulong tuhoy sa pila nga ‘maluyag mangin mga manunudlo sang kasuguan apang wala makahangop sang ginasiling nila ukon sang mga butang nga ila ginapilit.’ Ang pinamulong sang Santiago 3:1 labi na nga nagakaigo para sa mga lalaki nga nagahandum nga mangin mga manunudlo apang may malain nga motibo. Mahimo gid nila mahalitan sing daku ang panong kag nagakaigo nga magabaton sing mas mabug-at nga paghukom.—Roma 2:17-21; 14:12.
Ang Santiago 3:1 isa man ka maayong pahanumdom para sa sadtong mga kalipikado kag nagaalagad subong mga manunudlo. Bangod daku ang gintulin sa ila, daku ang pangayuon sa ila. (Lucas 12:48) Si Jesus nagsiling: “Ang tagsa ka pulong nga wala sing pulos nga ipamulong sang mga tawo, magahatag sila sing husay sini sa Adlaw sang Paghukom.” (Mateo 12:36) Matuod ini ilabi na sa sadtong ang ila mga pinamulong may mas daku nga impluwensia, ang gintangdo nga mga gulang.
Ang mga gulang magahatag sing husay sa kon paano nila ginapakig-angutan ang mga karnero ni Jehova. (Hebreo 13:17) Ang ila ginasiling nagaapektar sang kabuhi. Hanti, ang gulang dapat maghalong nga wala ginapakataas ang iya kaugalingon nga mga opinyon ukon ginaabusuhan ang mga karnero kaangay sang ginhimo sang mga Fariseo. Dapat sia manikasog nga ipakita ang tudok nga gugma nga ginpakita ni Jesus. Sa kada pagtudlo, kag ilabi na kon nagadalahig sang hudisyal nga mga butang, dapat tulutimbangon sing maayo sang gulang ang iya mga ginahambal, nga wala nagagamit sing patarasak nga mga hambalanon ukon nagapabutyag sing personal lamang nga mga ideya. Paagi sa pagsalig sing bug-os kay Jehova, sa iya Pulong, kag sa iya mga panuytoy paagi sa iya organisasyon, ang manugbantay magabaton sing bugana nga pagpakamaayo sang Dios, indi sing “mas mabug-at nga paghukom.”