SUGILANON SANG KABUHI

Wala Ako sing Ginakabalak-an Bangod Nagasalig Ako kay Jehova

PANUGIRON NI ISRAEL ITAJOBI

KON ginapamangkot ako sang mga tawo parte sa akon mga eksperiensia sa pag-alagad kay Jehova, ginasilingan ko sila nga daw pareho ako sa isa ka bagahe sa mga kamot ni Jehova. Ano ang buot ko silingon? Ti, indi bala nga kita ang nagadesisyon kon diin naton dal-on ang aton bagahe? Gusto ko nga amo man sini ang himuon sa akon ni Jehova kag sang iya organisasyon. Gusto ko nga sila ang magsiling kon diin ang akon asaynment kag kon san-o ko ini kadtuan. Mabudlay gid ang akon mga asaynment, kag may mga tion nga ara sa peligro ang akon kabuhi. Pero natun-an ko nga wala gid kita sang dapat kabalak-an kon nagasalig kita kay Jehova.

NAKILALA KO SI JEHOVA KAG NAGSALIG AKO SA IYA

Natawo ako sang 1948 sa isa ka gamay nga baryo sa bagatnan-katundan sang Nigeria. Sadto nga tion, nabawtismuhan bilang mga Saksi ni Jehova si Tito Moustapha nga manghod ni Tatay, kag si Wahabi nga akon magulang nga lalaki. Sang nuebe anyos ako, napatay si Tatay. Nasubuan gid ako. Ginsilingan ako ni Manong Wahabi nga makita namon liwat si Tatay sa tion sang pagkabanhaw. Naumpawan gid ako sa sini, gani nagpa-Bible study ako. Nabawtismuhan ako sang 1963. Sang ulihi, nabawtismuhan man ang akon tatlo ka utod nga lalaki.

Sang 1965, nag-upod ako sa akon magulang nga si Wilson sa Lagos. Nalipay gid ako mag-upod sa mga regular payunir sa Igbobi Congregation. Napalig-on gid ako sa ila kalipay kag kapisan sa pag-alagad, gani nagpayunir man ako sang Enero 1968.

May isa ka Bethelite nga si Albert Olugbebi nga nag-organisar sang espesyal nga miting para sa amon nga mga pamatan-on. Nagsiling sia nga kinahanglan ang mga espesyal payunir sa aminhan sang Nigeria. Madumduman ko pa ang iya ginsiling para palig-unon kami: “Mga pamatan-on, gamita ninyo ang inyo tion kag kusog para kay Jehova. Madamo gid kamo sang puede himuon sa inyo pag-alagad sa iya.” Gusto ko ilugon ang kahanda ni manalagna Isaias nga mag-alagad bisan diin, gani nag-aplay ako nga mangin isa ka espesyal payunir.—Isa. 6:8.

Sang Mayo 1968, gin-asayn ako bilang espesyal payunir sa siudad sang Kano sa aminhan sang Nigeria. Sadto nga tion, may inaway nga gintawag Biafran War nga nag-umpisa sang 1967 kag natapos sang 1970. Madamo gid ang napatay sa sini nga inaway sa aminhan sang Nigeria. Sang ulihi, ang sidlangan sang Nigeria naman ang naapektuhan sini nga inaway. Nabalaka ang isa ka brother sa akon, gani ginsilingan niya ako nga indi magkadto sa akon asaynment. Ginsilingan ko sia: “Salamat gid sa imo kabalaka. Pero si Jehova ang naghatag sa akon sini nga asaynment, gani sigurado nga buligan niya ako.”

Isa ka mapa sang West Africa, kag ginapakita sini ang pila sa mga lugar nga gin-istaran kag gin-alagaran ni Israel Itajobi: Conakry, Guinea; Sierra Leone; Niamey, Niger; Kano, Orisunbare, kag Lagos, Nigeria.

NAGSALIG AKO KAY JEHOVA SANG ARA AKO SA LUGAR NGA NAAPEKTUHAN SANG INAWAY

Indi gid maayo ang sitwasyon sa Kano. Grabe ang epekto sang inaway sa sining daku nga siudad. Kon nagabantala kami, may malabayan kami kon kaisa nga mga bangkay sang mga tawo nga ginpangmasaker. May mga kongregasyon sadto sa Kano, pero nagpalagyo na ang kalabanan sa mga kauturan. Wala kalab-ot sa 15 ka kauturan ang nagpabilin didto, kag nahadlok sila kag naluyahan sang buot. Anom kami nga mga espesyal payunir ang ginpadala didto, gani nalipay gid ang mga kauturan pag-abot namon. Naumpawan sila sa amon mga pagpalig-on. Ginbuligan namon sila sa pag-organisar liwat sang mga miting kag sang pagbantala. Ginbuligan man namon sila nga makapadala liwat sang mga report sa pag-alagad kag makaorder sang mga publikasyon sa branch office.

Nagtuon kami nga mga espesyal payunir sang Hausa nga lenguahe. Madamo nga tumandok ang nagapamati sa amon kon nagabantala kami sa ila kaugalingon nga lenguahe. Pero, indi gusto sang mga miembro sang isa ka daku nga relihion sa Kano nga nagabantala kami didto, gani kinahanglan gid namon maghalong. Isa ka bes, ginlagas ako kag ang akon kaupod sang isa ka tawo nga may dala nga sundang. Maayo lang kay mas madasig kami magdalagan sa iya, gani wala niya kami nalab-ot. Bisan pa may mga peligro, ‘ginhatagan kami ni Jehova sing kalig-unan’ kag nagdamo ang manugbantala didto. (Sal. 4:8) Subong, sobra 500 ka manugbantala ang nagaalagad sa 11 ka kongregasyon sa Kano.

GINHINGABOT KAMI SA NIGER

Sang nagaalagad ako bilang espesyal payunir sa Niamey, Niger

Sang ulihi sang Agosto 1968, pagligad lang sang pila ka bulan sa Kano, ginpadala ako sa Niamey nga kapital sang Republic of Niger upod ang duha pa ka espesyal payunir. Grabe gid man gali kainit sa Niger, West Africa. Gani magluwas nga dapat namon batason ang mainit nga tiempo, dapat man kami magtuon sang French nga amo ang ila opisyal nga lenguahe. Bisan pa sang sini nga mga kabudlayan, nagsalig kami kay Jehova. Gani ginsugdan namon ang pagbantala sa Niamey upod ang pila lang ka kauturan didto, kag gintanyag namon ang libro nga ginagamit sa pag-Bible study nga Ang Kamatuoran nga Nagadul-ong sa Kabuhi nga Dayon. Sa malip-ot lang nga tion, natanyagan namon sang sini nga libro ang halos tanan sa Niamey nga kabalo magbasa, kag nagkuha sila sini. Ginapangita pa gani kami sang mga tawo nga gusto man sang sini nga libro.

Wala madugay pag-abot namon didto, narealisar namon nga akig ang mga opisyal sang gobierno sa mga Saksi ni Jehova. Sang Hulyo 1969, nagtipon kami para sa pinakauna nga sirkito nga asembleya sa sini nga pungsod, kag mga 20 ang nag-attend. Excited gid kami sa bawtismo sang duha ka bag-o nga manugbantala. Pero sa pinakauna nga adlaw sang asembleya, nag-abot ang mga pulis kag ginpauntat nila ang programa. Dayon gindala nila sa estasyon sang pulis ang mga espesyal payunir kag ang circuit overseer. Pagkatapos nila kami mainterogar, ginmanduan nila kami nga magbalik pagkasunod nga adlaw. Narealisar namon nga daw may indi maayo nga plano ang mga opisyal, gani gindala namon sa isa ka balay ang mga balawtismuhan. Didto namon ginhimo ang pamulongpulong para sa bawtismo, kag sekreto namon sila nga ginbawtismuhan sa isa ka suba.

Pagligad sang pila ka semana, nagmando ang gobierno nga pahalinon ako pati ang lima pa ka espesyal payunir sa Niger. Ginhatagan lang nila kami sang 48 ka oras para maghalin sa ila pungsod, kag kami ang bahala kon paano namon ini himuon. Gintuman namon ang mando sang gobierno. Gani nagkadto kami dayon sa branch office sa Nigeria kag nakabaton kami sang bag-o nga mga asaynment.

Gin-asayn ako sa Orisunbare nga isa ka baryo sa Nigeria. Nanamian gid ako magbantala kag mag-Bible study sa mga tawo sa sini nga lugar upod ang pila lang ka kauturan nga nagaistar didto. Pero pagligad sang anom ka bulan, gusto sang branch office nga magbalik ako sa Niger nga ako lang isa. Sa umpisa, medyo nakibot ako kag nakulbaan. Pero excited gid ako nga makita liwat ang mga kauturan sa Niger.

Gani nagbalik ako sa Niamey. Pagkasunod nga adlaw, nakita ako sang isa ka negosyante nga taga-Nigeria kag narealisar niya nga isa ako ka Saksi. Madamo sia sing pamangkot parte sa Biblia, gani gin-Bible study ko sia. Sang ulihi, gin-untatan niya ang pagpanigarilyo kag ang pagpahubog, kag nabawtismuhan sia. Nalipay gid ako magbantala sa lainlain nga lugar sa Niger upod ang mga kauturan, kag nakita ko ang pag-uswag sa sini nga pungsod. Pag-abot ko sa sini nga pungsod, 31 lang ang Saksi. Pero paghalin ko, 69 na ang Saksi.

“GAMAY LANG ANG AMON NABAL-AN PARTE SA HILIKUTON SA GUINEA”

Sang Disiembre 1977, nagbalik ako sa Nigeria para mag-attend sa tatlo ka semana nga paghanas. Pagkatapos sang klase, ginpabasa sa akon sang Branch Committee coordinator nga si Malcolm Vigo ang sulat halin sa branch office sa Sierra Leone. Nagapangita sila sang mapagros kag soltero nga payunir nga kabalo mag-English kag mag-French para mangin circuit overseer sa Guinea. Ginsilingan ako ni Brother Vigo nga ginahanas ako para sa sini nga asaynment. Nagsiling man sia nga indi ini mahapos, gani ginlaygayan niya ako, “Pamensari anay ini sing maayo antes ka magdesisyon.” Pero nagsabat ako dayon, “Si Jehova ang nagapadala sa akon didto, gani makadto ako.”

Nagsakay ako sa eroplano pakadto sa Sierra Leone, kag nagdiretso ako sa branch office. Ginsilingan ako sang isa ka miembro sang Branch Committee, “Gamay lang ang amon nabal-an parte sa hilikuton sa Guinea.” Ang branch office sa Sierra Leone amo ang nagatatap sa hilikuton sa Guinea nga kaingod sini nga pungsod, pero indi nila makontak ang mga kauturan sa Guinea bangod sang ginamo sa pulitika didto. Madamo nga beses nga gintinguhaan nila nga makapadala sang brother sa Guinea para hibaluon ang sitwasyon sang mga kauturan didto, pero wala sila nagmadinalag-on. Gani, ginpakadto nila ako sa Conakry nga kapital sang Guinea para mag-aplay sang residency permit para makaistar ako sa sini nga pungsod.

“Si Jehova ang nagapadala sa akon didto, gani makadto ako”

Pag-abot ko sa Conakry, nagkadto ako sa Nigerian embassy para makigkita sa ambassador. Ginsilingan ko sia nga gusto ko magbantala sa Guinea. Pero ginsilingan niya ako nga indi ako dapat magtener sa Guinea bangod posible nga dakpon ako ukon sakiton. Nagsiling pa sia, “Magbalik ka na lang sa Nigeria kag didto ka magbantala.” Nagsabat ako, “Gusto ko gid nga mag-istar diri.” Gani ginsulatan niya ang Minister of the Interior sang Guinea para buligan ako, kag ginbuligan ako sini nga opisyal.

Wala madugay pagkatapos sini, nagbalik ako sa branch office sa Sierra Leone kag ginpabalo ko sa ila ang desisyon sang Minister of the Interior. Nakasinggit sa kalipay ang mga kauturan sang mabatian nila kon paano ako ginpakamaayo ni Jehova. Ginpasugtan ako sang gobierno sang Guinea nga mag-istar sa ila pungsod.

Malipayon si Israel nga may dala nga mga bagahe. — Sang nagaalagad ako sa sirkito sa Sierra Leone

Sugod sang 1978 asta sang 1989, nangin circuit overseer ako sa Guinea kag sa Sierra Leone, kag nangin substitute circuit overseer ako sa Liberia. Sa umpisa, pirme ako nagamasakit. Kon magmasakit ako kag ara ako sa malayo nga lugar, ginatinguhaan gid sang mga kauturan nga madala ako sa ospital.

Isa ka bes, grabe kalala sang akon sitwasyon. Nagmasakit ako sang malaria kag may impeksion ang akon tinai bangod sang mga bitok. Sang nag-ayo ako, nabal-an ko nga gin-istoryahan na sang mga kauturan kon diin ako ilubong kay abi nila mapatay na gid ako. Bisan pa pila ka beses nga nabutang sa peligro ang akon kabuhi, wala ko gid nahunahuna nga biyaan ang akon mga asaynment. Kumbinsido ako nga ang Dios lang ang makaamlig sa aton kay sia lang ang makabanhaw sa aton kon mapatay kita.

NAGSALIG KAMI NGA MAG-ASAWA KAY JEHOVA

Sanday Israel kag Dorcas sang ginkasal sila. — Sang ginkasal kami sang 1988

Sang 1988, nakilala ko ang isa ka payunir nga si Dorcas. Mapainubuson gid sia kag palangga gid niya si Jehova. Nagpakasal kami, kag gin-updan niya ako sa akon asaynment bilang circuit overseer. Handa gid magsakripisyo si Dorcas kag ginsuportahan gid niya ako. Kon kaisa, mga 25 ka kilometro ang amon ginalakat kon nagasaylo kami sang kongregasyon kag may dala kami nga mga bagahe. Kon malayo gid ang kongregasyon nga amon kadtuan, nagasakay kami sa bisan ano lang nga puede namon masakyan, kag lunangon kag batsihon ang mga dalan nga amon ginaagyan.

Maisog gid si Dorcas. Halimbawa, may mga tion nga nagatabok kami sa mga suba nga madamo sing buaya. Isa ka bes, kinahanglan namon maglakbay sing lima ka adlaw. Sadto nga tion, naguba ang taytay nga kahoy gani kinahanglan namon magsakay sa baruto nga wala sing katig para makatabok kami sa suba. Sang nagtindog si Dorcas sa baruto para manaug, nahulog sia sa suba. May mga buaya sa sini nga suba kag madalom ini. Indi kami kabalo nga duha maglangoy, gani maayo lang gid kay may mga pamatan-on nga lalaki nga naglumpat sa suba para buligan sia. May mga tion nga nagakadamguhan namon ini nga eksperiensia, pero padayon kami nga nag-alagad sa amon asaynment.

Sanday Jahgift kag Eric sa atubangan sang Kingdom Hall sang bata pa sila. — Regalo gid halin kay Jehova ang amon duha ka bata nga sanday Jahgift kag Eric

Sang 1992, nakibot gid kami sang nabal-an namon nga nagabusong si Dorcas. Kinahanglan namon magdesisyon kon bala mauntat kami sa pag-alagad bilang mga espesyal payunir ukon indi. Nahunahuna namon, “Ginhatagan kami ni Jehova sing regalo.” Gani, ginngalanan namon ang amon bata nga babayi sing Jahgift. Pagligad sang apat ka tuig, namanghuran si Jahgift sing lalaki kag ginngalanan namon sia nga Eric. Regalo gid halin kay Jehova ang amon duha ka bata. Nakaalagad si Jahgift sa remote translation office sa Conakry, kag ministeryal nga alagad subong si Eric.

Sanday Israel kag Dorcas upod ang ila mga bata nga sanday Eric kag Jahgift sa atubangan sang Kingdom Hall.

Kinahanglan mag-untat ni Dorcas sa pag-alagad bilang espesyal payunir, pero nagregular payunir sia bisan pa nga dapat namon atipanon ang amon mga bata. Sa bulig ni Jehova, padayon ako nga nag-alagad bilang espesyal payunir. Sang nagdalagku na ang amon mga bata, nangin espesyal payunir liwat si Dorcas. Subong, mga misyonero kami nga duha sa Conakry.

GIN-AMLIGAN GID KAMI NI JEHOVA

Wala ko gid ginbalibaran ang tanan nga asaynment nga ginhatag ni Jehova. Naeksperiensiahan gid namon ni Dorcas ang iya pag-amlig kag pagpakamaayo. Paagi sa pagsalig kay Jehova imbes nga sa materyal nga mga butang, nalikawan namon ang madamo nga problema kag kabalaka. Base sa amon mga eksperiensia, masiling gid namon nga si Jehova nga “Dios sang [aton] kaluwasan” amo lang ang makaamlig sa aton. (1 Cron. 16:35) Kumbinsido ako nga ‘amligan ni Jehova ang kabuhi sang tanan nga nagasalig sa iya pareho sang pag-amlig sang isa ka tawo sa malahalon nga butang sa isa ka suludlan.’—1 Sam. 25:29.