“Ang Buluhaton Daku Gid”

GINTIPON ni Hari David ang tanan niya nga pangulo, opisyal sang palasyo, kag isganan nga mga lalaki para sa importante gid nga miting sa Jerusalem. Nalipay sila sa ila nabatian nga pahibalo. Ginsugo ni Jehova ang anak ni David nga si Solomon nga maghimo sing dalayawon nga tinukod para sa pagsimba sa matuod nga Dios. Ang plano sini nga tinukod ginpahayag sang espiritu sang Dios sa tigulang na nga hari sang Israel kag ginhatag niya ini kay Solomon. “Ang buluhaton daku gid,” siling ni David, “kay ang templo indi para sa tawo kundi para kay Jehova nga Dios.”—1 Cron. 28:1, 2, 6, 11, 12; 29:1.

Dayon namangkot si David: “Sin-o karon ang magboluntaryo sa paghatag sing regalo kay Jehova?” (1 Cron. 29:5) Kon didto ka, ano ayhan ang himuon mo? Suportahan mo bala ining daku gid nga buluhaton? Amo gid sini ang ginhimo sang mga Israelinhon. Ang matuod, “nalipay gid [sila] sa paghatag [sang] kinabubut-on nga mga dulot, kay ginhatag nila ini sing bug-os tagipusuon kay Jehova.”—1 Cron. 29:9.

Ginatos ka tuig sang ulihi, may ginhimo si Jehova nga mas daku pa sangsa templo. Amo ini ang dakung espirituwal nga templo, ang kahimusan para makapalapit ang mga tawo sa iya kag masimba sia pasad sa halad ni Jesus. (Heb. 9:11, 12) Paano subong ginabuligan ni Jehova ang mga tawo nga makapasag-uli sa iya? Paagi sa aton pagtudlo sa ila nga mangin disipulo. (Mat. 28:19, 20) Bangod sini, minilyon ang ginatun-an sa Biblia, linibo ka disipulo ang ginabawtismuhan, kag ginatos ka bag-o nga kongregasyon ang nagadugang kada tuig.

Bangod sini nga pag-uswag, kinahanglan ang pag-imprinta sang mas madamo nga literatura sa Biblia, pagtukod kag pagmentinar sang mga Kingdom Hall, kag pagbakal sang mga lote ukon pag-arkila sang mga pasilidad para sa mga asembleya kag kombension. Indi bala nga ang aton ginahimo sa pagpalapnag sang maayong balita isa gid ka daku kag makapaladya nga buluhaton?—Mat. 24:14.

Ang gugma sa Dios kag sa isigkatawo kag ang pagkahilingagawon sang pagbantala parte sa Ginharian nagapahulag sa katawhan sang Dios nga “magboluntaryo sa paghatag sing regalo kay Jehova” paagi sa mga donasyon. Makalilipay gid nga ‘mapadunggan si Jehova paagi sa aton hamili nga mga butang’ kag makita nga ginagamit ini sing maayo kag maalamon para sa pinakadaku kag pinakaimportante nga buluhaton sa kasaysayan sang tawo!—Hulu. 3:9.

Mga Paagi sa Paghatag nga Ginpili sang Iban Para sa Bug-os Kalibutan nga Hilikuton

Madamo karon ang ‘nagapain’ sang kuarta kag ginahulog ini sa mga kahon alamutan sang kongregasyon nga nasulatan sing “Worldwide Work.” (1 Cor. 16:2) Kada bulan, ginapadala ini sang mga kongregasyon sa opisina sang mga Saksi ni Jehova nga nagatatap sa ila pungsod. Mahimo ka man direkta nga makapadala sing donasyon sa legal nga korporasyon nga ginagamit sang mga Saksi ni Jehova sa inyo pungsod. Para mahibaluan ang ngalan sang panguna nga legal nga korporasyon nga ginagamit sang mga Saksi ni Jehova sa inyo pungsod, palihug kontaka ang sanga talatapan sa adres nga makita sa www.jw.org. Ang mga donasyon nga mahimo mo ipadala sing direkta amo ang masunod:

DONASYON NGA WALA KONDISYON

Mga donasyon paagi sa electronic bank transfer, debit card, ukon credit card. Sa pila ka sanga talatapan, puede mo man ini mahimo paagi sa jw.org ukon iban pa nga ginagamit nga website.
Mga donasyon nga kuarta, alahas, ukon iban pa nga malahalon nga pagkabutang. Maglakip sang sulat nga nagasiling nga ang kuarta ukon pagkabutang gindonar mo nga wala kondisyon.

DONASYON NGA MAY KONDISYON

Gindonar nga kuarta nga may kondisyon nga puede ibalik kon kinahanglan sang nagdonar.
Maglakip sang sulat nga nagasiling nga ang donasyon may kondisyon.

CHARITABLE PLANNING

Magluwas sa direkta nga mga regalo nga kuarta kag malahalon nga pagkabutang, may iban pa nga paagi sang paghatag nga makabulig sa bug-os kalibutan nga hilikuton sang Ginharian. Nalista ini sa masunod nga mga parapo. Ano man nga pamaagi sa pagdonar ang imo gusto, kontaka anay ang sanga talatapan nga nagatatap sa inyo pungsod para mahibaluan kon ano nga pamaagi ang puede gamiton. Bangod lainlain ang legal nga mga pagsulundan kag kasuguan sa buhis, dapat magkonsulta anay sa kalipikado nga mga eksperto sa buhis kag kasuguan antes magpili sang pinakamaayo nga paagi sa pagdonar.

Insurance: Puede himuon ang korporasyon nga ginagamit sang mga Saksi ni Jehova nga benepisyaryo sang isa ka life insurance policy ukon sang isa ka retirement/pension plan.

Deposito sa Bangko: Mga deposito sa bangko, sertipiko sang deposito, ukon indibiduwal nga deposito sa pagretiro nga ginbuksan bilang trust account para sa korporasyon nga ginagamit sang mga Saksi ni Jehova ukon ihatag ini nga mga deposito sa korporasyon kon mapatay na ang nagdeposito, suno sa mga ginapatuman sang bangko sa inyo lugar.

Stock kag Bond: Mga stock kag bond nga ginadonar sa korporasyon nga ginagamit sang mga Saksi ni Jehova bilang regalo nga wala kondisyon ukon paagi sa nasulat nga kasugtanan nga ihatag ini sang nagdonar kon mapatay na sia.

Real Estate: Ang puede ibaligya nga real estate (balay, bilding, ukon lote) mahimo idonar sa korporasyon nga ginagamit sang mga Saksi ni Jehova bilang regalo nga wala kondisyon ukon mahimo ini ihatag sang nagdonar kon mapatay na sia. Halimbawa, kon balay ang idonar, mahimo niya ini maistaran tubtob buhi sia.

Gift Annuity: Kuarta ukon securities nga gindonar sa korporasyon nga ginagamit sang mga Saksi ni Jehova. May kondisyon ini nga magabaton ang nagdonar sing espesipiko nga kantidad kada tuig tubtob buhi sia. Ang nagdonar mahimo makabaton sang income-tax deduction sa tuig nga magasugod ang kontrata.

Testamento kag Trust: Mahimo ipapanubli sa korporasyon nga ginagamit sang mga Saksi ni Jehova ang pagkabutang ukon kuarta paagi sa isa ka legal nga testamento ukon himuon ang korporasyon nga benepisyaryo sang isa ka trust agreement. Mahimo ini magbuhin sa balayran nga buhis.

Subong ginapahangop sang termino nga “charitable planning,” ini nga sahi sang mga donasyon kinahanglan planuhon sang nagdonar. Para sa mga luyag maghatag sing pinansial nga bulig para sa bug-os kalibutan nga hilikuton sang mga Saksi ni Jehova paagi sa pila ka porma sang pagdonar, ginhimo ang brosyur nga Charitable Planning to Benefit Kingdom Service Worldwide. Ini nga brosyur, sa Ingles kag Espanyol, nagahatag sing impormasyon parte sa lainlain nga paagi sang pagdonar subong ukon sa ulihi, pareho sang pagpanubli kon mapatay ang nagdonar. Mahimo nga may mga impormasyon sa sini nga brosyur nga indi maaplikar sa imo sitwasyon bangod sang kasuguan sa buhis ukon iban pa nga kasuguan sa inyo pungsod. Paagi sini nga mga pagdonar, madamo ang nakasakdag sa aton mga hilikuton sa bug-os nga kalibutan, kag nabuhinan man ang ila ginabayaran nga buhis. Kon may ara sini nga brosyur sa inyo pungsod, mahimo ka makapangayo sa sekretaryo sang inyo kongregasyon.

Para sa dugang nga impormasyon, tan-awa ang “Maghatag sing Donasyon sa Amon Bug-os Kalibutan nga Hilikuton” sa idalom nga bahin sang umpisa nga pahina sang jw.org/hil, ukon kontaka ang sanga talatapan.