Paano Kita Makabulig sa mga Kinahanglanon sang Iban?
“NAGKINAGAMO pagkatapos sang eleksion, gani napilitan ang linibo ka mga Saksi ni Jehova nga magbiya sa ila mga balay,” siling ni François, isa ka gulang sa imol nga pungsod. “Maiwat ang pagkaon kag bulong, kag kon may ara gid man, mahal ka tama. Nagsira ang mga bangko, kag nahubsan ang mga ATM ukon nag-off-line.”
Ang mga kauturan sa sanga talatapan nagpadala dayon sing pondo kag mga suplay sa mga nagpalalagyo nga mga Saksi nga nagtipon sa mga Kingdom Hall sa bilog nga pungsod. Ang nagakontrahanay nga mga grupo naghimo sing mga check point, pero bangod nahibaluan nila nga neutral ang mga Saksi, sa masami ginapaagi nila ang mga salakyan sang sanga talatapan.
“Sang nagabiyahe kami pakadto sa isa ka Kingdom Hall, gintiro ang amon ban,” siling ni François. “Pero wala kami naigo sang bala. Sang nakita namon nga ang armado nga soldado nagadalagan palapit sa amon, ginpaatras namon dayon ang ban, nagliso, kag nagdalidali pabalik sa sanga talatapan. Nagpasalamat gid kami kay Jehova kay buhi kami. Pagkasunod nga adlaw, ang 130 ka kauturan sa amo nga Kingdom Hall nakasaylo sa mas luwas nga lugar. Ang iban nagkadto sa sanga talatapan, diin gin-atipan namon ang ila espirituwal kag materyal nga kinahanglanon tubtob natapos ang kinagamo.”
“Sang ulihi, nakabaton ang sanga talatapan sing madamo nga sulat sang mga kauturan sa bilog nga pungsod nga nagapabutyag sang ila pagpasalamat,” siling ni François. “Bangod naeksperiensiahan nila ang bulig sang ila kauturan sa iban nga lugar, nagbakod pa gid ang ila pagsalig kay Jehova.”
Sa panahon sang mga kalamidad, wala naton ginahambalan ang nabiktima nga mga kauturan nga “magpainit-init kag magpakabusog.” (Sant. 2:15, 16) Ginapanikasugan naton nga buligan sila sa ila pisikal nga mga kinahanglanon. Sing kaanggid, pagkatapos makabaton sing paandam nga may tiggulutom nga magaabot sang unang siglo, “namat-od ang mga disipulo nga ang tagsatagsa sa ila suno sa iya masarangan, mag-alagad paagi sa pagpadala sing bulig sa mga kauturan nga nagapuyo sa Judea.”—Binu. 11:28-30.
Subong mga alagad ni Jehova, handa kita magbulig sa mga nagakinahanglan sa materyal. Pero may espirituwal man nga kinahanglanon ang mga tawo. (Mat. 5:3) Para mapatalupangod sa ila ini nga kinahanglanon kag matigayon ini, ginsugo ni Jesus ang iya mga sumulunod nga maghimo sing mga disipulo. (Mat. 28:19, 20) Kada isa sa aton nagahatag sang aton tion, kusog, kag pagkabutang para matuman ini nga sugo. Subong isa ka organisasyon, ginagamit naton ang pila sa mga donasyon para maghatag sing materyal nga bulig, pero panguna ini nga ginagamit sa pagpasangkad sang intereses sang Ginharian kag sa pagpalapnag sang maayong balita. Sa sini nga paagi, mapakita naton ang aton gugma sa Dios kag sa aton mga isigkatawo.—Mat. 22:37-39.
Ang mga nagahatag sing donasyon para sa bug-os kalibutan nga hilikuton sang mga Saksi ni Jehova makasalig nga ang ila donasyon ginagamit sa husto kag pinakamaayo nga paagi. May ikasarang ka bala nga magbulig sa imo mga kauturan nga nagakinahanglan? Luyag mo bala suportahan ang paghimo sing disipulo nga hilikuton? Kon amo, “dili pagpunggi ang maayo gikan sa ila sa diin naigo ini, kon ini yara sa gahum sang imo mga kamut sa paghimo sini.”—Hulu. 3:27.