Ang Sentro sang Edukasyon sang Watchtower Nagapadala sing mga Misyonero

ANG Watchtower Bible ­School of Gil­ead nakahiwat sing mga klase sa nanuhaytuhay nga mga lokasyon. Sa ulot sang 1943 kag 1960, sa mga pasilidad sa ­South Lansing, New York, E.U.A., 35 ka klase, nga ginahuman sang mga estudyante gikan sa 95 ka kadutaan, ang nakabaton sing pinasahi nga paghanas. Nian ginsaylo ang eskwelahan sa bug-os kalibutan nga ulong-talatapan sa Brook­lyn, New York, diin nagpanghikot ini sa halos 28 ka tuig. Kutob sang 1988 tubtob sang maaga nga bahin sang 1995, ang Eskwelahan sang Gil­ead nakahiwat sing mga klase sa Wall­kill, New York.

Sa sulod sining mga tinuig ginpasangkad sang eskwelahan ang iya pagpanghikot. Sa idalom sang pagtuytoy sini ang napulo-ka-semana nga kurso sang pagtudlo gin-aman sa tatlo ka klase sa Mex­ico; lima sang subong sina nga mga klase ginhiwat sa Alemanya; duha sa India. Sugod sang 1987 ang isa ka sanga nga eskwelahan nga gintawag Min­is­te­rial Train­ing ­School nakahiwat sing mga klase sa 34 ka kadutaan, nagaaman sing pinasahi nga walo-ka-semana nga kurso sang paghanas para sa pamatan-on nga mga lalaki nga kalipikado. Apang, ang instruksion nga ginhatag sa ika-99 nga klase sang Gil­ead, sa bag-o matukod nga Sentro sang Edukasyon sang Watch­tower sa Pat­ter­son, New York, isa ka 20-ka-semana nga kurso, nga naglakip sing tul-id nga pagtuon sa bug-os nga Biblia, pag­hinun-anon tuhoy sa modernong-adlaw nga maragtas kag organisasyon sang mga Saksi ni Jehova, subong man maid-id nga laygay tuhoy sa hilikuton sang pagmisyonero sa iban nga pungsod.

Sang Septiembre 2, naggradwar inang ika-99 nga klase. Ang tatlo-ka-oras nga programa sang gradwasyon ginhiwat sa bag-ong awditoryom sa Sentro sang Edukasyon sang Watch­tower. Napuno ini sing hustuhan lamang. Dugang pa nga mga tumalambong sa mga pasilidad sang Beth­el sa Pat­ter­son, Wall­kill, kag sa Brook­lyn ang gin-angot sa elektroniko nga paagi. Isa yadto ka makakulunyag nga adlaw indi lamang para sa manuggradwar nga klase upod sa ila mga paryente kag suod nga mga abyan kundi para man sa ginatos nga nagpakigbahin subong mga boluntaryo sa pagpatindog sang matahom nga bag-ong mga pasilidad sang eskwelahan.

Sa iya nagabukas nga mga komento, ginpatalupangod ni Ca­rey Bar­ber sang Nagadumala nga Hubon ang importansia sang nagakatabo. Sia nagsiling: “Amo ini ang mangin sentro sang labing daku nga hilikuton sang balaan nga edukasyon nga nahimo sa sining duta.” Ginpaathag niya nga nagahilapit na kita sa talipuspusan sang inaway sa ulot sang binhi sang babayi kag sang binhi sang man-ug. (Genesis 3:15) Ang mga maluwas lamang sa makapulunaw nga engkwentrohanay sa nagapakari nga dakung kapipit-an, suno sa iya, amo ang mga may sibu nga ihibalo tuhoy sa Pulong sang Dios kag matinumanon sa sini.

“Ang aton programa karon sa edukasyon,” siling niya, “gindesinyo agod dalhon ang tanan nga katawhan ni Jehova bisan diin sa isa ka maayong kahimtangan sang pagkahamtong nga ginlaragway sa Hulubaton 1:​1-4​—⁠may ihibalo sa kaalam kag disiplina, may ikasarang sa paghantop sang paghangop, nagabaton sing disiplina nga nagahatag sing paghantop, pagkamatarong, paghukom, pagkatadlong, kag ikasarang sa paghunahuna.” Daw ano nga pangamlig ang makatigayon sining espirituwal nga kamanggaran!

Laygay sa Manuggradwar nga Klase

Yadtong nagabukas nga mga komento ginsundan sang lima ka malip-ot nga pamulongpulong nga ginpatuhoy sa manuggradwar nga klase. Si Har­old Jac­son, isa anay ka instruktor sa Gil­ead kag katapo karon sang talapuanan sang ulong-talatapan sa Brook­lyn, nagpalig-on sa klase, “Magpabilin sing Malig-on sa Inyo Diosnon nga Pagkakontento.” Si ­Lloyd Bar­ry, isa anay ka madugay nga misyonero kag katapo karon sang Nagadumala nga Hubon, nagpamulongpulong tuhoy sa “Pag-alagad kay Jehova sing Mapainubuson.” Ginpaathag niya nga ining kinaiya mangin importante sa mga gradwado sa ila pagpasibu sa bag-ong mga kahimtangan subong man sa ila relasyon sa mga masigkamisyonero, sa mga kongregasyon nga ila pangalagaran, kag sa lokal nga mga tawo.

Si Karl Adams, nagapangalagad karon sa pakultad sang Gil­ead, nangatarungan sa klase paagi sa pamangkot nga “Ano ang Ipahimo sa Inyo sang Pagtuo?” Ginpalig-on niya sila nga indi pagsundon ang mga Israelinhon nga nagreklamo nahanungod sa mga kahimtangan sa kahanayakan kag naghandum nga magbalik sa Egipto kundi, sundon sa baylo, si Abraham nga nagpaabot sa Ginharian sang Dios sa baylo nga magbalik sa Ur sang mga Caldeanhon subong solusyon sa mga problema. (Exodo 16:​2, 3; Hebreo 11:​10, 15, 16) Si Ulys­ses ­Glass, ang manugrehistro sang eskwelahan, naggamit sang eksperiensia ni Asap nga narekord sa Salmo 73 sa paglaygay sa manuggradwar nga klase, “Isipa ang mga Pagpakamaayo sa Inyo.” Kag si Al­bert ­Schroeder, isa ka katapo sang Komite sa Pagpanudlo sang Nagadumala nga Hubon, nagpamulongpulong sa tema nga “Si Jehova Nagaaman.” Bilang ebidensia sina nga aman, ginsambit niya ang Eskwelahan sang Gil­ead mismo kag ang papel sini sa pagtuman sang dakung hilikuton sa pagbantala kag paghimo sing mga disipulo.

Pagkatapos, namati ang tumalambong nga may hanuot nga interes sang si Milton Hen­schel, presidente sang ­Watch Tow­er So­cie­ty, nagpamulongpulong nahanungod sa “Mga Katapo nga Naangot sa Isa kag Isa.” Ginbasa niya kag ginkomentuhan sing tul-id ang Roma kapitulo 12. Lakip sa iban nga mga butang, sia nagsiling: “Dapat naton binagbinagon nga may yara kita suod gid nga kaangtanan sa aton mga masigkaalagad sa kongregasyon.” Nagdugang pa sia: “Maayo nga dumdumon naton pirme ang isa kag isa sa aton subong pagkabutang ni Jehova, kag sa baylo nga mangin mamulayon, sa baylo nga mangita sing sayop, mangin mabuligon kita pirme. Ginabuligan naton ang aton kaugalingon kon ginahuptan naton ang espirituwal nga paghiusa sang Cristianong kongregasyon.” Ginpakita niya kon paano ining pagkamabuligon sarang mapakita kon nagaluto sing pagkaon sa mga puluy-an pangmisyonero, ginabinagbinag ang katunayan nga indi palareho ang makaon sang tanan. Ginpalig-on man niya ang pagkamabuligon sa baylo sang pagmulay kon nagapakigbahin sa pag-alagad sa latagon upod sa mga masigka-Cristiano nga pigado gid. Kon mabuligon gid kita, makapabakod, kag makapalig-on sa isa kag isa, siling ni Utod Hen­schel, “higugmaon kita ni Jehova bangod sini.” Daw ano ini kaayo gid nga laygay para sa mga misyonero nga magaalagad sa kadutaan nga tuhay gid sa ila biyaan!

Pagkilala sa Klase sing Maayo Pa

Ang 48 ka estudyante sang ika-99 nga klase, sa promedyo, nagaedad sing 32 anyos kag nakahinguyang na sing kapin sa 11 ka tuig sa bug-os tion nga ministeryo.

Ang mga interbyu nga bahin sang programa sang gradwasyon naghatag sa tumalambong sing kahigayunan nga makilala sing maayo pa ang pila sa ila. Si Nik­ki ­Leibl, nga taga-Estados Unidos, kag si Si­mon Bolton, nga taga-Inglaterra, nag-asoy sang mga hitabo nga nagtilaw sang ila pagtuo nga si Jehova magaaman sang ila pisikal nga mga kinahanglanon. Naeksperiensiahan nila ang pag-atipan ni Jehova samtang ginauna nila ang bug-os tion nga ministeryo.

Si Isabelle Kazan, nga nagahambal sing Pranses, nagsiling nga nagtuon sia sing Arabiko agod makapanaksi sa nagahambal sing Arabiko nga mga tawo sa iya pungsod. Sang magsugod sia sang 1987, ang isa ka diutay nga grupo sa Paris ginahuman lamang sang apat ka nagahambal sing Arabiko nga utod nga lalaki, dugang sa iya kag sa isa pa ka utod nga babayi nga nagatuon sang lenguahe. (Indi yadto ma­hapos. Walo ka oras nga ginahandaan nila ang leksion sa Lalantawan kada semana agod makakomento sila.) Takus bala ini nga panikasog? Ti, sa karon ang nagahambal sing Arabiko nga mga Saksi naorganisar sa lima ka sirkito sa bug-os nga Pransia. Ang isa pa ka estudyante, si Miko Puro, nag-asoy kon paano ang Pranses nga natun-an niya sa eskwelahan nakabulig sa iya sa pagbantala sa taga-Aprika nga mga refu­gee sa Fin­land nga iya natawhan, kag mangin mapuslanon man ini sa iya teritoryo subong misyonero sa Benin. Ginsaysay ni Bon­ny ­Bowes ang iya panikasog nga mangin talunsay sa paghambal sing Pranses agod nga makaalagad sia sing epektibo sa Que­bec, Can­ada. Kag si ­Bjarki Ras­mus­sen, nga taga-Den­mark, nag-asoy sing mga eksperiensia nga naagihan nila nga mag-asawa sa sulod sang mga tinuig nga pag-alagad nila sa Faer­oe Is­lands. Huo, eksperien­siado gid nga bug-os tion nga mga ministro ining bag-o nga mga misyonero.

Ang mga gradwado ginpadala sa 19 ka kadutaan​—⁠sa Aprika, Sentral kag Bagatnan nga Amerika, Nasidlangan nga Europa, kag sa Sidlangan. Ang mga gradwado sang nauna nga mga klase nakaalagad na sa kapin sa 200 ka kadutaan. Madamo sining mga gradwado ang masako gihapon sa ila mga asaynment. Ining bag-ong mga misyonero nagabuylog karon sa ila sa dugang pa nga pagpasangkad sang pagpanaksi sa Ginharian tubtob sa kaukbungan sang duta.​—⁠Binuhatan 1:⁠8.

[Mga retrato sa pahina 25]

Mga danyag sa sulod sang hulot-klasehan sa Sentro sang Edukasyon sang Watchtower

[Retrato sa pahina 26]

Ika-99 nga Manuggradwar nga Klase sang Watchtower Bible School of Gilead

Sa listahan sa ubos, ang mga idas nanumeruhan halin sa atubang pa likod, kag ang mga ngalan nalista halin sa wala pa tuo sa tagsa ka idas.

(1) Heffey, S.; Riley, E.; Mortensen, D.; Honable, A.; Bolton, J.; Poole, J.; Siimes, G.; Sousa, L. (2) Pashnitski, B.; Shepherd, D.; Pashnitski, W.; Järvinen, J.; Paulsen, K.; Rasmussen, E.; Schewe, C.; Olsson, L. (3) Paulsen, E.; Samsel, T.; Bowes, B.; Harris, E.; Kazan, I.; Liebl, N.; Sousa, P.; Puro, J. (4) Lager, K.; Lager, V.; Golden, K.; Bolton, S.; Johnson, M.; Johnson, S.; Liebl, A.; Rasmussen, B. (5) Harris, D.; Samsel, W.; Schewe, O.; Heffey, R.; Kazan, L.; Riley, T.; Järvinen, O.; Puro, M. (6) Mortensen, D.; Golden, R.; Honable, L.; Shepherd, M.; Bowes, R.; Siimes, T.; Poole, E.; Olsson, J.

[Mga retrato sa pahina 27]

Yara pa gihapon sa ila asaynment: (wala) Charles Leathco upod sa iya asawa, si Fern, sa Brazil, mga gradwado sang una kag ikan-um nga klase sang Gilead; (ubos) si Martha Hess, sa Japan, gradwado sang ikapito nga klase sang Gilead