“Sa Imo Tuo nga Kamot Wala sing Katapusan ang Kalipay”

Panugiron ni Lois Didur

Nakasiling ka na bala, ‘Tani wala ko na lang ni ginhimo’? Ti, pagkatapos sang 50 ka tuig sa bug-os tion nga pag-alagad, wala gid ako sing ginhinulsulan sa akon pagpabilin sa tuo nga kamot ni Jehova. Sugiran ko kamo kon ngaa nasiling ko ini.

NATAWO ako sang 1939 kag nagdaku sa kaumhan sa Saskatchewan, Canada, upod sa akon apat ka utod nga babayi kag isa ka lalaki. Masadya ang kabuhi sa uma. Isa ka adlaw, may mga Saksi ni Jehova nga nagkadto sa balay kag nag-istorya kay Tatay kag ginpamangkot ko sila kon bala may ngalan ang Dios. Ginpakita nila sa amon ang ngalan nga Jehova sa Salmo 83:18. Nagpukaw ini sang akon interes sa Dios kag sa iya Pulong.

Sadto, ang mga estudyante sa uma halin sa Grade 1 asta Grade 8, ginatingob sa isa lang ka hulot-klasehan. Malayo ang ila mga balay, gani ang iban nagapangabayo samtang ang iban nagalakat lang pakadto sa eskwelahan. Ang mga ginikanan amo ang nagaatipan sang kinahanglanon kag dalayunan sang manunudlo. Sang turno na sang akon mga ginikanan, nagdayon sa amon ang bag-o nga maestro nga si John Didur.

Wala ko kabalo nga interesado man gali sia sa Pulong sang Dios. Kis-a gindayaw ko ang komunismo kag sosyalismo nga ginasakdag gid ni Tatay. Si John nagtugda: “Wala sing tawo nga may kinamatarong sa paggahom sa iban kundi ang Dios lang.” Bangod sini pirme na kami nagaistoryahanay.

Natawo si John sang 1931 gani nahibaluan niya ang mga kabudlayan sang tiempo giyera. Sang nagsugod ang Korean War sang 1950, ginpamangkot niya ang mga klero kon ngaa nagaentra sila sa inaway. Tanan sila nagsiling nga puede makaentra sa inaway ang mga Cristiano. Sang ulihi, ginpamangkot man niya ang mga Saksi ni Jehova. Ginpakita nila sa iya sa Biblia ang panindugan sang mga Cristiano sadto sa inaway. Ginbawtismuhan si John sang 1955 kag pagkadason nga tuig, ginbawtismuhan man ako. Gusto namon nga gamiton ang amon kabuhi kag kusog sa pag-alagad kay Jehova. (Sal. 37:3, 4) Sang Hulyo 1957, nagpakasal kami.

Ang amon anibersaryo pirme dungan sa kombension kag nalipay gid kami nga makaupod ang linibo nga nagatahod sang pag-asawahay. Una nga bes kami nga nakatambong sa internasyonal nga kombension sang 1958. Lima kami nga nagbiyahe sing isa ka semana pa New York halin sa Saskatchewan. Nagadrayb kami kon adlaw kag sa tent lang nagatulog kon gab-i. May nakilala kami nga brother sa Bethlehem, Pennsylvania, kag daw indi kami makapati sang ginpadayon niya kami sa iya balay sina nga gab-i! Bangod sang iya kaayo, nag-abot kami sa New York nga mahipid kag matinlo. Sa sining daku nga kombension, nabatyagan gid namon ang kalipay sang pag-alagad kay Jehova! Subong sang ginsulat sang salmista, “sa imo tuo nga kamot wala sing katapusan ang kalipay.”—Sal. 16:11, NW.

PAGPAYUNIR

Pagligad sang isa ka tuig, sang 1959, nagapayunir na kami kag nagaistar sa isa ka treyler sa ibabaw sang bakulod sa kaumhan sang Saskatchewan. Makita namon ang tuman kalapad nga kapatagan kag ang iban sini teritoryo namon.

Isa ka adlaw, may sulat para sa amon halin sa sanga talatapan kag gindala ko ini dayon kay John nga nagakay-o sang traktora. Ginaagda kami nga mag-espesyal payunir sa Red Lake, Ontario. Wala kami makahibalo kon diin ini, gani ginpangita dayon namon ini sa mapa.

Tuhay gid ini sa naandan namon nga kawayangan. Ang amon bag-o nga teritoryo mga kagulangan kag magagmay nga mga banwa malapit sa mga minahan sang bulawan. Pag-abot namon, samtang nagapangita kami sang dalayunan, nabatian kami sang isa ka bata nga babayi. Nagdalagan sia pauli kag ginsugiran ang iya Nanay, gani ginpadayon nila kami sina nga gab-i. Nagtulog kami sa isa ka kuarto nga duta ang dingding kag salog. Pagkaaga, nakakita kami sing dalayunan nga human sa kahoy. Wala ini sing gripo kag wala sing kagamitan, magluwas sa isa ka dalabukan agod mag-init ang balay. Gani, nagbakal kami sing segunda-mano nga mga gamit kag malipayon na kami sa sini.

Mga 209 kilometros ang kalayuon sang pinakamalapit nga kongregasyon. Madamo nga minero ang halin sa Europa, kag nangabay sila nga dal-an sing Biblia sa ila lenguahe. Wala madugay, 30 na ang nagauswag sa amon mga ginatun-an sing Biblia. Pagligad sang anom ka bulan, may diutay na kami nga kongregasyon.

Ang bana sang isa ka babayi nga ginatun-an namon nagtawag sa ila pari kag ginpakadto ini para ipakita sa iya asawa nga sala ang ginatudlo namon. Sang mag-abtanay kami, nagsiling ang pari nga dapat kuno namon itudlo ang mga doktrina pareho sang Trinidad. Ginkuha sang asawa ang Biblia sang mga Katoliko kag ginpangabay ang pari nga pamatud-an ang iya ginahambal. Ginpahurabog ini sang pari sa lamesa, kag nagsiling nga wala sia sing dapat pamatud-an. Sang manuglakat na sia, ginhambalan niya ang tagbalay sa lenguahe nga Ukrainian nga dapat tabugon nila kami kag indi na pagbatunon liwat. Wala sia kabalo nga nakaintiende si John sang Ukrainian!

Wala madugay, nagbiya kami sa Red Lake kay hanason si John sa pag-alagad sa sirkito. Isa ka tuig sang ulihi, namulongpulong si John para sa bawtismo sa kombension, kag atong bana isa sa mga kandidato! Bangod sa natabo sadto sang nagkadto ang pari, gin-usisa niya ang Biblia.

MASAKO SA PAGLAKBAY NGA HILIKUTON

Sa amon pag-alagad sa sirkito, makalilipay gid makig-upod sa lainlain nga pamilya. Nangin suod kami sa mga nagpadayon kag nagpalangga sa amon. May bes nga nakadayon kami sa isa ka naibabaw nga kuarto nga wala sing pangpainit kon tigtulugnaw. Kon aga, mabatyagan namon ang tigulang nga sister nga nagahinayhinay sulod para sindihan ang gamay nga kalan. Dayon, pagsaka niya liwat may dala na sia nga labador kag mainit nga tubig para gamiton namon. Daku gid ang akon natun-an sa iya kaayo kag kabuot.

Ang paglakbay nga hilikuton nakabulig sa akon nga mangin suod pa gid kay Jehova. Sa isa ka sirkito sa Alberta, may sister nga nagaistar sa isa ka minahan sa pinakamalayo nga bahin sa aminhan. Paano ginaatipan sang organisasyon ni Jehova ining nagaisahanon nga utod? Kada anom ka bulan, nagaeroplano kami kag nagatener didto sing isa ka semana para maghiwat sing miting kag magbantala upod sa iya. Isa ini ka pahanumdom sang mahigugmaon nga pag-atipan ni Jehova sa tagsa niya ka magamay nga karnero.

Pirme namon ginakamusta ang mga nagpadayon sa amon. Madumduman ko ang isa sa una nga mga regalo ni John sa akon—isa ka matahom nga karton nga puno sang papel nga sululatan. Nalipay gid kami magsulat sa amon mga abyan, kag amo ini nga mga papel ang akon ginagamit. Ginahalungan ko gid ini nga karton asta subong.

Sang nagaalagad kami sa isa ka sirkito sa Toronto, gintawgan kami sang brother sa Bethel sa Canada kag ginpamangkot kon gusto namon magpa-Bethel. San-o niya gusto mabal-an ang amon sabat? “Kon puede, buas dayon!” Siempre, ginbaton namon ini.

PAG-ALAGAD SA BETHEL

Kada magbag-o ang amon asaynment, labi namon nga nakita ang sarisari nga kalipay sa pagpabilin sa kamot ni Jehova. Amo man sini ang natabo sang magsaylo kami sa Bethel sang 1977. Sa amon pagpakig-upod sa pila ka hinaplas nakita namon ang ila sarisari nga personalidad kag ang ila tudok nga pagtahod sa Pulong sang Dios.

Kanami sang kabuhi sa Bethel. Halimbawa, ang amon mga bayo wala na sa maleta kundi sa aparador, kag isa na lang ang amon kongregasyon. Magluwas sa akon asaynment, nanamian gid ako mag-tour sang mga bisita. Ginapaathag ko ang mga ginahimo sa Bethel, ginapamatian ang komento sang mga kauturan, kag ginasabat ang ila mga pamangkot.

Daw ginabadbad lang ang tinuig, kag sang 1997, gin-agda si John nga magtambong sa School for Branch Committee Members sa Patterson, New York. Pagkatapos sini, ginpamangkot kami kon gusto namon magsaylo sa Ukraine. Ginsilingan kami nga hunahunaon kag ipangamuyo ini sing maayo. Sina mismo nga gab-i, nagdesisyon kami nga batunon ini.

ISA PA GID KA PAGBAG-O—UKRAINE

Nakatambong na kami sa isa ka daku nga internasyonal nga kombension sa St. Petersburg, Rusya sang 1992, kag sa Kiev, Ukraine sang 1993. Gani natun-an na namon nga palanggaon ang mga kauturan sa Eastern Europe. Ang amon bag-o nga puluy-an sa Lviv, Ukraine ara sa ikaduha nga panalgan sang daan nga balay. Kon maggawa ka, kitaon ang gamay nga hardin, isa ka daku nga sulog, kag mga pis-anan. Daw ara lang kami sa uma sa Saskatchewan. Dose kami nga nagaistar didto kag kada aga, nagasakay kami pakadto sa Bethel sa pihak nga bahin sang siudad.

Ano ang amon nabatyagan sa pagpakig-upod sa mga kauturan sa Ukraine? Nagdayaw gid kami kay madamo sa ila ang ginhingabot, gindumilian, kag ginbilanggo pero wala gid magluya ang ila pagtuo. Kon dayawon namon sila, nagasabat sila, “Ginhimo namon ato para kay Jehova.” Wala gid sila nagbatyag nga ginpabay-an. Bisan subong, kon pasalamatan mo ang isa sa iya kaayo, masabat sia, “Pasalamati si Jehova,” nga ginakilala ang Ginhalinan sang tanan nga maayong butang.

Sa Ukraine, ang kalabanan nagalakat lang pakadto sa miting. Mga isa ka oras ukon sobra pa ang ila ginalakat, gani makaistoryahanay sila kag makapalig-unay. Sobra 50 ang kongregasyon sa Lviv, kag 21 sini ang nagagamit sang isa ka daku nga Kingdom Hall Complex. Kon Domingo, kanami tan-awon sang daw nagailig lang nga mga kauturan nga nagapakadto sa miting.

Kamag-an dayon sang amon buot sa mga kauturan, nga mabuot kag may kabalaka sa iban. Kon indi ako kaintiende sang lenguahe, nga asta subong nagakatabo gihapon kon kaisa, kalaba gid sang ila pasensia. Ginapakita nila ini indi lamang sa ila mga tinaga kundi pati sa ila pangguyahon.

Ang isa ka halimbawa sang matuod nga pagsalig sa mga kauturan nakita ko sa internasyonal nga kombension sa Kiev sang 2003. Bag-o lang kami magsampot sa masako nga estasyon sang tren sa dalom-duta sang magpalapit sa amon ang bata nga babayi kag nagsiling, “Nadula ako. Indi ko makita si Lola.” Nakita sang bata nga may mga badge kami kag nahibaluan niya nga mga Saksi kami. Maisog sia kag wala maghibi. Gindala sia sang upod namon nga asawa sang C.O. sa Lost and Found Department sa istadyum. Nagkitaay dayon ang mag-lola. Natandog gid ako sa pagsalig sining bata, bisan pa nadula sia sa tunga sang linibo ka tawo.

Sang Mayo 2001, madamo nga kauturan sa iban nga pungsod ang nagkadto sa Ukraine agod magtambong sa dedikasyon sang amon bag-o nga pasilidad sang sanga. Pagkatapos sang espesyal nga pamulongpulong sa istadyum sang Domingo sang aga, tuman kadamo nga kauturan ang naglakat pakadto sa bag-o nga Bethel agod mag-tour. Kanami gid ini tan-awon! Natandog gid ako nga makita ining mga kauturan nga tuman kahipos kag kahim-ong. Naapresyar ko pa gid kon daw ano ang kalipay sang pag-alagad sa Dios.

HINALI NGA PAGBAG-O

Sang 2004, nadiskobrehan nga may kanser si John. Gani nagpabulong kami sa Canada. Ang una nga sesyon sang chemotherapy nagpaluya gid sa iya, amo nga pila sia ka semana nga naggrabe. Maayo kay nakabugtaw sia. Bisan nabudlayan sia maghambal, makita sa iya mga mata ang iya apresasyon sa mga nagaduaw sa iya.

Apang wala gid sia mag-ayo, kag sang Nobiembre 27, 2004 napatay sia. Nabatyagan ko nga daku nga bahin sang akon kabuhi ang nadula. Magkaupod gid kami ni John nga nag-alagad kay Jehova sing malipayon. Maano na lang ako? Nagdesisyon ako nga magbalik sa Ukraine. Nagapasalamat gid ako sa mainit nga paghigugma sang pamilya Bethel kag sang kongregasyon didto.

Wala gid kami sing may ginhinulsulan sa amon mga desisyon. Isa ini ka makalilipay nga kabuhi, upod sa pinakamaayo nga kaupdanan. Nahibaluan ko nga madamo pa ako sing dapat tun-an parte sa kaayo ni Jehova, kag nagalaum ako nga makapadayon sa pag-alagad sa iya tubtob san-o bangod nasapwan ko gid ang ‘kalipay sa tuo nga kamot ni Jehova.’

[Blurb sa pahina 6]

“Wala gid kami sing may ginhinulsulan sa amon mga desisyon”

[Retrato sa pahina 3]

Sang ginkasal kami ni John

[Retrato sa pahina 4]

Sang espesyal payunir ako sa Red Lake, Ontario

[Retrato sa pahina 5]

Sang sa Ukraine kami ni John, 2002