Isa Lamang Bala ang ‘Matuod nga Relihion’?

“SUBONG nga isa lamang ang Cristo, busa may isa lamang ka lawas ni Cristo, isa lamang ka Nobya ni Cristo: ‘isa lamang ka Katoliko kag apostoliko nga Simbahan.’”​​—⁠Dominus Iesus.

Amo sina ang pagpahayag sang isa ka Romano Katoliko nga kardinal, nga si Joseph Ratzinger, tuhoy sa panudlo sang iya simbahan nga may isa lamang ka matuod nga relihion. Ina nga relihion, siling niya, “nagaisahanon nga Iglesia ni Cristo, nga amo ang Iglesia Katolika.”

“Indi mga Iglesia Suno sa Matuod nga Kahulugan”

Bisan pa nag-insister si Papa Juan Paulo II nga ang dokumento nga Dominus Iesus “wala sing pagpabugal, ukon di-pagtahod sa iban nga mga relihion,” mabaskog ang reaksion sang Protestante nga mga lider sang simbahan. Halimbawa, sa General Assembly sang mga Presbiteryo sa Belfast, Aminhan nga Ireland, sang Hunyo 2001, ang isa ka ministro nagsiling nga ang dokumento hinimuan sang “isa ka impluwensiado nga grupo sa Iglesia Katolika Romana . . . nga nahadlok sa pagkaprangka nga ginhimo sang Batikano II.”

Si Robin Eames, nga Obispo sang Church of Ireland, nagsiling nga “mabang-awan gid” sia kon ang dokumento isa ka “pagpanumbalik sa panghunahuna anay sang Katoliko nga Simbahan sang wala pa ang Batikano II.” Nagakomento sa pangangkon sang Batikano nga ang mga simbahan nga nagasikway sa pila ka Katoliko nga mga doktrina “indi mga Iglesia suno sa matuod nga kahulugan,” si Eames nagsiling: “Para sa akon insulto ina.”

Ngaa ginhimo ang Dominus Iesus? Maathag nga ang Curia sang Romano Katoliko natublag sang ginatawag nga relihioso nga pagkarelatibo ukon pagpati sa nagabulubag-o nga mga talaksan, nga ang relihiosong mga kamatuoran nagadepende lamang sa pagtamod sang mga indibiduwal kag mga grupo. Suno sa The Irish Times, “ang pagluntad sang pluralista nga teolohiya​​—⁠nga nagasiling nga ang tagsa ka relihion maayo . . . labi nga nagtublag kay Kardinal Ratzinger.” Ini nga pagtamod daw amo ang nagpahulag sa iya nga magkomento tuhoy sa isa lamang ka matuod nga relihion.

Importante Bala Kon Ano ang Imo Relihion?

Matuod, para sa iban, ang “relihioso nga pagkarelatibo” ukon ang “pluralista nga teolohiya” mas makatarunganon kag makagalanyat sangsa bisan ano nga panugda nga may isa lamang ka matuod nga relihion. Para sa ila, ang relihion isa ka personal nga desisyon lamang. ‘Sa ulihi,’ siling nila, ‘indi gid man importante kon ano ang imo relihion.’

Daw mas matinuguton ini nga pagtamod​​—⁠bisan pa ang isa ka epekto sini amo ang pagbinahinbahin sang relihion sa madamong nanuhaytuhay nga denominasyon. ‘Ining pagkananuhaytuhay sa relihion,’ siling sang madamo, ‘isa lang ka maayo nga pagpabutyag sang indibiduwal nga kahilwayan.’ Apang, suno sa manunulat nga si Steve Bruce, sa katunayan ining “relihioso nga pagkamatinuguton” pareho lang sa “relihioso nga pagkadimasinapakon.”​​—⁠A House Divided: Protestantism, Schism, and Secularization.

Ano, nian, ang husto nga pagtamod? Isa lamang bala ang matuod nga relihion? Amo bala ang Iglesia Katolika Romana? Ang iban bala nga mga relihion ginakahamut-an man sang Dios? Sanglit nadalahig sa sining mga pamangkot ang aton kaangtanan sa aton Manunuga, importante gid nga mahibaluan ang iya mga pagtamod sa sining butang. Paano naton mahibaluan ini? Paagi sa pag-usisa sa inspirado nga Pulong sang Dios, ang Biblia. (Binuhatan 17:11; 2 Timoteo 3:​16, 17) Binagbinagon naton kon ano ang ginasiling sini tuhoy sa isa ka matuod nga relihion.