Report sang mga Manugbantala sang Ginharian

Pagpanginpadlos Gikan sa Impluwensia sang Demonyo

MADUGAY na nga ginakontrol sang espiritismo ang kabuhi sang minilyon ka tawo. Apang mahimo makapanginpadlos sa sini! Natabo ina sa madamo nga tawo sa dumaan nga siudad sang Efeso. Suno sa rekord sang Biblia, ‘madamo sang mga naghimo sing mga salamangka ang nagdala sang ila mga libro sing tingob kag ginpanutdan nila ini . . . Sa amo padayon nga nagtubo kag nagpangdaug ang pulong ni Jehova sa gamhanan nga paagi.’​—⁠Binuhatan 19:​19, 20.

Ang Cristianong kongregasyon karon nagauswag man. Subong sang natabo sa Efeso, lakip sa nangin mga tumuluo amo ang nagahimo sing demonismo anay. Ginailustrar ini sang masunod nga eksperiensia sa Zimbabwe.

Si Gogo (Lola) Mthupha bantog anay sa iya espiritistiko nga gahom. Ang mga tawo nagahalin pa sa malayo subong sang Zambia, Botswana, kag Bagatnan nga Aprika agod magpabulong sa iya nga nagagamit sing mga dahon-dahon. Gintudluan man ni Gogo Mthupha ang iban kon paano mangin isa ka n’anga, ukon siruhano. Kag kon kaisa nagapanghiwit sia!

Sang isa ka Domingo sang aga, ginduaw si Gogo Mthupha sang mga Saksi ni Jehova nga nagapakigbahin sa pamalaybalay nga ministeryo. Naluyagan gid niya ang pagpakighambal sa ila tuhoy sa saad sang Biblia nga isa ka bag-ong kalibutan sang pagkamatarong, isa ka kalibutan nga wala gid sing malaut nga mga impluwensia. Ginbaton niya ang libro nga Mahimu Ka Mabuhi sing Dayon sa Paraiso sa Dutaa kag nagpasugot sia nga magtuon sing Biblia sa puluy-an. Pagkatapos sang tatlo ka pagtuon lamang, nagtambong na sia sa mga miting.

Paagi sa pagtuon niya sa Biblia, natun-an ni Gogo Mthupha nga ang iya pinasahi nga gahom naghalin sa malaut nga espiritu nga mga tinuga nga nagrebelde batok sa pagkasoberano ni Jehova. (2 Pedro 2:4; Judas 6) Natun-an man niya nga ining mga demonyo determinado nga patalikdon ang tagsatagsa nga masarangan nila batok kay Jehova kag batok sa putli nga pagsimba. Sanglit ginabuligan sia sining malaut nga mga espiritu sa iya palangabuhian, ano ang iya himuon?

Ginpabutyag ni Gogo Mthupha ang iya handum nga dulaon ang tanan niya nga anting-anting kag kagamitan sa espiritismo. Nalakip sa sini ang iya pinasahi nga kalo kag “nagahambal nga sungay sang baka,” nga ginagamit niya sa iya n’anga nga pagpamulong. Luyag ni Gogo Mthupha dulaon inang tanan nga butang agod makaalagad sia sa lamang matuod kag buhi nga Dios, si Jehova.

Apang, namatok ang pila sang iya paryente bangod ginasakdag niya sila sa pinansial. Nangabay sila sa iya nga ipasubli sa ila ang mga kagamitan sa espiritismo, lakip ang iya misteryoso nga gahom agod padayon sila nga makaganar. Namalibad si Gogo Mthupha.

Sa bulig sang lokal nga kongregasyon sang mga Saksi ni Jehova, gintipon niya ang tatlo ka dalagku nga bag sang kagamitan sa espiritismo kag ginsunog ini tanan. Samtang nagadabadaba ang iya kagamitan sa pagsimba sa demonyo, si Gogo Mthupha nagsiling: “Tan-awa! Indi maluwas sang sungay ang iya kaugalingon.”

Sang ulihi, malipayon nga ginsimbolohan ni Gogo Mthupha ang iya dedikasyon kay Jehova paagi sa bawtismo sa tubig. Ano karon ang iya palangabuhian? Nagabaligya sia sing mga ulutanon. Huo, paagi sa gahom sang Pulong sang Dios, ang isa mahimo makapanginpadlos gikan sa pagsimba sa demonyo. Siling ni Gogo Mthupha: “Karon pa lang ako makabatyag nga hilway gid.”

[Footnote]