Ginapakamaayo Gid ni Jehova ang Maalwan

ANG aton Manunuga naghatag sa aton sing kadungganan paagi sa hamili nga regalo nga kahilwayan sa pagdesisyon. Luwas sini, ginapakamaayo gid niya ang mga handa sa paggamit sang ila kahilwayan sa pagdesisyon para mapauswag ang matuod nga pagsimba, kag ang mga nagahimo sang ila papel para pakabalaanon ang iya balaan nga ngalan kag suportahan ang iya dungganon nga katuyuan. Indi gusto ni Jehova nga ginatuman naton sia bangod lamang nga obligasyon naton ini. Sa baylo, ginapabaloran gid niya ang kinabubut-on nga debosyon bangod sang tudok nga gugma kag apresasyon.

Halimbawa, sang yara sa kamingawan sang Sinai ang mga Israelinhon, ginsugo sila ni Jehova nga magpatindog sing duog sang pagsimba. Nagsiling sia: “Kuha kamo sa inyo sing dolot sa GINOO; ang bisan sin-o nga may maalwan nga tagiposoon, padalha sia sing dolot sa GINOO.” (Ex. 35:5) Ang tagsa ka Israelinhon makahatag sang bisan ano nga masarangan niya, kag ang tagsa ka boluntaryo nga amot—ano man ini ukon pila ang bili—mahimo magamit sing nagakaigo para matuman ang katuyuan sang Dios. Ano ang ila reaksion?

“Ang tagsatagsa nga ang iya tagiposoon nagtandug sa iya” kag “ang tagsatagsa nga may kabubut-on sa iya espiritu” naghatag sing boluntaryo nga dulot, “nga may maalwan nga tagiposoon.” Ang mga lalaki kag babayi kinabubut-on nga nagdala sing mga butang para sa hilikuton ni Jehova: pangdekorasyon nga mga sibit, mga aritos, mga singsing, bulawan, pilak, saway, asul nga hilo, purpura nga de-lana, eskarlata nga hilo, maayo nga klase sang linen, balahibo sang kanding, linugom sa pula nga mga panit sang karnero nga lalaki, mga panit sang poka, akasya nga kahoy, malahalon nga mga bato, balsamo, kag lana. Sang ulihi, “may kasangkapan sila nga tuman na sa paghimo sang tanan nga buluhaton, kag madamu pa.”—Ex. 35:21-24, 27-29; 36:7.

Ang nakapahamuot gid kay Jehova, indi ang materyal nga mga dulot, kundi ang kaalwan sang mga nagsuporta sa putli nga pagsimba. Napahulag man sila nga ihatag ang ila tion kag kusog. ‘Ang tanan nga sampaton nga babayi nagpulon sing hilo,’ siling sang rekord. Huo, “ang tanan nga sampaton nga babayi nga ginpahulag sang ila tagipusuon, nagpulon sing balahibo sang kanding.” Luwas sini, ginhatagan ni Jehova si Bezalel sing “kaalam, paghangop, kag ihibalo sa tanan nga sahi sang buluhaton.” Ginhatagan sang Dios sanday Bezalel kag Oholiab sing ikasarang sa paghimo sang tanan nga buluhaton nga ginsugo sa ila.—Ex. 35:25, 26, 30-35, New World Translation, NW.

Sang gin-agda ni Jehova ang mga Israelinhon nga maghatag sing mga kinahanglanon, nagasalig gid sia nga “ang bisan sin-o nga may maalwan nga tagiposoon” magasuporta sa matuod nga pagsimba. Amo nga ginpakamaayo gid niya ang mga maalwan paagi sa paggiya sa ila kag paghatag sing daku nga kalipay. Gani, ginpakita ni Jehova nga kon ginapakamaayo niya ang kaalwan sang iya mga alagad, ginapat-od niya nga may bastante gid nga kinahanglanon kag mga ikasarang para matuman ang iya kabubut-on. (Sal. 34:9) Samtang kinabubut-on mo nga ginaalagad si Jehova, pat-od gid nga pakamaayuhon niya ang imo kaalwan.

MGA PAAGI SA PAGHATAG NGA GINPILI SANG IBAN PARA SA BUG-OS KALIBUTAN NGA HILIKUTON

Pareho sang tion ni apostol Pablo, madamo karon ang ‘nagapain sang bisan pila nga matipon’ ukon nagabadyet sang kuarta kag ginahulog ini sa mga kahon alamutan sang kongregasyon nga nasulatan sing “Worldwide Work.” (1 Cor. 16:2) Kada bulan, ginapadala ini sang mga kongregasyon sa sanga talatapan sang mga Saksi ni Jehova sa ila pungsod. Mahimo ka man direkta nga makapadala sing donasyon sa legal nga organisasyon nga ginagamit sang mga Saksi ni Jehova sa inyo pungsod. Para mahibaluan ang ngalan sining legal nga organisasyon, palihug kontaka ang sanga talatapan. Ang adres sang sanga talatapan makita sa www.jw.org. Ang mga donasyon nga mahimo mo ipadala sing direkta amo ang masunod:

OUTRIGHT DONATION

Mga donasyon paagi sa electronic bank transfer, debit card, ukon credit card. Posible man ini sa pila ka sanga talatapan paagi sa jw.org ukon iban pa nga ginagamit nga Web site.
Mga donasyon nga kuarta, alahas, kag iban pa nga malahalon nga pagkabutang. Maglakip sang sulat nga nagasiling nga ang kuarta ukon pagkabutang imo gindonar.

CONDITIONAL DONATION ARRANGEMENT

Gindonar nga kuarta nga may kondisyon nga puede ibalik kon kinahanglan sang nagdonar.
Maglakip sang sulat nga nagasiling nga ang donasyon may kondisyon.

CHARITABLE PLANNING

Magluwas sa direkta nga mga regalo nga kuarta kag malahalon nga pagkabutang, may iban pa nga paagi sang paghatag nga makabulig sa bug-os kalibutan nga hilikuton sang Ginharian. Ano man nga pamaagi sa pagdonar ang imo gusto, kontaka anay ang sanga talatapan para mahibaluan kon ano nga pamaagi ang puede sa inyo pungsod. Bangod lainlain ang legal nga mga pagsulundan kag kasuguan sa buhis, dapat magkonsulta anay sa mga kalipikado kag may ihibalo parte sa buhis kag legal nga mga pamaagi antes magpili sang pinakamaayo nga paagi sa pagdonar.

Insurance: Mahimo himuon ang organisasyon nga ginagamit sang mga Saksi ni Jehova nga benepisyaryo sang isa ka life insurance policy ukon sang isa ka retirement/pension plan.

Mga Deposito sa Bangko: Ang mga deposito sa bangko, sertipiko sang deposito, ukon indibiduwal nga deposito sa pagretiro mahimo ipangalan sa organisasyon nga ginagamit sang mga Saksi ni Jehova ukon ihatag sa sini nga organisasyon kon mapatay na ang nagdeposito, suno sa mga ginapatuman sang bangko sa inyo lugar.

Stock kag Bond: Ang mga stock kag bond ginadonar sa organisasyon nga ginagamit sang mga Saksi ni Jehova subong direkta nga regalo ukon paagi sa nasulat nga kasugtanan nga idonar ini kon mapatay ang tag-iya.

Real Estate: Ang mabaligya nga real estate (balay, bilding, ukon lote) mahimo idonar sa organisasyon nga ginagamit sang mga Saksi ni Jehova paagi sa direkta nga pagregalo ukon paghatag sini kon mapatay na ang tag-iya. Halimbawa kon balay ang idonar, mahimo ini maistaran sang tag-iya tubtob buhi sia.

Gift Annuity: Kuarta ukon securities nga gindonar sa organisasyon nga ginagamit sang mga Saksi ni Jehova. Ang nagdonar makabaton sing espesipiko nga kantidad kada tuig tubtob buhi sia. Ang nagdonar makabaton sang income-tax deduction sa tuig nga magasugod ang gift annuity.

Mga Testamento kag mga Trust Agreement: Mahimo ipapanubli sa organisasyon nga ginagamit sang mga Saksi ni Jehova ang pagkabutang ukon kuarta paagi sa isa ka legal nga testamento, ukon himuon ang organisasyon nga benepisyaryo sang isa ka trust agreement. Ini nga kahimusan mahimo magbuhin sang balayran nga buhis.

Subong ginapahangop sang termino nga “charitable planning,” ini nga sahi sang mga pagdonar kinahanglan planuhon sing maayo sang nagdonar. Para sa mga luyag maghatag sing pinansial nga bulig para sa bug-os kalibutan nga hilikuton sang mga Saksi ni Jehova paagi sa pila ka porma sang ginplano nga pagdonar, ginhanda ang isa ka brosyur sa Ingles kag Espanyol nga natig-uluhan Charitable Planning to Benefit Kingdom Service Worldwide. Ini nga brosyur ginhimo agod maghatag sing impormasyon tuhoy sa lainlain nga paagi sang pagdonar sa karon ukon sa tion nga mapatay ang nagdonar. Mahimo indi tanan nga impormasyon sa sini nga brosyur maaplikar sa imo sitwasyon bangod sang kasuguan sa buhis ukon iban pa nga kasuguan sa inyo pungsod. Gani pagkatapos mabasa ang brosyur, dapat mo pamangkuton ang imo abogado ukon ang mga may ihibalo parte sa buhis. Paagi sini nga pagdonar, madamo ang nakasakdag sa aton mga hilikuton sa bug-os nga kalibutan, kag nabuhinan man ang ila ginabayaran nga buhis. Kon may ara sa inyo pungsod, mahimo ka makapangabay sini nga brosyur sa sekretaryo sang inyo kongregasyon.

Para sa dugang nga impormasyon, magsulat lang ukon magtawag sa sanga talatapan sa inyo pungsod.