Maghanda Para sa Importante Gid nga Milenyo!

ANG Isa ka Libo ka Tuig nga Paggahom ni Cristo magadala sing di-maisip nga pagpakamaayo sa tawhanon nga pamilya. Sa idalom sang mahigugmaon nga panuytoy ni Jesus, ang katawhan bayawon gikan sa makaluluoy nga kahimtangan sini pakadto sa mahimayaon nga kahimpitan. Hunahunaa kon ano ang mangin kahulugan sina para sa imo. Mapagros nga panglawas! Handurawa ang pagbugtaw kada aga nga mas maayo ang pamatyag sangsa nagligad nga adlaw. Minilyon ka lalaki, babayi, kag kabataan ang nagalaum nga magkabuhi sa sinang makalilipay nga tion. Ginalauman nila ini, ginapangamuyo ini. Bangod sang ila pagtuon sa Biblia, kumbinsido sila nga ining mga pagpakamaayo matigayon nila.

Apang, antes niya sugdan ang iya Isa ka Libo ka Tuig nga Paggahom, dapat anay dulaon ni Jesucristo ang tanan nga nagapamatok sang iya paggahom sa duta. Himuon niya ini sa inaway nga ginatawag nga Armagedon sa Biblia. (Bugna 16:16) Ang matuod nga mga Cristiano sa duta indi makig-away sa sina nga inaway. Inaway ini sang Dios. Kag indi ini limitado sa isa lang ka geograpiko nga lokasyon. Ginasiling sang Biblia nga magalab-ot ini tubtob sa mga ukbong sang duta. Ang mga kaaway sang pagginahom ni Cristo patyon. Wala sa ila sang makalikaw!—Jeremias 25:33.

Pagkatapos sini iliso ni Jesus ang iya igtalupangod kay Satanas nga Yawa kag sa iya mga demonyo. Panan-awa ang danyag, subong sang nakita sang manunulat sang tulun-an sang Bugna: “Nakita ko ang anghel [si Jesucristo] nga nagakunsad gikan sa langit nga may yabi sang kadadalman kag daku nga kadena sa iya kamot. Kag gindakop niya ang dragon, yadtong dumaan nga man-ug, nga amo ang Yawa kag Satanas, kag gingapos sia sa sulod sang isa ka libo ka tuig.” (Bugna 20:1, 2) Sa ulihi, si Satanas kag ang iya mga demonyo laglagon sing dayon.—Mateo 25:41.

“Isa ka dakung kadam-an, nga wala sing tawo nga makaisip,” ang makalampuwas sa Armagedon. (Bugna 7:9) Tuytuyan sila ni Cristo agod makabenepisyo sing bug-os gikan sa “mga tuburan sang tubig nga nagahatag sing kabuhi,” subong sang isa ka manugbantay nga nagatuytoy sa iya mga karnero sa nagaluwas-kabuhi nga tubig. (Bugna 7:17) Bangod wala ginasablagan ni Satanas kag sang iya mga demonyo ang ila espirituwal nga pag-uswag, ining mga makalampuwas sa Armagedon amat-amat nga buligan nga malandas ang ila makasasala nga mga huyog tubtob nga malab-ot nila sa ulihi ang kahimpitan!

Sa idalom sang mahigugmaon nga paggahom ni Cristo, ang mga kahimtangan sang pagkabuhi padayon nga magauswag. Dulaon ni Jehova nga Dios, paagi kay Jesucristo, ang tanan nga kabangdanan sang kasakit kag kasubo. “Pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa.” (Bugna 21:4) Ginhinakpan ni manalagna Isaias ang talan-awon, nga nagasiling: “Sa sina nga tion ang mga mata sang mga bulag pamuklaton, kag ang mga igdulungog sang mga bungol mabuksan. Sa sina nga tion ang piang magalumpat subong sang usa, kag ang dila sang apa magaamba sa kalipay.” (Isaias 35:5,6) Kag ang mga patay, “ang dalagku kag magamay,” mabanhaw nga may paglaum nga indi na gid mapatay liwat!—Bugna 20:12.

Bisan karon, ginatipon na ang “dakung kadam-an” nga makalampuwas sa Armagedon. Nagahanda sila para sa Milenyo nga Paggahom ni Cristo. Bisan pa wala nila mahibaluan kon san-o magasugod ina nga paggahom, nagasalig sila nga sa gintalana nga tion sang Dios, magaluntad ini. Mahimo ka malakip sa ila, apang dapat man ikaw maghanda—indi paagi sa pagbaligya sang imo mga pagkabutang kag paglakbay padulong sa isa ka geograpiko nga lokasyon, kundi paagi sa pagkuha sing sibu nga ihibalo tuhoy kay Jehova nga Dios kag sa iya mga katuyuan paagi sa pagtuon sing Biblia. Sa wala sing bayad ukon obligasyon, malipay ang mga Saksi ni Jehova nga ipakita sa imo kon paano kamo sang imo pamilya makabenepisyo sa pagtuon sing Biblia. Ang mga manugbalhag sini nga magasin malipay sa paghatag sing dugang nga impormasyon.

[Kahon sa pahina 7]

Ang Isa ka Libo ka Tuig—Literal Bala ukon Simbuliko?

Sanglit ang kalabanan sang tulun-an nga Bugna sa Biblia ginsulat sa simbuliko nga lenguahe, nagautwas ang pamangkot. Ano naman ang tuhoy sa Isa ka Libo ka Tuig nga Paggahom ni Cristo nga ginsambit sa Bugna? Literal bala ini ukon simbuliko nga panag-on?

May yara gid pamatuod nga nagakahulugan ini sing literal nga isa ka libo ka tuig nga panag-on. Binagbinaga: Ginapatuhuyan ni apostol Pablo ang Isa ka Libo ka Tuig nga Paggahom ni Cristo, nga sa sining tion hukman ang katawhan, subong isa ka adlaw. (Binuhatan 17:31; Bugna 20:4) Ginsulat ni apostol Pedro nga ang isa ka adlaw (24 ka oras) kay Jehova subong sang isa ka libo ka tuig. (2 Pedro 3:8) Nagapamatuod ina nga ining “adlaw” sang paghukom literal nga isa ka libo ka tuig ang kalawigon. Dugang pa, mabasa naton sa Ingles sa Bugna 20:3,5-7 ang apat ka nanuhaytuhay nga tion, indi subong “a thousand years” [“sing isa ka libo ka tuig”], kundi “the thousand years” [“ang isa ka libo ka tuig”]. Daw ginapakita sini ang isa ka panag-on nga may pat-od nga kalawigon.