Daw Ano Mo Ginahigugma ang Pulong sang Dios?
“Daw ano ang paghigugma imo kasuguan!Ginapamalandungan ko sang ko ini sa bug-os nga adlaw.”—SALMO 119:97.
1. Ano ang isa ka paagi nga mapakita sang mahinadlukon-sa-Dios nga mga indibiduwal ang ila gugma sa Pulong sang Dios?
GINATOS ka milyon nga lalaki kag babayi ang nagapanag-iya sing isa ka kopya sang Biblia. Apang tuhay ang pagpanag-iya sing Biblia kag ang paghigugma sa Pulong sang Dios. Makatarunganon bala nga makasiling ang isa ka tawo nga ginahigugma niya ang Pulong sang Dios kon talagsa lang niya ini ginabasa? Aba indi! Sa kabaliskaran, ang iban nga wala gid anay nagasapak sa Biblia nagabasa sini karon adlaw-adlaw. Natun-an nila nga higugmaon ang Pulong sang Dios, kag kaangay sa salmista, ginapamalandungan nila karon ang Pulong sang Dios “sa bug-os nga adlaw.”—Salmo 119:97.
2. Paano ang pagtuo sang isa sang mga Saksi ni Jehova napabakod sa idalom sang mabudlay nga mga kahimtangan?
2 Ang isa nga nakatuon nga higugmaon ang Pulong sang Dios amo si Nasho Dori. Kaupod sang mga masigkatumuluo, nagbatas sia sing madamong dekada nga nagaalagad kay Jehova sa iya gindak-an nga Albania. Sa daku nga bahin sina nga tion, ang mga Saksi ni Jehova gindumilian, kag diutay lamang nga literatura sa Biblia ang nabaton sining matutom nga mga Cristiano. Apang, ang pagtuo ni Utod Dori nagpabilin nga mabakod. Paano? “Ang akon tulumuron,” siling niya, amo ang “pagbasa sing Biblia sing mga isa ka oras kada adlaw, kag ginhimo ko ini sa mga 60 ka tuig antes magpigaw ang akon mata.” Tubtob sining karon lang, ang bug-os nga Biblia indi pa matigayon sa Albanian, apang nakatuon sing Griego si Utod Dori sang bata pa sia, gani ginabasa niya ang Biblia sa sina nga lenguahe. Ang tayuyon nga pagbasa sing Biblia nagbulig kay Utod Dori nga mabatas ang lainlain nga mga pagtilaw, kag makabulig man ini karon sa aton.
‘Magtigayon sing Kahidlaw’ sa Pulong sang Dios
3. Ano nga panimuot ang dapat palambuon sang mga Cristiano tuhoy sa Pulong sang Dios?
3 “Subong sang mga lapsag nga bag-o natawo,” sulat ni apostol Pedro, “magtigayon kamo sing kahidlaw sa wala masimbugan nga gatas nga natungod sa pulong.” (1 Pedro 2:2) Subong nga ang isa ka lapsag nagahandum sing daku sa gatas sang iya iloy, ang mga Cristiano nga mahunahunaon sang ila espirituwal nga kinahanglanon nalipay sa pagbasa sing Pulong sang Dios. Amo bala sina ang imo balatyagon? Kon indi, indi madulaan sing paglaum. Mapalambo mo man ang kahidlaw sa Pulong sang Dios.
4. Ano ang nalakip agod ugalion ang adlaw-adlaw nga pagbasa sing Biblia?
4 Agod mahimo ini, disiplinaha anay ang imo kaugalingon nga ugalion ang tayuyon nga pagbasa sing Biblia, sa adlaw-adlaw kon mahimo. (Binuhatan 17:11) Basi indi ka makahinguyang sing isa ka oras kada adlaw sa pagbasa sing Biblia subong sa ginhimo ni Nasho Dori, apang ayhan makapain ka sing pila ka tion kada adlaw sa pagbinagbinag sa Pulong sang Dios. Madamong Cristiano ang nagabugtaw sing pila ka minuto nga temprano agod mapamalandungan ang isa ka teksto sa Biblia. Ano pa ang mas maayo nga paagi sa pagsugod sang adlaw? Ang iban nagapakamaayo nga tapuson ang adlaw paagi sa pagbasa sing Biblia antes magtulog. Ang iban naman nagabasa sing Biblia sa iban pa kombeniente nga tion. Ang importante amo ang tayuyon nga pagbasa sing Biblia. Nian, pamalandungi sa sulod sang pila ka tinion ang imo nabasa. Binagbinagon naton ang pila ka halimbawa sang mga indibiduwal nga nakabenepisyo gikan sa pagbasa kag sa pagpamalandong sa Pulong sang Dios.
Ang Salmista nga Naghigugma sang Kasuguan sang Dios
5, 6. Walay sapayan nga wala naton mahibaluan ang iya ngalan, ano ang matun-an naton tuhoy sa manunulat sang ika-119 nga Salmo paagi sa pagbasa kag sa pagpamalandong sa ginsulat niya?
5 Ang manunulat sang ika-119 nga Salmo may daku nga apresasyon sa Pulong sang Dios. Sin-o ang nagsulat sina nga salmo? Ang manunulat wala ginapakilala sa Biblia. Apang, gikan sa konteksto, mahibaluan naton ang pila ka detalye tuhoy sa iya, kag mahibaluan naton nga may mga problema sia sa iya kabuhi. Ang pila sang iya mga kakilala nga dapat kuntani mga sumilimba ni Jehova wala nagahigugma sang mga prinsipio sang Biblia kaangay niya. Walay sapayan sina, ang salmista wala magtugot sang ila panimuot nga magpugong sa iya sa paghimo kon ano ang husto. (Salmo 119:23) Kon nagakabuhi ukon nagapangabudlay ka upod sa isa nga wala nagatahod sa mga talaksan sang Biblia, ayhan makita mo ang mga pagkaanggid sa ulot sang kahimtangan sang salmista kag sang imo.
6 Bisan pa isa ka tawo nga diosnon, ang salmista wala gid magpakamatarong sang kaugalingon. Ginakilala niya sing tampad ang iya mga pagkadi-himpit. (Salmo 119:5, 6, 67) Apang, wala sia magtugot nga ang sala magakontrol sa iya. “Paano tinluan sang isa ka pamatan-on ang iya banas?” pamangkot niya. Ang iya sabat: “Paagi sa pagpabilin nga nagabantay suno sa imo pulong.” (Salmo 119:9) Nian, nagapadaku kon daw ano kabaskog nga puwersa para sa kaayuhan ang Pulong sang Dios, ang salmista nagdugang: “Sa akon tagipusuon gintipigan ko ang imo pulong, agod nga indi ako makasala batok sa imo.” (Salmo 119:11) Ang puwersa nga makabulig sa aton nga malikawan ang pagpakasala batok sa Dios mabaskog matuod!
7. Ngaa ang mga pamatan-on ilabi na nga dapat mangin mahunahunaon sa kinahanglanon nga basahon ang Biblia adlaw-adlaw?
7 Maayo nga binagbinagon sang Cristianong mga pamatan-on ang pinamulong sang salmista. Ang pamatan-on nga mga Cristiano ginasalakay karon. Luyag gid sang Yawa nga maglain ang pamatan-on nga kaliwatan sang mga sumilimba ni Jehova. Ang tulumuron ni Satanas amo ang pagbuyok sa pamatan-on nga mga Cristiano nga masulay sang undanon nga mga kailigbon kag maglapas sang mga kasuguan sang Dios. Ang mga sine kag mga programa sa telebisyon masunson nga nagapabanaag sang panghunahuna sang Yawa. Ang mga bituon sa sining mga programa daw matahom kag kalahamut-an; ang imoral nga mga relasyon sa tunga nila ginalaragway subong normal. Ang mensahe? ‘Wala sing malain nga maghulid ang mga indi kasal basta nagahigugmaanay gid sila.’ Sing makapasubo, kada tuig madamong pamatan-on nga mga Cristiano ang nasulay sa sina nga pangatarungan. Ang iban nakaagom sing pagkalunod sang ila pagtuo. Gani, may yara pag-ipit! Apang daku gid bala ang pag-ipit nga indi na ninyo nga mga pamatan-on malandas ini? Indi gid! Si Jehova nag-aman sing paagi agod malandas sang pamatan-on nga mga Cristiano ang di-maayo nga mga kailigbon. Mabatuan nila ang bisan ano man nga hinganiban nga gamiton sang Yawa paagi sa ‘pirme nga pagbantay suno sa Pulong sang Dios, nagatipig sang mga pulong sang Dios sa ila tagipusuon.’ Daw ano kadamo nga tion ang imo ginahinguyang sa regular nga pagbasa kag pagpamalandong sing personal sa Biblia?
8. Paano ang mga halimbawa nga ginbalay sa sining parapo makabulig sa imo nga madugangan ang apresasyon sa Mosaikong Kasuguan?
8 Ang manunulat sang ika-119 nga Salmo nagtu-aw: “Daw ano ang paghigugma ko sang imo kasuguan!” (Salmo 119:97) Ano nga kasuguan ang ginapatuhuyan niya? Ang ginpahayag nga pulong ni Jehova, lakip ang Mosaikong Kasuguan. Sa una nga pagpasiplat mahimo tamdon sang iban ang Kasuguan subong karaan kag magpalibog kon paano ini mahigugma sang bisan sin-o. Apang, samtang ginapamalandungan naton ang lainlain nga mga bahin sang Mosaikong Kasuguan, subong sa ginhimo sang salmista, maapresyar naton ang kaalam sa likod sina nga Kasuguan. Luwas sa madamong matagnaon nga mga bahin sang Kasuguan, yara ang mga kasuguan sini tuhoy sa katinlo kag pagkaon, nga nagpauswag sang katinlo kag maayo nga panglawas. (Levitico 7:23, 24, 26; 11:2-8) Ginapalig-on sang Kasuguan ang pagkabunayag sa negosyo kag naglaygay sa mga Israelinhon nga magpakita sing kahanuklog sa mga masigkasumilimba nga nagakinahanglan. (Exodo 22:26, 27; 23:6; Levitico 19:35, 36; Deuteronomio 24:17-21) Ang hudisyal nga mga desisyon dapat himuon nga wala sing ginapasulabi. (Deuteronomio 16:19; 19:15) Samtang ang manunulat sang Salmo 199 nakatigayon sing eksperiensia sa kabuhi, pat-od gid nga nakita niya ang kaayuhan nga nangin resulta para sa mga nagaaplikar sang Kasuguan sang Dios, kag ang iya kaluyag sa sini labi nga nagabaskog. Sing kaanggid sa karon, samtang ang mga Cristiano madinalag-on nga nagaaplikar sang mga prinsipio sang Biblia, ang ila gugma kag apresasyon sa Pulong sang Dios nagadugang.
Ang Prinsipe nga Tuman Kaisog nga Mangin Tuhay
9. Ano nga panimuot ang ginpalambo ni Hari Ezequias tuhoy sa Pulong sang Dios?
9 Ang kaundan sang ika-119 nga Salmo nagahisanto gid sa nahibaluan naton tuhoy kay Ezequias sang sia isa pa ka lamharon nga prinsipe. Ginapahangop sang pila ka iskolar sang Biblia nga si Ezequias amo ang nagsulat sang salmo. Bisan indi pa ini pat-od, nahibaluan naton nga si Ezequias may daku nga pagtahod sa Pulong sang Dios. Paagi sa iya pagkabuhi, ginpakita niya nga tinagipusuon sia nga nagaugyon sa ginasiling sang Salmo 119:97. Tuhoy kay Ezequias, ang Biblia nagasiling: “Padayon sia nga nagpanguyapot kay Jehova. Wala sia magbiya sa pagsunod sa iya, kundi padayon niya nga ginsunod ang iya mga sugo nga ginsugo ni Jehova kay Moises.”—2 Hari 18:6.
10. Ano nga pagpalig-on ang halimbawa ni Ezequias sa mga Cristiano nga wala ginpadaku sang diosnon nga mga ginikanan?
10 Suno sa bug-os nga kasaysayan, si Ezequias wala magdaku sa diosnon nga pamilya. Ang iya amay, si Hari Ahaz, isa anay ka walay pagtuo nga sumilimba sang idolo nga nagsunog nga buhi sa isa sang iya mga anak nga lalaki—ang utod mismo ni Ezequias—subong halad sa butig nga dios! (2 Hari 16:3) Walay sapayan sining malain nga halimbawa, si Ezequias ‘nagtinlo sang iya banas’ sa pagano nga mga impluwensia paagi sa paghibalo sing maayo sang Pulong sang Dios.—2 Cronica 29:2.
11. Samtang nagapanilag si Ezequias, ano ang natabo sa iya di-matutom nga amay?
11 Samtang nagadaku si Ezequias, nakita niya mismo kon paano gindumalahan sang iya idolatroso nga amay ang mga problema sang Estado. Ang Juda napalibutan sang mga kaaway. Yara si Rezin, nga hari sang Siria, nga nagbuylog kay Hari Peka sang Israel sa paglikop sa Jerusalem. (2 Hari 16:5,6) Yara ang mga Edominhon kag mga Filistinhon, nga madinalag-on nga nagsalakay sa Juda kag nag-agaw pa gani sang pila ka siudad sang Juda. (2 Cronica 28:16-19) Paano gin-atubang ni Ahaz ining mga problema? Sa baylo nga mangayo sing bulig kay Jehova batok sa Siria, si Ahaz nagdangop sa hari sang Asiria, naghamham sa iya sing bulawan kag pilak, lakip na ang naghalin sa bahandian sang templo. Apang wala ini maghatag sing dayon nga paghidait sa Juda.—2 Hari 16:6, 8.
12. Paagi sa paghimo sing ano nga malikawan ni Ezequias nga himuon liwat ang mga kasaypanan sang iya amay?
12 Sang ulihi, si Ahaz napatay kag si Ezequias naghari sa edad nga 25 anyos. (2 Cronica 29:1) Bata pa sia, apang wala yadto magpugong sa iya agod mangin madinalag-on nga hari. Sa baylo nga ilugon ang paggawi sang iya di-matutom nga amay, gintuman niya ang Kasuguan ni Jehova. Naglakip ini sa isa ka pinasahi nga sugo sa mga hari: “Kon maglingkod [ang hari] sa trono sang iya ginharian, magsulat sia sa isa ka libro para sa iya kaugalingon sing isa ka kopya sining kasuguan nga gikan sa ginatatap sang mga saserdote, nga mga Levinhon. Kag magapabilin ini sa iya, kag basahon niya ini sa bug-os nga mga adlaw sang iya kabuhi, agod makatuon sia sa pagkahadlok kay Jehova nga iya Dios agod matuman niya ang tanan nga mga pinamulong sining kasuguan.” (Deuteronomio 17:18,19) Paagi sa pagbasa sing Pulong sang Dios adlaw-adlaw, si Ezequias nakatuon sa pagkahadlok kay Jehova kag nakalikaw sa paghimo liwat sang mga kasaypanan sang iya di-diosnon nga amay.
13. Paano makapat-od ang isa ka Cristiano nga sa espirituwal nga kahulugan, ang tanan nga ginahimo niya magamadinalag-on?
13 Indi lamang mga hari sang Israel ang ginpalig-on nga binagbinagon pirme ang Pulong sang Dios kundi tanan man nga mahinadlukon-sa-Dios nga Israelinhon. Ginalaragway sang nahaunang Salmo ang malipayon gid nga tawo subong isa nga ang iya kalipay “yara sa kasuguan ni Jehova, kag sa iya kasuguan nagabasa sia sing mahinay sa adlaw kag gab-i.” (Salmo 1:1, 2) Tuhoy sa subong sini nga tawo, ang salmista nagsiling: “Ang bisan ano nga ginahimo niya magamadinalag-on.” (Salmo 1:3) Sa kabaliskaran, tuhoy sa isa nga kulang sing pagtuo kay Jehova nga Dios, ang Biblia nagasiling: “Isa sia ka tawo nga indi makapamat-od, indi malig-on sa tanan niya nga dalanon.” (Santiago 1:8) Luyag naton tanan nga magmalipayon kag magmadinalag-on. Ang tayuyon kag ang makahulugan nga pagbasa sing Biblia makadugang sa aton kalipay.
Ang Pulong sang Dios Nagpabakod kay Jesus
14. Paano ginpakita ni Jesus ang gugma sa Pulong sang Dios?
14 Sang isa ka bes, nakita si Jesus sang iya mga ginikanan nga nagalingkod sa tunga sang mga manunudlo sa templo sa Jerusalem. Daku gid ang ‘katingala [sining mga eksperto sa Kasuguan sang Dios] sa iya paghangop kag sa iya mga sabat’! (Lucas 2:46,47) Ina sang si Jesus 12 anyos. Huo, bisan bata pa, maathag nga naluyagan gid niya ang Pulong sang Dios. Sang ulihi, gingamit ni Jesus ang Kasulatan sa pagsabdong sa Yawa, nga nagasiling: “Ang tawo mabuhi, indi lamang sa tinapay, kundi sa tagsa ka pulong nga nagaguwa sa baba ni Jehova.” (Mateo 4:3-10) Wala madugay pagkatapos sadto, si Jesus nagbantala sa iya mga kasimanwa sa Nasaret, nga nagagamit sing Kasulatan.—Lucas 4:16-21.
15. Paano nagpahamtang sing halimbawa si Jesus sang nagbantala sa iban?
15 Si Jesus masunson nga nagkutlo gikan sa Pulong sang Dios sa pagsakdag sang iya mga panudlo. Ang iya mga tagpalamati “natingala sa iya paagi sa pagpanudlo.” (Mateo 7:28) Kag indi katingalahan—ang mga panudlo ni Jesus naghalin mismo kay Jehova nga Dios! Si Jesus nagsiling: “Ang akon ginatudlo indi akon, kundi iya sang nagpadala sa akon. Sia nga nagapamulong gikan sa iya kaugalingon nagapangita sang iya kaugalingon nga himaya; apang sia nga nagapangita sang himaya niya nga nagpadala sa iya, ining isa matuod kag wala sing di-matarong sa iya.”—Juan 7:16,18.
16. Tubtob diin ginpakita ni Jesus ang iya gugma sa Pulong sang Dios?
16 Indi kaangay sa manunulat sang Salmo 119, wala sing “di-matarong” kay Jesus. Wala sia sing sala, ang Anak sang Dios, nga ‘nagpaubos kag nangin matinumanon tubtob sa kamatayon.’ (Filipos 2:8; Hebreo 7:26) Apang, bisan pa himpit sia, gintun-an kag gintuman ni Jesus ang Kasuguan sang Dios. Importante ini sa iya ikasarang nga huptan ang iya integridad. Sang naggamit sing espada si Pedro agod tinguhaan nga punggan ang pagdakop sa iya Agalon, ginsabdong ni Jesus ang apostol kag namangkot: “Nagahunahuna ka bala nga indi ako makapangabay sa akon Amay nga padalhan ako sa sini nga tion sing kapin sa napulog duha ka lehiyon sang mga anghel? Sa sina nga kahimtangan, paano matuman ang Kasulatan nga dapat ini matabo sa sining paagi?” (Mateo 26:53,54) Huo, ang katumanan sang Kasulatan mas importante kay Jesus sangsa paglikaw sa mapintas kag makahuluya nga kamatayon. Daw ano ka tumalagsahon nga gugma sa Pulong sang Dios!
Ang Iban Pa nga mga Manug-ilog ni Cristo
17. Daw ano ka importante ang Pulong sang Dios kay apostol Pablo?
17 Si apostol Pablo nagsulat sa mga masigka-Cristiano: “Mangin mga manug-ilog kamo sa akon, subong nga ako man kay Cristo.” (1 Corinto 11:1) Kaangay sa iya Agalon, napalambo ni Pablo ang kaluyag sa Kasulatan. Sia nagtu-ad: “Sa akon nasulod nga pagkatawo ginahigugma ko gid ang Kasuguan sang Dios.” (Roma 7:22, The Jerusalem Bible) Masunson nga ginbalikwat ni Pablo ang Pulong sang Dios. (Binuhatan 13:32-41; 17:2,3; 28:23) Sang naghatag sia sang iya katapusan nga mga instruksion kay Timoteo, nga isa ka pinalangga nga masigkaministro, ginpadaku ni Pablo ang importante nga bahin sang Pulong sang Dios sa adlaw-adlaw nga pagkabuhi sang tagsa ka “tawo sang Dios.”—2 Timoteo 3:15-17.
18. Maghatag sing halimbawa tuhoy sa isa nga, sa karon, nagpakita sing pagtahod sa Pulong sang Dios.
18 Madamong matutom nga alagad ni Jehova sa karon ang nag-ilog man sang gugma ni Jesus sa Pulong sang Dios. Sang maaga nga bahin sining siglo, isa ka pamatan-on nga lalaki ang ginregaluhan sing Biblia sang isa ka abyan. Ginlaragway niya ang epekto sining hamili nga regalo sa iya: “Determinado ako nga himuon nga isa ka kinahanglanon sa akon kabuhi nga basahon ang isa ka bahin sang Biblia sa tagsa ka adlaw.” Yadto nga pamatan-on amo si Frederick Franz, kag ang iya gugma sa Biblia nagdul-ong sa pag-agom niya sing malawig kag madinalag-on nga kabuhi sa pag-alagad kay Jehova. Mahigugmaon sia nga madumduman bangod sang iya ikasarang sa pagbalikwat sa bug-os nga mga kapitulo sang Biblia sing saulado.
19. Paano ginaiskedyul sang iban ang semanal nga pagbasa sing Biblia sa Teokratikong Eskwelahan sa Pagministro?
19 Ginapadaku gid sang mga Saksi ni Jehova ang tayuyon nga pagbasa sing Biblia. Kada semana, bilang paghanda sa isa sang ila Cristianong mga miting, ang Teokratikong Eskwelahan sa Pagministro, ginabasa nila ang pila ka kapitulo sang Biblia. Ang talalupangdon nga mga punto sang gintangdo nga pagbasa sa Biblia ginabinagbinag sa miting. Nangin kombeniente sa pila ka Saksi nga bahinbahinon ang pagbasa sa Biblia sa isa ka semana sa pito ka magagmay nga seksion kag basahon ang isa ka seksion kada adlaw. Samtang nagabasa sila, ginapamalandungan nila ang materyal. Kon mahimo, nagapanalawsaw sila sing dugang sa bulig sang pasad-sa-Biblia nga mga publikasyon.
20. Ano ang kinahanglan agod may tion para sa tayuyon nga pagbasa sing Biblia?
20 Ayhan kinahanglan nga ‘magbakal ka sing tion’ gikan sa iban nga mga hilikuton agod mabasa sing tayuyon ang Biblia. (Efeso 5:16) Apang, ang mga benepisyo nagalabaw sa bisan ano man nga mga sakripisyo. Samtang ginapalambo mo ang batasan nga pagbasa sing Biblia sa adlaw-adlaw, ang imo gugma sa Pulong sang Dios nagadugang. Sa indi madugay, mapahulag ka sa pagsiling upod sa salmista: “Daw ano ang paghigugma ko sang imo kasuguan! Ginapamalandungan ko ini sa bug-os nga adlaw.” (Salmo 119:97) Ini nga panimuot magahatag sing daku nga mga benepisyo sa karon kag sa palaabuton, subong sang ipakita sang masunod nga artikulo.
Madumduman Mo Bala?
◻ Paano ginpakita sang manunulat sang Salmo 119 ang daku nga gugma sa Pulong sang Dios?
◻ Ano nga mga leksion ang makuha naton gikan sa mga halimbawa nanday Jesus kag Pablo?
◻ Paano naton personal nga madugangan ang aton gugma sa Pulong sang Dios?
[Mga laragway sa pahina 10]
Dapat basahon sing tayuyon sang matutom nga mga hari ang Pulong sang Dios. Ikaw bala?
[Laragway sa pahina 12]
Bisan sang bata pa, si Jesus naghigugma sang Pulong sang Dios