Report sang mga Manugbantala sang Ginharian
Pagsab-ug sing Binhi sang Ginharian sa Tanan nga Okasyon
GINAPALIG-ON sang Pulong sang Dios, ang Biblia, ang pagkamapisan. Si Hari Solomon nagsiling: “Isab-ug ang imo binhi sa aga kag tubtob sa gab-i indi pagpapahuwaya ang imo kamot; kay wala ikaw makahibalo kon diin sa ila ang magamadinalag-on, diri ukon didto, ukon basi mangin maayo sila nga duha.”—Manugwali 11:6.
Sa tagsa ka nagakaigo nga okasyon, ang mga Saksi ni Jehova nagasab-ug sing “binhi” paagi sa pagbantala sing maayong balita sang Ginharian sang Dios. Sa kapin sa 230 ka kadutaan kag mga isla, nagapadayon sila nga “wala sing untat sa pagpanudlo kag pagbantala sing maayong balita tuhoy kay Cristo, si Jesus.” (Binuhatan 5:42) Ginalaragway sang masunod nga mga eksperiensia kon paano ang mga Saksi ni Jehova ‘wala nagapapahuway sang ila mga kamot’ sa pagbantala nga hilikuton.
◻ Sa Republika sang Cape Verde, ang isa sang mga Saksi ni Jehova naglabay sa prisuhan samtang nagaalagad sa ministeryo sa latagon. Sa luwang sang prisuhan, ang pila ka bilanggo nagsaka sa kahoy. Sang nakit-an nila ang Saksi sa ubos, nagsinggit ang mga bilanggo nga nagapangayo sing mga magasin. Ginhigot sang Saksi ang Lalantawan kag Magmata! nga mga magasin sa bato kag ginhaboy ini sa pader sang prisuhan. Subong resulta sining una nga interes, 12 ka pagtuon sa Biblia ang nasugdan. Tatlo ka priso ang nagdedikar sang ila kabuhi sa Dios kag nagpabawtismo sa tubig. Ang isa sa mga bilanggo nag-alagad subong bug-os tion nga ebanghelisador, ukon payunir, sobra na isa ka tuig karon. Apang, paano, nila ginahimo ang pag-alagad sa latagon? Una, ang prisuhan gintunga sa mga teritoryo. Nian ginhatag ang mga teritoryo sa tatlo ka Saksi kag nagpanaksi sila sa mga selda. Ginaatipan sining mga manugbantala sang Ginharian ang mga interesado pareho sa ginahimo sang mga Saksi ni Jehova sa bug-os nga kalibutan—paagi sa pagduaw liwat. Apang, ang isa ka kinatuhayan amo ang kasunson sang pagdumala sang pagtuon sa Biblia. Sa baylo nga tun-an ang Biblia sing isa ukon duha ka beses sa isa ka semana sa sulod sang isa ukon sobra sa isa ka oras, ang iban nga mga priso nagatuon adlaw-adlaw! Dugang pa, gintugutan sang direktor heneral sang bilangguan nga maghiwat ang mga Saksi sing tanan nga miting sang kongregasyon sa sulod sang prisuhan.
◻ Isa ka babayi sa Portugal ang nakapanubli sing mga publikasyon sang Watch Tower sang mapatay ang iya lola. Sanglit indi sia isa sang mga Saksi ni Jehova, indi sia interesado nga huptan ang mga libro. Apang, indi niya luyag nga ipanghaboy ini. Isa ka adlaw ginsugiran niya ang isa sang mga Saksi ni Jehova nga nagduaw sa iya sa pamalaybalay nga ministeryo tuhoy sa mga publikasyon. Ginpamangkot sia sang Saksi kon bala nahibaluan niya kon ano gid ang kapuslanan sang mga publikasyon. Nagsabat ang babayi: “Sa pagkamatuod, wala ko mahibalui ang matuod nga kapuslanan sini, apang paano ko mahibaluan?” Ginbaton sang babayi ang isa ka pagtuon sa Biblia, kag sang ulihi ginpabaloran niya ang mga publikasyon sang iya lola. Sa karon isa naman sia ka Saksi ni Jehova. Dugang pa, ang iya anak nga babayi kag ang isa ka suod nga abyan sang pamilya nagatuon naman sa Biblia. Nangin daw ano ka mapuslanon nga panublion ining koleksion sang mga libro!