Sugilanon sang Kabuhi

Ginpadyaan ni Jehova sing Bugana Gid ang Akon Handum nga Magmisyonera

Panugiron ni Sheila Winfield da Conceição

Ang isa ka misyonera halin sa Aprika nagsugid sa amon nga sa iya asaynment ginapasulod sia sang tanan kag nagapamati sila sing maayo sa maayong balita sang Ginharian sang Dios. ‘Luyag ko gid magbantala sa sina nga sahi sang teritoryo!’ sa hunahuna ko. Bisan 13 anyos pa lang ako sadto, ato nga paghambalanay nagpatudok gid sa akon sang handum nga magmisyonera.

APANG, antes pa sini ang amon pamilya nakatuon na tuhoy kay Jehova. Isa ka aga sang 1939, duha ka lamharon nga lalaki nga mahipid mamayo ang nagduaw sa amon puluy-an sa Hemel Hempstead, sa gua lang sang Greater London, Inglaterra. Mga Saksi ni Jehova sila. Ginbun-ag ako antes sini nga tuig, amo nga indi ako makadumdom sining pagbisita. Agod maghalin na sila, ginsilingan sila ni Nanay nga basi interesado si Tatay apang alas 9:00 sa gab-i pa sia mapauli. Nakibot gid si Nanay sang magbalik sila sina mismo nga gab-i! Sang mapat-od sang akon amay nga si Henry Winfield ang ila tindog sa politika kag sa pungsudnon nga mga isyu, ginpadayon niya sila kag nagpasugot sia nga magtuon sa Biblia. Madasig ang iya pag-uswag tubtob nga nabawtismuhan sia. Pila ka tuig sang ulihi, nagtuon man ang akon iloy nga si Kathleen. Nabawtismuhan sia sang 1946.

Sang 1948, nagsugod ako sa pagpakigbahin sing regular sa pagbantala sing maayong balita sang Ginharian sang Dios. Ginahunahuna ko nga kinahanglan ko ang relo agod nga sibu ko nga mareport ang oras nga ginahinguyang ko sa ministeryo. Kon magbuot lang kami, ginahatagan kami sing sixpence (isa ka sensilyo nga nagabalor sing anom ka sentimos) subong balon namon kada Sabado. Halos duha ka tuig nga ginsupot ko ang akon sixpence agod makabakal sing pinakabarato nga relo sadto. Apang, si Ray nga kamanghuran sa akon duha ka utod nga lalaki, pirme nagapangayo kay Tatay sing duha ka threepence (sensilyo nga nagabalor sing tatlo ka sentimos), indi isa ka sixpence. Isa ka adlaw nagpamilit gid sia nga duha ka threepence ang ihatag sa iya amo nga naakig si Tatay. Naghibi si Ray kag nagsiling nga kinahanglan niya ang duha ka threepence bangod sang sekreto nila ni Jehova. Sang ulihi, si Ray nagpaathag: “Ang isa ka threepence ihulog ko sa kahon alamutan, kag akon naman ang isa ka threepence.” Naghibi si Nanay sa kalipay, kag si Tatay naman gilayon nga naghatag sing duha ka threepence, kag natun-an ko ang importansia sang pagsakdag sa hilikuton sang Ginharian.

Sa sini nga tion, naghimo sing kahimusan si Tatay nga magsaylo diin mas daku ang kinahanglanon nga manugbantala sang ginharian. Sang 1949 ginbaligya niya ang iya uma kag ang kuluhaan sang balas kag graba kag nagpayunir, nga nagaalagad bilang bug-os tion nga ministro sang mga Saksi ni Jehova. Nabawtismuhan ako sang Septiembre 24, 1950, subong simbulo sang akon dedikasyon kay Jehova. Sugod sadto, kon tion sang amon bakasyon sa eskwelahan, nagaaplay ako subong vacation pioneer (karon auxiliary payunir), nga nagahinguyang sing 100 ka oras kada bulan sa ministeryo. Apang panugod lamang yadto. Wala madugay ginhandum ko gid nga himuon ang kapin pa sa pagpasanyog sang putli nga pagsimba.

Ang Akon Handum nga Magmisyonera

Sang 1951, gin-asayn si Tatay sa Bideford, North Devon. Bag-o lang kami nag-abot didto sang nagbisita sa amon kongregasyon ang misyonera nga nag-alagad sa Aprika, nga ginhinambitan sang primero. Sugod sadto, ginaimpluwensiahan sang akon handum nga magmisyonera ang tanan ko nga desisyon. Nahibaluan sang mga manunudlo sa eskwelahan ang akon tulumuron kag ila ginhimo ang tanan nga masarangan nila agod palas-ayon ako, nga nagalaum nga unahon ko ang sekular nga karera. Sa katapusan ko na nga adlaw sa eskwelahan, sang ginkadtuan ko ang mga manunudlo agod magpasalamat kag magpaalam sa ila, ang isa sa ila nagsiling: “Panginbulahan sa imo! Ikaw lamang ang estudyante nga nakahibalo gid kon ano ang himuon mo sa imo kabuhi. Nagalaum kami nga malab-ot mo ang imo tulumuron.”

Sa gilayon, nakatigayon ako sing part-time nga trabaho, kag nangin regular payunir ako sang Disiembre 1, 1955. Sang ulihi, si Nanay kag ang akon mga utod nga lalaki nagpayunir man. Sa sulod sang pila ka tuig, ang tanan sa pamilya yara sa bug-os tion nga pag-alagad.

Pakadto sa Irlandiya

Pagligad sang isa ka tuig, nakabaton ako sing imbitasyon nga mag-alagad sa Irlandiya. Una ini nga tikang agod malab-ot ko ang akon tulumuron nga magmisyonera. Sang Pebrero 1957, nag-abot ako sa Cork, bagatnan nga Irlandiya upod sa duha ka lamharon nga payunir nga sanday June Napier kag Beryl Barker.

Makahalangkat ang pag-alagad sa latagon sa Irlandiya. Namatok gid ang Romano Katoliko nga Simbahan. Natun-an namon nga pat-uron gid pirme nga may alagyan pagua sa isa ka apartment ukon bilding, engkaso kinahanglan namon nga magpalagyo. Ginatago namon ang amon mga bisikleta sa uluunhan, apang pirme nga may makasapo sini kag ginabuslot ukon ginapakupos ang ruweda.

Isa ka bes, nagaduaw kami ni Beryl sa mga residente sang isa ka subdibisyon sang may grupo sang kabataan nga nagbato kag nagyawyaw sa amon. Gani, nagsulod kami sa isa ka balaligyaan sang gatas, nga palayas sang isa ka balay. Amat-amat nga nagtipon ang guban sa gua. Bangod paborito ni Beryl ang gatas, hinayhinay niya nga gin-inom ang duha ukon tatlo ka baso, nga nagapaabot nga maglakat ang guban. Wala ina matabo. Nian, nagsulod sa balaligyaan ang isa ka lamharon nga pari. Abi niya mga bisita kami, gani nagsiling sia nga luyag niya nga ilagawlagaw kami. Apang, gindala niya anay kami sa isa pa ka hulot sang balay, kag samtang mahipos kami nga nagpungko, naghimo sia sang katapusan nga pamilinbilin sa nagatagumatayon nga tigulang nga lalaki. Pagkatapos naghalin kami sa balay upod ang pari. Naglakat ang guban sang makita kami nga nagapakighambal sa pari.

Pakadto sa Gilead

Sang 1958 ang Divine Will nga Internasyonal nga Asambleya hiwaton sa New York. Matambong si Tatay, kag luyag ko man mag-upod, apang wala ako sing kuarta. Nian, sa wala ginapaabot, napatay ang akon lola kag may ginbilin sia sa akon nga 100 ka pound (280 dolyares). Ang plete pakadto-pakari sa asambleya 96 ka pound, gani gilayon ako nga naggawad sing tiket sa eroplano.

Wala madugay sa tapos sini, ginduaw kami sang isa ka representante halin sa sanga talatapan sang mga Saksi ni Jehova sa Britanya kag gin-agda niya ang tanan nga espesyal payunir nga matambong sa asambleya nga mag-aplay para sa misyonero nga paghanas sa Watchtower Bible School of Gilead. Daw indi ako makapati sa akon nabatian! Apang, ako lang ang wala niya ginhatagan sing aplikasyon. Tuman pa sa akon ka lamharon. Nangabay ako nga ilakip, nagapaathag nga nakabiya na ako sa pungsod nga akon ginapuy-an kag halos kaangay man ini sa misyonero nga asaynment. Sang nakita niya ang akon determinasyon, ginhatagan niya ako sing pormas. Nangamuyo gid ako nga mabaton! Madasig nga nag-abot ang sabat, kag gin-agda ako nga mag-eskwela sa Gilead.

Sa tuman ko nga kalipay, na-enroll ako sa ika-33 nga klase sang Gilead, upod sa 81 ka iban pa nga payunir gikan sa 14 ka kadutaan. Daw ginahunos lang ang lima ka bulan nga klase. Sang dali na lang ini matapos, si Utod Nathan H. Knorr naghatag sing apat-ka-oras nga makapahulag nga pamulongpulong. Ginpalig-on niya ang makapabilin nga di-minyo nga magpadayon sa sini. (1 Corinto 7:37, 38) Apang sa nagahandum magminyo sa ulihi, nagpanugda sia nga maghimo kami sing personal nga listahan sang kalipikasyon sang luyag namon pakaslan. Kag kon may yara gid man sing nagakaigo nga milinyuon, mahimo namon mausisa ini nga tawo suno sa sini nga mga kalipikasyon.

Lakip sa akon listahan sang mga kalipikasyon sang gusto ko pamanahon amo ang masunod: Dapat misyonero man sia kag ginahigugma niya si Jehova, mas madamo sing nahibaluan sa kamatuoran sa Biblia sangsa akon, mapasugot nga indi lang anay magbata tubtob mag-Armagedon agod makapadayon sa bug-os tion nga pag-alagad, talunsay mag-Ingles, kag mas magulang sangsa akon. Subong isa ka 20 anyos nga handa nga magbaton sing asaynment sa malayo nga pungsod, ini nga listahan nakabulig gid sa akon.

Pakadto sa Brazil

Naggradwar kami sang Domingo, Agosto 2, 1959, kag ginpahibalo ang amon mga asaynment. Kami nanday Vehanouch Yazedjian, Sarah Greco, Ray kag Inger Hatfield, Sonia Springate kag Doreen Hines ang gin-asayn sa Brazil. Nalangkag gid kami. Ginhanduraw ko na ang mga kagulangan, mga man-ug, mga rubber tree, kag tumandok nga mga Indian. Apang, pag-abot namon didto, nakibot gid ako! Sa baylo nga sa maulan nga kagulangan sang Amazon, didto ako sa Rio de Jainero, isa ka mainit kag moderno nga siudad, nga sa sina nga tion amo ang kapital nga siudad sang pungsod.

Ang una nga hangkat amo ang pagtuon sing Portuges. Sang una nga bulan, nagtuon kami sing 11 ka oras kada adlaw. Pagkatapos sang pagbantala sa siudad sang Rio de Janeiro kag pagtener sing makadali sa sanga talatapan sang mga Saksi ni Jehova didto, ginpadala ako sa puluy-an sang mga misyonero sa Piracicaba, sa Estado sang São Paulo, kag sang ulihi sa puluy-an sang mga misyonero sa Porto Alegre, sa Estado sang Rio Grande do Sul.

Nian, sang maaga nga bahin sang 1963, nakabaton ako sing imbitasyon nga magtrabaho sa Translation Department sa sanga. Si Floriano Ignez da Conceição, ang nagtudlo sing Portuges sa amon sang mag-abot kami, amo ang nagadumala sa departamento. Natun-an niya ang kamatuoran sang 1944, sang mga 300 pa lang ang Saksi sa Brazil, kag nag-eskwela sia sa ika-22 nga klase sang Gilead. Isa ka adlaw, mga pila ka bulan sang ulihi, ginpangabay ako ni Utod Conceição nga magpabilin anay sina nga udto, kay may luyag sia ihambal sa akon. Sa primero, nagkabalaka ako. May nahimo bala ako nga sala? Sang nag-bell na, ginpamangkot ko sia kon ano ang luyag niya ihambal sa akon. Bilang sabat, nagpamangkot sia, “Pamanahon mo bala ako?” Wala ako makasabat. Nagpangabay ako nga pamensaron ko anay ang mga butang kag nagdalidali ako panaug agod manyaga.

Si Floriano indi ang una nga nagpangaluyag sa akon. Apang tubtob sini, wala pa gid sang may nakalab-ot sa akon personal nga mga kalipikasyon para sa isa ka nagakaigo nga palamanhon. Nagapati ako nga ang listahan nakabulig sa akon nga malikawan ang maghimo sing sayop nga desisyon. Sa sini nga tion, tuhay na. Nalab-ot ni Floriano ang tanan nga kalipikasyon! Ginkasal kami sang Mayo 15, 1965.

Pag-atubang sa Hangkat sang Balatian

Makalilipay gid ang amon pag-asawahay ni Floriano, sa pihak sang mga hangkat nga amon gin-atubang. Ang isa sa sini amo ang balatian ni Floriano, nga nagsugod antes gid lang sang amon kasal. Mga tuig antes, ang iya wala nga baga naguba, kag ginaantos niya karon ang mga epekto sini. Subong resulta, naggua kami sa Bethel kag gin-asayn nga espesyal nga mga payunir sa siudad sang Teresópolis, bulubukid nga rehiyon sang Estado sang Rio de Janeiro. Naglaum kami nga ang klima didto makabulig sa iya nga mag-ayo.

Dugang pa, sang Disiembre 1965, nakabaton ako sing balita nga malala na ang kanser sang akon iloy. Pirme kami nagasulatay, apang wala na kami magkitaay sa sulod sang pito ka tuig. Ginbayaran niya ang amon plete pakadto sa Inglaterra agod makita sia. Gin-operahan si Nanay apang wala makuha sang mga doktor ang kanser. Bisan pa nga malala ang iya balatian kag nagahigda na lang, handum gihapon niya nga makigbahin sa pagbantala nga hilikuton. May makinilya sa iya kuarto agod madikta niya ang mga sulat. Nagapanaksi man sia sing malip-ot sa mga bisita. Napatay sia sang Nobiembre 27, 1966. Sa sina mismo nga bulan, nakareport sia sing pulo ka oras sa pag-alagad sa latagon! Nagpadayon si Tatay nga matutom sa payunir nga pag-alagad tubtob sang iya kamatayon sang 1979.

Sang patay na si Nanay, nagbalik kami ni Floriano sa Brazil, sa Estado sang Rio de Janeiro nga ginaalagaran namon halin sadto. Temporaryo kami nga gin-asayn subong manugtatap sa sirkito sa kapital sang pungsod, apang malip-ot lamang ang amon kalipay, bangod nagmasakit liwat si Floriano. Pagkatapos nagbalik kami sa Teresópolis subong espesyal nga mga payunir.

Sang 1974, pagkatapos sang tinuig kag masakit nga mga pagpabulong, ginkuha sang mga doktor ang wala nga baga ni Floriano. Sa amo nga tion, indi na sia makaalagad subong nagadumala nga manugtatap ukon subong isa ka espesyal payunir, apang makahiwat sia gihapon sing mga pagtuon sa Biblia sa tion nga puede sia maduaw sa ospital—ang isa sang iya mga gintun-an amo si Bob, nga isa ka may edad na nga Amerikano, kag ginahiwat nila ang pagtuon sa Ingles. Ginbaton ni Bob ang kamatuoran kag sang ulihi nabawtismuhan sia. Sing amat-amat nag-ayo si Floriano kag tubtob karon nagaalagad sia subong isa ka regular nga payunir.

Si Jehova Nagbulahan sang Akon Ministeryo

Sa sulod sang mga tinuig, nag-alagad ako subong espesyal nga payunir, kag si Jehova nagbulahan sang akon ministeryo. Sa Teresópolis, may makalilipay ako nga pribilehiyo nga mabuligan ang kapin sa 60 ka tawo nga magdedikar sang ila kabuhi kay Jehova. Ang isa sa ila amo si Jupira, nga gintudluan ko man magbasa. Sang ulihi, ginhiwatan ko sang pagtuon ang iya walo ka kabataan nga lunsay adulto na. Subong resulta, si Jupira kag ang kapin sa 20 ka miembro sang iya pamilya kag mga himata aktibo nga nagaalagad kay Jehova sa karon. Isa ang gulang, tatlo ang ministeryal nga alagad, kag duha ang payunir.

Natun-an ko nga mangin positibo tuhoy sa posibilidad nga ang mga tawo magatuon sing kamatuoran. Isa ka bes, nagahiwat ako sing pagtuon sa Biblia upod sa lamharon nga babayi nga si Alzemira sang ang iya bana, nga si Antônio, nagpamahog nga ipalaas ako sa duha ka dalagku nga ido kon indi ako maghalin gilayon sa ila balay. Sugod sadto, kon san-o lang ako makaduaw kay Alzemira tubtob nga pito ka tuig sang ulihi, natigayon ko ang pahanugot ni Antônio nga matuon kami liwat ni Alzemira. Apang, indi gihapon luyag ni Antônio nga sugilanunon sia tuhoy sa Biblia. Apang, sang isa ka adlaw nga maulan, gin-agda ko si Antônio nga makigbahin sa pagtuon. Didto ko nabal-an nga indi gali sia kabalo magbasa. Pagkatapos sadto, gintudluan sia ni Floriano kag sang iban pa nga makabasa kag gintun-an man sia sa Biblia. Sa karon, si Alzemira kag si Antônio bawtismado na. Daku nga bulig si Antônio sa kongregasyon, kag ginaupdan niya ang mga bag-uhan sa ministeryo.

Pila lang ini sa amon madamo nga eksperiensia sa sulod sang kapin sa 20 ka tuig nga pag-alagad sa Teresópolis. Sang maaga nga bahin sang 1988, nakabaton kami sing bag-o nga asaynment—ang siudad sang Niterói, sa diin nag-alagad kami sa sulod sang lima ka tuig antes magsaylo sa Santo Aleixo. Dayon nagsaylo kami sa Kongregasyon sang Japuíba sa sentro sang estado kag may pribilehiyo nga sugdan ang Kongregasyon sang Ribeira.

Isa ka Simple Apang Makapaladya nga Kabuhi

Sa sulod sang tinuig, ako kag si Floriano nakapribilehiyo nga mabuligan ang kapin sa 300 ka tawo nga magdedikar sang ila kabuhi kay Jehova. Sa karon, ang pila sa ila nagapangalagad sa sanga, kag ang iban mga payunir, mga gulang, kag mga ministeryal nga alagad. Nagapasalamat gid ako nga gingamit kami sang Dios paagi sa iya balaan nga espiritu nga mabuligan ang madamo nga tawo!—Marcos 10:29, 30.

Dapat gid nga atubangon ni Floriano ang serioso nga mga problema sa panglawas. Apang sa pihak sang iya kahimtangan, padayon sia nga di-mationg, malipayon, kag nagasalig kay Jehova. Pirme sia nagasiling: “Ang kalipay karon indi gikan sa kabuhi nga wala sing problema. Nagagikan ini sa pagtigayon sang bulig ni Jehova sa pag-atubang sang aton mga problema.”—Salmo 34:19.

Sang 2003, nasayasat nga may kanser ako sa wala nga mata. Gin-operahan ako, kag ang akon wala nga mata gin-islan sing artipisyal nga mata, nga kinahanglan pirme hugasan. Walay sapayan sini, ginhatagan ako ni Jehova sing kusog nga makapadayon sa pag-alagad sa iya subong espesyal payunir.

Nahanungod sa materyal nga mga butang, simple ang akon pagkabuhi. Apang, si Jehova nagbulahan sa akon asaynment kag naghimo sa akon nga manggaranon sa espirituwal. Ang ginsiling sang utod nga misyonera nahanungod sa pagbantala nga hilikuton sa Aprika nangin matuod nga paglaragway sang amon asaynment sa Brazil. Huo, ginpadyaan ni Jehova sing bugana gid ang akon handum nga magmisyonera!

[Retrato sa pahina 9]

Upod sa akon pamilya, 1953

[Retrato sa pahina 9]

Pagbantala sa Irlandiya, 1957

[Retrato sa pahina 10]

Sa Brazil sang 1959, upod sa iban nga misyonera. Halin sa wala pa tuo: Ako, si Inger Hatfield, si Doreen Hines, kag si Sonia Springate

[Retrato sa pahina 10]

Upod sa akon bana