Ang Pagkayab ni Cristo kag ang mga Benepisyo sini sa Aton
ANG pagkayab ni Jesus natabo sa Bukid sang Olibo (Binuhatan 1:9, 12), malapit sa banwa sang Betania (Lucas 24:50), nga nahamtang sa nasidlangan nga bahin sang Bukid sang Olibo. Ang mga nakasaksi sang pagkayab isa lamang ka gamay nga grupo, ang iya matutom nga mga apostoles. (Binuhatan 1:2, 11-13) Ang rekord nagasiling nga “samtang nagatan-aw sila, ginbayaw sia kag isa ka panganod ang nagkuha sa iya sa ila panulok.” Padayon sila nga nagtangla sa kahawaan tubtob nga ginhambalan sila sang mga anghel, nga nagpahibalo sa ila: “Ining Jesus nga ginbaton sa kahawaan gikan sa inyo magaabot sa amo man nga paagi kon paano nga nakita ninyo sia nga nagkayab sa kahawaan.”—Binuhatan 1:9-11.
Dapat tandaan nga ginpatuhuyan sang mga anghel ang “paagi” (Griego, troʹpos) indi ang porma (Griego, mor·pheʹ) sang paghalin ni Jesus. Sang ginkuha sia sang panganod, wala na sia makita sang tawhanon nga mga mata. Ginapakita sang rekord sang Binuhatan nga ang iya pagkayab indi pagpakitakita ukon pagpadayawdayaw, nga nahangpan sang pila lamang ka matutom nga mga sumulunod kag una lamang nga bahin sang pagkayab. Ang paagi sang iya pagkayab isa gid ka butang nga nagkalipikar sa mga apostoles nga mangin mga saksi sa sina nga katunayan, subong nga nangin saksi sila sa pagkabanhaw ni Jesus. (Binuhatan 1:3) Sa amo, wala lamang sia ‘madula’ sa ila, subong sang ginhimo niya sa duha ka disipulo sa Emaus, ukon kaangay sang anghel nga nagpakita kay Gideon “nga nadula sa iya panulok.” (Lucas 24:31; Hukom 6:21, 22) Sa isa ka kasangkaron, ang iya pagkayab kaangay sang anghel nga nagpakita kay Manoa kag sa iya asawa. Ginpahanda niya sila sing halad, kag “sang nagpaibabaw ang dabdab gikan sa halaran pa langit, ang anghel ni Jehova nagkayab sa dabdab sang halaran samtang nagatulok si Manoa kag ang iya asawa.”—Hukom 13:20.
Sanglit ginapakita sang Binuhatan 1:3-9 nga ang pagkayab ni Jesus natabo 40 ka adlaw kutob sang iya pagkabanhaw, may kal-ang sang tion sa ulot sang mga hitabo nga narekord sa Lucas 24:1-49 nga natabo sang adlaw sang pagkabanhaw ni Jesus kag sang iya pagkayab subong ginalaragway sang bersikulo 51 sina nga kapitulo. Mahimo man matalupangdan nga ang mga tinaga “kag nagkayab sa langit,” nga makita sa sina nga bersikulo, indi makita sa pila ka dumaan nga manuskrito kag sa amo ginkuha sa pila ka moderno nga badbad (NE, AT). Apang, makit-an ini sa Bodmer Papyrus (P75), sa Alexandrine Manuscript, sa Vatican Manuscript Num. 1209, kag sa iban pa dumaan nga manuskrito.
Epekto sa mga Disipulo
Ginapakita nga tubtob sa adlaw sang pagkayab ni Jesus ang mga disipulo nagahunahuna gihapon tuhoy sa dutan-on nga ginharian nga iya pagagamhan, subong makita sa ila ginsiling sa Binuhatan 1:6. Paagi sa iya pagkayab nga kitaon sa umpisa kag pagtugot sa iya mga disipulo nga makit-an ang una nga bahin sini, ginpakita sa ila ni Jesus nga ang iya Ginharian langitnon kag nga, tuhay sa iya ni David nga “wala magkayab sa mga langit,” ang posisyon ni Jesus kutob sadto padayon nangin sa ‘tuo nga kamot sang Dios,’ subong maisog nga ginpanaksihan ni Pedro sang adlaw sang Pentecostes.—Binuhatan 2:32-36.
Yadto nga buhat nagpahanumdom man sa ila sang madamo anay nga ginhambal ni Jesus tuhoy sinang langitnon nga posisyon kag nagbulig sa iya mga disipulo nga mahangpan ini. Ginkibot niya ang iban paagi sa pagsiling: “Ano, kon amo, kon inyo makit-an ang Anak sang tawo nga nagasaka sa iya anay ginhalinan?” (Juan 6:62); kag ginsilingan niya ang mga Judiyo: “Kamo naghalin sa mga duog sa idalom; ako naghalin sa mga duog sa ibabaw.” (Juan 8:23) Sang gab-i sang iya katapusan nga pagpakigsapol sa iya mga apostoles, ginsilingan niya sila nga ‘magakadto sia sa Amay sa paghanda sing duog para sa ila’ (Juan 14:2, 28); samtang kaupod nila sa iya katapusan nga gab-i sang pagkabuhi subong tawo, nagreport sia sa iya Amay nga ‘natapos niya ang hilikuton sa duta’ nga gintangdo sa iya kag nangamuyo, nga nagasiling: “Himayaa ako kaupod nimo sang himaya nga naagom ko sadto anay nga kaupod nimo ako sa wala pa ang kalibutan,” nagsiling man sia, “Ako nagakara sa imo.” (Juan 17:4, 5, 11) Sang gindakop sia, amo man sini ang iya ginpahangop sa Sanhedrin. (Mateo 26:64) Sang mabanhaw sia ginsilingan niya si Maria Magdalena: “Indi ka magkapyot sa akon. Kay wala pa ako makakayab sa Amay. Apang magkadto ka sa imo mga kauturan kag hambali sila, ‘Ako magakayab sa Amay kag sa inyo Amay kag sa akon Dios kag sa inyo Dios.’” (Juan 20:17) Apang, walay sapayan sini, maathag nga ang importansia sining mga pinamulong nahangpan lamang sang mga disipulo sang tion sang pagkayab. Sang ulihi, si Esteban ginhatagan sing palanan-awon tuhoy kay Jesus sa tuo nga kamot sang Dios (Binuhatan 7:55, 56), kag naeksperiensiahan ni Pablo ang epekto sang langitnon nga himaya ni Jesus.—Binuhatan 9:3-5.
Ang Pagsugod sang ‘Bag-o kag Buhi nga Dalan’
Sang ginsugdan ni Jesus ang iya pagkayab sa pisikal nga porma, sa amo nakit-an sang iya nagatan-aw nga mga disipulo, wala sing basihan nga maghaumhaum nga nagpadayon sia sa pisikal nga porma pagkatapos nga gintabunan sia sang panganod. Si apostol Pedro nagsiling nga si Jesus napatay sa unod apang ginbanhaw “sa espiritu.” (1 Pedro 3:18) Ginpahayag ni Pablo ang sugo nga “ang unod kag dugo ini makapanubli sang Ginharian sang Dios. (1 Corinto 15:50; ipaanggid man ang ginsiling ni Jesus sa Juan 12:23, 24 sa 1 Corinto 15:35-45.) Ginpaanggid ni Pablo ang pagkayab ni Jesus sa presensia sang Dios sa mga langit sa pagsulod sang mataas nga saserdote sa Labing Balaan nga hulot sang tabernakulo sa Adlaw sang Katumbasan kag nagsiling nga sa sina nga okasyon ang mataas nga saserdote nagadala lamang sing dugo (indi sang unod) sang ginhalad nga mga sapat. (Hebreo 9:7, 11, 12, 24-26) Nian ginpaanggid ni Pablo ang kumbong, nga nagapain sa una nga hulot gikan sa Labing Balaan nga hulot, sa unod ni Cristo. Kon nagasulod ang mataas nga saserdote sa Labing Balaan, sa tipiko nga presensia sang Dios, wala niya ginadala ang kumbong kundi nagaagi sa sini kag ginalampasan ini, amo nga yari ini sa iya likod. Sa amo, si Pablo nagsiling nga “may kasidla kita sa pagsulod sa balaan nga duog paagi sa dugo ni Jesus, nga iya ginbuksan sa aton subong bag-o kag buhi nga dalanon paagi sa kumbong, nga amo, ang iya unod.”—Hebreo 9:3, 24; 10:10, 19, 20; ipaanggid ang Juan 6:51; Hebreo 6:19, 20.
Ang pagkayab ni Jesus sa langit agod ipresentar ang nagagawad nga balor sang iya dugo kay Jehova nagsugod sing “bag-o kag buhi nga dalan” sang pagpalapit sa Dios sa pangamuyo. Nagbukas man ini sing dalan padulong sa langitnon nga kabuhi nahisuno sa pinamulong mismo ni Jesus sa rason nga, antes sini, “wala sing tawo nga nakasaka sa langit kundi sia nga nanaug gikan sa langit, ang Anak sang tawo.” (Juan 3:13) Sa amo, indi si Enoc ukon si Eliseo ang nagbukas sini nga dalan, indi man bisan si David. (Genesis 5:24; 2 Hari 2:11; Binuhatan 2:34) Subong sang ginsiling ni Pablo: “Ginpaathag sang balaan nga espiritu nga ang dalan padulong sa balaan nga duog wala pa mapahayag tubtob nga nagatindog pa ang una nga tolda.”—Hebreo 9:8.
Kon Ngaa Importante
Ang pagkayab ni Jesus sa langit importante sa pila ka rason ukon katuyuan. Nagsiling sia nga importante nga ‘maglakat sia’ agod mapadala niya ang balaan nga espiritu sang Dios subong manugbulig sa iya mga disipulo. (Juan 16:7-14) Ang pagbubo ni Jesus sa sina nga espiritu sang adlaw sang Pentecostes isa ka maathag nga pagpasundayag para sa mga disipulo sang kamatuoran nga nakadangat si Jesus sa presensia sang Dios kag ginpresentar niya ang balor sang iya halad nga gawad sa Iya. (Binuhatan 2:33, 38) Ining pagpresentar sang balor sang iya dugo naghimo man nga importante sina nga pagkayab, kay indi ini mahimo sa duta, sa Labing Balaan sang templo sa Jerusalem, kundi sa “langit mismo . . . sa atubangan sang Dios.” (Hebreo 9:24) Importante man ini kay Jesus subong gintangdo kag ginhimaya nga “dakung mataas nga saserdote nga nagsulod sa mga langit.” (Hebreo 4:14; 5:1-6) Ginapaathag ni Pablo nga “kon, karon, yari sia sa duta, indi sia mangin saserdote,” kundi, bangod “nagalingkod sa tuo nga kamot sa trono sang Labing Gamhanan sa mga langit,” si Jesus karon “nakatigayon sing mas halangdon nga publiko nga pag-alagad, amo nga sia man ang manugpatunga sa mas maayo nga katipan.” (Hebreo 8:1-6) Bangod sini, ang mga Cristiano nga yara sa idalom sang napanubli nga sala nalugpayan sa paghibalo nga may “kabulig sila upod sa Amay, si Jesucristo, isa nga matarong.”—1 Juan 2:1; Roma 8:34; Hebreo 7:25.
Sa katapusan, ang pagkayab importante para sa pagdumala ni Jesus sa Ginharian nga iya ginpanubli, upod sa “mga anghel kag awtoridad kag kagamhanan . . . nga ginpasakop sa iya.” (1 Pedro 3:22; Filipos 2:6-11; 1 Corinto 15:25; Hebreo 10:12, 13; ipaanggid ang Daniel 7:14.) Bangod “nadaug ang kalibutan” (Juan 16:33), si Jesus nakigbahin sa pagtuman sa tagna sa Salmo 68:18, ‘nagkayab sa hitaas kag nagdala sing mga bihag,” nga ang importansia sini ginpaathag ni Pablo sa Efeso 4:8-12.