Mga Ulipon sang mga Tawo Ukon mga Alagad sang Dios?

“MAY dalayawon nga mga butang sa mga Saksi ni Jehova.” Amo ini ang siling sang Aleman nga libro nga Seher, Grübler, Enthusiasten (Mga Bisyonaryo, mga Manugpamalandong, mga Panatiko). Walay sapayan nga daw ginamulay sini ang mga Saksi, ini nagbaton: “Sa kabilugan, nagakabuhi sila nga wala sing kasawayan, kag sing kasarangan nga kabuhi. Mapisan sila kag maukod sa ila mga trabaho, malinong nga mga banwahanon kag bunayag nga mga manugbayad sing buhis. Ginalikawan nila ang sobra nga paghingamo sa manggad. . . . Dalayawon gid ang ila pagkadisiplinado sa mga kombension. Ang ila masinakripisyuhon nga espiritu kaangay sa iban nga mga grupo sang relihion; kon tuhoy sa ministeryo nalabawan nila ang tanan nga iban pa. Apang ang nagpalabaw gid sa ila sa tanan iban pa nga Cristianong simbahan kag grupo sa karon amo ang ila indi gid mationg nga determinasyon diin ang kalabanan sa ila nagapahayag sang ila mga doktrina sa idalom sang tanan nga sirkunstansia kag sa atubangan sang tanan nga katalagman.”a

Walay sapayan sining positibo nga pagbinagbinag, tuhay ang panghunahuna sang iban tuhoy sa mga Saksi ni Jehova. Sa kalabanan nga pungsod sa bug-os nga kalibutan, dayag nga ginahimo sang mga Saksi ang ila relihioso nga mga serbisyo sa sulod sang mga dekada nga wala sing tublag. Kilala sila sang minilyon ka tawo, ginatahod sila, kag nagaugyon nga may kinamatarong sila nga himuon ang ila relihion. Ngaa, nian, may pagpangduhaduha tuhoy sa kon sin-o gid ang mga Saksi ni Jehova?

Ayhan ang isa ka rason sa pagpangduhaduha amo nga sining karon lang madamong iban nga grupo sang relihion ang nadalahig sa pag-abuso sa bata, tingob nga paghikog, kag mga pagsalakay sang terorista. Sa pagkamatuod, ang dikinaandan nga mga buhat kaangay sini yara sa bisan diin, indi lamang sa tunga sang mga relihioso. Apang, kon tuhoy sa relihion, madamo nga tawo ang nangin maduhaduhaon, ang pila nagapamatok pa gani.

Mga Katalagman sang Pagsunod sa mga Tawo

Ang “sekta” ginhatagan sing kahulugan subong “isa ka grupo nga nagasunod sa isa ka pinasahi nga doktrina ukon sa isa ka lider.” Sing kaanggid, yadtong katapo sang isa ka “kulto” may “daku nga debosyon sa isa ka tawo, ideya, ukon butang.” Sa pagkamatuod, ang mga katapo sang bisan ano nga relihion nga matutom kaayo sa tawhanon nga mga lider kag sa ila mga ideya yara sa katalagman nga mangin ulipon sang mga tawo. Ang mabaskog nga kaangtanan sa isa ka lider mahimo magresulta sa sobra nga emosyonal kag espirituwal nga pagsandig. Mahimo magdaku ang katalagman kon ang isa ka tawo ginpadaku sa sini nga kahimtangan kutob sa pagkabata.

Ang mga may subong nga kabalaka tuhoy sa relihion nagakinahanglan sing masaligan nga impormasyon. Ang iban mahimo ginsingganan nga ang mga Saksi katapo sang isa ka relihioso nga organisasyon nga nagaulipon sa mga miembro sini, nagakontrol sa ila, dinagakaigo nga nagalatid sang ila kahilwayan, kag wala nagagawi kaangay sang iban sa kabilugan.

Nahibal-an sang mga Saksi ni Jehova nga ining kabalaka wala sing sadsaran. Busa, ginaagda nila kamo nga usisaon ini mismo sa inyo kaugalingon. Pagkatapos sang maid-id nga pagbinagbinag, maghimo sang inyo kaugalingon nga mga paghinakop. Ang mga Saksi ni Jehova mga alagad gid bala sang Dios, subong sang ginasiling nila, ukon mga ulipon sang mga tawo? Diin nagahalin ang ila kusog? Ihatag sang duha ka artikulo sa pahina 12-23 ang makapaayaw nga mga sabat sa sining mga pamangkot.

[Footnote]