Report sang mga Manugbantala sang Ginharian

Nakatuon sing Kamatuoran ang Isa Anay ka Nagapamatok

MADAMO na ang ginbalita tuhoy sa inaway sibil sa Liberia. Linibolibo ang napatay, kag mas madamo pa ang nag-alaplaag. Walay sapayan sining mga kabudlayan, ang bunayag sing tagipusuon nga mga tawo padayon nga nagabaton sing kamatuoran, subong sang ginalaragway sang masunod nga eksperiensia.

Kutob sa edad nga napulo ka tuig, si James gintudluan sang Luterano nga Simbahan. Pagkatapos mangin editor sang pamantalaan sang simbahan, gingamit niya ang iya posisyon agod magsulat sing mga artikulo batok sa mga Saksi ni Jehova. Ginhimo niya ini walay sapayan nga wala pa gid sia sing nasugilanon nga isa sa ila.

Sang ulihi, naghalin si James sa pamantalaan sang simbahan kag nangin madinalag-on nga tag-iya sang isa ka motel. Isa ka adlaw samtang nagapungko sia sa reception sang iya motel, duha ka sister nga nakapanapot sing maayo ang nagduaw sa iya. Sang makita ang ila mahipid nga pamayo, ginpasulod niya sila. Apang sang ginpaathag nila ang katuyuan sang ila pagduaw, nagsiling sia, “Masako ako kaayo agod makigsugilanon.” Gintanyagan sia sang mga Saksi sing suskripsion sa Lalantawan kag Magmata! nga mga magasin, kag ginbaton niya ini agod makalakat dayon ang mga Saksi. Sa sulod sang 12 ka bulan nag-abot sa iya balay ang mga magasin, apang ginasulod niya ini sa plastik nga bag nga wala gani ginakuha ang putos sini.

Nagadabdab sadto ang inaway sibil, gani gin-impaki ni James ang isa ka bag nga may unod nga kuwarta kag malahalon nga mga pagkabutang agod maghalin sa una gid nga patimaan sang pagsalakay. Isa ka aga isa ka granada ang naglupok sa likod sang puwertahan sa likod sang iya balay, kag nagasalasala nga ginhakwat niya ang iya bag kag nalagyo. Upod sa linibo ka sibilyan nga nagapalagyo, nag-agi si James sa madamo nga checkpoint. Madamo sing wala sing labot nga mga sibilyan ang masami nga ginakawatan kag ginapatay nga wala sing nagakaigo nga rason sa sini nga mga checkpoint.

Sa una nga checkpoint, ginpamangkot si James sing pila ka pamangkot kag ginsugo nga abrihan ang iya bag. Sang gin-abrihan niya ini, gintan-aw niya ang sulod sang iya bag kag daw indi sia makapati sa iya nakita. Nadismaya sia sang masapwan niya nga ang iya nadala nga bag indi amo ang nasudlan sang iya malahalon nga mga pagkabutang. Bangod sang iya pagsalasala, napudyot niya ang bag nga nagaunod sang tanan wala mabuksan nga Lalantawan kag Magmata! nga mga magasin. Apang, sang makita sang soldado ang mga magasin kag sang mabasa ang ngalan ni James sa mga etiketa, sia nagsiling: “Ah, isa ikaw sang mga Saksi ni Jehova. Indi kamo ang amon ginapangita, nahibaluan namon nga wala kamo nagabutig.” Pagkatapos makakuha sing pila ka magasin sa bag, ginpalakat sang soldado si James.

Amo man sini ang natabo sa siam pa ka checkpoint, bangod naghunahuna ang mga kumander nga si James isa sang mga Saksi ni Jehova ginpalakat nila sia nga hilway sa kasamaran. Nagpasalamat si James nga wala niya madala ang iya malahalon nga mga pagkabutang bangod suno sa iya nakita, mahimo nga napatay kuntani sia bangod sa iya mga pagkabutang.

Sang makalab-ot na sia sa katapusan kag ginakahadlukan gid nga checkpoint, hinadlukan sia sang makita niya ang nagahamyang nga mga bangkay sa duta. Bangod sang kahadlok, nangayo sia sing bulig kay Jehova. Nangamuyo sia nga kon luwason sia sang Dios sa sini nga duog, alagaron niya sia sa bug-os niya nga kabuhi.

Ginpakita ni James ang iya bag sa mga soldado, kag liwat nagsiling sila: “Indi sila ang aton ginapangita.” Nagliso sa iya, nagdugang pa ang mga soldado: “Ang isa sang imo mga kauturan nagaistar sa ubos sining bungyod. Kadto ka sa iya.” Sa sini nga tion nagbag-o sing bug-os ang pagtamod ni James sa mga Saksi. Gilayon nga ginkadtuan niya ang utod nga lalaki, kag ginhimo ang mga kahimusan para sa pagtuon sing Biblia sa libro nga Mahimu Ka Mabuhi sing Dayon sa Paraiso sa Duta.a

Pila ka adlaw sang ulihi, napilitan sia nga magpalagyo bangod sang pagsalakay. Sa sini nga tion, nagkuyampad si James padulong sa kakahuyan nga ang lamang nga ginabitbit amo ang iya Mabuhi sing Dayon nga libro! Sa sulod sang 11 ka bulan nga nahamulag sia sa mga Saksi, lima ka beses nga gintun-an niya ang iya libro. Sang makabalik na sia sang ulihi sa siudad, ginpadayon niya ang iya pagtuon sa Biblia upod sa mga Saksi kag madasig nga nag-uswag. Wala madugay sang ulihi, nabawtismuhan sia, kag matutom sia karon nga nagaalagad upod sa iya mga kauturan sa espirituwal.

[Footnote]