Report sang mga Manugbantala sang Ginharian

“Ang Pulong sang Dios Nagatubo”

ANG Cristianong kongregasyon naguswag gikan sa 120 ka katapo tubtob sa kapin sa 3,000 wala madugay sa tapos ini nahuman. (Binuhatan 1:15; 2:41) Ginapaathag sang Biblia nga ang “pulong sang Dios nagtubo, kag ang kadamuon sang mga gintutun-an nagdugang sing tama gid sa Jerusalem.” (Binuhatan 6:⁠7) Pila ka tuig lamang ang nagligad, ang bag-o nahuman nga kongregasyon nangin interkontinental nga organisasyon upod sa mga Cristiano sa Aprika, Asia, kag Europa.

Ang Cristianong kongregasyon karon nagauswag man sing madasig. Halimbawa, sa Mexico, nag-uswag ang kadamuon sang manugbantala sang Ginharian sa sulod lamang sang lima ka tuig sing kapin sa 130,000 tubtob sa 443,640! Sang 1995 1 sa kada 59 ka tawo sa Mexico ang nagtambong sa Memoryal sang kamatayon ni Cristo subong ginasaulog sang mga Saksi ni Jehova. Apang, ang espirituwal nga pag-ani sa sinang pungsod wala pa matapos, subong ginapakita sang masunod nga eksperiensia.​—⁠Mateo 9:​37, 38.

Sa isa ka banwa sa estado sang Chiapas, wala sing bisan isa ang nagbaton sa pagtuon sing Biblia sa puluy-an upod sa mga Saksi ni Jehova, bisan pa sa tapos nila ginbantala ang maayong balita sa kapin sa 20 ka tuig sa amo nga duog. Maathag nga ginapahog ang madamo nga pumuluyo sing isa ka tawo nga nakilal-an subong masingki. Nahadlok sila kon ano ang iya himuon kon mahibaluan niya nga nagatuon sila sa Biblia upod sa mga Saksi.

Namat-od ang duha ka maisog nga Saksi nga nagsaylo sa sinang duog nga lubaron ang problema paagi sa pagpalapit sa tawo nga ginakahadlukan. Sang pag-abot nila sa iya puluy-an, gin-abiabi sila sang iya asawa kag ginpamatian gid niya ang ila mensahe. Interesado gid sia kaayo sa ginasambit sang Biblia nahanungod sa pagkabuhi sa paraiso sa duta. Apang ginahunahuna niya nga ang iya bana magapabudlay sa iya kon magtuon sia sa Biblia. Ginpaathag sang mga Saksi nga kon indi sia mangusisa sing maid-id sa kon ano ang ginasiling sang Biblia, indi gid niya mahibaluan kon paano alagaron ang Dios kag maagom ang kabuhi sa duta sing mapinadayunon. Ginbaton niya ang isa ka pagtuon sa Biblia.

Subong sa ginapaabot, wala naluyagan sang iya bana ang iya desisyon. Gindumilian niya sia sa paggamit sang iya kotse sa pagtambong sa Cristianong mga miting, bisan pa ginapahanugutan niya nga gamiton ini sa iban nga mga katuyuan. Walay sapayan sang iya pagpamatok, padayon sia nga nagalakat padulong sa pinakamalapit nga Kingdom Hall sang mga Saksi ni Jehova, nga may napulo ka kilometro ang kalayuon. Natalupangdan sang ulihi sang iban sa banwa ang iya kaisog kag determinasyon. Ginapamatian na sang mga tawo ang mga Saksi kon magduaw sa ila mga puluy-an. Ginaupdan pa gani sang iban ang babayi sa mga miting. Sang ulihi, gindumalahan sang mga Saksi ang kapin sa 20 ka pagtuon sa Biblia sa sina nga banwa!

Ang abyan sining babayi nagpamat-od man sa pagtuon sa Biblia walay sapayan sang pagpamatok sang iya bana. Sing makakilibot, ginpalig-on sia sang bana sang nahauna nga babayi. Pagkatapos niya ginsugilanon ang iya bana, nag-untat ang pagpamatok. Gani sa tapos sang 20 ka tuig ang binhi sang kamatuoran sa Biblia nagtubo sang ulihi, nga may kapin sa 15 ka tawo ang nagatuon kag nagatambong sa Cristianong mga miting, nagalakip sa sining duha ka babayi, nga nagabantala na karon sing maayong balita.