Ginhimo Nila ang Kabubut-on ni Jehova

Isa ka Pagduaw nga Ginpadyaan sing Bugana

ANG paglakbay gikan sa Seba pa Jerusalem makalalapyo para sa reyna. Naanad sia sa pagkabuhi sing luho. Nagalakbay sia karon nga sakay sang kamelyo sa kalayuon nga 2,400 ka kilometro, ang kalabanan sini sa mainit nga desyerto. Suno sa isa ka pagbanta, ang iya paglakbay nagakinahanglan sang mga 75 ka adlaw agod makumpleto, kag pakadto lamang ina!a

Ngaa ginbiyaan sining manggaranon nga reyna ang iya masulhay nga puluy-an sa Seba kag naglakbay sing makalalapyo?

Isa ka Makagalanyat nga Balita

Nagkadto sa Jerusalem ang reyna sang Seba sa tapos “mabatian ang balita nahanungod kay Solomon may kaangtanan sa ngalan ni Jehova.” (1 Hari 10:1) Wala ginsiling kon ano gid ang nabatian sang reyna. Apang, nahibaluan naton nga ginpakamaayo ni Jehova si Solomon sing tumalagsahon nga kaalam, kamanggaran, kag kadungganan. (2 Cronica 1:11,12) Paano ini nahibaluan sang reyna? Sanglit sentro sang negosyo ang Seba, mahimo nga nabatian niya ang kabantugan ni Solomon paagi sa mga negosyante nga nagduaw sa iya pungsod. Mahimo nga ang pila sa ila nakakadto sa ­Ofir, isa ka pungsod sa diin may madamo nga transaksion sa negosyo si Solomon.​—1 Hari 9:26-28.

Kon ano gid man, nag-abot ang reyna sa Jerusalem “upod ang tama ka daku nga katay, nga may mga kamelyo nga nagadala sing lana sang balsamo kag tama kadamo nga bulawan kag mga bato nga bilidhon.” (1 Hari 10:2a) Ang iban nagasiling nga ang “daku nga katay” nagalakip sang soldado nga tagpangapin. Halangpunon ini bangod ang reyna isa ka gamhanan nga persona kag nagalakbay nga may malahalon nga mga butang nga indi makalkula ang bili.b

Apang, talupangda nga nabatian sang reyna ang kabantugan ni Solomon “may kaangtanan sa ngalan ni Jehova.” Sa amo indi lamang ini isa ka paglakbay sa negosyo. Maathag nga nagkari ang reyna, una sa tanan, agod makapamati sang kaalam ni Solomon—ayhan agod makatuon pa gani nahanungod sa iya Dios, si Jehova. Sanglit mahimo nga kaliwat sia ni Sem ukon ni Ham, nga mga sumilimba anay ni Jehova, mahimo nga interesado sia sa relihion sang iya mga katigulangan.

Makalilibog nga mga Pamangkot, Makaalayaw nga mga Sabat

Sang makilala si Solomon, gintilawan sia sang reyna paagi sa “makalilibog nga mga pamangkot.” (1 Hari 10:1) Ang Hebreong tinaga nga gingamit diri mahimo mabadbad subong “mga paktakon.” Apang wala ini nagakahulugan nga ginpasabat sang reyna si Solomon sang wala pulos nga paindis-indis. Sing makawiwili, gingamit sa Salmo 49:4 ang pareho nga Hebreong tinaga sa paglaragway sang serioso nga mga pamangkot tuhoy sa sala, kamatayon, kag pagtubos. Kon amo, mahimo nga ang reyna sang Seba naghinun-anon upod kay Solomon sang madalom nga mga tema nga nagtilaw sa kadalumon sang iya kaalam. Ang Biblia nagasiling nga “ginpabutyag [niya] sa iya ang tanan nga yara sa iya tagipusuon.” Kag si Solomon “nagsaysay sa iya sang tanan niya nga pamangkot. Wala sing bisan ano nga natago sa hari nga wala niya masaysay sa iya.”—1 Hari 10:2b, 3.

Nagdayaw gid ang reyna sang Seba sa kaalam ni Solomon kag sa kahamungaya sang iya ginharian sa bagay nga “nahalawhaw sia.” (1 Hari 10:4, 5) Ginhangop sang iban ini nga prase nga ang reyna “naurungan.” Ang isa ka iskolar nagapanugda pa gani nga nalipong sia! Kon ano gid man ang natabo, nahayanghag ang reyna sa iya nakita kag nabatian. Gintawag niya nga malipayon ang mga alagad ni Solomon bangod nakabati sining kaalam sang hari, kag ginpakamaayo niya si Jehova tungod sang pagpalingkod kay Solomon sa trono. Nian ginhatagan niya ang hari sing malahalon nga mga dulot, nga ang bulawan lamang nagabili, suno sa karon nga bili, sing mga $40,000,000. Naghatag man si Solomon sing mga dulot, nagahatag sa reyna sang “tanan nga iya naluyagan nga iya pangayuon.”c—1 Hari 10:6-13.

Leksion Para sa Aton

Gingamit ni Jesus ang reyna sang Seba subong isa ka halimbawa para sa mga escriba kag mga Fariseo. “Ang reyna sang bagatnan pagabayawon sa paghukom sining kaliwatan kag magatagudili sini,” nagsiling sia sa ila, “kay nagkari sia gikan sa kaukbungan sang duta sa pagpamati sang kaalam ni Solomon, apang, yari karon! may isa diri nga daku pa kay Solomon.” (Mateo 12:42) Huo, ang reyna sang Seba nagpakita sing daku nga apresasyon sa hatag-Dios nga kaalam. Kon naglakbay sia sing 2,400 ka kilometro agod mamati kay Solomon, dapat gid nga namati sing maayo ang mga escriba kag mga Fariseo kay Jesus, nga yara mismo sa ila atubang.

Makapakita man kita karon sing tudok nga apresasyon sa Daku Pa nga Solomon, si Jesucristo. Paano? Ang isa ka paagi amo ang pagtuman sa iya sugo nga “maghimo sing mga disipulo sa mga tawo sang tanan nga kapungsuran.” (Mateo 28:19) Ang isa pa ka paagi amo ang pagbinagbinag sing maayo sa halimbawa ni Jesus kag sa iya panghunahuna kag nian ilugon ini.—Filipos 2:5; Hebreo 12:2,3.

Matuod, ang pagsunod sa halimbawa sang Daku Pa nga Solomon magakinahanglan sing panikasog sa aton bahin. Apang, pagapadyaan kita sing bugana. Sa pagkamatuod, nagasaad si Jehova sa iya katawhan nga kon magpakita sila sing nagasakripisyo-sa-kaugalingon nga espiritu, ‘pagabuksan niya sa ila ang mga talambuan sang langit kag iula sa ila ang pagpakamaayo tubtob nga wala na sing masudlan.’—Malaquias 3:10.

[Mga footnote]