Dedikasyon sang Watchtower Educational Center—Isa ka Kapiestahan kay Jehova

KUTOB sang dumaan nga mga tion, nangin bahin na sang matuod nga pagsimba ang makalilipay nga mga kapiestahan. Ang pila ka kapiestahan nga ginhiwat sa dumaan nga Israel naglawig sing inadlaw kag gintambungan sang linibo ka sumilimba ni Jehova. Ang inagurasyon sang templo ni Solomon naglawig sing pito ka adlaw kag ginsundan sang isa ka semana nga Piesta sang mga Kayangkayang. Naghatag ini sing kahigayunan sa mga Israelinhon nga pamalandungan ang dalayawon nga paagi sang pagpakig-angot ni Jehova sa ila. Nagpauli sila “nga malipayon kag masinadyahon ang tagipusuon tungod sang tanan nga pagkaayo nga ginhimo ni Jehova.”—1 Hari 8:66.

Ang natabo sa Watchtower Educational Center sa Patterson, New York, E.U.A., sang Mayo 17-22, 1999, nagpahanumdom sa mga bisita sadtong makalilipay nga mga kapiestahan sang una. Isa yadto ka semana sang pinasahi nga hilikuton nga nasentro sa pagdedikar sa 28 ka tinukod nga gindesinyo sa pagpauswag sang bug-os globo nga edukasyon sa Biblia. Ginhimo ang mga paghanda agod ang tanan nga 5,400 ka katapo sang ulong-talatapan sa Brooklyn, Wallkill, kag Patterson makalagaw sing maid-id sa mga pasilidad sa Patterson sa tion sadtong halandumon nga semana. Lakip sa mga bisita amo ang kapin sa 500 ka katapo anay nga nakigbahin sa hilikuton nga pagtukod sa educational center, mga tiglawas gikan sa 23 ka sanga sang Watch Tower Society, kag ang iban pa gikan sa malapit nga mga kongregasyon—may kabug-usan nga sa di-magkubos sa 8,100.

Ang mga Eksibit sa Paglagaw Nagahatag sing Edukasyon

Ginhanda ang pinasahi nga mga eksibit, edukasyunal nga mga presentasyon paagi sa video, kag gingiyahan nga mga paglibot sing kinaugalingon agod mangin pamilyar ang mga bisita sa educational center. Sa main lobby, naganyat sa gilayon ang mga bisita sa gamay nga modelo sang templo didto sa Jerusalem sang tion sang ministeryo ni Jesus sa duta. Ang iban nga mga eksibit nagpatalupangod sang maragtas sang Watchtower Bible School of Gilead, maragtason nga mga kombension, mga miting sa kongregasyon, modernong-adlaw nga pag-uswag sang mga pagtuon sa Biblia sa puluy-an—nga ang minilyon sini ginadumalahan karon kada semana—kag sang hilikuton sang Legal Department agod huptan nga bukas ini nga hilikuton bilang pagtuman sa sugo ni Jesus.—Mateo 28:19, 20.

Sa kaiping nga awditoryom, nga malingkuran sang 1,700 sing komportable, ang mga dumuluaw sa kapiestahan sang dedikasyon ginpatan-aw sing 33-minutos nga presentasyon sa video nga natig-uluhan “Indi Paagi sa Gahom—Paagi sa Akon Espiritu!” (sa Ingles). Ginpakita sini nga video kon paano nagluntad ang Watchtower Educational Center. Ginpahayag sang mga interbyu ang mga hitabo nga maathag nga nagapakita sang pagtuytoy ni Jehova sa mga butang kag sang iya pagpakamaayo sa mga panikasog agod matapos sing madinalag-on ining 15-ka-tuig nga proyekto. Linibo ang nakigbahin sa aktuwal nga pagtukod. Sa isa ka tion sang 1994, may yara 526 ka manugpangabudlay, lakip ang 350 ka bug-os tion nga boluntaryo, 113 ka temporaryo nga manugpangabudlay, kag 63 nga nagalakbay kada adlaw agod magbulig. Madamo pa ang nagsakdag sa hilikuton paagi sa mga amot. Nahangpan nila tanan nga indi gid kuntani ini mangin posible kon wala sing espiritu ni Jehova.—Zacarias 4:6.

Nakita sang mga naglagaw nga ang katuyuan sang hilikuton nga ginahimo sa educational center amo ang pagpauswag sa panudlo sang Dios. Ang eksibit sa ganhaan pasulod sa Eskwelahan sang Gilead sa una nga panalgan sang eskwelahan nagpadaku sang bugana espirituwal nga palanublion kag maragtas sang eskwelahan. Kutob sang nahauna nga klase sini sang 1943 sa orihinal nga kampus sang eskwelahan sa South Lansing, New York, ang Eskwelahan sang Gilead nakahanas sing kapin na sa 7,000 ka estudyante para sa misyonero nga pag-alagad. Ang mga eksibit sa ikaduha nga panalgan sang eskwelahan naghatag sing mga talan-awon sang Eskwelahan Para sa mga Katapo Sang Komite Sang Sanga kag Eskwelahan Para sa Nagalakbay nga mga Manugtatap, nga lunsay nagahiwat sing mga klase didto. Sugod sang ginsugdan ini sang 1995, ang eskwelahan sang sanga naghatag sing abanse nga instruksion para sa 360 ka katapo sang Komite sang Sanga gikan sa 106 ka pungsod.

Samtang nagalagaw ang mga bisita, nakita nila sa gilayon nga indi lamang mga eksibit sang mga laragway ang ila makita sa kalabanan nga mga duog. Nasulod nila mismo ang nagkalainlain nga mga departamento, naduaw ang mga opisina kag ang iban pa nga mga lugar nga ginatrabahuan, kag natigayon ang tul-id nga pagtan-aw sa hilikuton nga ginahimo. Ang talalupangdon nga bahin sang paglagaw amo ang Audio/Video Services nga building. Daw ano kaayo nga mga pasilidad ang ginagamit sa pagpauswag sang edukasyon sa Biblia! Paagi sa isa ka serye sang impormatibo nga mga eksibit kag malip-ot nga mga video, ginbuligan ang mga bisita nga mahangpan kon paano ginarekord ang mga tingog kag kon paano ginahimo ang mga video. May natun-an sila tuhoy sa masangkad nga pagpanalawsaw nga kinahanglanon sa paghanda sa props kag mga costume. Nakita nila kon paano ginaareglar ang mga danyag sa entablado sa diutay nga kagastuhanan apang ginatalupangod ang mga detalye. Nasaksihan nila kon paano ginagamit ang musika sa pagpabatyag sa mga tawo nga daw yara gid sila sa eksena nga ila ginatan-aw. Kutob sang 1990 nakapatubas ang Sosiedad sing napulo ka video sa 41 ka lenguahe, nga nagapadaku sang nanuhaytuhay nga mga tema sa Biblia, dugang sa iban pa nga mga video para sa mga nagagamit sing American Sign Language.

Madamo sang mga naglagaw ang nakakadto sa Photo Lab, Art Department, Information Services, nga nagahatag sing paghanas kag suporta sa kompyuter, Service Department, nga nagatatap sa hilikuton sang 11,242 ka kongregasyon kag 572 ka nagalakbay nga manugtatap, kag Writing Correspondence, diin ginaatipan ang mga 14,000 ka pamangkot kada tuig. Nagdayaw sila sa ginahimo nga mga panalawsaw sa mga sulat nga ginapadala kag sa matuod nga kabalaka nga ginapakita sa mga tawo nga ang ila mga pamangkot nagahatag sing pamatuod nga ginatinguhaan nila nga mabatas ang serioso nga mga problema.

Madamo nga grupo sang mga naglagaw ang nagduaw sa Translation Services. Nakibot sila nga mahibaluan nga sa sulod sang nagligad nga lima ka tuig, 102 pa ka lenguahe ang gindugang sa kadamuon nga sa sini ang Sosiedad nagaaman sing literatura sa Biblia. Sa bug-os nga kalibutan, mga 80 porsiento sang mga Saksi ni Jehova ang nagabasa sang mga publikasyon sang Sosiedad sa mga len­gua­he magluwas sa Ingles. Agod mahatag ang ila mga kinahanglanon, may kapin sa 1,700 ka boluntaryo nga nagapanghikot sa patag sang pagbadbad sa 100 ka pungsod. Gin-eksibit ang The Watchtower sa mga lenguahe sang Amerika, Europa, Asia, kag Aprika. Makita sang mga bisita ang New World Translation sang Biblia sa 31 ka lenguahe diin nabalhag ini. Nahibaluan nila nga ang mga publikasyon sang Watch Tower matigayon na karon sa 332 ka lenguahe kag nga ang brosyur nga Ano ang Ginapatuman sang Dios sa Aton? ginbalhag sa 219 sini.

Ginpakita sa mga bisita sa Legal Department ang nanuhaytuhay nga mga latagon sang hilikuton nga nagakinahanglan sing legal nga igtalupangod sa bug-os nga kalibutan. Sa isa ka video, nakita nila ang aktuwal nga kasaba diin nagapangatarungan ang isa ka Saksi nga abogado sa isa ka kaso may kaangtanan sa pagpatayon sing dugo. Nahibaluan man nila kon ano ang ginahimo agod mahuptan nga bukas ang dalan para sa dayag nga pagbantala sing maayong balita. (Filipos 1:7) Ginpatalupangod ang desisyon sang Marso sini nga tuig, sang isa ka korte sang pederal nga distrito, nga nagamando sa banwa sang Oradell, New Jersey, E.U.A., nga bag-uhon ang kasuguan sini agod dulaon ang kinahanglanon nga mga permiso kag badge sa mga Saksi ni Jehova nga luyag makigbahin sa ila publiko nga ministeryo sa pamalaybalay sa sina nga komunidad.

Indi lang ini ang nakita sang mga bisita. Gin-usisa nila ang mga display sa pagtukod sa Precast Shop kag ginlagaw ang mga pasilidad sang Wastewater Treatment, Powerhouse, Water-Softening Facility, kag ang madamo nga talyer sa pagmentenar, wala labot sa iban pa. Isa gid yadto ka pinasahi nga kahigayunan.

Ang Programa sang Dedikasyon Nagapadaku sang Panudlo sang Dios

Ang aktuwal nga programa sang dedikasyon ginhiwat sang Mierkoles, Mayo 19, nga nagsugod sang alas 4:00 s.h. Ang malipayon nga kadam-an sang 6,929 naglakip sa mga katapo sang ulong-talatapan, mga bisita sang Sosiedad, kag 372 nga nagtipon sa sanga sa Canada, nga gin-angot sing elektroniko.

Nalipay gid ang tagpalamati nga makabati sa nagaabiabi nga mga pinamulong ni Milton G. Henschel, ang presidente sang Watch Tower Society. Ginpakilala dayon ni Theodore Jaracz, katapo sang Nagadumala nga Hubon kag tsirman para sa okasyon, si William Malenfant. Sa pagpresentar sa “Talalupangdon nga mga Punto Sang Programa sa Pagtukod,” gin-interbyu niya ang tatlo ka utod nga lalaki nga may importante nga papel sa paghimo, pagdesinyo, kag pagtukod sa Watchtower Educational Center. Sa tion sang interbyu, ginsiling nga sa mga tuig sang aktuwal nga pagtukod, kapin sa 8,700 ka temporaryo nga manugpangabudlay ang nagbulig sa proyekto sa ila kaugalingon nga gasto. Daw ano kaayo nga pamatuod sang paghiusa kag kaalwan nga nangin posible bangod sang panudlo sang Dios!

Ang masunod amo ang simposium nga natig-uluhan “Diosnon nga Edukasyon sa Bug-os Globo nga Kasangkaron.” Ginhatag ini sang apat ka katapo sang Nagadumala nga Hubon. Ginpadaku ni John E. Barr nga ang diosnon nga edukasyon napasad sa Pulong sang Dios, ang Biblia, nga nagapalig-on sa mga Cristiano nga ‘padayon nga magpamunga sa tagsa ka maayong buhat kag maglambo sa sibu nga ihibalo tuhoy sa Dios.’ (Colosas 1:10) Ginpaathag ni Daniel Sydlik kon paano ang diosnon nga edukasyon ginaorganisar sing teokratiko halin sa ulo sang Cristianong kongregasyon, si Jesucristo, pakadto sa tagsa ka katapo sang bug-os kalibutan nga paghiliutod. (1 Corinto 12:12-27) Ang katapusan nga duha ka bahin sang simposium, nga ginhatag nanday Gerrit Lösch kag Carey Barber, nagpakita kon paano ginahimo nga kalipikado sang diosnon nga edukasyon ang mga ministro agod malab-ot ang mga tawo bisan diin kag matudluan sila agod nga sila man maglakat sa dalanon sang Dios.—Isaias 2:1-4; 2 Corinto 3:5.

Agod mangin pamilyar ang tagpalamati sa nanuhaytuhay nga mga eskwelahan nga ginahiwat sa sining educational center, may mga interbyu kag mga paghinun-anon upod sa mga instruktor subong man sa iban pa nga nadalahig sa pagpalakat sini. Ginpakita ang papel sang tagsa ka eskwelahan sa pagtuman sang diosnon nga programa sa edukasyon sa bug-os globo nga kasangkaron. Ginpaathag nga ang Eskwelahan sang Gilead nagakonsentrar sa pagtuon sang tagsa ka tulun-an sang Biblia, sa modernong-adlaw nga maragtas sang katawhan ni Jehova, kag sa paghanda para sa misyonero nga pag-alagad. Ang eskwelahan sang sanga isa ka matahom masangkad nga pagtuon tuhoy sa madamo nga latagon sang hilikuton diin nadalahig ang mga katapo sang Komite sang Sanga. Ang Eskwelahan Para sa Nagalakbay nga mga Manugtatap gindesinyo indi lamang agod pun-an ang mga kinahanglanon sang nagalakbay nga mga utod nga lalaki kundi agod sangkapan man sila sa paghatag sing espirituwal nga bulig nga ilabi na nga makabulig sa mga kongregasyon.

Sa paghinakop sa maayo nga programa, ginhatag ni Lloyd Barry sang Nagadumala nga Hubon ang pamulongpulong sang dedikasyon sa tema nga “Pagtukod Upod sa Aton Daku nga Manunuga.” Ginpakita niya nga ang Manunuga, si Jehova, nagakalipay sa tanan niya nga tinuga kag nagaagda sa aton nga magkalipay upod sa iya. (Isaias 65:18) Sanglit “sia nga nagtukod sing tanan nga butang amo ang Dios,” kay Jehova nga Dios ang bug-os nga kadayawan sining tanan nga pagtukod. (Hebreo 3:4) Sa tapos mapabutyag ini nga mga panghunahuna, nangamuyo sing tinagipusuon ang humalambal, nga nagadedikar sang Watchtower Educational Center kay Jehova, ang aton Dakung Manunuga.a

Wala sing duhaduha nga ang kapiestahan sa bug-os nga semana madugay nga malipatan sang mga nagtambong. Ngaa indi magplano nga duawon ang Watchtower Educational Center? Napat-od namon nga mangin makapalig-on sa imo ang pagduaw kag paglagaw sa sini sa mga panikasog mo nga magtuon sing dugang pa tuhoy sa aton mahigugmaon nga Manunuga kag magkabuhi suno sa iya matarong nga mga talaksan.

[Footnote]

[Mga laragway sa pahina 10]

Ang napuno nga awditoryom kag ang sobra nga tagpalamati sa hulot kalan-an

[Mga laragway sa pahina 10]

Ang mga paglagaw makalilipay gid nga bahin